الخميس، أكتوبر ٢٦، ٢٠٠٦

انت تخييييييييييييييييييييييييييييييين ماينفعش تغني



زي ما باحب اقولكم عن حاجات كتير جوايا باحبها و ناس مهمين في حياتي
اسمحولي النهاردة اتكلم عن حاجة تانية
انا كنت حكيت لكم قبل كدة اني فتحت عينيا ع الدنيا مالقيتش نفسي باعرف حاجة غير اني اغني
و طبعا الغلس بتاع كل تدوينة بيقول دلوقت :
دانت صدعتنا و قرفتنا كل شوية بتغني بتغني
و ارد عليه و اقوله ربنا يخليك ابعد عني الساعة دي
المهم طبعا لان كتير منكم ماشافنيش فاماتعرفوش الحقيقة العجيبة اللي في حياتي و هي اني تخين
مش مفشول قوي بس تخين
و ده اللي باصتدم بيه جدا و باتفاجئ بيه كل ماباروح اشتري هدوم
تقولش الدنيا ما فيهاش ابدا غير مانيكانات و موديلز ولو لاقيت البياع يطلع عيني في السعر و هو بيقول الكلمة الخالدة:
معلهش يا بيه مقاسات خاصة و مش هاتلاقي في السوق
كل ده مش مهم لكن اللي باصطدم بيه بجد الكلمة اللي قرتوها في العنوان
انت تخين يابني ماينفعش واحد زيك يغني
روح خس الاول قبل ماتفكر تيجي هنا
باحس ان عماد حمدي طلع من فيلم الخطايا و غير الكلام بدل ما يقول انت لقييط بدا يقول انت تخيين اخرج من بيتي
هم اللي ماسكين صناعة المزيكا في مصر مايعرفوش ان في كل بيت و عيلة في الدنيا في واحد و اتنين و عائلات كاملة كلهم تخان
وللا خايفين يجرحوا نظر الناس بواحد تخين اللهم احفظنا زي ماكون جربان وللا عندي اعاقة او من المشوهين
و للا هو مافيش تخان بيمشوا في الشارع و بيروحوا الجامعة و بيحبوا و بياكلوا و بيدخلوا الحمام زيهم زي أي كائن حقيقي ماشي على رجليه سواء كانت اتنين و للا اربعة
و الغلس عايز يقول حاجة ّ!!!!عارف يا سيدي ان اللي عندهم اربع رجلين مابيروحوش الجامعة بس انت بتوقف الكلام عند ملحوظات رزلة زيك!!
وللا هو المفروض ان التخان يتلموا في مراكز لاصحاب الاحتياجات الخاصة و يتعمل ليهم اعادة تاهيل
انتو عارفين ان ده خلاني احب تخني و شكلي جدا و عامل اليوزر نيم بتاعي في كل حاجة كلبوز
و ازاي في الخليج يقيموا الناس على اساس انهم مطربين جامدين و موهبتهم عالية و اللي في ايديهم صناعة المزيكا في مصر بيدوروا بس ع المزز الجامدة و الشباب اللي طالع طازة من الجيم و فاتح زراير القميص للاخر
يعني لو حسين الجسمي دا كان بيدور على فرصة هنا في مصر كان زماننا اتحرمنا من مطرب عبقري بقى!!!! وللا ايه؟
على فكرة انا كمان مش بتاع اامان يا لالاللي و للا الاغاني اللي بتتقاس التايمر
لا .....انا واحد باحب اغني الاغاني اللي كل اللي في جيلي و سني بيحبوها و على فكرة اللي فوق دي صورتي انا من غير فوتو شوب والله
و كمان لكل اصحابي انا بدات اسجل كام حاجة و هانزلهم قريب جدا ع المدونة و على فكرة كمان في لحن جديد لي هايتغننى قريب جدا و استنوا اخباره في التدوينة الجاية

هناك ٦ تعليقات:

hesterua يقول...

متكبرش المشكلة يا عم الحج
وانت شفت صاحبك اللى قدك مرتين
ربنا كرمه وعمل شريط مسمع كويس
اللى جاى احسن انشاء الله
اتمنى تنزل 3 سلامات بس تسجيل البرنامج

زحل الفلكي يقول...

صباح الخير يا على الاول

ان متفقه معاك جدا في ان الغناء =صوت حلو في المقام الاول ولكنه مش الاخير
طبعا محتاج معاه كمان دماغ بتفكر وتشوف الى يليق عليها صح وو ومنهم المظهر

ابدا مش حنقول ان مظهر على لالفى بأى وصف من لى وصفته انت يا على
انت عارف انى قولتلك قبل كده ان شكلك شكل فنان .... وكمان الصور والبوووز الى بتاخده وحجات كده
لكن لو سوق الغناء عيز كده انا مضطر اعمل الى يعجب الناس ((طالما هو مش ضد مبادئي والطريقه الى حابب اكون عليها كفنان او مطرب )))

فهمتنى يا على ....... الموهبه المجميله فيك وده الاساس والى جااى حيكون شيء كمالى ولكنه جميل

بتوفيق ليك يـــــــــــا رب ومستنيين غناويك...

فوكيره يقول...

على ده ردي انا الى فووق

بس رديت بيوزر سوبر نوفا

سماح النوبه :)

بعدك على بالى يقول...

اول مرة ازورك واوهدك مش حتكون الاخيرة لانى بجدحسيت قد ايه انت صادق جدا وحساس ودى كلها مقومات للفنان الجميل واللى وما مل حينجح ويكسر الدنيا وحيفتكر الايام دى ويضحك عليها...
ربنا يوفقك ومنتظريك الاغانى علشان تقدر نحكم على موهبتك بصدق ومن غير مجاملات

تحياتى

مُزمُز يقول...

بص بقى يا عم الحاج

انت مش تخين أساسا

انت ناشر صورتك عشان عايزنا نقوللك انك وسيم وزي القمر

ماشي ياعم انت وسيم وزي القمر

أما التخن الحقيقي ده مأساة اغريقية في مجتمعنا

التخن بجد يعن اللي انت سميته الفشولة

ماشي ماشي احنا فواشيل يا عم اتريق ولا يهمك ما احنا أساسا كتخان يعني التريقة بقت جزء أساسي من حياتنا اليومية

لو عايز تعرف المأساة الحقيقية تعالالي المدونة بأقرب تاكسي يقابلك واقرا المآسي والملاحم

تحياتي

غير معرف يقول...

سيبك منهم يا على و كون نفسك