الاثنين، سبتمبر ٠٦، ٢٠١٠

كريم بغدادي........و أنغام مرة تانية






المكان...مدينة المنصورة
الزمان:شهر مارس سنة 2005
الحدث مسابقات اسبوع شباب الجامعات
عشان اللي ما يعرفش
أسبوع
شباب الجامعات هى مسابقة بتتقام كل سنتين في كل المجالات بين كل الجامعات المصرية و كالعادة كنت واحد من افراد منتخب كورال جامعة قناة السويس
و في احدى الليالي اتعرفنا على مجموعة من الشباب من اهل المنصورة موهوبين جدا و قعدنا نسمع اغاني بعض
و واحد منهم سمعنى اغنية عجبتني قوي اسمها"كل البنات"و بعدها بيومين عرفنى بشاب نحيل القامة صامت الطبع شديد التناكة
و عرفت ان الشاب الحليوة التنك يبقى المحروس اللي لحن كل البنات
و انا كالعادة جريت و سلمت و ابديت اعجابي و انبهاري و ..و ...................كان الرد شكر مقتضب ...و مش بس كدة
البرنس اتقمص من صاحبه عشان سمعنا غنوته بدون إذنه
تمر الأيام و يزورونا نفس المجموعة في بورسعيد و نتعرف اكتر و نتصاحب اكتر
و نتفاجئ ان التنك مش تنك..لا ده شخص هادى و متزن و محترم في تصرفاته ..لا و كمان ملحن موهوب قوي قوي
انا فاكر كويس مجموعة من اغانية اللي سمعتها اول مرة ..ليه يا هوى ..و عاملة حسابي و غيرهم
و بدأنا نتصاحب اكتر و بدأت مزيكته و ألحانه تتوغل فيا اكتر و اكتر..لدرجة انى فعلا بقى واحد من احلامى انى يكون عندى لحن بتوقيعه
و تتغي
ر الدنيا بينا
و انا انقل حياتي للقاهرة عشان ادور على طريقي كمطرب و ملحن
و هو ينقل حياته بردو للقاهرة كملحن موهوب قوي و مجتهد قوي
و كان من اكبر أحلامنا انا و هو اننا نقدر نسمع ألحاننا لأنغام و اننا نشتغل معانا
خلال الفترة دى صحوبيتنا بقت أقوى
و غير انه واحد من اقرب الملحنين لذوقي
و ان مزيكته هى فعلا هى الأقرب للشكل اللي بحاول اغنية
بقى واحد من اقرب الأصدقاء و الشخصيات اللى يهمنى اخد رأيه في حاجات كتير في حياتي
وواحد من ناس قليلين جدا ممكن اتقبل انتقاده ليا و ما اتضايقش لو اخدت منه كلمتين في عضمتى ثقة منى انه فعلا خايف عليا
و يمكن اكتر وصف ممكن
ينطبق ع الراجل ده انه "ابن ناس" سلوكياته و تصرفاته و كمان اسلوب تلحينه
شيك قوي و محترم قوي و ذوق قوي قوي
كريم عمل لى لحنين من اهم أغاني حياتي أصلا من كلمات صديقي الشاعر المحترم / أحمد شلبي
واحدة منهم اسمها حاجات كتير فيكي
و التانية ربنا كتبلها انها تنتشر اكتر و تتسمع اكتر و الناس يحبوها كمان و هى "ما تنفعلكش"...و في الفترة دى كريم كمان نزل ليه ألحان مع مطربين معروفين منهم لؤي و حسام حبيب و مى سليم
و تمر الأيام و افاجأ بتليفون من كريم
و أعرف منه ان فيه عمل جديد لأنغام هايكون من ألحانه....
بجد انا فرحان قويي قوي قوي ليه
و حاسس انها بداية ا
كبر و اقوى ليه
و اهو واحد فينا عملها
الف الف الف مبروك يا صااااااااااااااااااحبي

**************************************************



نيجي بقى للست اللي هاتجنني
و بجد كل يوم احترامى ليها بيزيد قوي
طبعا كلكم عارفين انا بقصد اتكلم عن الست أنغام
عايز ارجع شوية بتفكيري من كام سنة كدة لما الست دى اتمردت على كل حاجة الناس حبتها منها و على شكلها القديم غنائيا و مظهرا كمان و نزلت البوم اسمه ليه سبتها
اللي كان فيه سيدي وصاالك
انا واحد من الناس اللي اتصدموا من التغيير ده
و ما تقبلتوش بسهولة
انما فجأة لاقيتنى واحد من المنبهرين بالالبوم و اغانيه و كمان الشكل اللي هى اختارته كان شديد الجرأة و التمرد على صورة البنت ام شعر طويل اسود و بتغني الركن البعيد الهادي
باختصار واحدة قررت تشوف زمنها فيه ايه و ماتنفصلش عنه
و ها هى من جديد
مفاجأة جديدة
جرأة في اختيار الشكل
جرأة في اختيار الشكل الموسيقي الجديد
انغام بتغني على ترانس يا اخواننا
و رغم انى لسة في مرحلة باستوعب فيها الشكل و الأغانى
الا انى لا املك الا انى اعلن احترامى الشديد للتجربة
و استوعب الدرس
ان الفنان الحقيقي ما يلعبش ع اللون و الشكل اللي نجح بيه قبل كدة
لا
يغامر و يجرب و يجرب و يفاجئ جمهوره
و ده بيخليه يعيش اطول و اطول
حتى لو التجربة ما نجحتش
انما شرف التجربة في حد ذاته مكسب...و المغامرة تستاهل
و مرة تانية بقول
أنغام....شكرا قوي قوي قوي انك موجودة بيننا

السبت، أكتوبر ١٠، ٢٠٠٩

أمينة.....اخر مرة

الكلام ده انا كتبته عن جدتى "الله يرحمها"من فترة

دلوقت اسمحولى اعيده تاني...لآخر مرة


مش عارف امتى العلاقة بيني و بينها بدات تبقى بالشكل العميق ده

بس انا فتحت عينيا ع الدنيا لاقيتها حاططاني في عينيها و قافلة عليا

و وعيت وانا باقولها يا ماما و هي اللي بتاكلني و بتحكي حواديت ارتجالية عجيبة بديعة

و جنب امي الحقيقية لاقيت عندي ماما امينة

و اللي يعرفني و كل اللي حواليا عارفين قد ايه امينة هي واحدة من 3 اشخاص في الدنيا شكّلوا شخصيتي و راعوني

آآآآه نسيت اقول لكم مين امينة

امينة هي جدتي والدة ابويا

لما باقعد جنبها في لحظات الصفا تقعد تحكيلي انا يا على حبيتك قبل ماتتولد و سميتك على واحنا رايحين نقرا فاتحة ابوك على امك وانا نازلة من بيت ابوها قلت لهم خلّوا بالكم من ام علي و لما انت اتولدت اصريت ان انا ادخل مع الدكتور و اكون اول واحدة تشيلك

كنت كل ما اكبر احس بحبها العجيب جدا و الخاص جدا ليا طبعا مانا اول حفيد ليها من اولادها و اسمي على اسم جدي و احنا عايشين معاها في يبت العيلة و كنت كل ما اكبر احس بحبها

بجد حب غريب عجيب جدا

امينة طول عمرها عنيدة جدا و كنا نتخانق خناقات لذيذة جدا و في الاخر انام في حضنها و تقعد تعيّط و ترقيني

عمري ما افتكر انها نادتني باسم دلع او أي اسم غير علي زي ما يكون اسمي مقدس عندها جدا و ماينفعش اتنادى بغيره لما كبرت شوية باقيت اناديها امينة كدة حاف و هي بقت تسمحلي اني ادلعها و امينة طول عمرها ست قوية جدا انا جدي مات بدري جدا في بداية الاربعينات من عمره و شالت هي الحمل هى و اكبر اولادها اللي هو ابويا عشان كدة تحس انهم بردو علاقتهم خاصة و انهم شركا في شيل الهم قوي و كانت عجيبة جدا و هي بتعاقبني على أي حاجة اعملها وانا صغير مش ممكن كل الحب اللي بلاقيه منها يبقى بردو كل العقاب القاسي ده تعرفوا ساعات جاراتنا لما بيتعبوا من اولادهم بيقولولهم هانجيبلكو طنط امينة

العيال يستخبوا رغم انها عمرها ماكانت بتاذي حد منهم بس السيرة القوية اللي معروفة عنها و قدرتها على السيطرة على أي عدد من الاطفال مهما زاد عالية جدا

ساعات الاعبها و اقول لها هاتي نتفرج على صورك القيمة يا موني

يااااااااااه دانت كنتي مزة زي القمر

طبعا ماهي بنت بيت ناس مهمين جدا في بورسعيد و كانت دلوعة تحكيلي ازاي كانت حماتها بتعاملها بحزم و شدة و ازاي ده خلاها تبقى جدعة و قادرة تشيل هم بيتها لوحدها

تضحك و تمصمص شفايفها وتقعد تحكيلي عن جدي لما كان ياخدها مصر و يحضروا حفلة ام كلثوم و للا لما يروحوا السينما يشوفوا فيلم جديد لليليى مراد

جدك ماكانش يجيب لي الروج غير ماكس فاكتر و اضحك انا و هي

افتكر امينة لما نبقى في المصيف و هي و امي جوة المطبخ بيعملوا أي حاجة ماتتعملش ابدا في مصيف و للا و هي قاعدة تلف محشي في الشاليه

حاسس قد ايه هي شافت كتير في حياتها و ازاي حتى لما كبرت اتحملت معانا تغير ظروفنا و ظروف مرض بابا و الازمات اللي لسة بنمر بيها لغاية دلوقت امينة الايام دي مش هي

تعبانة قوي و حالتها مش حلوة

انا بردو طول عمري عارفها و هي عندها السكر و القلب

بس ولا عمري حسيت بان ده بيوقّفها عن انها تعمل أي حاجة في حياتها

و انا مش مستوعب ان ست بالقوة اللي انا اتكلمت معاكو عنها ممكن تنام كدة لا حول لها ولا قوة و تكون في حالة غريبة عليها و عليا

و انا مش مستوعب ان الست اللي بروحها شايلة حياتي و ساندة البيت ممكن تروح

لما رجعت من الحفلة دخلت عليها اودتها و هي هاتبدا تنام و قعدت ع الكرسي جنب سريرها و حطيت راسي جنبها ع المخدة اتفاجئت انها حطت ايديها على راسي و قعدت تقرالي قرآن و ترقيني

كل شوية تقوللى البيت مالوش حس لما تسافر يا على

انا بجد يا جماعة مش مستوعب ان الست اللي شايلة بروحها حياتي ممكن تروح مني فجأة

عشان خاطري طلب



ادعو لامينة بالرحمة

انا لله و انا اليه راجعون

انا


الثلاثاء، أغسطس ١٨، ٢٠٠٩

اول حوار ليا في جريدو وشوشة يا رب يعجبكم

يا كل اصحابي على هذا الكوكب و الكواكب اللي جنبه
صدر اليوم العدد الجديد من جريدة وشوشة
سيبكم بقى من الصفحة الاولى و اشي تامر و اشى حماقى و ركزا كدة جوة العدد هاتلاقوا صورتى و حوار معايا في صفحة الشباب
و اللي مش معاه اتنين جنيه يجيب الجرنال اديني باعملها معاه بجميلة و جايب له الحوار لحد عنده

الأربعاء، أغسطس ١٢، ٢٠٠٩

حفلة ايامنا الحلوة

بالنيابة عن كل اعضاء فرقة ايامنا الحلوة
بادعوكم بكرة الخميس 13/8/2009 تشرفونا في حفلتنا في المسرح المكشوف في دار الاوبرا المصرية
هاتعملوا دماغ مزيكا صح
و هاتسمعوا مجموعة من اجمد اجمد اجمد اصوات مصر
و مستحيل تلاقوا العدد ده من الاصوات الحلوة الا في ايامنا الحلوة و بس
هانستناكو
و نوعدكم انها حفلة عمركم ما هاتنسوهاااا

الاثنين، يوليو ١٣، ٢٠٠٩

امييينة...تانى

مش عارف امتى العلاقة بيني و بينها بدات تبقى بالشكل العميق ده

بس انا فتحت عينيا ع الدنيا لاقيتها حاططاني في عينيها و قافلة عليا

و وعيت وانا باقولها يا ماما و هي اللي بتاكلني و بتحكي حواديت ارتجالية عجيبة بديعة

و جنب امي الحقيقية لاقيت عندي ماما امينة

و اللي يعرفني و كل اللي حواليا عارفين قد ايه امينة هي واحدة من 3 اشخاص في الدنيا شكّلوا شخصيتي و راعوني

آآآآه نسيت اقول لكم مين امينة

امينة هي جدتي والدة ابويا

لما باقعد جنبها في لحظات الصفا تقعد تحكيلي انا يا على حبيتك قبل ماتتولد و سميتك على واحنا رايحين نقرا فاتحة ابوك على امك وانا نازلة من بيت ابوها قلت لهم خلّوا بالكم من ام علي و لما انت اتولدت اصريت ان انا ادخل مع الدكتور و اكون اول واحدة تشيلك

كنت كل ما اكبر احس بحبها العجيب جدا و الخاص جدا ليا طبعا مانا اول حفيد ليها من اولادها و اسمي على اسم جدي و احنا عايشين معاها في يبت العيلة و كنت كل ما اكبر احس بحبها

بجد حب غريب عجيب جدا

امينة طول عمرها عنيدة جدا و كنا نتخانق خناقات لذيذة جدا و في الاخر انام في حضنها و تقعد تعيّط و ترقيني

عمري ما افتكر انها نادتني باسم دلع او أي اسم غير علي زي ما يكون اسمي مقدس عندها جدا و ماينفعش اتنادى بغيره لما كبرت شوية باقيت اناديها امينة كدة حاف و هي بقت تسمحلي اني ادلعها و امينة طول عمرها ست قوية جدا انا جدي مات بدري جدا في بداية الاربعينات من عمره و شالت هي الحمل هى و اكبر اولادها اللي هو ابويا عشان كدة تحس انهم بردو علاقتهم خاصة و انهم شركا في شيل الهم قوي و كانت عجيبة جدا و هي بتعاقبني على أي حاجة اعملها وانا صغير مش ممكن كل الحب اللي بلاقيه منها يبقى بردو كل العقاب القاسي ده تعرفوا ساعات جاراتنا لما بيتعبوا من اولادهم بيقولولهم هانجيبلكو طنط امينة

العيال يستخبوا رغم انها عمرها ماكانت بتاذي حد منهم بس السيرة القوية اللي معروفة عنها و قدرتها على السيطرة على أي عدد من الاطفال مهما زاد عالية جدا

ساعات الاعبها و اقول لها هاتي نتفرج على صورك القيمة يا موني

يااااااااااه دانت كنتي مزة زي القمر

طبعا ماهي بنت بيت ناس مهمين جدا في بورسعيد و كانت دلوعة تحكيلي ازاي كانت حماتها بتعاملها بحزم و شدة و ازاي ده خلاها تبقى جدعة و قادرة تشيل هم بيتها لوحدها

تضحك و تمصمص شفايفها وتقعد تحكيلي عن جدي لما كان ياخدها مصر و يحضروا حفلة ام كلثوم و للا لما يروحوا السينما يشوفوا فيلم جديد لليليى مراد

جدك ماكانش يجيب لي الروج غير ماكس فاكتر و اضحك انا و هي

افتكر امينة لما نبقى في المصيف و هي و امي جوة المطبخ بيعملوا أي حاجة ماتتعملش ابدا في مصيف و للا و هي قاعدة تلف محشي في الشاليه

حاسس قد ايه هي شافت كتير في حياتها و ازاي حتى لما كبرت اتحملت معانا تغير ظروفنا و ظروف مرض بابا و الازمات اللي لسة بنمر بيها لغاية دلوقت امينة الايام دي مش هي

تعبانة قوي و حالتها مش حلوة

انا بردو طول عمري عارفها و هي عندها السكر و القلب

بس ولا عمري حسيت بان ده بيوقّفها عن انها تعمل أي حاجة في حياتها

و انا مش مستوعب ان ست بالقوة اللي انا اتكلمت معاكو عنها ممكن تنام كدة لا حول لها ولا قوة و تكون في حالة غريبة عليها و عليا

و انا مش مستوعب ان الست اللي بروحها شايلة حياتي و ساندة البيت ممكن تروح

لما رجعت من الحفلة دخلت عليها اودتها و هي هاتبدا تنام و قعدت ع الكرسي جنب سريرها و حطيت راسي جنبها ع المخدة اتفاجئت انها حطت ايديها على راسي و قعدت تقرالي قرآن و ترقيني

كل شوية تقوللى البيت مالوش حس لما تسافر يا على

انا بجد يا جماعة مش مستوعب ان الست اللي شايلة بروحها حياتي ممكن تروح مني فجأة

عشان خاطري طلب

ادعو لامينة

الأربعاء، يونيو ٢٤، ٢٠٠٩

يومك حرية

يا كل اصحابي على هذا الكوكب و الكواكب اللي حواليه
ان شاء الله بكرة"الخميس25-6-2009"
هاكون ضيف برنامج يومك حرية
على راديو حريتنا
مع صديقي الجامد جدا صبري سراج
ده لينك الراديو

www.horytna.net

و مستني تليفوناتكم ع الرقم ده

27950706


و ده نص الاعلان اللي كتبه صبري عن الحلقة



انتظروا المطرب الجميل علي الألفي
يوم الخميس من 1 ظهرافي يومك حرية
مع صبري سراج
حلقة جامدة جدا مليانة غناءوفرفشة
هتسمعوا صوت جميل وطرب حقيقي
هنتكلم مع علي في أغانيه وحياته
وفي المزيكا عموماوهنسمع غناء كتيييير
مستنيينكم رقم تليفوننا 27950706
وإيميلنا infohorytna@yahoo.com

الثلاثاء، يونيو ١٦، ٢٠٠٩

اول اغنية تنزل ليا

يااااااااااااااااااااااااااااااااااااااااااااااااه
ازيكم
ده يعني لو لسة حد بيدخل هنا
او بيقرا اي حاجة
انا بس حبيت امسي ع البيت ده
تصدقوا بجد قشعرت لما فتحت بلوجر
جزء كبير و مهم من ذكرياتي
و من التحول الجذري في حياتي عشته ع الصفحة دى
يبقى لازم نقول اخر الاخبار
صدرت بحمد لله تعالى اول اغنية سينجل ليا
اسمها مش لازم
كلماتى و الحانى
و توزيع شريف محسن
تسجيل و ميكس باهر الحريري
اشوفكم بكل خير
ده لو حد دخل و قرا هنا