الخميس، نوفمبر ٢٩، ٢٠٠٧

يوم ليك و يوم عليك


ممكن اللي هاكتبه ما يهمش حد من اللي هايقرا

بس هو ايه من اللي كتبته قبل كدة كان يهم اي حد

و مع ذلك الناس قرت و تفاعلت و ردت

المهم

امبارح كان الذكرى الرابعة لوفاة ذكرى

شوفتوا ازاى

اكيد بالنسبة لكتير من الناس ماهواش حدث اساسا

لكنى عشان يمكن لوحدى الايام دى و بتهف عليا حاجات غريبة قوي

بافكر في حاجات ماتخصش حد و يمكن ماتخصنيش انا كمان

بس ده يخصني

سنة 1996طلع شريط لوحدة صوتها تخين و غريب شوية بالنسبالي اسمها ذكرى

كانت رفيعة قوي قوي

و قالوا انها البنت الجديدة اللي هانى مهنى جايبها يضرب بيها سميرة سعيد

و كنوع من الطفاسة الموسيقية اشتريت الشريط

و انبهرت باللي سمعته

اولا بالنسبة لسني في الفترة دي ماكانش ممكن افهم قوي ايه مواطن الجمال في الصوت ده

لكنى كان شاددنى قوي

و باكبر حبة حبة

و كان انتاجها القليل من الاغانى المصرية بيوصلني

و ماضيعتش البوم ليها ما اشتريتهوش

و بقيت اكبر و افهم الصوت ده اكتر و اكتر و كان عندى احساس ان الست دى كان لازم تبقى واحدة من اهم اهم مطربات الدنيا لولا ان الانتاج بيمشي بالعكس في بلدنا

و مشاكل احتكار و مش احتكار و حاجات دى و لكن كان انتاجها من الاغانى الخليجية موجود و بردو بيوصلنى

و كنت انا و اصحابي بنتسابق ع اللي يعرف اغنية جديدة لحد احنا بنحبه

و على مدار مشوارها في مصر من 1995 لغاية الحادثة في28-11-2003

ماعملتش غير 4 البومات مصرية و هم

وحياتي عندى

الاسامى

يانا

يوم عليك

تخيلوا انى اكتشفت ذكرى بجد بعد الحادثة

و بقيت اسمع الاغانى كانى باسمعها لاول مرة في حياتي

اقفل على نفسي قزاز العربية و اعلي الكاسيت و اتامل

ايه ده

سبحان الله في خلقه

اولا تحكمها في صوتها مش طبيعي و الخامة اللا منطقية اساسا

غناها الشرقي بافترا و غربي بحرفنة

و في النهاية كانت النهاية تكون بالشكل المأساوي ده

مفاجأة موت بخمسة و عشرين رصاصة

و الاكتر ان فيه كتير قرروا انهم يقتلوها تانى و تالت بعد ما ماتت

اللي يشكك في سلوكها و اللي يشكك في دينها و اللي يفترى عليها

المهم

انا حاطط ع البلوج دلوقت واحدة من افظع اغانى ذكرى

عارف

اسمعوها و قولوا رأيكم
و ادعولها بالرحمة

ــــــــــــــــــــــــــــــــــــــــــــــــــــــــــــــــــــــــــــــــ

بعد مرور اقل من شهر على حفلتنا اللي فاتت

عندى حفلة ياجدعان

اه و الله

عندنا حفلة مع فرقة ايامنا الحلوة ان شاء الله يوم الخميس الجاي6-12-2007في فرع ساقية الصاوي التاني

new generation

المكان بعيد قوي

و مش عارف اعزم الناس و هاييجوا ازاى

بس انا عرفت ان الساقية عاملة اوتوبسات هاتاخد الناس من قدام سلينترو نادى الشمس للحفلة و ترجعهم

اللي يقدر ييجي ينورني

ـــــــــــــــــــــــــــــــــــــــــــــــــــــــــــــــــــــــــــــــــ

من اهم الاقوال المأثورة اللي حاببها الايام دى تعليقا على موضوع الست اللي سابت كرسي البرلمان بناء على رغبة عريسها



قول يا سي حنفى قول...دي حتى السياسة اسهل من شوربة الكوارع

الجمعة، نوفمبر ٢٣، ٢٠٠٧

ياللا نبقى وحوش

على طريقة خطبة التاميم اتوجه الى جيران الهنا اخواننا سكان القاهرة و اقول
اخوانى سكان القاهرة
تحية طيبة و بعد
يشرفتنى و بعد فترة ليست باليسيرة في بلدكم ال....ماشي ياسيدي نقول الموقرة
يشرفنى انى اقول ليكو
فلتفقدوا ادميتكم
فلتفقدوا ادميتكم و لن يلوم عليكم لائم
مادامت هى دى مواصلاتكم و هو ده الطريق الوحيد للوصول لبيوتكو بعد يوم عمل غير ادمى
يبقى ياللا
واحد
اتنين
تلاتة
ياللا نبقى وحوش
ياللا نرمى اي ضعيف او ست مش قادرة برة الميكروباص
ياللا نستسلم لتحكمات سائق المينيباص و التباع او الكمسارى اللي معاه
ياللا نستحمل اننا كل واحد يقف على رجل واحدة لان مفيش مكان يحط فيه رجله التانية
ياللا ما نعترضش لو كنا و اقفين ع الباب و متشعلقين و نلاقي السواق بيقف يركب زيادة علينا
عشان لو احنا لا سمح الله اجرمنا و اعترضنا هايقول كلمة واحدة
اللي مش عاجبه يبقى يركب تاكسي
ما تقرفونيش
و ياللا نتحمل انهم يقطعوا كل خط لتلاتة او اربع خطوط
يعني الهرم يبقى بدل جيزة مشعل او رماية
يبقى جيزة طالبية عريش مشعل
و هكذا
حسبي الله و نعم الوكيل
عمار يا بورسعيد
ـــــــــــــــــــــــــــــــــــــــــــــــــــ



لا زلت اعيش مرحلة نجاح الحفلة
اللهم لك الحمد و الشكر
بجد الحفلة دي تعتبر نقلة مهمة ليا و خطوة حلوة قوي
الحضور كان اكبر بكتير من عد الكراسي و كان ناس كتير واقفين
و الحمد لله كل فقرات الحفلة نجحت نجاح عالى جدا
عقبال الباقي
و نتقابل دايما
ـــــــــــــــــــــــــــــــــــــــــــــــــــــــــــ





شادي اتجوز يا جدعااااااااان
يمكن ماجاتش فرصة اتكلم عنه كتير
بس خصوصية العلاقة و الصحوبية بيني و بينه كانت اكبر من الكلام
شادي شوقى عوض
هو ده اسم صديقي الانتيم
اتعرفنا ببعض في تالتة اعدادى و ما اتقابلناش بعدها لحد ما دخلنا الكلية
و اتصاحبت انا و هو في تالت سنة في الكلية
و استمرت الصحوبية بيننا لحد دلوقت
تقريبا شادي هو و احمد عيسى الوحيدين من الكلية اللي لسة ليا علاقة بيهم
اتخانقنا بالهبل
لكننا كنا فعلا بنحترم تفكير بعض جدا و كنا قريبين من بعض جدا
و عمر ما كان فرق الديانة بيني و بينه سبب للافتراق
و كانت فترة تحضير مشروع التخرج من اصعب واغرب لحظات حياتنا


كنا دايما جنب بعض في لحظات صعبة قوي


لدرجة انى ساعات كنت مسميه صديق اللحظات السودة






شادي اتجوز
و كان المفروض انى مش هعرف احضر الفرح لانه كان يوم اربع يعني مفيش بعده اجازات


يعني بعد كل اللحظات السودة اللي شوفناها سوا كان ممكن ما احضرش يوم حلو زي ده
بس ربنا سهل كل حاجة و بقيت انا عامل زي ام العروسة باهرج و اغنى و ارقص و ملينا القاعة تهريج
الفرح كان حلو قوي و كل حد موجد فيه كان فرحان من قلبه






مبروك يا شوووووووووووووو

السبت، نوفمبر ١٧، ٢٠٠٧

كان عندى حفلة امبارح

الحمد لله رب العالمين انا نجحت امبارح قوي و عديت مرحلة كنت حاسس انى ممكن ما ارجعش اغنى فيها تانى
و بجد
ماكنتش قادر احكي لحد اللي انا كنت فيه و ازاى مريت بمرحلة فقدان توازن و فقدان ثقة
المهم كانت الحفلة امبارح اكتر من رائعة
ما اخبيش عليكو كنت مرعوب جدا و انا باغني بين الوحوش دول
كل و احد فيهم اجمد من التاني
و قولت انا بالكتير اصحابي اللي هاييجوا هم اللي هايصفقوا و خلاص
الحمد لله ربنا اكرمنى اخر كرم و ما كنتش قادر اقف على رجليا ممن كتر الفرحة بعد الاغنية
الحمد لله
ـــــــــــــــــــــــــــــــــــــــــــــــــــــــــــــــــــــــــــــــــ
على جنب كدة
احساس رهيب بالذنب تجاه كل واحد جالى الحفلة انى ما قدرتش اقعد معاهم و ارحب بيهم صح
بمعنى
انا امبارح جالي وينكي و سراء النيل و طارق و شادي و اليانت و غيرهم من المدونين
و جالى من بورسعيد شريك الاحلام احمد شلبي و انتيمي اللدود احمد عيسى
و جالى من الفيوم صديقي المطرب الرهيب محمود
ده غير اصدقائي من القاهرة و اولهم لطفي
و غيرهم و غيرهم
و ده خلانى عشان محدش يزعل منى
افضل الف عليهم شلة شلة عشان اقعد معاهم
و في الاخر اكيد ما عرفتش اقعد مع و لا واحد منهم صح و اكيد ناس منهم اتضايقوا
بس اكيد هم هايقدروا
على فكرة عندى تفاصيل كتيييييرة محوشها للبوست الجاى
كل حفلة و انتم طيبين

الأحد، نوفمبر ٠٤، ٢٠٠٧

فيديو اعلان حفلتنا

اقول لكم على حاجة بيني و بينكم

يمكن مش كل الناس عارفين انا ليه حاسس ان الحفلة دى مهمة جدا في حياتي

هاقول لكم و خليها بيني و بينكم

انا بقالي هنا في القاهرة حوالى ستة شهور و ما حصلش تقريبا فيهم اي خطوة ايجابية في طريقي

و خصوصا بعد ماسيبت فرقتى الاولى ستيب باي ستيب

حاسس ان وجودى مع الفرقة دى بقى مسالة اثبات وجودى

بقت مسالة اثبات ان انا لسة مطرب حد حابب يسمعه

و لان حفلاتى بقت قليلة جدا جدا الحفلة دى بقت اهم و اهم بالنسبالي

مستنيكم كلكم تكونوا معايا اليوم ده

و للحديث بقية