الاثنين، أغسطس ٢٧، ٢٠٠٧

و من تانى الله عليك يا عم احمد يا بتاع زمان


زمان قالوا ان اصدق الشعر اكذبه

لكنى تعودت معه على الاختلاف

تعودت منه ان يكتبني

لا ان يكتب عنى بل يكتبني

و يكتب ناس تانية

يترجمنا ع الورق

و يجعل منا قصائد يعجب بيها كل الناس

وحدهم ابطالها هم الذين يعرفوها بشكل اخر

و يتذوقوها ليس كالاخرين

المهم يا اخواننا

امرة دى كتب عن حد اعرفه كما اعرف نفسي

شفاف

ممكن ان تقرا كل ما بداخله

ووقع في تجربة

كتاها احمد كما حدثت

بلا زيادة و لا نقصان

و لكن بمنتهى الابداع




متنفعلكش
كلمة وقالوهالى فى كل مكان
مفيش انسان شافنى معاها
الا نادانى وقاللى انساها
متنفعلكش
انت برئ...ولسه رقيق
وقلبك ورده بتفتح
وهى سنين...دموع وأنين
من قلب لقلب تتفسح
متنفعلكش
مصدقتش...مدققتش
مشيت وياها موقفتش
لحد ما جه عليا الدور
وهنت عليها مصعبتش
قالولى كلام وهتقولوا
وميت واحد قالتهولوا
عايشة الحب بتجرب
وعمر فى يوم ما هتطولوا
قالولى بس تنساها
وابعد لحظة تلقاها
فى ثانية عايشة حب جديد
وواحد تانى وياها
مصدقتش ..مدققتش
مشيت وياها موقفتش
لحد ما جه عليا الدور
وهنت عليها مصعبتش
أحمد


بجد الله عليك يا عم احمد يا بتاع زمان و الان و كل وقت



و استنوا لحنها قريب و هاتسمعوها ان شاء الله

الجمعة، أغسطس ١٧، ٢٠٠٧

هوامش

انا حاسس انها بقت ماسخة قوي فكرة انى كل شوية باكتب كذا بوست مجمع في بعض
بس بجد اعذروني نظرا لصعوبة الحصول على جهاز بسهولة
المهم ياللا بينا


نعرف و نؤمن و نصدق و نشهد بانه لا اله الا الله وحده لا شريك له و ان سيدنا محمد عبد الله و رسوله
لكن من اجمل نعم الله عندما يبعث لك رب العالمين برسالة
عندما يبرز دلائل قدرته
و هو لا يحتاجنا و نحن المحتاجين
لكنه يحبنا
و خلقنا لنعبده
اتكلم هنا عن تجربة مررت بيها من فترة مش بعيدة
مش عارف احكيها ازاي
لكنى عرفت معاني ايات الله اكثر عندما رايتها بعيني
" و من يتق الله يجعل له مخرجا"
طبعا معظمكم عاش معايا فترة الاكتئاب و النكد اللي كنت عاملهالكو
عرفت السبب بس متاخر
و لاقيت العلاج كمان
ياا جماعة و الله ربنا كبير قوي و من يتقيه يلاقيه
و نتيجة لكل ده ربنا عمل لى حاجة حلوة قوي في حياتي هانتكلم عنها بعدين
.......................................................
يبدو اننا خذلناها
البت دايما عاملة الواجب و زيادة و عاملة اللي عليها معانا كلنا
و يوم ما احتاجتنا ما لاقيتناش جنبها
ايوة باتكلم عن وينكي
قولنا ان عندها مسرحية يوم الخميس
انا شخصيا ظروف قهرية منعتني من الحضور
و اعتذرت لها من بدري
و كنت فاكر ان غيري كتير رايح
لكنى صدمت لما استقبلت منها كوممينت بتقول فيه الكلام ده
شكرا لكل من قال نعم
وشكرا لكل من قال لأ
شكرا للى اعتذروا من قبل ما تبتدى المسرحيه
لكن اللى عشمونى انهم ييجوا وماجوش
انا زعلانه بجد .
ماعلش يا وينكي
سامحينا
....................................................

ما كنتش عارف اني هاقع في الحب كدة بسرعة
كنت معزوم في فرح صديق ليا
و فجاة طلت علينا
كنت محذر نفسي و عامل حسابي ان كل واحد بيقرب من النار طمعا في نورها بيتلسع من نارها
لكنى زى المنوم مغناطيسيا قربت
و واحدة واحدة لاقيتني باتسحب و باتشد ليها
ايه ده
هو فيه كدة فعلا؟
انا مش مصدق الضحكة اللي ممكن تاكل بعقل قارة بحالها حلاوة
و للا الشياكة
و للا العسل الل دايب في الصوت و الطلة و الصورة
اكيد مافيش حاجة تيجي كدة
و مش عارف ايه اللي حصل لي لما جت عينها في عيني
و غمزت
انا فرفرت
و نسيت اللي حواليا
و روحت في عينيها لدنيا تانية
و فجاة رمت لي وردة
مش قادر احدد ايه اللي كنت فيه
و من ساعتها و انا دايب و مافيش على لسانى غير الكلمتين دول
انا باحبها قوي
انا دايب فيها
يخرب جمالك يا نانسي
نانسي عجرم يا اخوانناااااااااااااااااااااااااااااااااااااااااااااااااااااااا
......................................................
شوية جد
الفقرات دي من بوست رائع كتبه صديقي اللدود احمد عيسى عن واحد كان معروف انه عبيط الدرسة
و نفسه يبقى حاجة
لانها عارف و متاكد من جواه انه ولا حاجة
و دلوقت بقى حاجة
بس حاجة و سخة

وانا في اولي اعدادي كان معايا واحد كان مهزئة الفصل
امعة وملوش شخصية من الشخصيات الباهته اللزجة اللي لما كنا نحب نضحك كنا بنوقفه ونقوله غني يا حجازي
وكان بيغني اغنية السد العالي ويقلد عبد الحليم حافظ

كبر حجازي وسمعت انه بقي شاعر..عادي
كبر وسمعت انه في حركة كفاية...عادي جدا
كبر وسمعت انه مسيحي من وهو عنده 16 سنة لأن السيد المسيح جاله في رؤيا في المنام وده خلاه يدرس المسيحية واللاهوت واقتنع تمام الاقتناع ان المسيحية هي الدين الصح وان الاسلام يدعو للارهاب وبيغرس جوه المسلمين الخوف والرعب من العذاب عشان كدة بيتعبدو غصب عنهم مش حبا في العبادة
اه انا بتكلم عن محمد حجازي اللي رافع قضية علي الدولة عشان يشهر مسيحيته هو ومراته وابنه
كان صاحبي وزميل دراسة
ومن معرفتي بيه غاوي شهرة وامعة وملوش شخصية ومش من النوع اللي له موقف اساسا في اي حاجة
بالضبط عامل زي عادل امام في شاهد مشفش حاجة..نفس الطريقة ونفس الطباع
.................................................
اكيد شايفين حجم تفاهة التفكير...تفاهة كومبو حجم عائلي مش كدة؟؟؟؟؟؟؟؟
معتقدش ان الاسلام خسر كتير لما محمد حجازي ارتد عنه واعلن انه مسيحي
ومعتقدش ان حد مصدق المسلسل البايخ اللي بيقوله

اللي يسيب دينه عشان مش مقتنع بيه سهل يخون بلده عشان مش مقتنع بالنظام سهل يرمي مراته لو حد اقنعه بست تانية وسهل يرمي ولاده عشان مش مقتنع بيهم
ومش محمد حجازي اللي يستاهل الضجة دي
ـــــــــــــــــــــــــــــــــــــــــــــــــــــــــــــــــــــــــــــــ
الى هنا انتهى كلام احمد عيسى
و انا كمان عندى تجربة مع هذا الشئ اللي كان نفسه يبقى شئ
و بقى شئفعلا
بس شئ حقير
مش عشان غير دينه و للا ساب ديني
لان بصراحة ديني كسبان لما يتخلص من زبالات مكتوب في بطاقتها انها منتمية ليه
لكن انه عشان يتعرف برة مجال الناس اللي حواليه و بيشتغلوه يعمل الفيلم الاهبل ده هو و الهبل اللي بيطبلوله
يبقى.........و حطوا انتو مكان النقط كل عبارات الاحتجاجات المصرية القبيحة

الاثنين، أغسطس ١٣، ٢٠٠٧

خبر عاجل طحن


اهو جه الوقت

اختنا و صاحبتنا و البنوتة اللي ليها واجب في كل بيت

قصدي بلوج

وينكي العجيبة

عندها مسرحية يوم الخميس في الساقية

و احنا لازم نروح نقف جنبها و نهيص لها

و الحاضر يعلم الغايب

انا عن نفسي رايح

و امانة عليكم اللي يلحق يقرا قبل الخميس يحط لها اعلان عنده

و هانتقابل كلنا هناك ان شاء الله

الأربعاء، أغسطس ٠٨، ٢٠٠٧

ايامنا الحلوة تااااااني




بعد صباح القشطة على كل الناس الطيبة اللي مالهومش في اللعب القذر و لا ليهم في الاذية


و لا ليهم في قذف الناس بما قد يدمرهم


احب اقوللكم انى زى الفل


و مش بس كدة


انا جايبلكم خبر حلو


فرقة ايامنا الحلوة عندهم حفلة جامدة جدا في مسرح البالون ان شاء الله يوم الجمعة الجاية الساعة 8مساءا


انا مش هاغنى في الحفلة دى


و لا حتى اللحن بتاعى هايتغني


لكن الناس دول فرقة جامدة


و ناس من جواهم حلو قوى زى غناهم


ياللا نتجمع و نسمع


و انا عرفت من محمد عثمان مايسترو الفرقة


انهم في الحفلة دى


كل واحد فيهم هايغني احلى غنوة غناها قبل كدة


يعني بالصلاة ع النبي حفلة البيست اوف


و ان شاء الله نتقابل هناك

السبت، أغسطس ٠٤، ٢٠٠٧

و قررت ان اكتب بوست


لاني ماكتبتش بجد من فترة

و لانى قاعد قدام جهازى

و لانى عايز ارغى

و لانى حاسس ان دماغي مليانة حاجات كتير زحمة مش فاهمها

و بقت عاملة زي سوق التجارى اخر ايام رمضان

زحمة زحمة

انا قدامى كام ساعة و مسافر و هاسيب بيتنا

مش عايز اسافر

عندى شغل بكرة

و احمد عاصم كلمنى و قاللي عندنا بكرة لقاء في قناة النيل و ماعرفش انهى واحدة فيهم

اهو لقاء ع الهوا و السلام

برنامج قالولى اسمه شباب ع الهوا

روحت من شوية حجزت التذكرة

و باحضر الشنطة انا و امى

و ماشي

كانت اجازة حلوة

و للا يمكن لا

هو انا قابلت ناس كتير

بس ما قابلتش كل اللي كنت عايز اشوفهم

بس فرحان لان في حاجة حصلت

اختى روزاليا عاملة مهرجان حلو قوي قوي اسمه برة الدايرة

هو مهرجان تنمية بشرية بيكلم الناس عن انهم ممكن يتغيروا و يخرجوا برة دايرة حاجات كتير سلبية راميين نفسهم فيها

و انا المفروض كنت هاقدم فقرة فيه

غنا و كلام

يعني تفاصيل بس مرئية مش مقروءة

باتكلم و باغنى و باقول اللي في نفسي بس في اطار الموضوع

و لانى ما كنتش هقدر اروح المهرجان

وصلنا لاقتراح عبقرى

انا سجلت امبار فقرتى كلها فيديو

غنيت و اتكلمت

عملت رسالة حلوة انا راضي عنها

و يا رب تعجب اللي هايحضروا

و اهو رغم انى مش موجود بس هابقى معاهم

روزا

ربنا معاكي

ياللا خير

مش عارف

انا كان نفسي اتفك مع حد

و اديني اتكلمت معاكم

على فكرة الصورة اللي فوق اخدها العبقري وليد منتصر لمعديات بورفؤاد

تعرفوا

انا كنت باكره المعدية دي جدا جدا

خصوصا انها كانت اجباري عليا و انا رايح الكلية كل يوم

بس دلوقت انا بجد باموت فيها هى و حاجات كتير افتقدتها

ياللا تانى

اكيد هاتتظبط

بالله عليكم لو حد عرف يشوفنى بكرة ع التليفيزيون يسجلها