الاثنين، ديسمبر 29، 2008

مفاجأة جامدة جدا احلى كلام اتكتب عنى

مفاجأة قوة جدا لاقت ع الفيس بوك صديقة بتهنيني ع اللي انكتب عنىو شوية و لا قيت احمد شلبي بيقوللى ان واحد صاحبه قرا كلام عنى جريت اشترى المجلة اللي قالولى مكتوب فيها"الاذاعة و التليفيزون"و قعدت انا و كونسولتو من اصحابي ندور فهامالقيتش حاجةلغاية ما تبرعت الصديقة نشوى حسين و كتبتلى النص كاملاحاجة تشرح القلبو الاحلى ان الكاتبه انسان و كاتب من اكتر الناس اللي باقدرهم و باحترمهم في حياتيو باعشق اسلوبه بجدرغم اننا ما اتقابلناش غير مرات قليلة و من زمان قويتصدقوا انى حبيت نفس من جمال اللي اتكتب عنىههههههههالمهم اسيبكم مع كلام طارق امام عنى على الألفى.. <بورسعيدى> رايح جاى!-عندما تسأله: "ليه بتغنى؟" سيجيبك بمرح: "بجرب صوتى فى حاجة غير الكلام!" .. وعندما تستفسر عن طموحاته سيقول لك ببساطة "إنى افضل أغنى"على الألفى صوت شاب يعتز بأغانى التراث التى يتغنى بها فى فرقة(أيامنا الحلوة) ويبحث عن أغان خاصة لكن بشروط يقول عنها "لابد ان تكون أغنيات حقيقية لا أحب غناء التيك آواى وجعلنى غنائى للأغنيات القديمة أكشف سر عبقريتها وخلودها وهو انها "معمولة بضمير" فيها جهد تلمحه فى كل كلمة وكل جملة موسيقية ربما لن تصدقنى إن قلت لك إننى مع كل أغنية قديمة أغنيها أكتشف مرة بعد أخرى مناطق جمال فيها لم أكن أكتشفها من قبل حتى شعرت بأننى -وأنا مازلت فى السادسة والعشرين من عمرى- انتمى لزمن قديم وعريق!.قدر اعتزازه بالأغانى القديمة يعتز على ب"بورسعيد" مسقط رأسه ويقول"بورسعيد عشقى الكبير حتى الغنا له طعم تانى هناك اتعودت أتمشى ع البحر وأدندن فى الهوا.."ويكمل: أيضا أنا مسكون ب"السمسمية" وأغانيها تربيت عليها.. تنفستها مع الهواء.. وإلى جانب ذلك، مازلت حتى هذه اللحظة أذهب للصيادين.. وأطلب منهم الغناء.. وأقوم بتسجيل أغانيهم التى كادت تندثر خاصة أن الأجيال الجديدة لم تعد تهتم بهذا اللون من الغناء.. وأتمنى أن أتمكن من إحياء أنماط الغناء المحلية ومزجها بالتقنيات الحديثة لأقدم لونا غنائيا يعكس خصوصيتى.عندما سألته عن الهندسة مجال دراسته، قال: هو مجال أحبه.. ولكنه ليس طموحى فالغناء هو شغلى الشاغل.. وأمنح وقتى كله له.. وعندما طلبت منه أن يحدثنى عن تجربته مع "أيامنا الحلوة" اتسعت ابتسامته، وقال: هذا الفريق هو أسرتى الفنية الحقيقية.. إنه يحقق لى حالة "ونس" جميلة ومختلفة.. وأجمل ما فيه أن كل أعضائه "كورال" وكلهم "نجوم" فى نفس الوقت.. فكل منا يغنى وحده.. ثم يعود للكورال ليتقدم آخر للغناء.. هذا هو المعنى الحقيقى للفريق.. وهو بالفعل يمثل بالنسبة لى "أيامى الحلوة"!

السبت، ديسمبر 06، 2008

أصائيص

انا اسف يا اخواننا ما كتبتش هنا من زمااااااااااااان قوي
و ده خلاني اجمع ليكو سوية قصاقيص عدت عليا و احكيهالكو



استرجل

عنوان جملة اعلانية لكشروب شعير غير كحولى
يعني بالمفتشر اللي مابيشربش المدعوق ده يبقى"....."و انتو فاهمين بقى
ايه اللي بيجرالنا ده


....................................
في حفل عائلي بهيج
احتفلت اسرة فرقة ايامنا الحلوة بالنجاح الباهر للحفلة الاخيرة
و طبعا نظرا لغيابي من زمان عن المدونة
ف ده خلانى ما احكيلكوش عنها
الحمد لله
الحفلة نجحت قوي قوي قوي
و بشكل اكبر بكتير من اى تقعات
و الى الامام يا رب

...................................

العيد فرحة و اجمل فرحة
يا رب يكون كدة السنة دى فعلا

................................

ملاحطتى الايام دى
اختفاء التدوين و المدونين
و انهيار ظاهرة المدونات
قدام الوحش العبقري الفيس بوك

................................

طبعا كمية اخطاء املائية بالهبل هاتلاقوها نظرا لمحاولتى كتابة البوست ده سريعا قبل ما البرنامج بتاع السيبر يقفل الوقت
المهم

كل سنة و انتو طيبين

الاثنين، ديسمبر 01، 2008

ولانه احمد شلبي

شريك احلامى بدا يحقق حلمه
باختصار
يوم انا شخصيا استنيته كتير قوي
كتير منكم قرا له
و كتير منكم سمع اشعاره بصوتى او بصوت سلمى
دلوقت ممكن تقروا و تمتلكوا نسخة من الديوان و صدقونى
هاتحتفظوا بيها زى اى حاجة غالية قوى عندكم
كلام بسيط قوى
من جوة جوة جوة االقلب
و بيدخل دوغرى ع القلوب
مبروك
الف مبروك
النهاردة صدر الديوان الاول للشاعر و الصديق احمد شلبي
تخيلوا اسمه ايه
اسمه على اسم اهم انية عملتها انا و احمد و اللى عملت لينا شهرة قوية في وسط المدونين


اللى انكسر يتطوح

الاثنين، نوفمبر 17، 2008

محتاج ناس تنفض معايا

عارفين لما تيجي عليك فترة ما تتدخل بيت و تدخل تلاقي تراب و عناكب و مواضيع

هو ده بالظبط اللي حاسس بيه اول ما فتحت المدونة

لامؤاخذة يعني

ابوريا طول عمره يقوللى
"بيت المهمل يتخرب قبل بيت الظالم"
صدقته دلوقت
وحشتني مدونتى
_
______________________________________________
عندى حفلة يا جدعاااااااااااااااان

حكايات بالعبيط هاتتحكى
و اخبار
منها الحلو و منها الوحش
بس دلوقت الاولوية للخبر ده
عندى حفلة يا جدعااااااااااااااااااااااااااااااااااااااااااااان


اشوفكم ان شاء الله في حفلتى مع فرقة ايامنا الحلوة يوم الجمعة
21-11-2008
الساعة 8
قاعة الحكمة في الساقية
و هناك هانتصالح
صدقونى

الاثنين، أكتوبر 13، 2008

اول حوار اذاعى ليا.....عايزكم تصيتونى

بعد صباح الفل على احلى و اجمل اصحاب في الدنيا
امبارح سجلت اول حوار اذاعى في حياتي
كانت تجربة حلوة قويو نفسي كلكم تسمعوها و تقولولى رأيكم
عايز اقول لكم ان فيه كذا مفاجأة في الحوار يا رب يعجبوكم
هو في محطة اذاعة جديدة ع النت اسمها كام راديو
و اللينك بتاع الراديو اهو
الحلقة هاتتذاع يوم الاربعاء 15-10-2008الساعة 9 مساء
و فيه تواصل من خلال االموقع انكم تقدروا تبعتوا رسايل تقولوا رد فعلكم و تعليقاتكم ع الحلقة
و انا هاكون يومها في المحطة و ان شاء الله هاتكون حلقة تانية لايف عشان نقرا رسايلكم و نرد عليها كمان
مستنيكم تصيتووووووونيييييييييييييييييييييي

الثلاثاء، سبتمبر 30، 2008

اهلا اهلا بالعيد

كل سنة و انتو طيبين و زى الفل و منورين حياة كل اللى حواليكم

الثلاثاء، سبتمبر 16، 2008

شوية لينكات عشان الحبايب

كل سنة و انتم طيبين
و بمناسبة انى بقالي كتير قوي قوي قوي قوي ما سيبتش لينكات هنا
ادي يا اخواننا شوية لينكات لووووووووووووووز
اسمعوا و ادعولى
خبر عاجل
عرض قهوة سادة مستمر في رمضان حتى يوم 25

الاثنين، سبتمبر 01، 2008

رمضان جانا...اهلا رمضان

مش عارف ايه سر ارتباط رمضان بالتدوين عندى
اول مرة دونت كان في رمضان
باحن لكل حاجة حلوة حصلت في رمضان ايام ما كنت في بورسعيد
و باحاول اتعالج من اثار ذكريات مؤلمة حصلت في رمضان اللى فات و انتو عشتوها معايا
المهم
رمضان كريم
كل سنة و انتو طيبين
ياااااااااااااااااااااااااااااااااااااااااا رب
تقبل منا اعمالنا و اهدينا لكل شئ يرضيك يا رب

الأحد، أغسطس 24، 2008

سوزان تميم

من كام سنة كدة لفت نظرى مطربة كان صوتها مميز جدا جدا جدا
و كانت اغانيها كمان حلوة
و فجأة اختفت
و فجأة اخبار عن قضايا
و أخبار عن جواز و طلاق
و فجأة خبر قتلها بشكل بشع جدا
و كلام عن رجال اعمال مصريين و عرب
و كالعادة لانها فنانة يظهر الف واحد وواحد ينهشوا فيها و هي ميتة و يسيئوا ليها
المهم انها دلوقت في دار الحق
و عند ارحم الراحمين
هاسيبكم دلوقت مع اغنية من اروع اغانيها لبيروت ايام الحرب
عشاق و القصة دمعة


السبت، أغسطس 23، 2008

يا دبلة الخطوبة






لانى شايف ان صور الخطوبة دي شئ شخصي جدا



و لان فيها ناس كتير لو فكرى استأذن كل واحد فيهم انى انزل صورته مش هاخلص



و لانى بردو لازم احتفل معاكم



اهى دى صور جديدة اتصورتها بمناسية خطوبتي



و عقبال عندكم

السبت، أغسطس 02، 2008

الحدق يفهم

وصلت....................................؟؟
عقبالكم كلكم

السبت، يونيو 21، 2008

وجوه باقابلها ,,,وحاجات تانية

و كأنه نسي ان الله قد اوقف الوحي منذ ان بعث سيدنا محمد"صلى الله عليه و سلم"رسولا
و كانه قد قرر ان يكون من الذين لا ينطقون عن الهوى
اتكلم عن من يظن نفسه مثاليا لايخطئ
اتعجب عندما اراه ينظر بإعجاب شديد لنفسه و هو يفعل اي شئ
انه لا ينصح احدا كيف يتصرف
بل يقوم بأشياء امام اعين مرؤوسيه و هو متأكد كل التأكد انه في مدرسة الحياة قد اصبح عالما و بروفيسير
مجرد ان تكون معه فأنت في نعيم علم الحياة
مجرد ان تكون بجواره فهو شرف قد منحك الله اياه و يجب ان تظل شاكرا الله على هذه النعمة
و كيف لا يفعل هذا
و نظرات الانبهار الزائف و الاندهاش المستمر الكاذب من مرؤوسيه تلاحقه اينما غدا او جاء
انا لن استغرب لو وجدتهم واقفين على باب الحمام ينتظرون انتهاء سيادته من قضاء حاجته
و كانهم يريدون ان يروا مهارته في عمل البي بي
و كانه سوف يخرج جواهر و احجار كريمة بدلا من الكاكا
مقرف انا؟؟؟
معلش اصلي هاطرشق
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
بدون مقدمات
الم رهيب في كل جسمي
بقع حمراء منتشرة
أكلان و كانى بقيت جربان
و المضحك انى كنت بايت عند واحد صاحبي
سخونية ترتفع و تنخفض بدون مبرر
تليفون امى في الصباح
احكيلها ما امر به
لم هدومك و تعالى يا على
دي اعراض حصبة
انزل بورسعيد ليؤكد دكتور الحميات ما قالته امى
اجازة و عزل بالمنزل 15 يوم
تليفون من مديري
انت معندكش رصيد مرضي يكفيك
انت موظف مؤقت و اللي هاتغيبه هايتخصم من مرتبك
كل هذا يتراص في ذهنى و انا اعد حقيبتي منتظرا سفري خلال يومين
كان نفسي اتفسح في بورسعيد
ما عرفتش
ما بين المرض
و بين انشغال اصدقائي باعمالهم
ما عرفتش اعمل اى حاجة
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
نفسي اغنى قوي
وحشتني الحفلات
ووحشني شكل الناس و هم بيبصولى و منتظرين هاقول ايه
وحشني صوتى قوي

الأربعاء، يونيو 11، 2008

شوية كدة

أولا انا عرفت خبر مهم
عرض قهوة سادة مستمر لحد ااااخر شهر يونيو
الحقوا احضروه
--------------------------------------------------------------------------
جميل جدا انك يكون عندك هدف
و انك تبذل كل مجهودك في سبيل تحقيقه
كنت في الاوبرا
و جوايا رغبة اكيدة في الحصول على ما اريده
استغليت وجود صديق ليا ساكن في الدقي و مشيت معاه لحد ميدن المساحة في يوم من اشد ايام الدنيا حرارة و في الاخرر فوجئت بنظرة التشفى في وجه البائع و هو بيقول
اسف
المكنة عطلانة
معندناش
تخيلوا
لكن انا لم ايأس
اخدت ميكروباص الجيزة
و تقدروا تتخيلوا الانجاز العبقري في اننا وقفنا بس في اشارة شارع مراد 3/4 ساعة بس
المهم
ما يئستش
ركبت مكروباص من الهرم
و لا تنتهى الحكاية
ييعطل المكروياظ في محطة المساحة بردو
لاحظوا الصدفة في مساحة الدقي و مساحة الهرم
المهم
ركبت مكروباص تانى
و لمزيد من الاثارة يكون راكب معانا احد الغلابة اللي ربنا رحمه من التفكير في هم الدنيا و فقد عقله
و ما سابش حد في المكروباص ما بربرش عليه او تفتف او انعم عليه بأي حاجة مقرفة
و اخيرا
وصلت كايرو مول
و واحدة واحدة بدأت اقرب جدا
و دخلت
و طلبت
و لاقيت
انا يا جماعة باعشق الميلك شيك بتاع ماكدونالدز
و قربت افلس لانى كل يوم تقريبا باطخ مشوار جامد بسببه
و مش عارف اشمعنى يعني
-----------------------------------------------------------------------------------
يا جماعة عايز اخد رايكم في حاجة
انا بافكر فعلا انى اعمل حفلة لوحدى
انا مستمر فعلا مع ايامنا الحلوة
بس عايز اجرب
تفتكروا ايه بقى؟

الثلاثاء، يونيو 03، 2008

قهوة سادة...الضحك حتى البكاء



لازم تحضروه


لازم تعيشوا تجربته


لازم تشوفوا ازاى ممكن الضحك يكون مؤلم اكتر من البكاء


قهوة سادة هو عرض ورشة التمثيل و الارتجال في مركو الابداع اللي في الاوبرا


مش عارف احكي عنه


يمكن لانى حضرته ليلتين ورا بعض


و لسة لحد دلوقت حاسس انى عايز اشوفه تانى


قهور سادة ع اللغة و اللي حصل فيها


قهوة سادة ع الفن اللي بوظوه بالفلوس و خللوا كل حاجة ناطقة بالخليجية


قهوة سادة على صلة الرحم اللي ممكن تخلي واحد يموت و ريحته تطلع و محدش يحس بيه


قهوة سادة ع الفتاوى اللي بقت في بق اللى يفهم و اللي مايفهمش لحد ما طلعت فتوى ارضاع الكبار


قهوة سادة على الموهوبين اللي مش لاقيين فرصة في ظل سيطرة الشللية و الجهل في سوق الفن


قهوة سادة ع البنت اللي عاشت تتمنى فستان الفرح لحد ما شابت و عجزت و ما شافتهوش


قهوة سادة ع الشباب اللي ضاقت بيهم و رموا نفسهم في حضن البحربيدوروا على رزقهم لحد ما بلعهم البحر




تخيلوا كل ده و انت بتضحك و مسخسخ من الضحك


العيال دي جامدة قوي


و الف الف الف تحية للمخرج خالد جلال ع العرض ده


العرض شغال كل يوم في مسرح مركز الابداع في الاوبرا


الدخول مجانى


بس لازم تلحقوا لان التذاكر بتخلص فورا الساعة سبعة و تلت


اوعوا يفوتكواااااا


بس اول ما تخرج هاتفكر كتير قوي في كل حاجة




الجمعة، مايو 23، 2008

هابي بيرث داى تو ميييييي

كل سنة و انا طيب
برغم كل حاجة سخيفة عكننت عليا
و برغم ان اليوم ده 20-5-2008 عمرى ما هانساه ابدا ابدا
كان من اسوأ خمس أيام في حياتي
و يومها بس اكتشفت ان انا فعلا انسان وهمى
كائن يعيش و يتفاعل على كوكب الفيس بوك
انما في الحقيقة
مش موجوووووووووووووووووود
تخيلوا انك تلاقي نفسك الوحيد مع نفسك و عايز تعمل حاجة لنفسك تبسط بيها نفسك
ماتلاقيش
قررت انى اعمل لنفسي عيد ميلاد
روحت اتصورت عند سمير و ميزو
روحت اشتريت لنفسي عدسات نظر
قولت اجربها من نفسي
و جاء اليوم الموعود
بافتح الفيس بوك لاقيت مظاهرة تهانى حارة ع الوول "الحيطة"بتاعتى
قولت خير ياواد
شكلك هاتقضي عيد ميلاد اسطورى
و لكن
فسسسسسسسسسسسسس
صوت رياح في صحرا
او حتى ده كمان مش موجود
هششششششششششششششششششش
ابص للتليفون
هششششششششش
تخيلوا ان ناس من اللي كنت فاكرهم قريبين استخسروا رسالة موبايل من ام 20قرش و كتبوا ع الفيس بوك
روحت متصل بواحد صاحبي
و قعدت عنده في البيت يومها اعمل ولا حاجة
و عادى يعني
و يومها جيت البس العدسات اتقطعت واحدة منهم
و يومها التليفيزيون كان هايقع من ايدي و كرشه طلع لبرة
عادي يعني
كان يوم ما باحبش افتكره
بس قولت احكيه
كل سنة و انا طيب
على فكرة الصور مكسرة الدنيا ع الفيس بوك
ههههههههههههههههههههههههههههههههههههههههه

الاثنين، مايو 05، 2008

حفلة جديدة يا جدعاااااااااااااااان



حفلة جديدة يا جدعااااااااااااااااااااااااااااااااااااااان


يا كل اصحابي على هذا الكوكب و الكواكب اللي جنبه


عندي ان شاء الله حفلة مع فرقة أيامنا الحلوة يوم الجمعة الجايية 9-5-2008


و هاغني غنوة حلوة قوي


و صعبة قوي


مستنيكو كلكم تنوروني يومها


الجمعة، مايو 02، 2008

من النهاردة مفيش خرابة.....انا ال.....لا...مفيش خرابة و خلاص

ايوة
و بأعلى صوت
ماعادش فيه خرابة
نفس الحالة
قعدت و فتحت الداش بورد
و قولت هاكتب
و مش عارف اكتب
و المدونة هاتفضل خرابة
لكن لا
ما عادش ينفع
معلش
هرتلة مع النفس
لكن و الله ربنا بيصلحها
وحشني الرغي هنا
ووحشني انى اقعد احكى اللى بيحصل لي
بس ياللا
نحتفل بإعادة فتح مدونة تفاصيل علي الالفي
انا كويس الحمد لله
سيبت شغلي اللي كان مخليني مضغوط قوي كدة
و فضلت في شغلي بتاع الصبح بس
و باحاول اتفرغ للغنا شوية
ادعولى
ملحوظة مهمة جدا

شكرا جدا لكل اللى دخلوا المدونة و انا مش فيها
شكرا جدا لكل اللي سألوا عليا
و اللي ما سألوش كمان
عدنا
و انتظروا الرغى كله قريبا

الجمعة، أبريل 11، 2008

بدون الدخول لأى تفاصيل

بدون الدخول في أي تفاصيل
بجد مش عارف اتكلم
مش عارف اكتب
رغم ان حصل لى حاجات كتير الفترة اللي فاتت
و كلها تستاهل انى اتكلم عنها
بس مش عارف اكتب فعلا
حاسس ان المدونة بقت خرابة
و ده من فترة
بس دي مش أول مرة
انا ياما بعدت و رجعت تانى
شكلي عامل زى الفنانين اللي بيمضواو اوتوجرافات و بيقولوا استنونى
انا عارف ان فيه رجعة قوية جدا جدا
أملى في ربنا كبير قوي
و بجد
ادعوووووووووووووووووووووووولى

الجمعة، مارس 21، 2008

كلاكيت تانى مرة ....كل سنة و انتو طيبين يا امى

كل سنة و انتو يا امى طيبييييييييين
على فكرة اللي انتو قريتوه مش خطأ املائي و للا هبل لغوى
لاانا قاصد جدا
انا على فكرة فتحت عينيا ع الدنيا دي لاقيت لي اتنين ام
اه
انا لاقيت امى اللي ولدتنى و ربنا بعتهالى تنور لي دنيتي و اخدت منها اجمل احساس في الدنيا و اللي محبب الاناس في غنايا
و امى التانية اللي هي في الاصل جدتي ام ابويا
لكن طول عمرى ما اعرفش غير انها امى و بتحبني حب عجيب جداانا اول حفيد ليها و هى سمتني على من قبل ما اتولد و باحس بحبها محاااااوطني و جوايا
نيجي بقى لحاجة تانية
يا كل الناس بجد كل واحد قرا كلامى يجري يقول لامه كل سنة وانت طيبة و يبوس ايديها و دماغهاربنا ما يحرمش حد من اللي ليه
ابدا
دا احنا من غيرهم و الله ولا حاجة
البوست ده نزلته من سنة
و لانى في حالة مش مخلياني قادر اكتب كويس
حبيت اقول لهم تانى
كل سنة و هم و انتم طيبيييييييييييين

الجمعة، مارس 14، 2008

ع السمسمية

يا اخوانناا

انا لو قعدت اشكركم من هنا لبكرة على اللي عملتوه معايا في الحفلة

مش هعرف و الله

و عشان كدة هدية منى لكل اللي حضروا الحفلة و حبوا الاغنية

و اللي ما قدروش يحضروها

فيديو ع السمسمية

يا رب يعجبكم

اعتذار

انا يسرية....يسرية اللي ليها ف كل بيت واجب
و عايزة الواجب ده يترد ليا فيك النهاردة
.
كلام جامد وي قالته هند صري في فيلم احلى الاوقات
عارفين فكرتني بمين
بواحدة اسمها مروة
بس احنا عارفين انها اسمها وينكى
البنت دى لها واجب في كل مدونةو و عند كل مدون
انا شخصيا مديون ليها باكتر من واجب عملته ليا في كذا حفلة ليا
دعاية و اعلانات و حضور زغاريط و و و و
بس مش عارف اردهولها خالص
و النهاردة كان المفروض اون عندها في حفلتها في الاقية
و حصل اللي حصل و زى ما كنت متوقع
جالى شغل مفاجئ خلانى مش هاروح
و مش هاتصل بيها اعتذر
لانى حبيت اعتذر ليها عالملأ هنا
انا اسف يا وينكى

الأربعاء، فبراير 27، 2008

عندى حفلة يا جدعان و تانى مرة صحافة







فاكرين الكلمة دي



مش لاقي كلمة تانية اقولها وانا باعمل اعلانى عنها



عندى حفلة



بس المرة دى بجد حفلة مهمة قوي قوي قوي قوي قوي عندى



يمكن هى تاني حفلة ليا مع ايامنا الحلوة



و بعد النجاح اللي فات معاهم خايف جدا من الحفلة دى



و يمكن كمان لانها اول حفلة ليهم في المسرح الكبير في الساقية؟



و يمكن عشان الاغنية اللي هاغنيها المرة دى



بجد مفاجأة لكل اللي سمعنى قبل كدة



و محدش في الدنيا هايقدر يتوقع انا هاغنى ايه



الكل دايما بيحطني في منطقة غنائية من الاتنين دول



يا اما الواد الرومانسي الي بيغنى دراما او حاجة هادية



يا اما الواد اللي بيغني شرقي و يعمل له كام عربة و خلاص



انما المرة دى تحدي جامد ليا



اغنية بعيدة تماما عن اى حاجة انتو سمعتوها منى ع الاطلاق



محتاج اشوفكم جنبي يومها






ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ



تانى مرة صحافة



صديقي الصحفي الجميل اللي نشر عنى الخبر اللي فات فاجئني مفاجأة حلوة و هى نشر نفس الخبر في جريدة المسائية



لا و إيه في الصفحة الفنية و كمان معاه صورة



بجد انا فرحان جدا



حتى لو خطوات صغيرة قوي كدة



مسيرنا نكبر و نبقى ع الاغلفة

الخميس، فبراير 21، 2008

أول مرة صحافة




اول خبر ينزل عنى في حياتى

على فكرة معظم اللي في الخبر ده حقيقي

لكن موضوع التصوير ده للأسف توقف و غالبا اتلغى

مش عارف بقى

المهم انا فرحان بالخبر

اى نعم هو خبر صغير قوى في صفحة مش متشافة و من غير صورة

انما اهو

عقبال يا رب ما ابقى ما ابقى على الغلاف


و عشان الخبر ما يبقاش ناقص
اهو ده لينك اغنية ماشيين بالعكس بصوت سلمى صباحي
يا رب يعجبكم

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


على فكرة انا لسة مستنيكم تنوروا حفلتى ان شاء الله يوم السبت 23/2 في مسرح الجمهورية مع فرقة ارابيسك


ايه


محدش قال جاي



السبت، فبراير 16، 2008

معلش...انا مقصر معاك




اسخف كلمة اسمعها مرارا و تكرارا من من يقابلني بعد وفاة عمى من اسبوع


معلش يا علي


"انا مقصر معاك"


لا يا شيخ؟؟


التمست العذر لكل من كان لايعرف


او من كان يعتقد بوجودى في القاهرة الفترة دى


لكن كل اللى كانوا عارفين انى في بورسعيد


و ماكلفوش خاطرهم انهم يجولى او حتى يتكلموا بالتليفون يعزونى


و فجاة يلاقونى ع الماسنجر او في الشارع صدفة


"البقاء لله يا على...معلش انا مقصر///مقصرة معاك قوي"


مش عارف التمس لحد فيهم عذر


واهو كدة بقى




ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ




ممكن اقوللكم كلمة بايخة؟؟؟؟


معلش انا مقصر معاكم




اه و الله


رغم ان الكلام اللى جوايا كتير


و كنت هافرقع


لكنى لاقيته اسود من اللازم


و حسيت انى نكدت عليكم بما فيه الكفاية


و لأن كل اللي فات كان كئيب قوي قوي قوي


قررت انى اسكت


و اهو لما اتصورت حبيت اشارككم فيها


مش باقول لكم


معلش انا مقصر معاكم




ــــــــــــــــــــــــــــــــــــــــــــــــــــــــــــــــــــــــــــــــــــــــــ




حاجة تانيى مهمة لازم اقولها


ياللا استعدوا


واحد


.


.


.


.


.


اتنين


.


.


.


.


.


.


تلاااااااااااااااااااااااااااااااااااااااااااااااااتة




عندى حفلة يا جدعااااااااااااااااااااااااااااااااااااااااااااااااااااااااااااااااااااااااااان




اه و الله


عندى حفلة مهمة جدا جدا جدا جدا جدا جدا جدا جدا جدا جدا جدا جدا جدا جدا ليا


مع فرقة اسمها ارابيسك


مجموعة شباب من كلية تربية موسيقية


و كلهم موهوبين قوي


لا و ايه


دى اول حفلة ليا مع دار الاوبرا


هى اى نعم مش في المسرح الكبير


لكنها في مكان احلى


الحفلة هاتكون يوم السبت الجاى 23-2-2008


في مسرح الجمهورية في وسط البلد


بجد هاستناكووووووووووووووووووووووووووو


ملحوظة كمان


انا حاطط ع الجنب فلاير للحفلة


طلب شخصي من كل واحد حابب انه يساعدنى


يا ريت يحطه هو كمان في مدونته


نفسي اشوفكم كلكم جنبي يومها






الأحد، يناير 27، 2008

صورى الجديدة

اعتذارا منى على انى وريتكم الصور اللي فاتت متاخر
انا اهو باكتب لكم من ستوديو المصور سمير عز
و لسة مستلم الصور حالا و اول حد يشوفها انتو

الأحد، يناير 13، 2008

يوووووووووووه هو انا نسيت ده كمان


السلام عليكم يا اخواتى و حبايبي و اللي مستحملين اكتئابي المتزايد
اكتشف اكتشاف منيل بستين نيلة

هو انى في خضم"حلوة خضم دى"الايام اللي فاتت

نسيت افرجكم ع الصور الجديدة بتاعتى

و اعتذارا عما بدر منى
اهى الصور اهى

و معاها لينك جديد



و الصور اهى





دول اللي قدرت انزلهم دلوقت

اسمعوا و اتفرجوا و قولوا رايكم

الثلاثاء، يناير 08، 2008

عن الذين يظهرون و لا يختفون

و كانه قاعد معايا
رغم انه في بلد و انا في بلد تانية
لكنى لو انا اللي كاتب البوست ده
عمرى ا هاقدر اوصف اللي جوايا بالدقة دى و لا بالروعة دى
لكنه كعادته
هو قال لي
بلاش تقرا البوست الاخير عندى .....
رغم انه ما يعرفش اللي انا فيه هنا
لكنى اتهروت و قريت
و اديني بمنتهى البساطة
اخدت البوست بتاعه و حطيته عندى

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انهم عديدون...كثيرون..يملئون حياتك الصاخبه فيزيدوها صخبا...تسير بك حياتك كقطار مسرع تحاول جاهدا ان تكون علي متنه..هم من وجدوا في حياتك بشكل ما كي يعيقوك عن اللحاق بذلك القطار...لست بتلك الاهمية في حياتهم..دعك من المزاح..انت محور حياتهم..كل منهم يستيقظ من نومه فزعا ان تكون قد استيقظت قبله فمرت تلك الدقائق من حياتك في هدوء بدونه..كل منهم يفكر كيف يحيل حياتك جحيما
ربما تسأل نفسك كيف اقتحم حياتك...كيف ادخل نفسه في ذلك المحيط الضيق الذي تتحرك فيه ...ربما تسأل نفسك اين وكيف ومتي..لماذا وماذا...ضحكة..سلام..ربما كلمتين وعنوان!!...انهم عديدون..كثيرون ..يملأون حياتك الصاخبة فيزيدوها صخبا..ربما كان رئيسك في العمل..ربما كان زميل دراسة..ماذا عن تلك الفتاة التي احببتها في صمت وظل حبها يؤرقك ..تسير في الطرقات بعد كل تلك السنين فلا تنسي كيف مرت بجوارك يوما ما فخفق قلبك ولم تع ماذا تفعل..؟..ماذا عن ذلك الفتي البدين الذي كان يوسعك ضربا في المدرسة؟؟..وبائع الخبز العجوز الذي كان ينهرك عندما تتأخر في جمع الخبز الساخن في تلك الحقيبة البلاستيكية..كيف كنت طفلا تخجل من البكاء حين يوبخك مدرسك لانك لم تذاكر درس الامس...وتلتمع عيناك غضبا حين يعنفك ابيك امام اصدقائه فلم تستطع الرد
انهم عديدون..كثيرون...يملئون حياتك الصاخبة فيزيدوها صخبا...ربما تظل طيلة حياتك كالذبابة تتخبط في شباكهم..ربما كان احدهم بجوارك الان وانت تقرأ هذه السطور ..تفكر ماذنب هذا العالم اذا ماتحول الي موقد كبير بعد ان تتحقق امنيتك بأن يحترق كل من اساء اليك..كل كلمة..ابتسامة سخرية..تتمني لو اختفت من ذاكرتك وحياتك للابد ومعها يختفي اثر اولئك الذين دخلوا حياتك دون ارادتك..عاثوا داخلك فسادا...اصبحت اطلالا خربة كمدينة ابان الحرب تلملم اشلاءها وجراحها علي امل بأن تضج بالحياة من جديد
انهم عديدون...كثيرون...يملأون حياتك الصاخبة فيزيدوها صخبا..وكلما هدأت يزيدوها صخبا..وكلما دفنت ما فعلوه في اعمق اعماق اعماقك تجد مالابد وان يوقظه..وكلما حاولت ان تنسي تجد تلك المرارة مازالت بداخلك...تدرك ان الصخب الذي يحيطك انما ينبع من داخلك...ترتفع حدة الصراع بينك و..وبينك...ترفع راسك لتأخذ نفسا عميقا...تحاول ان تكمل حياتك وان تلحق بقطارك...تعدو تعدو حتي تنقطع انفاسك...فقط لتجد ان هناك الكثير ممن تقابلهم كل يوم يحاولون جاهدين الا تلحق بذلك القطار الذي لا ينتظر احدا...كل منهم انت محور حياته..يفكر في كل لحظة كيف يحيل حياتك جحيما
تظل تتمني ان يختفي هؤلاء جميعا ...فلا يختفون
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الى هنا ينتهى كلامه
و لكن انا كمان ليا كلمة
لما تكون قاعد في ضلمة شديدة
و فجاة تنور لك شمعة
صغيرة قوي
و ضعيفة قوي
بتفرح قوي قوي بيها
و بتتخيل ان هى دى كل املك و نورك
كمان لما تكون في وحدة شديدة
و يظهر لك حد
تتخيل ان هو ده الاقرب منك
و ان ده اللي تقدر تحكى معاه
بتبقى فرحان جدا جدا جدا بيه
و بتبقى حتى لو اظهرت فرحتك او لا
متخيل حاجات كتير جدا جدا جدا جدا ممكن تحصل في حياتك بوجود هذا الشخص
و فجاة
بخ
رااااااااااحييييييييييييييييييييييييييت
و تبقى عامل زى عبد الحليم في اغنية بلاش العتاب لما عملوا الدنيا شبورة و ضلمة من حواليه
و تتخبط و تتالم
و ترجع تانى تقع في نفس الغلطة مع حد تانى من الذين يظهرون في حياتك و لا يختفون
هو فعلا بيختفوا من حياتك
لكنهم كجرح موجود لايختفون ابدا
شكرا جدا جدا جدا لاحمد عيسى

الثلاثاء، يناير 01، 2008

كل سنة و انتو طيبين و منورين الدنا

جه العيد و ماقولتهاش
و جت راس السنة و ماقولتهاش
و جت مناسبات للكلام و ماتكلمتش
و جاى عيد الميلاد المجيد عند اخواتنا المسيحيين
و جاية راس السنة الهجرية
و مش عارف جاية ايه كمان
و قصاد ده كله
كان لازم اخرج من الحالة اللى مش فاهمها و اللى مخليانى مش عارف اكتب حاجة
بس عشان اقول لكم
كل سنة و انتم طيبين و منورين الدنيا