الأحد، ديسمبر ٠٩، ٢٠٠٧

عندما تختصر شهور من عمرك في شريط كاسيت



انترو جيتار هادئ بيتسحب للودان و تدخل بعيه موسيقى ماتعرفش توصل منين للقلب و وراها انغام
كل مانقرب لبعض..كل مايزيد الاشتياق
اغنية سهلة صعبة
و هى شغالة ع الاف ام لاقيتني بيرجع ليا شريط حياتي لمدة ست شهور
من يوم ما سيبت بورسعيد و قررت انى انقل عمرى لبلد تانية انا فيها لوحدى
كان دايما نزل شريط انغام و انا في بورسعيد حدث مهم باستناه
لكن المرة دى كانت الاحداث كتير قوي ورا بعضها



تصدقوا انى رجعت لى كل لحظة مرت بيا خصوصا لما طلبت من صاحبي اللي كنت معاه في عربيته انه يشغل الشريط


يووووووووووووووووووه





كل ما نقرب










اول ما باسمع الاغنية بافتكر وانا مرمى في السكن بتاع الشغل اللي كان بعيييييييييييييييد عن الحياة و قاعد اترجى الواد بتاع وصلة الدش انه يشغل لى قناة روتانا عشان اتفرج ع الكليب



ما اتكلمتش معاكم عن الفترة دى كتير



يمكن لانى كنت وقتها مش مبسوط لدرجة انى ما باتكلمش اساسا بس اللي اقدر اقولهولكم انى كنت معزول عن الحياة




من شغلي للبيت



علما ان شغلي تحت البيت



و كنت لو حبيت اتهور و انزل نت كنت باقطع حوالى اربعين كيلو عشان اقعد ساعة و ارجع اتلقح في اوتوبيس المستعمرة"هى اسمها كدة"مستني انه يطلع



عارفين اوتوبيس المستعمرة ده شكله ايه؟



فاكرين لما نجاة الصغيرة كانت في فيلم طالعين رحلة و بتغني عاليادليا"الا هو يعني ايه عاليادليا؟"كانت راكبة اوتوبيس



اهو بتاع الشغل ده الاوتوبيس الاقدم منه



اوتوبيس ابو بوز كبير من قدام







مابتعلمش






مش عارف ليه كنت متضايق من الغنوة دى يوم ماسمعتها و كنت حاسس ان الموزع عامل فيها مزيكا مش قد حلاوة كلامها و لحنها



و لانى عشت هنا حاجة شبه كلام الاغنية دى



يمكن مش بالتفاصيل العاطفية الرهيبة هنا في الاغنية



و لانها تجربة سخيفة ما باحبش افتكرها



لكنها حصلت لى هنا في القاهرة





قولت ادينا نتكلم سوا و الملخص



ما تحاولش تجرى ورا صاحب هو مابيعتبركش صاحبه



و لا تحاول تدخل في وسط انت عارف انه ممكن ما تكونش واحد منهم



انتهى










هاتمناله الخير




حد فاكر البوست اللي انا كتبته عن الاغنية دي


انغام هانم غنت الاغنية دي قبل ما تنزل الشريط بحوالى خمس شهور في حفلة


وقتها كان واحد قريب منى قوي قوي في حياتي و صديق عزيز عليا قوي بيمر بتجربة سخيفة و انا كمان جت رجلى فيها


صاحبنا ده كان مرتبط ببنت و انفصلوا


لحد كدة و مفيش حاجة


انما بعد ما انفصلوا اتفاجئنا كلنا بالبنت ى هى وواحدة صاحبتها ماليين الدنيا حكايات عجيبة عنه و عمالين يشوهوا صورته قدام طوب الارض و هاتك يا تقطيع في الواد


مش بس هو لا و كل اصحابه و انا كمان كنت واحد منهم


فاتفاجئت لما سمعت الاغنية دي


هاتمناله الخير و هى بتتكلم عن حبيبين انفصلوا لككنها ما بتتمناش ليه غير كل خير لانه كان في يوم حبيبها و لانه كان يوم سبب في مداواتها حتى ولو ككان جارحها


فاكرين البوست ده






الامل




اول ما بسمعها بافتكر يوم واحدة من خناقاتي الكتيييييييييييييير مع مديري هنا في الشغل


يومها كان مجرجرنى معاه في مشوار في قرية في الفيوم على مسافة كبيرة من العمار


و كنت متفق معاه انى هامشي من المامورية بدرى لظروف عندى


و اتفقنا و سافرنا


و هناك عمل زى الافلام العربي القديمة


لما كمال الشناوي استغل براءة و طيبة و هطل شادية و اخدها معاه و مارضيش يسيبها


انا لازم امشي يا باشمهندس دلوقت انا اتاخرت


مانتاش ماشي الا لما نخلص شغلنا


شغل ايه يا باشمهندس ما انت قاعد تطفح اهو و شوية الشاي جاي لك و مفيش شغل


انت حر عايز تمشي اتفضل


بس مش هخلى السواق يوصلك في اي حتة


و انا عملت شملول و سيبته و وقفت في الصحرا اوقف اي معزة شاردة او جمل سفينة الصحراءاو حتى توك توك الصحراء


لغاية الحمد لله ما وصلت من الفيوم للقاهرة"اللي هم جنب بعض"في اربع ساعات و يا محاسن الصدف كان معايا الام بي ثري و سمعت الغنوة دى


اى نعم انا ما كنتش حابب كلماتها


بس ذكرياتها معايا عاشت قوي






باغير




الاغنية دى مش عارف اللي بيسحبني فيها ايه


يمكن لانى باحب قوي احساس البنوتة اللي بتغير بمناسبة و من غير مناسبة بس من غير ما تكون خنقة للي بتحبه


و يمكن لانى مفتقد انى الاقي حد احس انه بيحبني قوي كدة و متمسك بيا و بيغير عليا بالطريقة دى؟


يمكن






اهو ده اللي عندى




بتقول تعبتك ...اديني سيبتك...يا رب بس تكون مرتاح


باقل راحتك...خلاص براحتك...في ناس تحب تعيش في جراح


وجودى جنبك...ماكانش عاجبك...و عشان تحس بقيمتى مشيت


...دور عليا ...او حن ليا ...و ابقى افتكر انت اللي بديت


و اهو ده اللي عندى


و عيش في بعدي


قلبي عمل كل اللي عليه




مش لاقي حاجة احلى من الكلام ده اوصفه بيها


اصله حقيقي قوي






ما باحبش حد يشوف اى دموع في عنيه




مش عارف اذكر موقف من مواااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااقف كتير حسيت فيها بالاغنية دي


انا هنا مريت بمواقف لو كانت في وقت تاني غير اللي انا فيه


او في ظروف تانية


كان ممكن زمانى دلوقت مشلول


لكنى قررت انى اقاوم


و انه ماتجيش عليا لحظة الم هدومى و ارجع بورسعيد و اقول مش لاعب


و كانى قفلت باب بورسعيد ورايا و رميت المفتاح عشان ما ارجعش


و ده خلانى اشد على نفسي في حاجات كتير و اتماسك قدام حاجات كتير


الا حاجة واحدة


الوحدة


انا هنا لوحدى قوي


بس معايا ربنا






غيرتني


هنا بقى روحت انا دايس ريبيت و خليت الشريط يفضل يعيد و يزيد و يقول


اغنيتي المفضلة


و اللي باعشقها


و اللي باحس انها متكاملة قوي


و اللي بتفاجئني كل يوم باسمعها يه بحاجات حلوة كتيرة و جديدة


و اللي سحبتني


على فكرة دى كمان انا كتبت عنها قبل كدة هنا


و هاتلاقوها شغالة دلوقت


الاغنية دى على مدار ست شهور انا عشت فيهم هنا سمعتها كتير قوي قوي


هو انت ايه


مش بردو انسان زينا و ممكن تحس


و للا انت ايه


كل اللي عارفه عن الحياة تاخد و بس






مرة تانية

انغام

شكرا لانك موجودة بيننا

الأحد، ديسمبر ٠٢، ٢٠٠٧

ساقية الصاوى...عيب اوى كدة

حاجة غريبة جدا ابتكرتها ساقية الصاوى
وعرفت انه من اختراع م/ /الصاوي ذات نفسه
قال ايه لما تشتري اي مشروب"شاي ,نسكافيه....الخ"تدفع غير تمن المشروب تمن السكر اللي هاتاخده
و بجد ده عيب قوي
على فكرة الربع جنيه اللي بيندفع مقابل السكر مش مشكلة لاى حد بس العيب انك لما تلاقي مكان محترم زى ده بيعمل حاجات صغيرة قوي زي دي لازم تقول
لا كدة عيب قوي

الخميس، نوفمبر ٢٩، ٢٠٠٧

يوم ليك و يوم عليك


ممكن اللي هاكتبه ما يهمش حد من اللي هايقرا

بس هو ايه من اللي كتبته قبل كدة كان يهم اي حد

و مع ذلك الناس قرت و تفاعلت و ردت

المهم

امبارح كان الذكرى الرابعة لوفاة ذكرى

شوفتوا ازاى

اكيد بالنسبة لكتير من الناس ماهواش حدث اساسا

لكنى عشان يمكن لوحدى الايام دى و بتهف عليا حاجات غريبة قوي

بافكر في حاجات ماتخصش حد و يمكن ماتخصنيش انا كمان

بس ده يخصني

سنة 1996طلع شريط لوحدة صوتها تخين و غريب شوية بالنسبالي اسمها ذكرى

كانت رفيعة قوي قوي

و قالوا انها البنت الجديدة اللي هانى مهنى جايبها يضرب بيها سميرة سعيد

و كنوع من الطفاسة الموسيقية اشتريت الشريط

و انبهرت باللي سمعته

اولا بالنسبة لسني في الفترة دي ماكانش ممكن افهم قوي ايه مواطن الجمال في الصوت ده

لكنى كان شاددنى قوي

و باكبر حبة حبة

و كان انتاجها القليل من الاغانى المصرية بيوصلني

و ماضيعتش البوم ليها ما اشتريتهوش

و بقيت اكبر و افهم الصوت ده اكتر و اكتر و كان عندى احساس ان الست دى كان لازم تبقى واحدة من اهم اهم مطربات الدنيا لولا ان الانتاج بيمشي بالعكس في بلدنا

و مشاكل احتكار و مش احتكار و حاجات دى و لكن كان انتاجها من الاغانى الخليجية موجود و بردو بيوصلنى

و كنت انا و اصحابي بنتسابق ع اللي يعرف اغنية جديدة لحد احنا بنحبه

و على مدار مشوارها في مصر من 1995 لغاية الحادثة في28-11-2003

ماعملتش غير 4 البومات مصرية و هم

وحياتي عندى

الاسامى

يانا

يوم عليك

تخيلوا انى اكتشفت ذكرى بجد بعد الحادثة

و بقيت اسمع الاغانى كانى باسمعها لاول مرة في حياتي

اقفل على نفسي قزاز العربية و اعلي الكاسيت و اتامل

ايه ده

سبحان الله في خلقه

اولا تحكمها في صوتها مش طبيعي و الخامة اللا منطقية اساسا

غناها الشرقي بافترا و غربي بحرفنة

و في النهاية كانت النهاية تكون بالشكل المأساوي ده

مفاجأة موت بخمسة و عشرين رصاصة

و الاكتر ان فيه كتير قرروا انهم يقتلوها تانى و تالت بعد ما ماتت

اللي يشكك في سلوكها و اللي يشكك في دينها و اللي يفترى عليها

المهم

انا حاطط ع البلوج دلوقت واحدة من افظع اغانى ذكرى

عارف

اسمعوها و قولوا رأيكم
و ادعولها بالرحمة

ــــــــــــــــــــــــــــــــــــــــــــــــــــــــــــــــــــــــــــــــ

بعد مرور اقل من شهر على حفلتنا اللي فاتت

عندى حفلة ياجدعان

اه و الله

عندنا حفلة مع فرقة ايامنا الحلوة ان شاء الله يوم الخميس الجاي6-12-2007في فرع ساقية الصاوي التاني

new generation

المكان بعيد قوي

و مش عارف اعزم الناس و هاييجوا ازاى

بس انا عرفت ان الساقية عاملة اوتوبسات هاتاخد الناس من قدام سلينترو نادى الشمس للحفلة و ترجعهم

اللي يقدر ييجي ينورني

ـــــــــــــــــــــــــــــــــــــــــــــــــــــــــــــــــــــــــــــــــ

من اهم الاقوال المأثورة اللي حاببها الايام دى تعليقا على موضوع الست اللي سابت كرسي البرلمان بناء على رغبة عريسها



قول يا سي حنفى قول...دي حتى السياسة اسهل من شوربة الكوارع

الجمعة، نوفمبر ٢٣، ٢٠٠٧

ياللا نبقى وحوش

على طريقة خطبة التاميم اتوجه الى جيران الهنا اخواننا سكان القاهرة و اقول
اخوانى سكان القاهرة
تحية طيبة و بعد
يشرفتنى و بعد فترة ليست باليسيرة في بلدكم ال....ماشي ياسيدي نقول الموقرة
يشرفنى انى اقول ليكو
فلتفقدوا ادميتكم
فلتفقدوا ادميتكم و لن يلوم عليكم لائم
مادامت هى دى مواصلاتكم و هو ده الطريق الوحيد للوصول لبيوتكو بعد يوم عمل غير ادمى
يبقى ياللا
واحد
اتنين
تلاتة
ياللا نبقى وحوش
ياللا نرمى اي ضعيف او ست مش قادرة برة الميكروباص
ياللا نستسلم لتحكمات سائق المينيباص و التباع او الكمسارى اللي معاه
ياللا نستحمل اننا كل واحد يقف على رجل واحدة لان مفيش مكان يحط فيه رجله التانية
ياللا ما نعترضش لو كنا و اقفين ع الباب و متشعلقين و نلاقي السواق بيقف يركب زيادة علينا
عشان لو احنا لا سمح الله اجرمنا و اعترضنا هايقول كلمة واحدة
اللي مش عاجبه يبقى يركب تاكسي
ما تقرفونيش
و ياللا نتحمل انهم يقطعوا كل خط لتلاتة او اربع خطوط
يعني الهرم يبقى بدل جيزة مشعل او رماية
يبقى جيزة طالبية عريش مشعل
و هكذا
حسبي الله و نعم الوكيل
عمار يا بورسعيد
ـــــــــــــــــــــــــــــــــــــــــــــــــــ



لا زلت اعيش مرحلة نجاح الحفلة
اللهم لك الحمد و الشكر
بجد الحفلة دي تعتبر نقلة مهمة ليا و خطوة حلوة قوي
الحضور كان اكبر بكتير من عد الكراسي و كان ناس كتير واقفين
و الحمد لله كل فقرات الحفلة نجحت نجاح عالى جدا
عقبال الباقي
و نتقابل دايما
ـــــــــــــــــــــــــــــــــــــــــــــــــــــــــــ





شادي اتجوز يا جدعااااااااان
يمكن ماجاتش فرصة اتكلم عنه كتير
بس خصوصية العلاقة و الصحوبية بيني و بينه كانت اكبر من الكلام
شادي شوقى عوض
هو ده اسم صديقي الانتيم
اتعرفنا ببعض في تالتة اعدادى و ما اتقابلناش بعدها لحد ما دخلنا الكلية
و اتصاحبت انا و هو في تالت سنة في الكلية
و استمرت الصحوبية بيننا لحد دلوقت
تقريبا شادي هو و احمد عيسى الوحيدين من الكلية اللي لسة ليا علاقة بيهم
اتخانقنا بالهبل
لكننا كنا فعلا بنحترم تفكير بعض جدا و كنا قريبين من بعض جدا
و عمر ما كان فرق الديانة بيني و بينه سبب للافتراق
و كانت فترة تحضير مشروع التخرج من اصعب واغرب لحظات حياتنا


كنا دايما جنب بعض في لحظات صعبة قوي


لدرجة انى ساعات كنت مسميه صديق اللحظات السودة






شادي اتجوز
و كان المفروض انى مش هعرف احضر الفرح لانه كان يوم اربع يعني مفيش بعده اجازات


يعني بعد كل اللحظات السودة اللي شوفناها سوا كان ممكن ما احضرش يوم حلو زي ده
بس ربنا سهل كل حاجة و بقيت انا عامل زي ام العروسة باهرج و اغنى و ارقص و ملينا القاعة تهريج
الفرح كان حلو قوي و كل حد موجد فيه كان فرحان من قلبه






مبروك يا شوووووووووووووو

السبت، نوفمبر ١٧، ٢٠٠٧

كان عندى حفلة امبارح

الحمد لله رب العالمين انا نجحت امبارح قوي و عديت مرحلة كنت حاسس انى ممكن ما ارجعش اغنى فيها تانى
و بجد
ماكنتش قادر احكي لحد اللي انا كنت فيه و ازاى مريت بمرحلة فقدان توازن و فقدان ثقة
المهم كانت الحفلة امبارح اكتر من رائعة
ما اخبيش عليكو كنت مرعوب جدا و انا باغني بين الوحوش دول
كل و احد فيهم اجمد من التاني
و قولت انا بالكتير اصحابي اللي هاييجوا هم اللي هايصفقوا و خلاص
الحمد لله ربنا اكرمنى اخر كرم و ما كنتش قادر اقف على رجليا ممن كتر الفرحة بعد الاغنية
الحمد لله
ـــــــــــــــــــــــــــــــــــــــــــــــــــــــــــــــــــــــــــــــــ
على جنب كدة
احساس رهيب بالذنب تجاه كل واحد جالى الحفلة انى ما قدرتش اقعد معاهم و ارحب بيهم صح
بمعنى
انا امبارح جالي وينكي و سراء النيل و طارق و شادي و اليانت و غيرهم من المدونين
و جالى من بورسعيد شريك الاحلام احمد شلبي و انتيمي اللدود احمد عيسى
و جالى من الفيوم صديقي المطرب الرهيب محمود
ده غير اصدقائي من القاهرة و اولهم لطفي
و غيرهم و غيرهم
و ده خلانى عشان محدش يزعل منى
افضل الف عليهم شلة شلة عشان اقعد معاهم
و في الاخر اكيد ما عرفتش اقعد مع و لا واحد منهم صح و اكيد ناس منهم اتضايقوا
بس اكيد هم هايقدروا
على فكرة عندى تفاصيل كتيييييرة محوشها للبوست الجاى
كل حفلة و انتم طيبين

الأحد، نوفمبر ٠٤، ٢٠٠٧

فيديو اعلان حفلتنا

اقول لكم على حاجة بيني و بينكم

يمكن مش كل الناس عارفين انا ليه حاسس ان الحفلة دى مهمة جدا في حياتي

هاقول لكم و خليها بيني و بينكم

انا بقالي هنا في القاهرة حوالى ستة شهور و ما حصلش تقريبا فيهم اي خطوة ايجابية في طريقي

و خصوصا بعد ماسيبت فرقتى الاولى ستيب باي ستيب

حاسس ان وجودى مع الفرقة دى بقى مسالة اثبات وجودى

بقت مسالة اثبات ان انا لسة مطرب حد حابب يسمعه

و لان حفلاتى بقت قليلة جدا جدا الحفلة دى بقت اهم و اهم بالنسبالي

مستنيكم كلكم تكونوا معايا اليوم ده

و للحديث بقية

الجمعة، أكتوبر ٢٦، ٢٠٠٧

3بوستات





اولا نبدا بالجديد


عندى حفلة يا جدعاااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااان


طب بذمتكم ما وحشتكوش الكلمة دى


انا عندى حفلة مهمة جدا مع فرقة ايامنا الحوة


لو قولتلكو الحفلة دى مهمة في حياتي قد ايه محدش هايصدقنى


بس بجد


انا مستنيكو كلكم الجمعة 16/11/2007 في ساقية الصاوى


حفلة فرقة ايامنا الحلوة


ـــــــــــــــــــــــــــــــــــــــــــــــــــــــــــــــــ


لم تنتهى الاحتفالات بعيد ميلاد تفاصيل


و بهذه المناسبة الفظيعة






انا اخترت احط لينكات لاحب البوستات لقلبي


































ــــــــــــــــــــــــــــــــــــــــــــــــــــــــــــــــ


سؤال يشغلني


ليه كروت موبينيل اسعارها هى هى و اغللى رغم ان القرد بياكد انها رخصت؟؟
و ليه الواد بيفضل واقف على باب الميكروباظ و مستنيك انت تدخل و مستعجل عليك انك تطلع رغم انه شايفك تخين و الباب ما يساعكوش؟؟




















الأحد، أكتوبر ٢١، ٢٠٠٧

كل سنة و انا و انتو و كل اللي باحبهم و بيحبونى طيبين و منورين دنيتي

ياااااااااااااااااااااااااااااااااااااااااااااااااااااااااااااااااااااااااااه

تصدوا انى كدة بقالي سنة فاتح مدونتى؟

اه و الله

ما تيجوا نحكي من الاول ازاى بدأنا

سمعت من كل اللي حواليا ان فيه حاجة اسمها مدونة

حاجة ما تفهمش موقع و للا مقالات و للا حاجة غريبة

المهم اهى حاجة ببلاش و خلاص

و ما اهتميتش بالموضوع

و يعني كنت من وقت للتانى بادخل عند احمد شلبي اخد غنوة و للا اتنين و خلاص

لغاية ما جه يوم و كان في رمضان اللي فات

و قولتلهم انا عايز اعمل مدونة

و ساعتها قعد واحد صاحبي واحدة واحدة يعلمنى ازاى اعملها

و كتبت كلام عجيب

قولت استنونى

و هانبدا نحكي

تقولش يا اخويا الناس كانت مابتعملش حاجة غير انها تستناني

روّحت بيتنا متحمس جدا



و فجاة



لاقيتني مش لاقي حاجة اقولها



انا كنت من جوايا عايز اتكلم



و محتاج اتكلم



بس في ايه



و عن ايه محدش يعرف و لا انا كمان

و فجاة

فتحت اول بوست

لحد دلوقت ما اعرفش ازاى باكتب
و ازاى باتكلم


انا كدة

اللي باحسه باقوله

و اللى بيبقى جوايا و ينفع يطلع للناس ما باخبيهموش

بجد

فرحت قوي لوجود مدونتى في حياتي


كانت لحظة حلوة قوي اللي كنت بالاقي ناس ما اعرفهومش و ما يعرفونيش كاتبين عنى او حتى حاططين لينك ليا


و الأحلى كمان الناس اللي عرفتهم عن طريق البلوج


طبعا مش كلهم


بس بجد فيه ناس كتير بافتخر انهم اصحابي و انى عرفتهم من هنا


و كمان الاولاد اللي دخلوا التدوين عن طريقي و مفرحينني قوي


انا بافكر كتير في طريقة احتفل بيها معاكم


لاقيت حاجة حلوة قوي


تعالوا نفتكر البوستات اللي باعتبرها احلى و اهم بوستات عملتهم في مدونتى


و ع الاقل من وجهة نظرى


يعني اول بوست بجد ليا كان اسمه هذا انا


مجرد تعريف بيا


و بعد كدة بدات اتكلم في عموميات


يعني عملت بوست اسمه بانوا بانوا


و اتكلمت بعد كدة عن ناس قريبين منى او مهمين في حياتي


اتكلمت عن سلمى و انغام و احمد شلبي


و اتكلمت عن جدتى


و اتكلمت عن نفسي كتير


بس باعتبر ان البوستات اللي بتتكلم عن مواقف بتحصل لي هى اكتر حاجة حية بتتكتب هنا


يعني بدات مع بوستين متتالين اسمهم الهرس الاول و الهرس التاني عن كعبلات قابلتها هنا في القاهرة ايام ما كنت باجيها زائر


تصدقوا انى قعدت اتفرج على حياتي لمدة سنة ن خلال البوستات دي


يعني مثلا


لاقيت اكتر شهر عملت فيه بوستات


هو شهور البطالة في حياتي


وت ما كنت حاسس اني كائن بلا لزمة في الحياة


اليوميات و دة يعني


كمان بدات بوستات الاكتئاب و الحاجات دى


لكنى كمان كنت بابقى مبسوط قوي بردود الفعل على البوستات اللي فيها لينكات اغانيا


او الكلام اللي كان بيعرف الناس بيا كمطرب


فرحت قوي بكل اللي حضروا حفلاتى كمدونين


فرحت قوي لما حسيت ان فيه عمل انا عملته و نجح قوي بين شريحة معينة من الناس و بداو يتكلموا عنه


انا قصدي طبعا اغنية اللي انكسر يتطوح


اللي لاول مرة تحسسني بانتشار عمل ليا


دلوقتي لما بدات مرحلة جديدة في حياتى و بدا كلامى ياخد اتجاه جديد


اتجاه اكثر جدية


و اكثر اهمية


بدات اكون انسان كثير الانشغال و التعب و الهموم و الفرح


بدات تكون ليا حياتي و تجربتي و حاجات


اتغيرت حاجات كتير


و اتغيرت وجهة نظرى في حاجات كتير


المهم


نسيبنا شوية من الجد


و تعالوا نحتفل و ننبسط


كل سنة و انتو طيبين


و كل سنة و انا و انتو و كل اللي باحبهم و بيحبونى طيبين و منورين دنيتي




الأحد، أكتوبر ١٤، ٢٠٠٧

العيد فرحة.......ياسلام ياختى


و بعد فترة من الغياب عن بورسعيد.....غياب؟
بالطبع كان فيه زيارات
لكنى لم احسبها
لانها كانت تتعب اكثر ما بتريح
بمعنى انك تكون قاعد في بيتك و التايمر شغال لحد ما الوقت بيخلص و تضطر تسافر
و انت ما قابلتش كل اللي نفسك تقابلهم
و لا عملت أي حاجة لان الوقت قليل جدا
يبقى ما تتحسبش الزيارة
المهم
يوم الخميس
اللي ما كانش باين اذا كان هو اخر يوم رمضان و للا لسة
قررت انى هاسافر في اوتوبيس سبعة و نص
وروحت شغلي و فضلت فيه لحد ما جت سبعة الا ربع
قولت ما بدهاش و ع الترجمان يا برنس
و كعادتنا الرهيبة في احترام مواعيدنا الباص بالصلاة ع النبي طلع الساعة تمانية و خمسة
و في مشواره الممل الي ألماظة عشان يجيبب باقي الركاب
لحد هنا و مفيش مشكلة
و الراجل حمل فعلا و طلعنا من الماظة و فجاة السواق وقف
و نزل من الباص

وو
الاوتوبيس عطل يا اخواننا
طرمبة البنزين اتقطعت
الله يخرب بيت شرق الدلتا و بيت اوتوبيساتها
و نزلنا على امل انهم يبعتوا لينا باص تانى
و كن هيهات يا بني ادمين
و فجاة
هل علينا المنقذ الجبار
اوتوبيس اسماعلية
الاوتوبيس كان فيه اماكن كتيرة فاضية
حوالى تلتاشر كرسي بس اللي كانوا مششغولين
و ده معناه ان حوالي خمستاشر من ركاب باص بورسعيد هايقفوا
لان السواق كان محمل ركاب زيادة اساسا
و كاد الامر ان يتحول لكارثة عندما قرر بعضهم انهم ما يركبوش الباص عشان محدش يقف
ساعتها اخوكم وقف زي السبع
يا ناس افهموا
انتو عندكم استعداد تقفوا ساعة او اتنين عشان تستنوا اوتوبيس يا اما ييجي او مايجيش
ما انتو عارفين الشركة دى ما تنتضمنش
ما تقفوا الساعة دي في الباص و هايوصل اسماعلية و تفضى الاماكن
و روحت رازع شنطتي في بطن الباص
و لحق بيا باقى الركاب
و طلعنا
و ما اكدبش عليكم انا اول مكان فاضي لاقيته قعدت فيه
بس و الله اتطمنت ان كل البنات و الستات اللي كانوا معانا قعدوا
و قعدت
طبعا كانت نظرات الركاب بتقوللى مش كنت عامل فيها بطل قومي و بتقول ها تقف
طنشت كل ده و ركبت
و عمار يا مصر باوتوبيساتك
و الله رجعت بازمة في صدري من ريحة الجاز و البنزين و الصنة اللي مالية الباص
بس وصلت الحمد لله
ــــــــــــــــــــــــــــــ
في بيتنا
من زمان و انا مشتاق لسريري و اودتى
نمت يا اخواننا
و افاجا لما صحيت ان محمد اخويا فتح المروحة و سابها دايرة و انا نايم
و الحمد لله معايا دلوقت جايزتين
اولا كحة شديدة من جراء جاز الاوتوبيس
و انفلوانزا تقيلة من بركات محمد اخويا
ـــــــــــــــــــــــــــــ
واضح ان العيد بالنسبالي بقى مناسبة جميلة للمرض
ما انتو فاكرين العيد اللي فات كان فيه ايه
ـــــــــــــــــــــــــــــــــــ
في بيت محمد زكى
صديقي الانتيم
و واحد من الناس اللي باعرف اتفك معاهم في الكلام و ارتاح
قعدت ع الجهاز بتاعه و اكتشفت ان الانسان ده عامل ارشيف لكل لحظة حلوة عشناها و اتصورنا فيها
ياااااااااااااه
دا احنا كنا حاجة حلوة قوي في حياة بعض
كل واحد في الصور ده فين دلوقت
ايام الهنا يا ريتها دامتكنا كلنا بنتجمع من كل حتة و كان كل هدفنا اننا نكون مع بعضاحنا فين دلوقتيكل واحد في بلد و مش عارفين بكرة فيه ايه
هاتلاقونى انا و اديني لوحدى في القاهرة
و شريف دلوقت في الامارات
و اللي في السويس
و السعودية
و المنصورة
و بورسعيد
تفتكروا هانتجمع تانى؟؟؟
يا رب

كل سنة و انتو طيبين
ـــــــــــــــــــــــــــ
على فكرة قريبا جدا ان شاء الله توقد الشموع و تعلق الزينات و تبدا الاحتفالات
بمناسبة مرور عام كامل على افتتاح مدونتى
تفاصيل
تصدقوا انى بقالي سنة حالها بارغى
و انتو بتقروا
ربنا يكون في عونكوا و الله
المهم
ياللا حضروا نفسكم لحفلة كبيرة و اجتماع بجد
عشان نحتفل كلنا سوا
و كل سنة و انتو طيبين تاني

الثلاثاء، أكتوبر ٠٢، ٢٠٠٧

انا كنت............هناك




الخميس
حفلة محمد منير
انا كنت حاضر هناك


ما كنتش محضر و لا ناوى اروح
و فجاة لاقيت ناس كتير حواليا رايحين
قولت ما بدهاش
ياللا يا عم
ماهو مش كل يوم هايبقى فيه حفلة للملك
و روحت
ما اكذبش عليكم انبهاري الشديد بيه
ما اعرفش ايه سر التعويذة اللي بيرميها و هو داخل
حماسه
تشنجاته
غناه
ما تعرفش
و لا تعرف ايه سر الجنون العجيب بيه و بكل تفاصيل شكله و غناه و صوته
دي حاجة ربنا بيزرعها
و ربنا ما بيحتاجش سبب
ربنا هو اللي بيعمل السبب
الناس هناك كانوا كتير قوي
و كانوا ناس من نوع جديد عليا
ناس وصلوا من الحب لدرجة الانجذاب بصاحب المقام و عملوله مولد و جم يحيوه
وصلت بيهم لحظات الانجذاب لدرجة ان واحد منهم من كتر حبه فيه كان هايموته لما حب يهاديه و حدف له ساعة
الساعة يا اخواننا جت في دماغ منير و سورق و فرفر و كان هايروح فيها
و فجاة رجع من تانى زي ال السبع و فتح الدنيا غنا و حواديت و شبابيك و سياسة و حب
ومزيكا
****
ملحوظة عجية شويتين


الجو و الهوا اللي كنا بنتنفسه كان جديد حبتين
لان جمهور منير قرر يضيف للاكسجين و النتروجين و باقي مكونات الهوا
مكون جديد اللي هو الحشيش و البانجو
انا يومها يا جماعة شميت كمية مخدرات ماشوفتش زيها في حياتي
بس كان الحدث الاهم و الاعظم في الليلة
لما علي الحجار و محمد الحلو طلعوا و غنوا مع منير
ساعتها حسيت ان الكبار و قفوا يقولوا كلمتهم
قولوا بقى و ارحمونا من الكاكا الغنائي اللي ملا الدنيا


ـــــــــــــــــــــــــــــــــــــــــــــــــــــــــــــــــــــــــــــــــــــــ


الجمعة
حفلة ايامنا الحلوة
انا كنت باغني هناك


مش عارف احكي كتير عن الحفلة
بس عايز اقول انى خرجت منها سعيد جدا بكل ردود الافعال على غنايا والناس اللي حبوا صوتى و غنايا في الفرقة
و ربنا يكرمنى و اقدر ابقى من نجوم الفرقة بجد

ــــــــــــــــــــــــــــــــــــــــــــــــــــــــــــــــــــــــــــــــــــــــ


الجمعة بردو
سحور مع فرقة ايامنا الحلوة
ده بردو احلى بكتير من انى احكي عليه
بجد الناس دي عيلة حلوة قوي و قد كدة بيحبوا بعض و يكونوا مع بعض
و الصور تحكي احسن من الكلام


ــــــــــــــــــــــــــــــــــــــــــــــــــــــــــــــــــــــــــــــــــــــ
السبت
افطار مع شخصية فريدة في الحياة
انا كنت مستمتع هناك


تليفون رقيق من عمر مصطفى
الشاعر و الملحن و صاحب مدونة تجربة
و عزومة رقيقة جدا ع الفطار و انا ما كدبتش خبر
روحت يا اخواننا و اكتشفت عالم حلو قوي من الناس
الناس اللي ممكن يتقال عليهم اولاد ناس بجد
الاحترام و الهدوء و الموهبة و الذوق العالي
عمر مصطفى ليه ديوان اسمه
اسباب وجيهة للفرح
يا عمر
وجودك في حياة المتعاملين معاك
سبب وجيه جدا جدا للفرح


ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الاحد
بيت نهى محمود و روكا
انا كنت بافطر هناك


دعوة تانية رقيقة للافطار جاتني من الشقيقن الرائعين نهى و طارق
و بردو ما كدبتش خبر
واكتشف حاجات حلوة قوي
اولا ان نهى غير انها كاتبة رائعة
طبيخها حلو قوي يا جدعان
و لازم تجربوا الرقاق اللي هي بتعمله و الفراخ البانيه
بس سيبكم من ده
القلوب اللي شوفتها
تخيلوا لما بني ادم يبقى كله قلب
هم دول
ربنا يكرمهم و يخليهم دايما كدة
احلى عيلة و احلى ناس
************

الجمعة، سبتمبر ٢٨، ٢٠٠٧

عاجل

بعد سلسلة من الخلافات الودية بيني و بين احمد عاصم ملحن و مؤسس فرقة ستيب باي ستيب
و في قرار مشترك بين الطرفين
قررنا انفصالي عن الفرقة متمنيا لهم كل التوفيق في حياتهم الفنية
و متنيا لكل اخوانى و اصدقائي و احبائي اعضاء و جمهور الفرقة كل السعادة
و ستظل ايامي في الفرقة من اهم و اجمل ايام حياتي و حتى لو لم يكتب لنا الله الاستمرار عمليا فسوف تظل الاخوة و الصداقة التي جمعتنا الى الابد
لانها هى الاهم و الابقى من اى عمل
و تمنوا لي الخير في مشواري المستقل
و مع فرق اخرى
و اشوفكم بقى ان شاء الله

الثلاثاء، سبتمبر ٢٥، ٢٠٠٧

ما تيجو نخرج بقى من المود

اه و الله انا قولت انى نكدت عليكم بما فيه الكفاية
و الحمد لله واحدة واحدة ربنا انتشلني من اللي انا فيه و بدات الحياة تفتح
المهم ندخل في المفيد
يا اخوااننا
انا عندى حفلة
اه و الله حفلة
لا و مش اي حفلة
انا هاغنى مع ايامنا الحلوة
المرة دى كعضو في الفرقة
عارفين هاغني ايه
انا هاغنى تلات سلامات
و هانغنى الليلة الكبيرة
و اغاني تانية
يا جماعة
انا مستنيكم كلكم تيجوا تنورونا في مسرح البالون بالعجوزة ان شاء الله يوم الجمعة الجاية الساعة 8و نص مساءا

الثلاثاء، سبتمبر ١٨، ٢٠٠٧

اصله مؤدب..ياععععععع

تهمة مقززة تلاحقني و مخلية الناس واخدة منى موقف
مؤدب
علي ابن الناس الكويسين
اصل نت ياعلي هادى كدة
فك بقى
ـــــــــــــــــــــــــــــــ
دى عينة من الانتقادات الموجهة ليا
و مخليانى افكر
ياترى انا هنا لوحدى بس للاسباب دي؟؟
انا بطبيعتي مش كدة على فكرة
يعني انا انسان منطلق
باهرج كتير
صوتى عالي
بس باخد وقتي على ما احدد علاقتي و مدى هزارى مع اي حد
مش من الاول كدة
و ده بيخليني على ما ابدا اخد ع الناس
يكونوا يمكن زهقوا
اتفقعوا
مش عارف
امبارح كان مديري الشاب بيتكلم معايا
و بيقوللى
انت عارف ان انا باتعامل معاك بقسوة شوية و باشد معاك في الكلام
اصلي بصراحة حابب انك تتغير كدة
و تبقى واد مخربش
اصلك يعني هادى و حالم و
اكتشفت ان هدوئي اللي كتسبته هنا بقى عيبة
و اكتشفت ان دخولى مع الناس واحدةواحدا بقى مش مظبوط
انا مش فاهم
ارجو نصيحة
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
كانت المغرب لو اذنت عليا و انا لوحدى في بورسعيد
ممكن انهار عصبيا
احساسي ان جو الفطار و البيت و الحاجات دى لو فاتني بازعل قوي
دلوقت الشركة كلها روحوا
و قفلوا الدنيا
انا هنا ع الجهاز
و مش عايز اروح من الشركة
لانى هاروح اقعد لوحدى
و كدة كدة هاكل لوحدى
يبقى خليني هنا
اطلب اي حاجة ديليفري
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
اكثر ما اكرهه في حياتي عدم التقدير
و هذا ما احسه هذه الايام في كيان كنت اعتبره بيتي و عيتي
و لكنى الان امر بمرحلة سخيفة مع فرقتى
step by step
قد يترتب عليها انفصالي عن الفرقة
و ربما يتم الصلح قريبا
اتمنى ان ربنا يهديني للخير في قراري ده
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,و
كان لي صديق توفي والده
و صديقي ده اتاثر جدا بوالده و وفاته
و ده خلاه نه يفضل كل شوية يشغل تسجيل لاخر المكالمات اللي كانت بينه و بين والده و يقعد يفتكره و يعيش معاه
انا دايما كنت بانتقد التصرف ده
و كنت باقولله حرام عليك انك تعمل كدة في نفسك و اعصابك و و و و و
انا الايام دي باعمل نفس التجربة
و كل شوية باطلب رقم احمد ابن عمتى
و انا عارف انه مش هايرد
و كل مرة باتصدم لما اسمع رسالة موبينيل بتاعة الجهاز مغلق
انا لله و انا اليه راجعون
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
واحد منهم كان بيكلمنى و قعد يثني على صوتى
و غنايا
و قعد يقول شعر في غنايا و خصوصا يوم حفلة ايامنا الحلوة
و كعادتى باصاب بحالة خجل من كلمات الاطراء
و باقعد اقول الحمد لله
شكرا
و حاجات من دى
لاقيته بيبص لي شذرا و بيقول
ياعلى انت لازم تعرف قيمتك شوية
انت جامد و اوعى تعمل كدة
و ده خلانى افكر
يمكن المفروض لما حد يقوللى صوتك حلو
اقوم ارد عليه و اقول له
طبعا انا عارف
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
ده تعريف بنفسي كاتبه ع الفيس بوك
و حااسس بيه الفترة دى

About Me:
واحد عادى جدا كل مشكلته انه نفسه يغني بس اكتشف انه عامل زي الحمار اللي معلقين له جزرة في سنارةعمال يمشي و يجرى و را الجزرة ولا عمره هايقدر يوصل لها
..................
................
يا خوفي لاحسن ما اوصلش للجزرة

الجمعة، سبتمبر ١٤، ٢٠٠٧

انا لله و انا اليه راجعون

يا جماعة لو حد ما بيستحملش بلاش يقرا
محمد شهاب
1984—2007
اخر يوم في شهر شعبان
عمي بيتصل بيا
فتحت على طول و بدات اغني
:رمضان جانا و فرحنا به..سيب رسالتك يا عمو بعد ما اخلص الاغنية
......................
......................
شهاب مات يا علي
كان مع احمد ووصله لحد البيت و بعدها بخمس دقايق اتقلب با الفيسبا و مات
و انقطع الخط
و عشان اللي ما يعرفش
شهاب صديق مقرب جدا لاخويا محمد
و كان معاه ليل نهار ايام الامتحانات و المذاكرة
و كان شخصية انا نفسي بابصلها بمنتهى الاعجاب
معجب باحترامه و وضعه بن اصحاب اخويا
كان بينهم زي الليدر
و فجاة راح
ــــــــــــــــــــــــــــــــــــــــــــــــــــــــــــــــــــــــــــــــــــ
أحمد الجزار
1981—2007
كان اول يوم في رمضان صعب عليا قوي
قاعد لوحدى و مش عارف هافطر فين لوحدى و مش معايا اهلي
و جت لي دعوة لطيفة من صديق للفطار معاه
و فجاة جالى تليفون من والدى
ايوة يا علي
انت بكرة عندك شغل و للا اجازة
احنا نازلين بورسعيد حالا"كانوا في راس البر في المصيف"
أنا:خير
حاجة وحشة حصلت.؟
بابا:احمد الجزار البقاء لله

احمد الجزار ابن عمتى و صديقي القريب قوي منى في العيلة
و تقريبا صاحبي الوحيد في اولاد عمامى
كان الفرق بيننا سنة و شهر بالظبط
كانت كل كتبه معايا سنة بسنة
و كانت هدومنا واحدة
و كانت افكارنا واحدة
كنت باحترم فيه هدوءه و قوة شخصيته
اللي كانت بتصدمنى ساعات و باحس انه برود او جمود
بس لما كبرت فهمت و احترمت ثباته
احمد اتخرج من سنتين من كلية طب
و روحت انا و هو فرز الجيش سوا
و اخدنا الاعفا سوا
و رجع دخل كلية الشرطة و اتخرج منها ملازم اول طبيب
و كانت حفلة تخرجه من حوالي شهر
تصدقوا انى ما كنتش عرفت انه اشتغل فعلا
انا مش قادر احزن او ابكي
انا مش مستوعب و مش مصدق
و الاصعب انى انا اللي كاتب نعيه بايدي
و انا اللي وزعته و لصقته في كل مكان
تصدقوا انى كنت بالصق نعى احمد في كل حتة جنب نعي شهاب
انا بجد مش فاهم
"و بشر الصابرين الذين اذا اصابتهم مصيبة قالوا انا لله و انا اليه راجعون"
انا لله و انا اليه راجعون
خدوا بالكو
الموت بقى جاي لنا احنا
مش للعواجيز
و جاي جاي
فجاة و من غير حساب

يا رب ارحم شهاب
و ارحم احمد
ادعولهم


السبت، سبتمبر ٠٨، ٢٠٠٧


اهو على ما قسم

قررت اعزمكم على مشاهدة اجبارية لطلعتي البهية في برنامج شبابيك

و انا باغني تلت سلامان


شكرا جدا للصديق صاصا

الاثنين، أغسطس ٢٧، ٢٠٠٧

و من تانى الله عليك يا عم احمد يا بتاع زمان


زمان قالوا ان اصدق الشعر اكذبه

لكنى تعودت معه على الاختلاف

تعودت منه ان يكتبني

لا ان يكتب عنى بل يكتبني

و يكتب ناس تانية

يترجمنا ع الورق

و يجعل منا قصائد يعجب بيها كل الناس

وحدهم ابطالها هم الذين يعرفوها بشكل اخر

و يتذوقوها ليس كالاخرين

المهم يا اخواننا

امرة دى كتب عن حد اعرفه كما اعرف نفسي

شفاف

ممكن ان تقرا كل ما بداخله

ووقع في تجربة

كتاها احمد كما حدثت

بلا زيادة و لا نقصان

و لكن بمنتهى الابداع




متنفعلكش
كلمة وقالوهالى فى كل مكان
مفيش انسان شافنى معاها
الا نادانى وقاللى انساها
متنفعلكش
انت برئ...ولسه رقيق
وقلبك ورده بتفتح
وهى سنين...دموع وأنين
من قلب لقلب تتفسح
متنفعلكش
مصدقتش...مدققتش
مشيت وياها موقفتش
لحد ما جه عليا الدور
وهنت عليها مصعبتش
قالولى كلام وهتقولوا
وميت واحد قالتهولوا
عايشة الحب بتجرب
وعمر فى يوم ما هتطولوا
قالولى بس تنساها
وابعد لحظة تلقاها
فى ثانية عايشة حب جديد
وواحد تانى وياها
مصدقتش ..مدققتش
مشيت وياها موقفتش
لحد ما جه عليا الدور
وهنت عليها مصعبتش
أحمد


بجد الله عليك يا عم احمد يا بتاع زمان و الان و كل وقت



و استنوا لحنها قريب و هاتسمعوها ان شاء الله

الجمعة، أغسطس ١٧، ٢٠٠٧

هوامش

انا حاسس انها بقت ماسخة قوي فكرة انى كل شوية باكتب كذا بوست مجمع في بعض
بس بجد اعذروني نظرا لصعوبة الحصول على جهاز بسهولة
المهم ياللا بينا


نعرف و نؤمن و نصدق و نشهد بانه لا اله الا الله وحده لا شريك له و ان سيدنا محمد عبد الله و رسوله
لكن من اجمل نعم الله عندما يبعث لك رب العالمين برسالة
عندما يبرز دلائل قدرته
و هو لا يحتاجنا و نحن المحتاجين
لكنه يحبنا
و خلقنا لنعبده
اتكلم هنا عن تجربة مررت بيها من فترة مش بعيدة
مش عارف احكيها ازاي
لكنى عرفت معاني ايات الله اكثر عندما رايتها بعيني
" و من يتق الله يجعل له مخرجا"
طبعا معظمكم عاش معايا فترة الاكتئاب و النكد اللي كنت عاملهالكو
عرفت السبب بس متاخر
و لاقيت العلاج كمان
ياا جماعة و الله ربنا كبير قوي و من يتقيه يلاقيه
و نتيجة لكل ده ربنا عمل لى حاجة حلوة قوي في حياتي هانتكلم عنها بعدين
.......................................................
يبدو اننا خذلناها
البت دايما عاملة الواجب و زيادة و عاملة اللي عليها معانا كلنا
و يوم ما احتاجتنا ما لاقيتناش جنبها
ايوة باتكلم عن وينكي
قولنا ان عندها مسرحية يوم الخميس
انا شخصيا ظروف قهرية منعتني من الحضور
و اعتذرت لها من بدري
و كنت فاكر ان غيري كتير رايح
لكنى صدمت لما استقبلت منها كوممينت بتقول فيه الكلام ده
شكرا لكل من قال نعم
وشكرا لكل من قال لأ
شكرا للى اعتذروا من قبل ما تبتدى المسرحيه
لكن اللى عشمونى انهم ييجوا وماجوش
انا زعلانه بجد .
ماعلش يا وينكي
سامحينا
....................................................

ما كنتش عارف اني هاقع في الحب كدة بسرعة
كنت معزوم في فرح صديق ليا
و فجاة طلت علينا
كنت محذر نفسي و عامل حسابي ان كل واحد بيقرب من النار طمعا في نورها بيتلسع من نارها
لكنى زى المنوم مغناطيسيا قربت
و واحدة واحدة لاقيتني باتسحب و باتشد ليها
ايه ده
هو فيه كدة فعلا؟
انا مش مصدق الضحكة اللي ممكن تاكل بعقل قارة بحالها حلاوة
و للا الشياكة
و للا العسل الل دايب في الصوت و الطلة و الصورة
اكيد مافيش حاجة تيجي كدة
و مش عارف ايه اللي حصل لي لما جت عينها في عيني
و غمزت
انا فرفرت
و نسيت اللي حواليا
و روحت في عينيها لدنيا تانية
و فجاة رمت لي وردة
مش قادر احدد ايه اللي كنت فيه
و من ساعتها و انا دايب و مافيش على لسانى غير الكلمتين دول
انا باحبها قوي
انا دايب فيها
يخرب جمالك يا نانسي
نانسي عجرم يا اخوانناااااااااااااااااااااااااااااااااااااااااااااااااااااااا
......................................................
شوية جد
الفقرات دي من بوست رائع كتبه صديقي اللدود احمد عيسى عن واحد كان معروف انه عبيط الدرسة
و نفسه يبقى حاجة
لانها عارف و متاكد من جواه انه ولا حاجة
و دلوقت بقى حاجة
بس حاجة و سخة

وانا في اولي اعدادي كان معايا واحد كان مهزئة الفصل
امعة وملوش شخصية من الشخصيات الباهته اللزجة اللي لما كنا نحب نضحك كنا بنوقفه ونقوله غني يا حجازي
وكان بيغني اغنية السد العالي ويقلد عبد الحليم حافظ

كبر حجازي وسمعت انه بقي شاعر..عادي
كبر وسمعت انه في حركة كفاية...عادي جدا
كبر وسمعت انه مسيحي من وهو عنده 16 سنة لأن السيد المسيح جاله في رؤيا في المنام وده خلاه يدرس المسيحية واللاهوت واقتنع تمام الاقتناع ان المسيحية هي الدين الصح وان الاسلام يدعو للارهاب وبيغرس جوه المسلمين الخوف والرعب من العذاب عشان كدة بيتعبدو غصب عنهم مش حبا في العبادة
اه انا بتكلم عن محمد حجازي اللي رافع قضية علي الدولة عشان يشهر مسيحيته هو ومراته وابنه
كان صاحبي وزميل دراسة
ومن معرفتي بيه غاوي شهرة وامعة وملوش شخصية ومش من النوع اللي له موقف اساسا في اي حاجة
بالضبط عامل زي عادل امام في شاهد مشفش حاجة..نفس الطريقة ونفس الطباع
.................................................
اكيد شايفين حجم تفاهة التفكير...تفاهة كومبو حجم عائلي مش كدة؟؟؟؟؟؟؟؟
معتقدش ان الاسلام خسر كتير لما محمد حجازي ارتد عنه واعلن انه مسيحي
ومعتقدش ان حد مصدق المسلسل البايخ اللي بيقوله

اللي يسيب دينه عشان مش مقتنع بيه سهل يخون بلده عشان مش مقتنع بالنظام سهل يرمي مراته لو حد اقنعه بست تانية وسهل يرمي ولاده عشان مش مقتنع بيهم
ومش محمد حجازي اللي يستاهل الضجة دي
ـــــــــــــــــــــــــــــــــــــــــــــــــــــــــــــــــــــــــــــــ
الى هنا انتهى كلام احمد عيسى
و انا كمان عندى تجربة مع هذا الشئ اللي كان نفسه يبقى شئ
و بقى شئفعلا
بس شئ حقير
مش عشان غير دينه و للا ساب ديني
لان بصراحة ديني كسبان لما يتخلص من زبالات مكتوب في بطاقتها انها منتمية ليه
لكن انه عشان يتعرف برة مجال الناس اللي حواليه و بيشتغلوه يعمل الفيلم الاهبل ده هو و الهبل اللي بيطبلوله
يبقى.........و حطوا انتو مكان النقط كل عبارات الاحتجاجات المصرية القبيحة

الاثنين، أغسطس ١٣، ٢٠٠٧

خبر عاجل طحن


اهو جه الوقت

اختنا و صاحبتنا و البنوتة اللي ليها واجب في كل بيت

قصدي بلوج

وينكي العجيبة

عندها مسرحية يوم الخميس في الساقية

و احنا لازم نروح نقف جنبها و نهيص لها

و الحاضر يعلم الغايب

انا عن نفسي رايح

و امانة عليكم اللي يلحق يقرا قبل الخميس يحط لها اعلان عنده

و هانتقابل كلنا هناك ان شاء الله

الأربعاء، أغسطس ٠٨، ٢٠٠٧

ايامنا الحلوة تااااااني




بعد صباح القشطة على كل الناس الطيبة اللي مالهومش في اللعب القذر و لا ليهم في الاذية


و لا ليهم في قذف الناس بما قد يدمرهم


احب اقوللكم انى زى الفل


و مش بس كدة


انا جايبلكم خبر حلو


فرقة ايامنا الحلوة عندهم حفلة جامدة جدا في مسرح البالون ان شاء الله يوم الجمعة الجاية الساعة 8مساءا


انا مش هاغنى في الحفلة دى


و لا حتى اللحن بتاعى هايتغني


لكن الناس دول فرقة جامدة


و ناس من جواهم حلو قوى زى غناهم


ياللا نتجمع و نسمع


و انا عرفت من محمد عثمان مايسترو الفرقة


انهم في الحفلة دى


كل واحد فيهم هايغني احلى غنوة غناها قبل كدة


يعني بالصلاة ع النبي حفلة البيست اوف


و ان شاء الله نتقابل هناك

السبت، أغسطس ٠٤، ٢٠٠٧

و قررت ان اكتب بوست


لاني ماكتبتش بجد من فترة

و لانى قاعد قدام جهازى

و لانى عايز ارغى

و لانى حاسس ان دماغي مليانة حاجات كتير زحمة مش فاهمها

و بقت عاملة زي سوق التجارى اخر ايام رمضان

زحمة زحمة

انا قدامى كام ساعة و مسافر و هاسيب بيتنا

مش عايز اسافر

عندى شغل بكرة

و احمد عاصم كلمنى و قاللي عندنا بكرة لقاء في قناة النيل و ماعرفش انهى واحدة فيهم

اهو لقاء ع الهوا و السلام

برنامج قالولى اسمه شباب ع الهوا

روحت من شوية حجزت التذكرة

و باحضر الشنطة انا و امى

و ماشي

كانت اجازة حلوة

و للا يمكن لا

هو انا قابلت ناس كتير

بس ما قابلتش كل اللي كنت عايز اشوفهم

بس فرحان لان في حاجة حصلت

اختى روزاليا عاملة مهرجان حلو قوي قوي اسمه برة الدايرة

هو مهرجان تنمية بشرية بيكلم الناس عن انهم ممكن يتغيروا و يخرجوا برة دايرة حاجات كتير سلبية راميين نفسهم فيها

و انا المفروض كنت هاقدم فقرة فيه

غنا و كلام

يعني تفاصيل بس مرئية مش مقروءة

باتكلم و باغنى و باقول اللي في نفسي بس في اطار الموضوع

و لانى ما كنتش هقدر اروح المهرجان

وصلنا لاقتراح عبقرى

انا سجلت امبار فقرتى كلها فيديو

غنيت و اتكلمت

عملت رسالة حلوة انا راضي عنها

و يا رب تعجب اللي هايحضروا

و اهو رغم انى مش موجود بس هابقى معاهم

روزا

ربنا معاكي

ياللا خير

مش عارف

انا كان نفسي اتفك مع حد

و اديني اتكلمت معاكم

على فكرة الصورة اللي فوق اخدها العبقري وليد منتصر لمعديات بورفؤاد

تعرفوا

انا كنت باكره المعدية دي جدا جدا

خصوصا انها كانت اجباري عليا و انا رايح الكلية كل يوم

بس دلوقت انا بجد باموت فيها هى و حاجات كتير افتقدتها

ياللا تانى

اكيد هاتتظبط

بالله عليكم لو حد عرف يشوفنى بكرة ع التليفيزيون يسجلها