السبت، مارس 10، 2007

أنغام شكرا لانك موجودة بيننا


أنغاااااااام
و ها هي انغام تقنعني من جديد انها رمز للرقي و تؤكدلي انها ست الغناء و تاج راسه
يا جماعة المطرب اللي بيغني و خلاص مش بيعيش لكن المطرب اللي بيغني و بيحس و بيطرح فكرة من غناه هو اللي بيعيش و بيبقى فوق راس الناس كلها
انغام غنت غنوة جديدة في اخر حفلة ليها اسمها هاتمناله الخير
الموضوع لفتني جدا
و فكرت فعلا
ليه أي اتنين حبوا بعض و افترقوا لاي سبب لازم تنقلب محبتهم لكراهية و عداوة عنيفة
لا و كل واحد منهم يحاول على قد ما يقدر يدمر التاني و يشوه سمعته
و ينسوا حتى أي حاجة حلوة شافوها سوا
حتى العشرة و العيش و الملح
الاغنية دي بتتكلم عن اتنين سابوا بعض
لكن فضل جواهم حاجة حلوة و كل واحد منهم ماننسيش الطيب اللي شافه من التاني
حتى لو ما عادش فيه فرصة لرجوعهم لبعض
ممكن يتقابلوا و هم مفيش بينهم اساءة و يفضل من الحب اللي كان بينهم حاجة حلوة
تعرفوا
اصل احنا ياما بنشوف حوالينا ممكن تلاقي واحدة بتموت في انسان و هي عارفة كويس انه نضيف جدا من جواه و لكن لما ما يحصلش نصيب تلاقيها عملت كل اللي تقدر عليه في انها تشوه سمعته و تدمر علاقته بكل اللي حواليه و لو قدرت تشوه اصحابه كمان معندهاش مانع

المهم عايز احيي انغام و اللي كتب الاغنية لانغام و كل اللي بيسمعوا انغام و كلمات الغنوة اهى
..........
............
هاتمناله الخير
ايه يعني يفوتني و ينساني
ماهو ياما اتحمل علشاني
ما هو ياما كان قلبه غليا
هاتمناله الخير
ماهو قبل ما يجرحني داواني
كان عمرى و كان هو زماني
كان قلبي و روحي و عينيا
وهافتكر له حاجات كتير كانت ما بيننا
هافتكرله ايام هوانا
و الخطاوي اللي في طريقنا
هافتكر له حاجات كتير كانت ما بيننا
و هافتكرله ايام هوانا
و انسى لحظة ما افترقنا
لما كنا بنقسم الفرحة في عيوننا
و هافتكرله حاجات كتير
و هاتمناله الخير
ـــــــــــــــــــــــــــــ
هاتمناله الخير من قلبي
علشان يستاهل
دانا هاتمنى تلف الدنيا
تاني و نتقابل
وهافتكر له حاجات كتير كانت ما بيننا
هافتكرله ايام هوانا
و الخطاوي اللي في طريقنا
هافتكر له حاجات كتير كانت ما بيننا
و هافتكرله ايام هوانا
و انسى لحظة ما افترقنا
لما كنا بنقسم الفرحة في عيوننا
و هافتكرله حاجات كتير
و هاتمناله الخير



************



انغام...............شكرا لانك موجودة بيننا



لو عايزين تسمعوا الاغنية دوسوا هنا



على فكرة هي من حفلة و التسجيل مش قد كدة يعني و الفرقة كانت بايخة جدا
بس بردو انغام هي انغام






اااااااااااااااااااااااااااااااااااااااااااااااه



على فكرة لسة في بوست جديد عن اغنية غاطتني اقرووووووووووووووووووووووووه






هناك 14 تعليقًا:

18goosebumps يقول...

يووووووبي ومره اخرى اول تعليق

حلوووووووووووه اوى الكلمات يا علي

بجد

انغام صوت جميل

يمكن في الاوقات الاخيره بيكون لى ملاحظات عليها

انما محدش يختلف انها حد بيحترم فنه

تحياتى

hesterua يقول...

الأنغامى القديييييم علوة
شكرا ع الغنوة يا معلم
كلماتها جميلة حقيقى
فعلا الواحد بيشوف كتير اليومين دول
وبيعيش كمان
))

انغام صوت واحساس بجد رائعة واغانيها مع محمد على سليمان روعة
زى طيب
يا علوة يا طيب
))

islam yousef يقول...

جميله أوى
انا كمان بحب أسمع لأنغام و خاصه الحاجات القديمه
سلملى على أحمد شلبى
و كل البورسعيديه

اسلام يوسف
المنصورى

الأباصيرى يقول...

أصالة وأنغام وماجدة الرومى
وبس

دول ناس بتغنى من قلبها
مش بيقروا الكلام مع شوية موسيقى ورقص

الكلمات روعة بجد

تسلم ايدك ياعلوة

ibrahim يقول...

انا كمان بشكر انغام لانها موجوده بينا
انغام مش بس صوت دي احساس وثقافه واختيارات واحترام للجمهور وده اللي احنا محتاجينه في الزمن ده واغنية اتمناله الخير مش غريبه على انغام هي طول عمرها اختيارتها للكلام جديده وحلوه ومين ينسى انا كل مابحتاج اتكلم واتفابلنا وتحب اتغير وغيرها كتير

saher80m يقول...

طول عمرك فنان و بتعرف تنقى يا عمى

saher80m يقول...
أزال المؤلف هذا التعليق.
memo يقول...

انا كل لما اقول لحد انا بسمع انغام يقولي ياه دانتي قديمه قوي دانا من ايام الركن مسمعتلهاش
و لما بتسال بتحبي تسمعي مين و اقول انغام يعدو يتريقو
بس صراحه كلمات اغانيها كبيره
انا بحبها اوي

makhlouf يقول...

شكرا
انك كتبت عن انغام
انا بحبها اوى
وباحب اغنية مخصماك
راحت ليالى
والاغنية اللى انت حاطتها ل واما
حلوة جدا

علي الألفي يقول...

جوسي المتحفطة
شكرا لمرورك و مبروك انك خلصتي كل التاجات اللي في الدنيا
ـــــــــــــــــــــــــــــــــ
دكتور زيفاجو

اه و الله يا عمى الواحد ياما بيعيش و يشوف وانت هارش بقى
ــــــــــــــــــــــــــــــ
اسلام يوسف

يوصل سلامك يا باشا
و نورت

ـــــــــــــــــــــــــ

اباصيري
و الله و ليك وحشة

ــــــــــــــــــــــ

ابراهيم

هلا هلا انا دخلت عندك مالقيتش حاجة؟؟
انت فين يا عمى

ــــــــــــــــــــــــ

سااااااااااااااااهر



مبروك ع المدونين انك بقيت واحد منهم
يا عمى و يا اطيب قلب عرفته من بين كل اللي في المزيكا

ــــــــــــــــــــــــــ

ميموو

يخرب عقلك البوست الاخير يهبل

لكن تعالى هنا
هم اصحابك دول مش عايشين هنا و بيتفرجوا على تلفيزيون زينا
انت محسساني انك بتتكلمى عن منيرة المهدية و للا حد من زمان

ــــــــــــــــــــــ

مخلوووووف


انا و الله مش مصدق نفسي انك رديت عندي

نورت يا برنس

hamasat يقول...

الحقيقة ما سمعتش لانغام حاجه قبل كدا لكن عجبتني اوي الكلمات
وانا معك ايام الحب اللذيذه لازم تفضل ذكري حلوهومش لازم تتشوه لو حصل خلاف وعدم اتفاق حتي بين الزوجين انا لا اري اي داعي لان يجرح اي مخلوق في الاخر او يستهين به ابدا

Geronimo يقول...

اولا : شكرا على الغنوة التحفة

ثانيا : فين اللينك بتاعي يا علي

ثالثا : كنت اتمنى انك تكون ضيف عليا ف برنامج اذاعي يافنان يا جميل ... لو مش هتكسفني وهتدعمني .... زي ما كنت بحاول ادعمك ف يوم م الايام ... هستنى اميل منك .... تقولي اوكي

رابعا : فين الغنوة بتاعتي ولا هي وحشة قوي للدرجة دي

لو كلامك في البلوج صادق وحقيقي .... هترد اكيد
لو حتى بمجرد تمني الخير

Dr. Tantawy يقول...

كلمات الاغنيه جميلة اوي يا علوه
بس اللنك بتاعها مش شغال معايا خالص

تصدق انا طول عمري بحب انغام بس اول مره احس من فتره انها رجعت تاني لاصلها لانها كانت بعدت عن التألق ده فتره و بدأت مرحله عك فني لكن الحمدلله رجعت بالسلامه

تحياتي يا فنان

rose يقول...

الاغنية كتير حلوة
وانغام صوتها اكتر من رائع
شكرا كتير علي الكلمات
فعلا جميلة