الجمعة، مارس 09، 2007




ياااااااااااااا لهوى يا جدعان
هي الدنيا جرى فيها ايه
هم الرجالة راحوا فين
معلش خدتكوا في دوكة من غير ما اقول لكوا ايه اللي عامل فيا كدة
سمعتوا الاغنية اللي عاملها جوزيف عطية نجم ستار اكاديمي السنة اللي فاتت
و الله فيها مزيكا حلوة قوي و الواد بيغني بطريقة معقولة جدا بس كان عيبها الاستعراض المبالغ فيه في طبقات صوته لدرجة انه كان بيحزق و لا مؤاخذة عشان يجيب الطبقات العالية
لكن كل ده كوم و كلمات الكوبيله الاول كوم تاني
يا خبر يا جدعان
ايه اللي بيتقال ده
طب شوفوا كدة
......
.....
راح ارقص لك راح اغنيلك
راح اقضي عمري مقابيلك
قولي إنشالله
طلباتك و الله اوامر
نايم صاحي بقللك حااااااااااااااااااااااااااضر
...........
..........
و يكمل الاستعطاف و الشحتفة و يقوللها
خليكي الله يخليكي عمرى الجايي بشوفه فيكي
بدي انت تربي و لادي و تكوني الزينة في اعيادى
حبك شهادة ميلادي
ده طبعا غير الصرخة المدوية اللي اطلقها في بداية الاغنية
لااااااااااااااااااااااااااااااااااااااااااااا لااااااااااااااااااااااااااااااااا
لا تروحي


طبعا انا عاجبني جدا معنى الاغنية اللي هو اعتذاره عن غلطه في حقها و الاعتراف بالحق فضيلة
لكن عمرى ما هاستوعب ازاي وانا جاي اصالح حبيبتي اقوللها و النبي ارجعى
ربنا يخليكي و مايحرمك من اللي بتحبيهم
بس انت ارجعى و انا هاكنس و اطبخ و انضف الحمامات و
لا و ايه
اللي انت عايزاه هاتحزّم و ارقصلك و لو عايزة عجين الفلاحة كمان مفيش مانع
و اللي هاتطلبيه اوامر يا ست السيد
و تخيلوا معايا يا اخواننا لو فيلم بين القصرين اتعاد و الاخ ده فيه عامل دور امينة و نازل يبخر الست هانم
لا و للا الاحلى لو هي تسهر برا و تروح تشرب و تشوف عوالم و هو قاعد يدعيلها و يغسل هدومها و شراباتها و يربي العيال
المفروض كان يكمل بس انت ارجعى و انا هاكون خاتم في صباعك
لا خاتم ايه
انا فوطة مطبخ تمسحي بيها و هاقعد جنب الحيط بس انت ارجعى
اييييه
بتبصولي كدة ليه
انا ما تكلمتش الا ع الكوبليه اللي استفوني
بس تعالوا نتكلم عن الغنوة فعلا توزيعها حلو جدا
و الكليب كمان مهقول جدا
بس تعالوا هنا بيني و بينكم
مش البت الموديل اللي كانت معاه في الكليب بجد تعقد الصبيان و البنات في نفس و احد
المهم
اقوم انا لاحسن الغنوة تيجي من غير ما اشوفها
و ربنا يكرمكوا ياللي بتكتبوا الاغانى ابقوا خدوا بالكم انتو بتكتبوا لمطربين و للا مطربات و للا ربات البيوت

هناك 8 تعليقات:

18goosebumps يقول...

اولا تحياتى يا على
وثانيا مبرووووووووووووك على الشغل

انا كنت سمعت منك قبل كده الملاحظه على اغنيه لا تروحى

بس
انا مختلفه معاك في كام نقطه
خلينا نقول انا متفقه معاك في ايه
الاول
في كلمه راح ارقصلك ولو ان الرقص في لبنان مفهومه مختلف عن عندنا في مصر
وده بيبان في حفلات استار اكادمى مثلا
وطبعا انت عارف وفاهم الكلام ده اكتر منى

نقط الاختلاف هى اولا انا مش شايفه ((كمستمعه مش كمتخصصه )) ان في مبالغه في استخدام صوت جوزيف لانه عنده صوت بجد

الكليب رغم انه نسبيا كويس الا انى معجبنيش فكره السداح مداح الي في الكليب علشان مجرد انهم بيحبوا بعض

- كمان كلمات الكوبليه انا شفتها بوجهه نظر تانيه
انه الراجل اكيد يحب يعطى
(فاكر المريخ والزهره )
يبزل علشان زوجته او خطيبته
مفيهاش حاجه لما يقول ليها حاضر على طلابتها
يعنى ده مش زل ليه او او

مش حتكلم عن نقطه الغسيل وتربيه الاولاد والطبيخ وكده
لان وجهه نظري فيها انها المفروض تكون بالمشاركه بين الاتنين

بحب وعطاء

وبس

تحياتى

يا على يا انسان

Supernova يقول...

هههههههههه

تفكير بشكل جديد يا على

:)

بس تعرف مهو ممكن يكون غلطان غلطة تخلي اعتذاره اقوى من كده كمان

واللا ايه ؟

rosealia29 يقول...

هههههههه إنت كااارثة أزلية .. يعني وقعت أهله كلهم سودا إللي يقع تحت لسانك و تبقى مش معجب بيه .. و بعدين بغض النظر هو عمل ايه علشان كده بيستجدي عطفها .. التمس لأخيك 70 عذر .. لو خلصتهم كلهم .. تعالى و أنا أسلفك كمان شوية ...

علي الألفي يقول...

انا شخصيا لو كنت غلطان غلطة كبيرة جدا جدا جدا
عمرى ما هاستسمح اللي غلطت في حقه باي ارقص له عشرة بلدي عشان يسامحني
و والله انا باحب الاغنية لكن الجزء ده مستفز جدا ليا
طب انتو فاكرين كمان اغنية محمد محي اللي بيقول فيها
عذبني اتعبني ائلمني بس ارجع

smraa alnil يقول...

ههههههههههههههه
بقولك ايه يا علي
ما تغير اسمك وتبقي علي عطية

يعني محمد عطية وجوزيف عطية وخدوا الجايزة
غير انت بقي وانا ادعيلك

تليفزيونا بايظ بقاله 5 شهور
مقطيعين مايا ونور

عشان كدة لا قادرة احكم علي صوت ولا علي كليب
انا قلت انصحك مصيحة اخويا
وتبقي علي عطية

الأباصيرى يقول...

أممممممممم

على العموم الرجالة راحوا فى 73 خلاص

الموجودين دلوقتى عبارة عن نسخة مقلدة

كان ناقص يقولها

الليل الليل
الليل ياميمون
وكمان الليل
وأنا أكون ممنون

ومفيش مانع يعملها
رقصة نوم العزب
أو عجين الفلاحة

:(
حاجة تغيظ
يابو صلاح

el2ahwagi يقول...

elkalemaat gameela gedan ..

bas el link mosh shaghal ma3reftish asma3 w howa da elaham ...

gameel ennak bet3ala2 3ala aghani nas tanya belta2deer da.. !

مش أنا يقول...

يا علي يا نجم يا كبير اناشايف انه العلاقه بين اتنين بيحبوا بعض (بفرض ان الحب ده حقيقي)انه المبالغه في الاسف دليل علي الحب الشديد وبعدين لو لنت اعتذرت لحبيبتك بالاعتذار ده معتقدش انها هاتقولك طيب هزلي شويه علشان اصالحك لازم تكون هي كمان مقدرة كلامك وشاعرو بمشاعرك لأن بصراحه لو قالتلك هز يا علي ساعتها اديها باللي في رجلك وسيبها وامشي .في النهايه اعتقد انك لسه ماحبتش زيي بالضبط علشان كده منقدرش نحكم