السبت، يونيو ٣٠، ٢٠٠٧

كبشة تفاصيييييييييييييييييييييييل





نظرا لصعوبة حصولى على جهاز كومبيوتر الا على فترات متباعدة
فواضح ان ده هايبقى اسلوب تعاملنا مع التفاصيل
هانلم كل فترة شوية في زكيبة و نفرجكم ع الجديد
يعنى البوست ده ممكن يكون طويل شويتين
...............................................................




تحديث بخصوص الحفلة
فاكرين الصورة دى
الصورة دى كانت في الحفلة اللي فاتت و كنا كلنا متجمعين اكبر مجموعة من المدونين يكون فيها بورسعيدية
و كان اليوم ده من اسعد ايام حياتي و فرحت جدا لما اتعرفت بناس كتير مننا و بقينا بجد عيلة و اصحاب لحد النهاردة
انا هنا في بورسعيد و اتاكدت خلاص ان معظم اصحابي المدوني البورسعيدية و اصحابي من موقع بورسعيد اون لاين
مش هايقدروا انهم ييجوا الحفلة
وكنت حكيتلكو من زمان قد ايه بيبقى احساس سخيف جدا انى اكون باغنى في الحفلة و انا حاسس ان انا لوحدى
عشان كدة انا متعشم فيكو جدا انى الاقي فعلا اصحابي و اهلى معايا في الحفلة و الاقي العيون اللي بتبص لي و انا باغني و بتشجعنى و بتحسسني انى مش لوحدى
...............................................................
نرجع بقى للبوست
...............................................................
أجازة
بدون سابق انذار عرفت ان والدى صحته مش كويسة هنا في بورسعيد دخلت على مدير شئون العاملين عندنا في الشركة عشان اساله ازاى ممكن اخد اجازة و ياللعجب ان الراجل كان متفاهم جدا لدرجة انى قدرت اخد اربع ايام و هى تعتبر معجزة في حياتي و حياة اهلى
...............................................................
حنش
قبل ما امشي قابلنى واحد من زمايلي في الشغل و جارى في المستعمرة "ده هو الاسم اللي بيقولوه ع المنطقة السكنية اللي جنب الشغل"
المهم الواد قابلنى بمنتهى الشوق و اللهفة جوة عينيه و زى ما يكون هايقوللى بشرى
يا باشمهندس علي يا باشمهندس علي
ما عرفتش حصل ايه امبارح في المستعمرة
-خير يا توفيق
-مش لاقينا امبارح تعبان-ثعبان-حنش-في المستعمرة"ملحوظة و الواد متهللة اساريره و تظهر علامات السرور على وجهه"
-و قد ايه التعبان ده يا توفيق
-ييجي حوالي مترين و نص يا باشمهندس
-يا صلاة النبي يا صلاة النبي و قتلتوه يا توفيق
-لا يا باشمهندس دا الواد شافه من هنا و قعد يجرى و يصرخ
و هنا تاتى المفاجأة
-و كان فين مكانه يا توفيق
-جنب سور المدرسة يا باششمهندس
ملحوظة سور المدرسة ده جنب بلكونة شقتى و العاقبة عندكم في المسرات
لولولولولولولوىىىىىىىىىىىىىىىىىىىىىىىىىىىى

............................................................
الست انغام
نرجع بضهرنا للزمن حبتين
فاكرين لما قولتلكو هاسمع شريط انغام و اجى احكيلكو
خلاف كبير داير بيني و بين صديقي احمد شلبي بسبب اغنية في الشريط ده
الاغنية دى ساحرانى جدا وواكلة عقلي
اولا المفروض لو انتو الجهاز عندكو سليم و الريل بلاير مافيهوش مشاكل هاتكونوا سامعينها دلوقت
الغنوة دى اسمها غيرتني
كلامها بيقول
غيرتني
مابقيتش انا
مابقيتش اصدق أي حاجة
غيرتني
معقول انا
بقيت اخاف من كل حاجة
هو انت ايه
مش بردو انسان زينا و ممكن تحس
و للا انت ايه
كل اللي عارفه عن الحياة تاخد و بس
غيرتني
خلتني اندم انى كنت بجد باحلم اعلمك
تقدر اللي ما بين ايديك
لازم تهون لما تكون انسان ضعيف
مش قد قلبي و حبي ليك
هو انت ايه
مش بردو انسان زينا و ممكن تحس
و للا انت ايه
كل اللي عارفه عن الحياة تاخد و بس

الحالة للي الغنوة دى معيشاني فيها مش طبيعية
اولا الكلام صادمنى جدا و مفاجئني انى حد و صل للمستوى ده من الكراهية في الغناء
كمان اتفاجئت من اداء انغام في الاغنية دي
لانى اتعودت في الفترة الاخيرة ان انغام لماالطبقة بتعلى منها بتستخدم الصوت المستعار
يعني بتستخدم صوت حاد و حنون نوعا ما
لكنها هنا كانت بتصرخ مع الكلام و منفعلة جدا و ده خلانى اول مرة سمعتها روحت مصفق وقايل
ايوة كدة يا ست
انفعلى بقى
كمان التوزيع بتاع الغنوة دى متكامل قوي
يعنى اختيار الترومبيت للصولوهات و توزيع الوتريات و الهارمونى اللي محطوط كله راكب على بعض
و بصراحة باقولها تانى
انغام
شكرا لانك موجودة بيننا
..................................................................
ازمة السكن
قررت بيني و بين نفسي و من قبل موضوع التعبان حتى انى اسيب السكن في المستعمرة
انا بقيت حاسس انى مخنوق قوي فيها
و ان العزلة اللي اتفرضت عليا فيها اصبحت مكبلة حياتى
انا عشان انزل نت في سيبر بقيت مضطر انى اقطع مشوار حوالى اربعين كيلو
يعني تقريبا المسافة بين بورسعيد و دمياط
و انا كمان مش قادر اشوف أي حد و لا اتكلم مع أي حد من اصحابي
و حتى الحلم اللي انا جيت القاهرة علشانه
مابقيتش قادر انى اعمل أي حاجة فيه بسبب البعد
عشان كدة انا بدات ادور من تانى على سكن في القاهرة
و حديدا في الجيزة او الهرم او فيصل
و اللي يلاقي حاجة حنينة و رخيصة و بنت حلال يقوللى و يبقاله الاجر و الثواب عند ال
له
.....................................................................

النعمة



محدش بيقدر معنى النعمة اللي لما تزول من وشه
هو ده و الله اللي على لسانى
فاكرين قد ايه انا كنت مخنوق في بورسعيد و شايف انها مانعانى من انى احقق حلمى و كلام كتير من ده
دلوقت انا لو اقدر ابوس اسفلت شوارعها مش هاتردد
و الله بلدنا دى بجد نعمة
كفاية لطشة هواها ع الوش و انت داخلها و معدى الجمرك
كفاية نظافة شوارعها
و اللي مهما اتزحمت ما بتبقاش نص اللي في القاهرة
كفاية رخص الحياة فيها
و كفاية انها بورسعيد
اللي فيها احلى ايام الواحد
و فيها اصعب ايام الدراسة و اسودها
و اللي لما الواحد بيفتكرها دلوقت بيمصمص شفايفه و يقول
و الله كانت ايام حلوة
ربنا ما يحرم حد من اللي ليه
و عمار يا بلدنا

...................................................................
افتعال مشكلة
كنت حكيت لكو زمان انى كنت هاغنى مع فرقة جديدة اسمها صبا
و فعلا عملنا الحفلة
و لكن شاء رب العالمين ان الحفلة دى ما كانتش موفقة
يعني حصل غلطات كتيرة ع المسرح
و احداث تانية مؤسفة
و سواء الغلطات دى منى او من أي حد تانى في الفريق فالنتيجة واحدة
الحفلة كلها ماكانتش مظبوطة
و نزلنا كلنا من المسرح و قولنا كلمة واحدة
احنا الحفلة دى نشيلها من حساباتنا و نتكلم من اول و جديد ع الجاى ان شاء الله
لكنى اتفاجئت بناس من الفريق بيدخلوا هنا عندى ع المدونة و يعاتبونى ويتهمونى بانى باتجاهل وجودى معاهم او حلقت للحفلة
و طبعا انا و الله لانى ما حبيتش احكي كل اللي فات ده من زمان و هم اللي خلونى اقول حاجات انا كنت رافض انى اقولها خوفا على مشاعر ناس انا باحبهم و باحترمهم
.
و ان شاء الله حفلتنا الجاية مع فريق صبا يكون متحضر لها كويس و تبقى اقوي و احلى من اللي فاتت
.................................................
تحديث
شكر وواجب عليا لصديقي اللدود احمد عيسى على تعبه معايا في تغيير شكل المدونة
انا مبسوط قوى بالنيو لوك و يا رب يعجبكو
انا دلوقت قاعد مع احمد شلبي في اخر تلت ساعات ليا في بورسعيد
و الساعة خمسة الفجر ان شاء الله هايتحرك بيا الاوتوبيس متوجها للقاهرة
بجد ادعووووووووووولي قوي

السبت، يونيو ٢٣، ٢٠٠٧

سمعنى سلام ذئاب الجبل




مالحقتش ارجع يا اخواننا من بورسعيد الا و كانت هناك مفاجاة ليا


قرر مديري المصون ادامه الله انه يخليني معاه من المهندسين المشرفين على تركيب الكابلات على طريق الكريمات و بني سويف


و كعادتى




استقبل المفاجات ب رد فعل واحد ثابت لا يتغير


الا و هو الاكتئااااااااااااب و الوجوم العنيف


المهم


مالوش فايدة


قضا ربنا نفد


نزلنا يا اخواننا اخدنا عربية الشغل"ملحوظة دى اول مرة استخدمك عربية الشركة في مامورية"


اتقابلنا الساعة8و اللي فاكره ان احنا وصلنا الجبل الساعة10صباحا


اقوللكم ايه و اعيدلكم ايه


بجد سبحان الله ع الجبل و الصحرا و الوديان والحفر-جمع حفرة- اللي ممكن تاخد الواحد مايبانلوش قرار


بس سيبكم من ده


الاحلى و الاحلى كانت حكايات المهدسين اللي معانا عن اللي بيقابلوه


يا صلاة النبي يا صلاة النبي


اشي ضرب نار و اشي مطاريد و اشي ناس تثبتهم و تقشط اللي معاهم


بجد الواحد كان هايطرشق من السعادة و يفرقع من الانبساط


و فجاة بابص لاقيت على مسافة مش بعيدة عننا كدة دخان ابيض لونه مميز


و سالت المهندس اللى كان معانا


قاللي


لا عادي


دول جماعة من المطاريد سارقين الكابلات و بيسيحوها


اصل بردو كل حاجة و ليها اصول


اولا ببيسيحوا البلاستيك اللي ع الكابلات و بعد كدة يبداوا يسيحوا النحاس و المكونات المعدنية


يعني يا جماعة فشر كل مصانع الحديد و الصلب


دلوقتي صناعات المطاريد كيان قائم بذاته


و يا ترى بتتحسب الضرايب عليهم ازاي


مش مهم


و ببلاهتي المعهودة كنت هاسال اذا كان ممكن نقرب اكتر من المدخنة


لكن المهندس اللي معايا كان هارش انى هاسال سؤال اهبل زي ده


و قاللي من نفسه


احنا لو قربنا هناك ممكن نرجع من غير العربية او من غير هدومنا


دده لو رجعنا اساسا


و ماكانش على لسانى وقتها غير الكلمتين بتوع كل موقف


ايه اللي انا عملته في نفسي ده


انا كان مالي و مال القرف ده


و فجاة الافتاء بدات تلعب دورها


كان معانا اتنين سواقين


واحد افتى اننا نتحرك يمين و التاني افتى شمال


و مشينا مع اللي قال يمين


و احب اطمنكم انا توهنا لمدة ساعتين اتنين بس في الصحرا لغاية ما طلعنا منها و الحمد لله


يخلص اليوم على كدة؟؟


و دى تيجي


بعد ما رمانى سواق الشركة في الجيزة قولت اخد اى محروق مكروباظ يرميني ناحية بيت شريف صاحبي


و المكروباظ طلع من هنا و قامت حريقة


خناق والعة بين الركاب و السواق


اصله قرر من نفسه انه يرفع الاجرة ربع جنيه بحاله


و الشتايم بقت طايرة من كل ناحية


و ايه


من المنقي


الحمد لله وصلت حوالي الساعة تلاتة و نص


و يومها كان عندى بروفة بالليل


أأأأأأأأأأأأأأأأأأأأأأأأأأه


بمناسبة البروفة


ماتنسوش ان شاء الله ميعاد حفلتي


و نفسي تبقى بجد اكبر تجمع مدونين في الدنيا كلها


كمان عايز اشكر صديقي جدا أحمد البليسي ع البوستر الجامد اللي بعتهولى


...............................................


علشان محدش يقول انى داخل عليكم بايدي فاضية انا جايب لكو معايا هدية


صديقي المطرب الجامد جدا شريف اسماعيل كنت قاعد معاه و بنغني سوا و لاقيت عنده تسجيل حلو قوي بصوته لاغنية كلموها عنى بتاعة تامر عاشور يا رب يعجبكم زي ماهو عاجبني جدا




..............................................


طلب من زمان ما طلبتهوش منكم


بس حاسس انى محتاجه قوي


بالله عليكم


و بجد


ادعوووووووووووووووووولىىىىىىىىىىىىىىىىىىىىى




الخميس، يونيو ١٤، ٢٠٠٧

حفلة....أصدقاء....انغام...حكمة


معلش لو العنوان يلخبط
بس بجد و الله واحشني جدا الرغى و الحكى معاكم
و انا اسف جدا لو كان اي حد منكم اتضايق من ردي في موضوع استفزنى و خلانى اخرج عن اسلوبي و طريقتي في الكلام
بس ده مش موضوعنا
انا قررت اجمع اهم و احلى حاجات حصلت و عشتها الفترة اللي فاتت و اجم\عها في بوست ممكن يطول شوية بس عادي بقى
الواحد مش بيكتب كل يوم
و عشان محدش يقول داخل بعد الغيبة بايدي فاضية
انا جايبلكو خبر



.......................................................................
عندى ان شاء الله حفلة جامدة جدا مع فرقتي
Step by step
الحفلة هاتكون ان شاء الله الخميس 5/7 في ساقية الصاوي
الحفلة المرة دى فيها حاجات جديدة كتير و مخوفانى
بس ربنا معايا
و هاستناكو كلكم ان شاء الله
و اهو لا امتحانات و لا يحزنون و ان شاء الله تكون الحفلة دى اكبر اجتماع بلوجرز مصريين عرفه التاريخ المعاصر و ما قبل التاريخ
.....................................................................................

نبدا الرغى بقى في مواضيع حلوة
طبعا كلكم حفظتم ان انا مش موجود في بورسعيد و نقلت حياتى و عيشتي و دنيتي للقاهرة بعد استلامى لشغلي الجديد
و كانت اهم مشكلة ليا في حياتي تؤرقنى جدا هى الوحدة
انا باكره انى اكون وحيد
انتو عارفين
انا ممكن اقعد كتير ماشوفش حد من اصحابي بس احساسي انهم جنبي و موجودين بيطمني جدا
عشان كدة لما سافرت كانت اكبر مشكلة عاملالى قلق السنين هى الوحدة
بس ربنا ما بيسيبش حد
و زى ما بيقولوا بيقطع من هنا و بيوصل من هنا
انا الحمد لله ربنا اعطانى شلة حلوة قوي
و بسرعة جدا بقينا اصحاب قوي
كلهم كنت اعرفهم قبل ما انزل لكن العشرة بقى حاجة تانية
و بسرعة جدا بقيت حاسس ان الناس دول بقوا مهمين عندى و نفسي اشوفهم على طول تحبوا تتعرفوا بيهم؟

تعالووا معايا









شريف اسماعيل
مطرب جامد جدا
و على فكرة اغانيه مكسرة الدنيا ع الاف ام
اااااااااااااه طبعا ماهو ده بقى اللي اسمه شريف و بشرى
بس سيبكم من ده
شريف ربنا اعطاله قلب كبير قوي قادر انه يساع ناس كتير قوى حواليه و انا شخصيا جربت ده اكتر موقف في ده
و كل ليلة بيته مجمع كل الناس اللي هاحكيلكم عنهم كمان شوية





أشرف حصافى
باحس ان ابرز حاجة ممكن الواحد يلمسها في الواد ده الجدعنة
و التصرفات الرجولية
الجراة و الصراحة و مالوش غير انه يصارحك باي شئ ما عجبوش ممكن تكون عملته
و ده خلانى اقرب منه اكتر و احترم التعامل معاه اكتر
حاجاة كمان اعرفها عن قرب عن اشرف
انه في سبيل تحقيق حلمه ممكن يقتل نفسه شغل و تعب و عشان كدة اكيد انه هايلاقي نتيجة لكل ده
او تاكا
اسمه الحقيقي ياسر
اول حاجة تلفت في التعامل معاه انكم لازم تلاقي نفسك بتتعامل مع دماغ جامدة و جواها حاجات كتير بيجتهد انه ما يبينهاش للناس
باحب جدا تعبيرات وشه و هو بيسمعنى باغنى
و عمرى ما عرفت انفذ له طلبه باني احفظ اغاني تامر عاشور و اغنيهاله

محمد شاهين
ده بقى شخصية سهل جدا انها توصل لقلب أي انسان بسرعة عجيبة
ابرز حاجة انك تلاقي تصرفت طفولية جدا بتتطلع منه من غير حساب
بس ساعات تلاقيه بيستغرب جدا من حاجات عادية جدا و بيتعامل عادى جدا مع حاجات ممكن انها تخلي الواحد يستغرب قوى
مجتهد في شغله و ان شاء الله ربنا هايكرمه و يبقى سوبر ستار جامد جدا

حسام داغر
صعب جدا انى الخص الشخصية دي في انه مجرد عبقري كوميديا
او انه انسان طيب قوي و قلبه كبير
حسام هايكون من اهم كوميديانات الدنيا جدا
الواد ما بيسكتش و طول ماهو قاعد بيطلع قفشات و حاجات تهلك كل الموجودين من الضحك العجيب
.......................
تصدقو انى بادعي ربنا كل يوم انه يخليلي اصحابي دول و ما يحرمنيش من أي واحد فيهم
..........................................................
نيجي بقى لحدث مهم جدا كان الاسبوع ده
شريط الست انغام نزل يا ناااااااااااااس
على فكرة انا لما اسمع و اركز ها تلاقوا كذا بوست ورا بعض عن الالبوم
بس اللي لفتني ان الاغانى كانها بتتكلم عنى قوي
كل تفصيلة في اغانى كتير باحس انى عشتها بجد و اهمها الغنوة اللي المفروض انكم سامعينها دلوقت

ياللا بقى
ماهى بردو الست انغام
مش أي حد


مع ملاحظة انى متضايق جدا من غلاف الالبوم و الصور العجيبة جواه
.....................................................



تجربة عشتها الايام القليلة اللي فاتت طلعت منها بنتيجة
اقروها و ماتحاولوش انكم تفكروا في ظروف التجربة
"لو لاقيت حد يحبك قوي و انت ماقدرتش انك تبادله نفس المشاعر حاول تانى و لما تفشل و تلاقي نفسك مش قادر تحبه اكيد هو لازم يلتمسلك العذر
بس خد بالك انك لو كنت مكانه عمرك ما كنت هاتلتمس أي عذر للي سابك"


الخميس، يونيو ٠٧، ٢٠٠٧

الى اللا اخ او اللا اخت اللس مسمي نفسه مجهول

ببساطة و من غير لف و لا دوران
انا عامل المدونة دى مساحة جوانية قوي باتكلم فيها عن تفاصيل جوانية جدا
و عاملها ساحة و مساحة فاضية لكل اللي باحبهم و بيحبونى
وواضح انك مش منهم
و لهذا اتمنى الا تسعد عيوني برؤية ردودك السخيفة و اللي ارهقنى مسحها فقلت ابلغك و تتصرف انت من منطلق انك احتمال يكون عندك دم و تحرمنى من ردودك
او فيه حل تانى
انك يكون لك وجود حقيقي بيننا و بين مدوناتنا و ساعتها نعرف شخصيتك فعلا و نقدر نعرف حالتك و يمكن نساعدك في علاجها
...............
...........
.....
....
.
.
.
.
الكلام ده موجه لشخص سخيف بيتعمد يدخل يسيب ردود باسم مجهول و بيستخدم الخاصية اللي بتخلي الردود مفتوحة لكل الناس و لا هو مدون و لا نيلة
..
امضاء
علي الالفي
واتحد مكلكع جدا

السبت، يونيو ٠٢، ٢٠٠٧

يخرب بيت عقلي
ايه اللي انا هببته ده
انا عمرى ما تخيلت انى اوصل للدرجة دى و اعمل اللي انا عملته
ازاى قدرت انساها و هى عمرها ما نسيت ولا واحد مننا
اه
ده انا طلعت ندل ندالة
الحكاية من اولها انى لما رجعت بورسعيد
كلمتها
و كنت مستعجل جدا ع المسنجر
و بعد حمد الله ع السلامة و الحاجات دى
و هى اساسا ما قطعتش السؤال عنى هنا و انا لوحدى
و هى كدة معانا كلنا
لاقيتها بتكلمنى و العتاب مالي كلامها
على فكرة انت ماقولتليش كل سنة و انت طيبة
و من ساعتها و انا وشي منها في الارض
مش عارف اعمل ايه
دي يوم بعد يوم بتكلمنى تسال
و متابعانى بدعوتها هى و مامتها اللي بقوا بالنسبالي عيلة تانية
و تانى يوم كانوا كل اصحابنا عاملين لينا احتفال بمناسبة عيد ميلادنا احنا الاتنين
و المصيبة انها اتعاملت معايا عادي
كان نفسي تعاتبني
او تزعق لي
او حتى تدور وشها
لكن و عشان هي
بكل اخلاقها و طيبتها و جدعنتها
و وقفتها جنبنا كلنا مهما كان فيها
عملت و لا كانه فيه حاجة
انا مش عارف اعتذرلها ازاى
بس انا حابب انى اقول لها هنا
و كا اللي بيحبوها كمان يقولولها معايا
كل سنة و انت طيبة يا
و تفضل حواديتك مجمعانا كلنا
و نشوفك احسن و احسن
يا احلى و اعقل و اجدع اخت في الدنيا
و تاني و تالت و عاشر
كل سنة و انت طيبة يا روووووووووزاااااااااااااااااا
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
خارج الموضوع
انا مستنيكم كلكم بكرة ان شاء الله تنوروا حفلة فرقة صبا في مسرح قاعة الحكمة في ساقية عبد المنعم الصاوى
و انا ها غنى معاهم بكرة خمس اغانى احلى من بعض
بجد حاولوا تيجوا