الخميس، يونيو 14، 2007

حفلة....أصدقاء....انغام...حكمة


معلش لو العنوان يلخبط
بس بجد و الله واحشني جدا الرغى و الحكى معاكم
و انا اسف جدا لو كان اي حد منكم اتضايق من ردي في موضوع استفزنى و خلانى اخرج عن اسلوبي و طريقتي في الكلام
بس ده مش موضوعنا
انا قررت اجمع اهم و احلى حاجات حصلت و عشتها الفترة اللي فاتت و اجم\عها في بوست ممكن يطول شوية بس عادي بقى
الواحد مش بيكتب كل يوم
و عشان محدش يقول داخل بعد الغيبة بايدي فاضية
انا جايبلكو خبر



.......................................................................
عندى ان شاء الله حفلة جامدة جدا مع فرقتي
Step by step
الحفلة هاتكون ان شاء الله الخميس 5/7 في ساقية الصاوي
الحفلة المرة دى فيها حاجات جديدة كتير و مخوفانى
بس ربنا معايا
و هاستناكو كلكم ان شاء الله
و اهو لا امتحانات و لا يحزنون و ان شاء الله تكون الحفلة دى اكبر اجتماع بلوجرز مصريين عرفه التاريخ المعاصر و ما قبل التاريخ
.....................................................................................

نبدا الرغى بقى في مواضيع حلوة
طبعا كلكم حفظتم ان انا مش موجود في بورسعيد و نقلت حياتى و عيشتي و دنيتي للقاهرة بعد استلامى لشغلي الجديد
و كانت اهم مشكلة ليا في حياتي تؤرقنى جدا هى الوحدة
انا باكره انى اكون وحيد
انتو عارفين
انا ممكن اقعد كتير ماشوفش حد من اصحابي بس احساسي انهم جنبي و موجودين بيطمني جدا
عشان كدة لما سافرت كانت اكبر مشكلة عاملالى قلق السنين هى الوحدة
بس ربنا ما بيسيبش حد
و زى ما بيقولوا بيقطع من هنا و بيوصل من هنا
انا الحمد لله ربنا اعطانى شلة حلوة قوي
و بسرعة جدا بقينا اصحاب قوي
كلهم كنت اعرفهم قبل ما انزل لكن العشرة بقى حاجة تانية
و بسرعة جدا بقيت حاسس ان الناس دول بقوا مهمين عندى و نفسي اشوفهم على طول تحبوا تتعرفوا بيهم؟

تعالووا معايا









شريف اسماعيل
مطرب جامد جدا
و على فكرة اغانيه مكسرة الدنيا ع الاف ام
اااااااااااااه طبعا ماهو ده بقى اللي اسمه شريف و بشرى
بس سيبكم من ده
شريف ربنا اعطاله قلب كبير قوي قادر انه يساع ناس كتير قوى حواليه و انا شخصيا جربت ده اكتر موقف في ده
و كل ليلة بيته مجمع كل الناس اللي هاحكيلكم عنهم كمان شوية





أشرف حصافى
باحس ان ابرز حاجة ممكن الواحد يلمسها في الواد ده الجدعنة
و التصرفات الرجولية
الجراة و الصراحة و مالوش غير انه يصارحك باي شئ ما عجبوش ممكن تكون عملته
و ده خلانى اقرب منه اكتر و احترم التعامل معاه اكتر
حاجاة كمان اعرفها عن قرب عن اشرف
انه في سبيل تحقيق حلمه ممكن يقتل نفسه شغل و تعب و عشان كدة اكيد انه هايلاقي نتيجة لكل ده
او تاكا
اسمه الحقيقي ياسر
اول حاجة تلفت في التعامل معاه انكم لازم تلاقي نفسك بتتعامل مع دماغ جامدة و جواها حاجات كتير بيجتهد انه ما يبينهاش للناس
باحب جدا تعبيرات وشه و هو بيسمعنى باغنى
و عمرى ما عرفت انفذ له طلبه باني احفظ اغاني تامر عاشور و اغنيهاله

محمد شاهين
ده بقى شخصية سهل جدا انها توصل لقلب أي انسان بسرعة عجيبة
ابرز حاجة انك تلاقي تصرفت طفولية جدا بتتطلع منه من غير حساب
بس ساعات تلاقيه بيستغرب جدا من حاجات عادية جدا و بيتعامل عادى جدا مع حاجات ممكن انها تخلي الواحد يستغرب قوى
مجتهد في شغله و ان شاء الله ربنا هايكرمه و يبقى سوبر ستار جامد جدا

حسام داغر
صعب جدا انى الخص الشخصية دي في انه مجرد عبقري كوميديا
او انه انسان طيب قوي و قلبه كبير
حسام هايكون من اهم كوميديانات الدنيا جدا
الواد ما بيسكتش و طول ماهو قاعد بيطلع قفشات و حاجات تهلك كل الموجودين من الضحك العجيب
.......................
تصدقو انى بادعي ربنا كل يوم انه يخليلي اصحابي دول و ما يحرمنيش من أي واحد فيهم
..........................................................
نيجي بقى لحدث مهم جدا كان الاسبوع ده
شريط الست انغام نزل يا ناااااااااااااس
على فكرة انا لما اسمع و اركز ها تلاقوا كذا بوست ورا بعض عن الالبوم
بس اللي لفتني ان الاغانى كانها بتتكلم عنى قوي
كل تفصيلة في اغانى كتير باحس انى عشتها بجد و اهمها الغنوة اللي المفروض انكم سامعينها دلوقت

ياللا بقى
ماهى بردو الست انغام
مش أي حد


مع ملاحظة انى متضايق جدا من غلاف الالبوم و الصور العجيبة جواه
.....................................................



تجربة عشتها الايام القليلة اللي فاتت طلعت منها بنتيجة
اقروها و ماتحاولوش انكم تفكروا في ظروف التجربة
"لو لاقيت حد يحبك قوي و انت ماقدرتش انك تبادله نفس المشاعر حاول تانى و لما تفشل و تلاقي نفسك مش قادر تحبه اكيد هو لازم يلتمسلك العذر
بس خد بالك انك لو كنت مكانه عمرك ما كنت هاتلتمس أي عذر للي سابك"


هناك 17 تعليقًا:

18goosebumps يقول...

سمدله بالحلامه يا على

ربنا يخليلك اصحابك و يبارك في صداقتكم دى يا على

على فكره كل واحد فيهم حسيت صورته معبره اوووى عن دماغه
وعن صفاته زي ما قولت

الجمله الاخيره مش حعرف اكتب عنها تعليق

والبوم انغام اسمعه واقولك

حنشوفك بكره في الحفله ان شاء الله

ساعه الغروب يقول...

اولا بجد ليك وحشه جامده جدا جدا

ثانا بالنسبه للحفله بتاعتك ان شاء الله ربنا يسهل و نكون كلنا موجودين معاك باذن الله

وبالنسبه لاصدقاءك
ربنا بجد يديم الصداقه اللى بينكو
وتفضلوا على طول مع بعض

بالنسبه لالبوم انغام دا اساى هيتسمع وهنرد عليك اكيد

اما الجمله الاخيره
فهبقى اقولك لما اشوفك باه

سلام وربنا معاك ويوفقك باذن الله

سلام مؤقت

:)

rosealia29 يقول...

حمد لله على سلامتك يا أجمل صوت و قلب في الدنيااااااا .. نورت بورسعيد - ده أساسي - أكيد الواحد سعيد بخطواتك الثابتة و الواثقة في القاهرة .. و زي ما قالت جوسي كل أصدقائك الجدد دماغهم باينة جداً من صورهم .. و الحمد لله انا شخصياً اطمنت عليك جداً وسط المجموعة دي ... فا ربنا يباركلك و يكرمك و يوفقك .. و تأكد إن أي حاجة حلوة بتحصل معاك في القاهرة دي كمية دعوااات كتيرة لناس كتيرررر بتحبك

بالنسبة للحفلة إن شاء الله .. نكون معاك .. و انا إن شاء الله هارتب نفسي على كده .. و حفلة انهرده إن شاء الله تكون كمان تحفة .. ما إنت إللي عودتنا على كده ..



أنغام كلامها بيضرب و بيلمس مع كل الناس ..

ماسة الحب يقول...

بص ياعيلوة
اولا حمد لله علي سلامتك
وربنا بجد يخليلك اصحابك الجدد ويعوضوك شويه عن بورسعيد وعلي فكرة فيهم ناس معروفين لينا اوي وشكل كلامك عليهم يدي انطباع كويس عنهم ربنا يوفقك
انشاء اللله الحفلة تكون هايلة ومتخفش خير باذن الله
والله البوم انغام لما اسمعه نبقي نتكلم فيه
وبالنسبه لاخر البوست
انا جربت والله ياعلي وعندك حق فعلا انت ممكن انك تنتظر من حد انه يتصرف نفس تصرفك بس ياخسارة الناس مش كلها ........

وينكى يقول...

حمدلله على السلامه ياعلى
واحشانى طلتك ورغيك وكل كلامك
ماكنتش فاكره انك لما تقرب فى المسافه كده هاتبعد فى الاتصالات
بس مش مهم
اهم حاجه انك تكون كويس ومرتاح
انا متأكده بجد من كل قلبى ان ربنا رزقك بأصحاب جامدين جدا ربنا يخليهملك ويخليهملى كمان
دى الدنيا فعلا صغيره قوييييييييييي
حسام داغر واوتاكا وشاهين من أقرب واحب الناس لقلبى
وانا متأكده انك كل ماتقرب منهم هاتحبهم اكتر واكتر
ان شاء الله هاحاول اجى الحفله
كفايه الحفله اللى فاتت ماحضرتهاش
انا قربت اخلص امتحانات
ادعيلييييييييييييييييييي

REEMOO يقول...

حمدالله بالسلامه يا على
انا سعيده انك بدات تستقر بوجودك فى القاهره
وأكيد وجود اصدقاء جنبك هيخليك تحس انك مش لوحدك

يارب تتوفق فى حفلاتك
رغم انى مش عارفه احضر ولا واحده فيهم
يارب بس اخلص الشغل الى ورايا هنا علشان اقدر انزل القاهره واحضرلك حفله من حفلاتك

الكلمه اللى فى نهايه البوست صعبه أوى
مش عارفه اعلق عليها
بس هى وصلت اوى بجد

على فكره البوم انغام تحفه
عجبنى جدا
انا اصلا بموت فيها

تحياتى

sad_doraa يقول...

يا بختك بيهم ياعلي ربنا يخليهملك وميبعدكش عنهم ابدا
والله نعمة محدش بيفكر فيها
والي اتحرم منها بس الي يفهمها
تحياتي
ربنا يوفقك

gogo we bas يقول...

حمد الله على السلامة يا بشمهندس
ربنا معاك
حفلة يوم الخميس كانت عسولة بس ليا تعليق صغنن عليه...معلش بقى حاول تقبله من ناقدة على قد حالها

اوعى تغنى مرة تانية وانت مش مركز شكلك وصوتك كانو بيقولو كده) ثانيا ..كل اللى كانوا بيغنوا جمدين وحلوين بس حسيت انى تايهة فى الاصوات من كتر مداخلتكم سوا

ثالثا وده الاهم.. عايزين نشوف حفلة جامدة فى يوم 5/7 وده نظرا لحدوث حدث تاريخى عظيم وهو هبوطى الكريم لارض المحروسة واقامتى فيها لمدة شهر كامل من اول شهر سبعة... فأكيد اكيد ان شاء الله هطب عليكم

بس ياريت تفاصيل بسيطة كده.. المعاد بالظبط بيبقى الساعة كام؟ وبيرحولها ازاى دى(معلش اصلى اول مرة اروح البندر)وبتخلص امتى ؟
بسييييييييييييييييطة خالص مش كده


يلا بقى ربنا معاك

عمرو غريب يقول...

حمدالله علي السلامة

زحل الفلكي يقول...

شوف دي يا علي

دي هدية من واحد صاحبنا مش راضي يقول هو مين

ابقا اعرفه انت بقا

http://img169.imageshack.us/img169/7539/alynb5.jpg

واي خدعة

شيماء الجيزى يقول...

عارف يا على

رغم ان البوست فعلا يجنن وعجبنى جدا
بس آخر جزء

انا متفقه معاك فيه بشكل كبير اوى

وكمان تعالى هنا

انا اجلت لقاء المدونين فى بورسعيد بسبب حفلتك
وعلشان الكل يستمتع
ويحضر حفلتك

ويجى بردو اللقاء

امال انت مش هتيجى
نقلت القاهره خلاص

طب مش هتيجى لقاء المدونين فى بورسعيد ولا ايه؟

اتمنى تشوف تفاصيله على مدونتى
واتمنى اكتر
انك تيجى

تحياتى ليك

Ana keda يقول...

ازيك يا على عامل ايه
على فكرة انت صوت جامد جدا والناس دى بيطلعوا فى التلفزيون
ههههههههه اه بحب الاتنين دول اوى
انغام الشريط تحفة مووووووووت بجد انانزلته الفجر وتنحت فى الشريط لانها انغام وهى فعلا انغام صوت حنين وطيب اوى الشريط فى اغنية بجد حسيتها اوى مبحبش اكيد عارفها وباقى الشريط تحفة بجد ليهحواديت عندى كتير بيتهيالى محدش يعرف يعمل اللخبطة دى غير انغام الى تلخبط احساسك من جوه

يا رب اقدر اجى حفلتك ربنا معاك يا على
وربنا يخليك اصحابك بجد اوى احنا من غير اصحابنا الى بجد ويقفوا معاك اوى ويطلعوك من حالاتك المختلفة منبقاش حجات كتير

إنـســانـة يقول...

اوتاكا
اسمه الحقيقي ياسر
اول حاجة تلفت في التعامل معاه انكم لازم تلاقي نفسك بتتعامل مع دماغ جامدة و جواها حاجات كتير بيجتهد انه ما يبينهاش للناس
باحب جدا تعبيرات وشه و هو بيسمعنى باغنى
و عمرى ما عرفت انفذ له طلبه باني احفظ اغاني تامر عاشور و اغنيهاله

اخوياااااااااااااااا

كنت هحطله صورة فى المدونة عندى بس انت سبقت بقا بما إنكوا طلعتوا صحاب

صحيح الدنيا صغيرة اوى يا جدعان

وبالنسبة للباقى اللى هما اصحاب اخويا بردو اللى بيجمع بينهم كلهم انهم محترمين اوى وفنانين بجد
فعلا ونعم الأصدقاء
ربنا يديم الود والمعروف بينكوا دايما يارب

تحياتى

علي الألفي يقول...

جوسي اللى سابقة السن

يا رب
ـــــــــــــــــــــــــــــــــ
ساعة الفروب
عجبني جدا التعليق اللي قولتيهولى ع الجملة
ـــــــــــــــــــــــــــــــــ
روزا
و الله و انا كمان باحس جدا بدعوات الناس اللي بيحبوني و استنى منى مقاجات في المهرجان
ــــــــــــــــــــــــــــ
ماسة الحب

شكرا على مرورك
ــــــــــــــــــــــــــــــ

غير معرف يقول...

el o'3neya gamda gedan ya 3aly we a7sant el e5teyar la2enaha o'3neyety elmofadala men elshreet
bas bardo alpum an'3am elly fat kan a7san
laken taoze3at el alpum dah gamda gedan
we 7adar nafsak ya abo 3ally le elly gay fe mofaga2at keteer mestaneyak
we 3ala fekra a7san bekteer
amr drummer saba band

sad_doraa يقول...

على انا هاجي القاهرة يوم الجمعة الي جاية دي ان شاء الله اجي حفلتك قول يا رب اجيييييييييييييييييييييييي

S H A H يقول...

حمدالله على سلامتك يا نجم

عايزين نشوف شريط مغرق الدنيا