السبت، يونيو ٢٣، ٢٠٠٧

سمعنى سلام ذئاب الجبل




مالحقتش ارجع يا اخواننا من بورسعيد الا و كانت هناك مفاجاة ليا


قرر مديري المصون ادامه الله انه يخليني معاه من المهندسين المشرفين على تركيب الكابلات على طريق الكريمات و بني سويف


و كعادتى




استقبل المفاجات ب رد فعل واحد ثابت لا يتغير


الا و هو الاكتئااااااااااااب و الوجوم العنيف


المهم


مالوش فايدة


قضا ربنا نفد


نزلنا يا اخواننا اخدنا عربية الشغل"ملحوظة دى اول مرة استخدمك عربية الشركة في مامورية"


اتقابلنا الساعة8و اللي فاكره ان احنا وصلنا الجبل الساعة10صباحا


اقوللكم ايه و اعيدلكم ايه


بجد سبحان الله ع الجبل و الصحرا و الوديان والحفر-جمع حفرة- اللي ممكن تاخد الواحد مايبانلوش قرار


بس سيبكم من ده


الاحلى و الاحلى كانت حكايات المهدسين اللي معانا عن اللي بيقابلوه


يا صلاة النبي يا صلاة النبي


اشي ضرب نار و اشي مطاريد و اشي ناس تثبتهم و تقشط اللي معاهم


بجد الواحد كان هايطرشق من السعادة و يفرقع من الانبساط


و فجاة بابص لاقيت على مسافة مش بعيدة عننا كدة دخان ابيض لونه مميز


و سالت المهندس اللى كان معانا


قاللي


لا عادي


دول جماعة من المطاريد سارقين الكابلات و بيسيحوها


اصل بردو كل حاجة و ليها اصول


اولا ببيسيحوا البلاستيك اللي ع الكابلات و بعد كدة يبداوا يسيحوا النحاس و المكونات المعدنية


يعني يا جماعة فشر كل مصانع الحديد و الصلب


دلوقتي صناعات المطاريد كيان قائم بذاته


و يا ترى بتتحسب الضرايب عليهم ازاي


مش مهم


و ببلاهتي المعهودة كنت هاسال اذا كان ممكن نقرب اكتر من المدخنة


لكن المهندس اللي معايا كان هارش انى هاسال سؤال اهبل زي ده


و قاللي من نفسه


احنا لو قربنا هناك ممكن نرجع من غير العربية او من غير هدومنا


دده لو رجعنا اساسا


و ماكانش على لسانى وقتها غير الكلمتين بتوع كل موقف


ايه اللي انا عملته في نفسي ده


انا كان مالي و مال القرف ده


و فجاة الافتاء بدات تلعب دورها


كان معانا اتنين سواقين


واحد افتى اننا نتحرك يمين و التاني افتى شمال


و مشينا مع اللي قال يمين


و احب اطمنكم انا توهنا لمدة ساعتين اتنين بس في الصحرا لغاية ما طلعنا منها و الحمد لله


يخلص اليوم على كدة؟؟


و دى تيجي


بعد ما رمانى سواق الشركة في الجيزة قولت اخد اى محروق مكروباظ يرميني ناحية بيت شريف صاحبي


و المكروباظ طلع من هنا و قامت حريقة


خناق والعة بين الركاب و السواق


اصله قرر من نفسه انه يرفع الاجرة ربع جنيه بحاله


و الشتايم بقت طايرة من كل ناحية


و ايه


من المنقي


الحمد لله وصلت حوالي الساعة تلاتة و نص


و يومها كان عندى بروفة بالليل


أأأأأأأأأأأأأأأأأأأأأأأأأأه


بمناسبة البروفة


ماتنسوش ان شاء الله ميعاد حفلتي


و نفسي تبقى بجد اكبر تجمع مدونين في الدنيا كلها


كمان عايز اشكر صديقي جدا أحمد البليسي ع البوستر الجامد اللي بعتهولى


...............................................


علشان محدش يقول انى داخل عليكم بايدي فاضية انا جايب لكو معايا هدية


صديقي المطرب الجامد جدا شريف اسماعيل كنت قاعد معاه و بنغني سوا و لاقيت عنده تسجيل حلو قوي بصوته لاغنية كلموها عنى بتاعة تامر عاشور يا رب يعجبكم زي ماهو عاجبني جدا




..............................................


طلب من زمان ما طلبتهوش منكم


بس حاسس انى محتاجه قوي


بالله عليكم


و بجد


ادعوووووووووووووووووولىىىىىىىىىىىىىىىىىىىىى




هناك ١٤ تعليقًا:

Nouran يقول...

ياااه وبعد غيبة عن التعليقات اجي والاقي نفسي اول تعليق يا سبحان الله
المهم انا فضلت اضحك فعلا كتير اوي معرفش ليه هو اللي انت كاتبه المفروض يضحك ؟؟ اصل انا عندي بله اليومين دول -بيني وبينك بقى بله علطول- المهم يعني عملت الشغل اللي انت كنت رايحله ولا لأ ؟؟
بس هي ديه مصر يا بشمهندس
بس حاجة عجيبة اللي مش بيشتغلوا مضايقين واللي بيشتغالوا مضايقين محدش عجبه حاله يا سبحان الله
المهم ربنا معاك يا رب وينولك كل اللي تتمناه يا رب

غير معرف يقول...

علي انا مبسوطة جدا جدا باللي انا باقراه دة
ربنا يوفقك يا رب
و ان شاء الله الحفلة بتاعتك تنجح
انا مبسوطة بيك جدا جدا
و فخورة بيك جدا
ايوة كدة يا علي خطوة لقدام
ربنا يوفقك

دينا فهمي يقول...

ربنا معاك بجد ويعمل لك كل اللي فيه الخير ويرضيك بيه

rokaaa يقول...

ايه يا بشمهندس
ايه اللى بيحصلك ده
ههههههههههههههههههههههه
والله طمنتنى على مستقبلى الهندسى
المهم يا ابنى انت اى حد يضايقك فى الموقع بتاعك , تقولى مطاريد مش مطاريد ولا يهمك قولى بس ومالكش دعوه
عيب عليك انت ليك اصحاب واخوات من شبرا برده
وربنا معاك يا على يا رب
وبالنسبه للحفله والله اى حد اشوفه بقوله عليها على طول
يعنى ان شاء الله هجيلك اليوم ده ومعايا الدفعه بتاعتى كلها
والجيران
واصحابى والعائله والاحباب والقرايب
تمام كده
يلا خالى بالك من نفسك
روكى

شيماء الجيزى يقول...

يعنى مش عارفه اقولك ايه
ده عذاب والله يا على
عذاب بجد يعنى

بس انا عايزة اقولك ربنا معاك
من كل قلبى
يابن بلدى

بجد اتمنى تحقق كل الى نفسك فيه
ويارب الحفله تكون جميله جدا
ويحضرها ناس كتير جدا

تحياتى

هيثم محفوظ يقول...

عارف يا واد
كان فى مسلسل زمان بيتزاع على اذاعة الشرق الاوسط كان اسمه يوم مالوش اخر .....واضح انه حصل معاك.
هو فى ايه يا على محكتش ليه على الحفلة بتاعت فرقة صبا اللى كانت يوم 3\6 مع ان المدونة بتاعتك اسمها تفاصيل(عادى بقى).

فوكيره يقول...

رد الفعل الطبيعى للى بتقوله هناا

هوو

ربناااااااااااااااا معاااااااااك
يااااااا اخوووووووويااااااااا

مفيش كلام تانى

علي الالفي يقول...

نوران

يااااااااااااااه حمد الله ع السلامة و كمان اضحكي اضحكي محدش واخد منها حاجة
........................
شيماء علي

ادعيلي قوي و سلميلي على سمسم

.........................

امرأة تقول اللي مايتقالش

رغم انى مافهمتش مغزى الاسم لكن اهلا بيكي جدا
و نورتي مساحتى الخاصة و تفاصيلي

............................

روكا اخويا

طب حضر نفسك يا برنس عشان نازل الموقع قريب و هات مجموعة كبيرة من الشبراوية بسرعة

...............................

هيثم محفوظ

هو كان فعلا مالوش اخر

و بالنسبة للموضوع التاني
طب انت ما كتبتش عندك ليه
خد بالك انا دايما باحب اكون صادق و لو لاقيت ان اللي هاكتبه هايزعل منى حد بيبقى بلاش نكتب احسن
و اظن كلامى واضح

.........................
جوسي الجميلة
امييييييين

غير معرف يقول...

ازيك يا على
اتمنا انك تكون لسا فاكرنى
انا مش هعلق ولا هتكلم هنا
لاكن هطلب منك طلب واحتمال يكون الاخير
ابعتلى ايميلك
درامر فريق صبا

علي الالفي يقول...

شيماء الجيزي
بس انت افضلي ادعيلي
............................
عمرو اتلجميل
انا مش فاهم ليه هايكون الطلب الاخير
هو انت رايح فين
بس يا سيدي ايميلاتى موجودة برة ع المدونة ع الجنب في حاجة اسمها للتواصل
و عشان خاطرك يا صاحبي الايميلات اهى

alyalalfy100@hotmail.com
alyalalfy@yahoo.com

Radwa يقول...


هو انت بجد بتغنى ولا ايه على العموم ربنا يكون فى عونك

غير معرف يقول...

ان شاء الله ربنا يوفقك

والحفلة تنجح جدااااااااا

بالمناسبة سأكون هناك

تحياتي

علي الالفي يقول...

سندريللا
و الله مش عارف ارد عليكي اقوللك ايه
اوممال باعزمكم على حفلتى اللي هاقدم فيها فقرة الساحر...؟
........................
صاحب البوابة

اخيرا هانتقابل
100000000 حمد الله على سلامة والدك

غير معرف يقول...

عاااااااااااااااااااا
يا نهار ملخبط
ايه يابنى اللى بيحصل عندك دا كله؟؟؟!!!؟
ياخبرك خبر
خلى بالك من نفسك عشان خاطريييييييي