السبت، يونيو 30، 2007

كبشة تفاصيييييييييييييييييييييييل





نظرا لصعوبة حصولى على جهاز كومبيوتر الا على فترات متباعدة
فواضح ان ده هايبقى اسلوب تعاملنا مع التفاصيل
هانلم كل فترة شوية في زكيبة و نفرجكم ع الجديد
يعنى البوست ده ممكن يكون طويل شويتين
...............................................................




تحديث بخصوص الحفلة
فاكرين الصورة دى
الصورة دى كانت في الحفلة اللي فاتت و كنا كلنا متجمعين اكبر مجموعة من المدونين يكون فيها بورسعيدية
و كان اليوم ده من اسعد ايام حياتي و فرحت جدا لما اتعرفت بناس كتير مننا و بقينا بجد عيلة و اصحاب لحد النهاردة
انا هنا في بورسعيد و اتاكدت خلاص ان معظم اصحابي المدوني البورسعيدية و اصحابي من موقع بورسعيد اون لاين
مش هايقدروا انهم ييجوا الحفلة
وكنت حكيتلكو من زمان قد ايه بيبقى احساس سخيف جدا انى اكون باغنى في الحفلة و انا حاسس ان انا لوحدى
عشان كدة انا متعشم فيكو جدا انى الاقي فعلا اصحابي و اهلى معايا في الحفلة و الاقي العيون اللي بتبص لي و انا باغني و بتشجعنى و بتحسسني انى مش لوحدى
...............................................................
نرجع بقى للبوست
...............................................................
أجازة
بدون سابق انذار عرفت ان والدى صحته مش كويسة هنا في بورسعيد دخلت على مدير شئون العاملين عندنا في الشركة عشان اساله ازاى ممكن اخد اجازة و ياللعجب ان الراجل كان متفاهم جدا لدرجة انى قدرت اخد اربع ايام و هى تعتبر معجزة في حياتي و حياة اهلى
...............................................................
حنش
قبل ما امشي قابلنى واحد من زمايلي في الشغل و جارى في المستعمرة "ده هو الاسم اللي بيقولوه ع المنطقة السكنية اللي جنب الشغل"
المهم الواد قابلنى بمنتهى الشوق و اللهفة جوة عينيه و زى ما يكون هايقوللى بشرى
يا باشمهندس علي يا باشمهندس علي
ما عرفتش حصل ايه امبارح في المستعمرة
-خير يا توفيق
-مش لاقينا امبارح تعبان-ثعبان-حنش-في المستعمرة"ملحوظة و الواد متهللة اساريره و تظهر علامات السرور على وجهه"
-و قد ايه التعبان ده يا توفيق
-ييجي حوالي مترين و نص يا باشمهندس
-يا صلاة النبي يا صلاة النبي و قتلتوه يا توفيق
-لا يا باشمهندس دا الواد شافه من هنا و قعد يجرى و يصرخ
و هنا تاتى المفاجأة
-و كان فين مكانه يا توفيق
-جنب سور المدرسة يا باششمهندس
ملحوظة سور المدرسة ده جنب بلكونة شقتى و العاقبة عندكم في المسرات
لولولولولولولوىىىىىىىىىىىىىىىىىىىىىىىىىىىى

............................................................
الست انغام
نرجع بضهرنا للزمن حبتين
فاكرين لما قولتلكو هاسمع شريط انغام و اجى احكيلكو
خلاف كبير داير بيني و بين صديقي احمد شلبي بسبب اغنية في الشريط ده
الاغنية دى ساحرانى جدا وواكلة عقلي
اولا المفروض لو انتو الجهاز عندكو سليم و الريل بلاير مافيهوش مشاكل هاتكونوا سامعينها دلوقت
الغنوة دى اسمها غيرتني
كلامها بيقول
غيرتني
مابقيتش انا
مابقيتش اصدق أي حاجة
غيرتني
معقول انا
بقيت اخاف من كل حاجة
هو انت ايه
مش بردو انسان زينا و ممكن تحس
و للا انت ايه
كل اللي عارفه عن الحياة تاخد و بس
غيرتني
خلتني اندم انى كنت بجد باحلم اعلمك
تقدر اللي ما بين ايديك
لازم تهون لما تكون انسان ضعيف
مش قد قلبي و حبي ليك
هو انت ايه
مش بردو انسان زينا و ممكن تحس
و للا انت ايه
كل اللي عارفه عن الحياة تاخد و بس

الحالة للي الغنوة دى معيشاني فيها مش طبيعية
اولا الكلام صادمنى جدا و مفاجئني انى حد و صل للمستوى ده من الكراهية في الغناء
كمان اتفاجئت من اداء انغام في الاغنية دي
لانى اتعودت في الفترة الاخيرة ان انغام لماالطبقة بتعلى منها بتستخدم الصوت المستعار
يعني بتستخدم صوت حاد و حنون نوعا ما
لكنها هنا كانت بتصرخ مع الكلام و منفعلة جدا و ده خلانى اول مرة سمعتها روحت مصفق وقايل
ايوة كدة يا ست
انفعلى بقى
كمان التوزيع بتاع الغنوة دى متكامل قوي
يعنى اختيار الترومبيت للصولوهات و توزيع الوتريات و الهارمونى اللي محطوط كله راكب على بعض
و بصراحة باقولها تانى
انغام
شكرا لانك موجودة بيننا
..................................................................
ازمة السكن
قررت بيني و بين نفسي و من قبل موضوع التعبان حتى انى اسيب السكن في المستعمرة
انا بقيت حاسس انى مخنوق قوي فيها
و ان العزلة اللي اتفرضت عليا فيها اصبحت مكبلة حياتى
انا عشان انزل نت في سيبر بقيت مضطر انى اقطع مشوار حوالى اربعين كيلو
يعني تقريبا المسافة بين بورسعيد و دمياط
و انا كمان مش قادر اشوف أي حد و لا اتكلم مع أي حد من اصحابي
و حتى الحلم اللي انا جيت القاهرة علشانه
مابقيتش قادر انى اعمل أي حاجة فيه بسبب البعد
عشان كدة انا بدات ادور من تانى على سكن في القاهرة
و حديدا في الجيزة او الهرم او فيصل
و اللي يلاقي حاجة حنينة و رخيصة و بنت حلال يقوللى و يبقاله الاجر و الثواب عند ال
له
.....................................................................

النعمة



محدش بيقدر معنى النعمة اللي لما تزول من وشه
هو ده و الله اللي على لسانى
فاكرين قد ايه انا كنت مخنوق في بورسعيد و شايف انها مانعانى من انى احقق حلمى و كلام كتير من ده
دلوقت انا لو اقدر ابوس اسفلت شوارعها مش هاتردد
و الله بلدنا دى بجد نعمة
كفاية لطشة هواها ع الوش و انت داخلها و معدى الجمرك
كفاية نظافة شوارعها
و اللي مهما اتزحمت ما بتبقاش نص اللي في القاهرة
كفاية رخص الحياة فيها
و كفاية انها بورسعيد
اللي فيها احلى ايام الواحد
و فيها اصعب ايام الدراسة و اسودها
و اللي لما الواحد بيفتكرها دلوقت بيمصمص شفايفه و يقول
و الله كانت ايام حلوة
ربنا ما يحرم حد من اللي ليه
و عمار يا بلدنا

...................................................................
افتعال مشكلة
كنت حكيت لكو زمان انى كنت هاغنى مع فرقة جديدة اسمها صبا
و فعلا عملنا الحفلة
و لكن شاء رب العالمين ان الحفلة دى ما كانتش موفقة
يعني حصل غلطات كتيرة ع المسرح
و احداث تانية مؤسفة
و سواء الغلطات دى منى او من أي حد تانى في الفريق فالنتيجة واحدة
الحفلة كلها ماكانتش مظبوطة
و نزلنا كلنا من المسرح و قولنا كلمة واحدة
احنا الحفلة دى نشيلها من حساباتنا و نتكلم من اول و جديد ع الجاى ان شاء الله
لكنى اتفاجئت بناس من الفريق بيدخلوا هنا عندى ع المدونة و يعاتبونى ويتهمونى بانى باتجاهل وجودى معاهم او حلقت للحفلة
و طبعا انا و الله لانى ما حبيتش احكي كل اللي فات ده من زمان و هم اللي خلونى اقول حاجات انا كنت رافض انى اقولها خوفا على مشاعر ناس انا باحبهم و باحترمهم
.
و ان شاء الله حفلتنا الجاية مع فريق صبا يكون متحضر لها كويس و تبقى اقوي و احلى من اللي فاتت
.................................................
تحديث
شكر وواجب عليا لصديقي اللدود احمد عيسى على تعبه معايا في تغيير شكل المدونة
انا مبسوط قوى بالنيو لوك و يا رب يعجبكو
انا دلوقت قاعد مع احمد شلبي في اخر تلت ساعات ليا في بورسعيد
و الساعة خمسة الفجر ان شاء الله هايتحرك بيا الاوتوبيس متوجها للقاهرة
بجد ادعووووووووووولي قوي

هناك 17 تعليقًا:

وينكى يقول...

على باشا
واحشنى موت يافندم..معلش انا عارفه انى مقصره فى زياراتى اليومين اللى فاتوا لكن اللى يشفعلى انى اخيرا خلصت امتحانات وناقشت المشروع وان شاء الله خير
ماتخافش انا مش نسيه حفلتك,دا نا حتى بالم زباين من دلوقتى
انا كمان بقيت من الزباين السايبريين بعد ما اتفصل النت من البيت
انت لسه فاكر الصوره دى؟؟
والله انا باعتبره احلى يوم فى حياتى
عندى كلام كير قوى خالص عاوزه اقوله بس انا عارفه انك مش ناقص صداع
خلص بروفاتك وان شاء الله اشوفك فى الحفله
انا جايه..اعمل حسابى فى الشيكولاته اللى وعدتنى انك هاتجيبهالى من بورسعيد
:p

أحمد عيسي يقول...

بتهرج؟
محدش جاي الحفلة من بورسعيد؟
استني وان شاء الله ربنا حيفرجها
ده غير اني قتيل الحفلة دي متقلقش
يعني جاي جاي بعون الله لو محصلش مصيبة

hesterua يقول...
أزال المؤلف هذا التعليق.
hesterua يقول...

مبروك الأول على النيو لوك بتاع المدونة يا لول

انشاء الله تبقى بشرى خير والحفلة تكسر الدنيا ويجيلك كل اصحابك فيها


بالنسبة لغنوة انغام

يعنى هتيجى على دى يا راجل

هو احنا امتى اتفقنا على حاجة

يا اخى شوف احنا عملنا كام غنوة مع بعض واغلبها صدف

سيبك
رغم اى شئ انت عارف انى بحب ((الست والحاجة والكونتيسة أنغام حفظها الله ورعاها )) ....من زمااان

بحاول اكون يقول...

مبروك يا علي على النيولوك حلو اوي
انشالله تكون الحفلة حلوة وكل حفلاتك اللى جاية تكون احسن من اللى فاتت
واحنا كلنا جنبك واكيد اصحابك وحبايبك مش هيسبوك لوحدك
يارب تلاقي النجاح الدائم انت تستاهل كل خير

غمض عينيك يقول...

هي الحفلة الساعة كام

rokaaa يقول...

انا قولت امسى بس
على فكره انا فتحت المدونه تانى
على ميعادنا يا بطل

امرأة تقول الذي لا يقال يقول...

ربنا ما يحرم حد من اللي ليه

الله عليك يا علي

أولا.. مبروك على النيو لوك
ثانيا
انا كنت قلتلك اني هحاول اجي الحفلة لكن للاسف خطوبة بنت عمتي يوم الخميس 5 يوليو ):
منشنين
بجد كان نفسي اكون موجودة

wahed يقول...

ان شاء الله تبدع في هذه الحفله ,ونشوفك مطرب كبير ,علي فكره انا بحب حليم جدا وام كلثوم انت مين مطربك المفضل

فوكيره يقول...

شد حيلك ياا على في الحـفله

انت عارف ان حتى لو محضرناش ..قلوبنا معاك وبندعييلك

وعارفه انه اكيد مأثر فيك اننا مش حنكون حوليك سعتها
بس
حندعييلك اووى


.. انا عايزه اعرف عملتوا ايه في التعبان
يا على

شد حيلك

change destiny يقول...

نيو لووك رايق عقبال صاحبه لما يروق

حفلة حلوة ان شاء الله

للأسف مش في مصر

عايزة اسمعك لايف بقى

على العموم مبروك مقدما على نجاح الحفلة

Nouran يقول...

الاول اللوك جامد يا هندسه
وان شاء الله الحفله هتبقى جامده
بس ايه حكايه التعبان ده ربنا يكرمك وتلاقي مكان حلو كده ومفهوش تعابين
ربنا معاااك يا باشا

صاحب البوابــة يقول...

سأحاول ان أكون متواجداً ان شاء الله لدعمك

تحياتي عزيزي

فوكيره يقول...

اطمنت على اخبار الحفله من روودى

مبرووووووك يا على

zordeak يقول...

الحفلة كانت تحفة يا على

انا فرحت اوى انى جيت وشفتك وقضيت معاكو اليوم الجميل ده

صوتك بجد ما شاء الله عليه

انا فضلت طول الحفلة اصقف لما ايدى ورمت

بس انتو كنتو تستاهلو

اغنية وسط البلد التحفة

واغنيتك قطرين اللى فضلنا نقولك تانى تانى علشان تعيدها

الحفة كانت جميلة بجد واتمنى اننا نكون شرفناك

أكيد هحاول احضر حفلاتك الجاية ان شاء الله

بس اخلص امتحانات بس

سلام يا بطل

:)

Nouran يقول...

يا رب تكون الحفلة كانت جامدة واتبسطت فيها والناس اللي راحتلك يكونوا اتبسطوا :)

ساعه الغروب يقول...

على الحفله بجد كانت روعه

واتبسطت اوى انى كنت موجوده

بجد ربنا يوفقك
كنت ببقى بجد طايره من الفرحه لما تبقى منسجم اوى مع الكلمات
واقول الحمد لله


احسن حاجه بتعجبنى وانت على المسرح غير بجد صوتك انك بتبقى اوى حاسس الكلمه

على فكره كل الموجودين اجمعوا على انك بجد اجمل صوت بجد والله مش مجرد تشجيع

دا اللى اتقال فعلا

ربنا بجد يوفقك ويكتب لك كل خير باذن الله

ربنا معاك دايما وما تخافش مش ناسياك فى الدعاء برضو

:)