الاثنين، يوليو 30، 2007

انا و شيريو غنينا سوا

اهو يا جماعة عشان نبقى ع الاحداث طازة بطازة

احدثكم الان عن حفلة اايامنا الحلوة

نيجي لاهم موقف حصل فيها

طبعا كنت حكيتلكو ان شريف اسماعيل هايغنى اغنيتي ابعد بقلبك

و فعلا شريف غناها

و الحمد لله الغنوة نجحت جدا و الناس حبتها و طلبت اعادتها

لكن المفاجاة انى لاقيت شريف بيندهلى اطلع اغنى معاه ع المسرح الغنوة

و الحمد لله

يمكن مش قادر احكي كتير عن اللي حصل

نسيب الفيديو يحكي

شكرا جدا جدا جدا لصديقي صاصا ع الفيديو الروعة ده

ملحوظة كمان

تحت في بوست مهم جدا ابقوا تقروه

ملحوظة كمان ماتنسوش تقفلوا صوت الاغنية بتاعة انغام عشان الصوتين ما يدخلوش على بعض

الجمعة، يوليو 27، 2007

وجوه اقابلها


وجوه اقابلها
من زمان و انا نفسي اكتب البوست ده
عن وشوش باقابلها كتير
على فكرة
معظم القصص الواردة بالبوست من الحياة و اى ادعاء من الكاتب اللي هو انا انها من خياله يبقى لامؤاخدة شغل عوأ منه و استهبال لدا وجب التنبيه
...............................................
ارتعدت شفتاه و هو يتحدث
و تشنجت عروق رقبته وفي انفعال واضح و بدا انه على وشك الانقجار في وجه من يتحدث معه
و لم يهتم اساسا بالزحام اللي حواليه في واحد من اكثر شوارع الجيزة زحاماًَََ
و اخد يلوخ بيديه و هو يتكلم
و عينيه مصوبة كالرمح ناظرا امامه لمن يتشاجر معه
و فجاة حدث ما كنت احدر منه انا
وقعت عينيه في عينيا و انا مركز معاه
و نظر لي في خجل
ماهو اصله كان ماشي في الشارع بيكلم نفسه
و نظرت اليه في اعتدار
ما تزعلش قوي كدة يا صاحبي و ما تتكسفش
مانا بردو باعملها كتير

............................................
التنك
وانا قاعد في الاوبرا جت عينيا في عينيه
يعني خلاص لازم اقوم اسلم و خلاص
و كالعادة يصدمنى وجهه بتعبير مش عارف احدده
يعني هو خليط من البرود على الجمود علي التهكم على الاستخفاف
مش عارف الخصها
اااااااااه
التناكة
بس على ايه يعني ان شاء الله

..............................................
اعشق متابعة الوجوه اللي بتحبني ة انا باغني
اه اللي بتحبني
باحس بيهم و باتطمن بيهم
و باحب تعبيرات عضلات وشوشهم و عينيهم لما بتلمع معايا
باحبهم لما يحاولوا يحفظوا اللي باغنيه و يقولوه معايا رغم انهم بيسمعوه للمرة الاولى
مانا قلت
الوشوش اللي بتحبني

,...................................................
النجم
من الوشوش اللي بتفرسنى و ش بقى ناس كتيرة لابساه
وش النجم
نبقى قاعدين في البروقة
و تلاقي الواد في عز الظلمة لابس النظارة اللي واكلة معظم وشه شبه الغواصين
لا و اية
تلاقي الواد مرسوم و لا اجدعها موديل
و بيتكلم نص كلامه انجليش بس بلهجة بين الصعيدي و الفلاحى و النوبي
و لو فتح بقه من هنا
تطلع الدرر
طب لما سيادتك كدة مالكش فيها
بتترسم كدة لية
ياللا قطيعة
,,,,.................................................

اصطدم هنا في القاهرة بوشوش جامدة صلبة شرسة
عايزة تفترسك و خلاص
في المترو
في المكروباصات
محدش بيهتم غير بانه يمشي في طريقه و ان شاء الله يدوس على أي حد في أي حتة
او يمكن لانى اتعودت على وشوش سمحة في بورسعيد
ناس اتعودوا ع الخير و الهدوء
طبعا بورسعيد مش اليوتوبيا و لا اهلها ملايكة بجناحات
بس مش كدة
.................................................
كنت كلمتكم زمان عن انى باعشق الحرارة في السلام و اللهفة في الوشوش وده اللي انا باحبه في سلامى على اصحابي
و باحدد علاقتي بالناس على حسب اللي باشوفه في سلامهم و تون صوتهم في التليفون و...و...و
عموما يمكن اكون غلط بس هو ده انا و مش عايز اتغير

السبت، يوليو 21، 2007




قبل البوست


يا جماعة عندى حفلة جامدة جدا جدا جدا


بس مش هاغنى فيها


طبعا و مش هاعمل فيها شقلباظات و لا هاقول نكت


لا


انا المفروض انى كنت هاغنى فيها


بس نظرا لظروف صحية هاكلمكوا عنها كمان شوية مش هاغنى الحفلة دي


بس ان شاء الله من الحفلة الجاية هاكون واحد من مطربي فرقة ايامنا الحلوة اللي شرف كبير جدا لكل مطرب في الدنيا انه يغني فيها


و المهم انا رايح الحفلة و هايتغنالى لحن فيها


فاكرين غنوتى الجامدة جدا جدا جدا و الرهيبة و اللي مالهاش زي ابعد بقلبيك"ولو مش فاكرين امشوا يمين شوية هاتلاقوالينك"الغنوة دى هايغنيها مطرب جامد جدا جدا جدا هو صاحبي المطرب شريف اسماعيل


و انا رايح و نفسي تبقى تجميعو جامدة جدا جدا لينا كلنا هناك و نتقابل كلنا على خير


و اهى فرصة احضر حفلة معاكم من تحت و احضر تجميعتنا كلنا


.............................................


هدية مميزة جدا اعطتها لي القاهرة


يا جماعة انا كنت عند الدكتور من شويتين و عرفت انى جالى حساسية في الصدر


و اصبحت من ذوى البخاخات و ادععولى


ان حلم عمرى الغنا كله مربوط بجهازى التنفسي


شفاه الله


و ادعولى




..................


البوست بقى اللي جاي اكتبهولكم




عن يوم الحفلة

يااااااااااااااااااااااااااااااااه
طبعا بعد العيد ما يتفتلش كحك"الا هو يعني ايه يتفتل"مش موضوعنا
بس انا اكتشفت انى اخدتكم في دوكة الاكتئاب و الاصحاب الله يقطعهم و دوكة المبروك و اللي اتجوز و اللي نجح
و نسينا نتكلم عن الحفلة و يومها
على فكرة و الله يوم ما يتنسيش
طبعا ماكنتش نمت من قبلها بيومين
و اخدت ادن من الشغل و روحت نمتلي بتاع ساعتين
و صحيت زى اى مطرب محترم و اى نجم طالع يقابل جمهوره
اخدت لى دش دافى و بدات مرحلة استرخاء
استرخاء ده يعني مكوى و تحضير هدوم
حضرت هدومى اللي هاغنى بيها
و نزلت
و زى اى مطرب محترم بردو شاورت لاول ربع نقل معدية
و طلعت ركبت في االصندوق
احساس رائع
كان جمهوري الحبيب شايلني على اكتافه
او يمكن واقف ع الصفين يلوح"حلوة يلوح دى؟"بايديه و انا من فوق ارد تحيتهم
و لا يقطع افكارى دي الا واحدة طالعة بالمشنة و محملاها بالخير كله
و من الصندوق ده لصندوق تانى لغاية ما وصلت المحور و منه لميدان لبنان
و بمنتهى التناكة و الالاطة طلبت بيتزا و وقفت استنى اى عربية ترميني عند الساقية و بعد تلت اربع ساعة طلعت اوتوبيس النقل العام و ايه الاحتضان الجماهيري ليا ده
عايز اقول لكم ان جمهور الباص كان متلاحم لدرجة ان البيتزا اتعجنت في علبتها و طبعا لاستحالة وصولي للسواق قدام نطيت من الاوتوبيس من الباب الورانى و وصلت الساقية و انا في اقصى درجات الاعياء من المشوار
و دخلت اودتى"تقولش يعني اللي الصاوي كاتب عليها اسمي"و ضربت البيتزا و اللي جابتلي تخمة و خلتنى مش قادر اتنفس
الطفاسة وحشة بعيد عنكم
و طلعت لاقيت اختنا وينكي داخلة عليا هى و وشوشنى و هاتك يا رغى
لكن محدش يتصور فرحتى لما زوغت من ظبط الصوت و خرجت لاقيت تقريبا معظم الناس اللي انا باحهبم و باحترم مدوناتهم موجودين
اه و الله
هم دول الناس اللي انا باحبهم حتى لوما علقتش عندهم
و الاحلى ان الناس دي انا السبب فس تجميعتهم
و بدات الحفلة
و ايه
اصحابي عملولى اجدعها تظبيط في الدنيا
تهييص و رقص
و كله كوم و لما وينكي زغرطت ده كوم تانى
لاقيت الفرقة كلها بتبص ليا و بتضحك تقولش انا اللي زغرطت
و خلصت الحفلة
و عايز اقول بجد ان وجود كل واحد فيكم كان سبب مهم لفرحتى و ربنا يفرح كل احبابي اللي نوروا الحفلة
و انى كان هاين عليا انزل من المسرح و اقعد معاكم و اعيش الجو الجامد ده بينكم
كام ملحوظة على جنب
شكرا جدا جدا لاخواتى الي جم من بورسعيد مخصوص و استحملوا السفر و البهدلة احمد عيسى و رودى
كنت سعيد جدا بعروسة المدونين انجى سمراء النيل
و ربنا يخلينا نتقابل اكتر و اشوف عريسها اللي لفت نظر الجميع بادبه الشديد و هدوؤه
كنت سعيد جدا لما شوفت البنوتة اللي مسمية نفسها مجنونة علي الالفي سدرة
اكيد الواحد بيبقى فرحان جدا بحب الناس ليه و بيفرح اكتر بالتواصل معاهم و ادينا كسبنا اخت تانية بس بتحب تسمعنا
اختى وينكي بجد شكرا ليكي
اختى نهى انا بردو مستنى نسختىىىىىىىىىى
و انا منتتظر الصور يا جماعة



الجمعة، يوليو 13، 2007

اربعة مبروك وواحد لينك و صلحه




لانها وينكي







و لانها وينكي حبيبة الكل
و لانها اجمل زغروطة في عالم التدوين و الصحوبية
و كمان اجمل فرحة بيننا كلنا و مجمعانا كلنا
يبقى واجب على كل واحد فينا يرفع ايده ناحية بقه و يحضر لسانه
و واحد اتنين تلاتة
لولولولولولولولولولولولولولولولوللولولولولولولىىىىىىىىى
البت نجحت يا اخواننا و رفعت راسنا في كل حتة
و ترتيب ع الدفعة و كلام كبير قوي
و ياللا كلنا التلات الجاي في الاوبرا ها نتلم و نزغرط و نحتفل
و هيصة كبيرة لغاية ما بتوع الاوبرا يطردونا
مبروووووووووووووووووك يا وينكيييييييييييييييييييييييييييييييي









لانهما سلمى و اشرف



و لانها سلمى اختى و صديقتي و حد مهم جدا في حياتي
و لانه اشرف و احد من اجدع الناس اللي عرفتهم في حياتي
و الاتنين من احب اصحابي
يبقى بردو مبروووووووووووووووووك كبيرة جدا
و لولولولولولولىىىىىىىىىىىىىى
لاجمل عروسين في احلى فرح في مصر المحروسة











و لانه مورو


ده واحد عمركم ما عرفتوه
لكنى كنت كل ما ابقى متضايق في حياتي الاقيه بيفتحلي ابواب السويس و يقوللى ماتيجي
و اروح و ارجع و لا كان كان فيه حاجة
و لانه صاحب واحدة من اهم التجارب في كليات تجارة في مصر كلها
يبقى مبروك جدا و اكبر لولولولولولولىىىىىىىىىىىىىىىىى
الواد اتخرج و خلص كليته بعد 8 سنييييييييييييييين
لولولولولولولىىىىىىىىىىىىىى















و لانها مها


لانها مها عيسى
اختى الصغيرة
و اخت اخويا و صديقي احمد عيسى
و لانها بنت البيت اللي ياما شالني و احتضني و ذاكرت فيه
و البنت كبرت قدام عينيا
يبقى كمان
لولولولولوللولولولولولىىىىىىىىى
البنت خطوبتها النهاردة
و ربنا يتمم بالف خير
على فكرة مها هى صاحبة مدونة
كلام فارغ و مليان
و ملحوظتين جنب بعض
طبعا الصورة دى مش بتاعة مها لانى اتسالت السؤال العجيب دع
و كمان ظروف سفرى منعتنى احضر فرح البنية
بس متعوضة يا مها في الليلة الكبيييييرة

مبروووووووووووووووووووك




............................................





برة كل ده
و عشان محدش يقول عليا واد غتت بانكد عليكم و ارجع لكم بايدي فاضية
هديتي ليكم
لينك جامد جدا
لاغنية مهمة جدا





يا رب يعجبكوووووووووو

الاثنين، يوليو 09، 2007

مش هاقول كتير عن الحفلة
بس بجد ربنا ما يحرم حد من اللي له
و كل اللي حضروا كانوا اهلى و اخواتى
و انا فرحان بكل واحد فيهم فرحة ما تتوصفش و لو اتكلمت عنها الكلام مش هايساعدنى
ربنا يخليكو
.............................................................................
مش عايز انكد عليكم
بس بجد
انا محتاج اليومين دول لكل واحد قريب منى يكون جنبي
و ادعولى
.........................................
برة البوست
او يمكن جواه
هو لو فيه واحد حب شلة معينة و حب يدخل بينهم يبقى غلطان؟؟
موضوع كنت باتكلم فيه انا و صديقي احمد شلبي
بس اللي اقدر اقوله
انه لو واحد حب ناس معينة و اكتشف انه ممكن يكون غير مرغوب فيه بينهم
و لو اكتشف انهم بيتقابلوا و يخرجوا من غير ما يكلموه
او بدا يحس بفتور في مقابلتهم ليه
بيوصل لاقصى درجات فقدان الثقة بالنفس
و بيفكر كتير و ممكن يكلم نفسه و هو بيسال
ايه اللي ممكن يكون خلاه يضايقهم
و بيبقى شعوره انه منبوذ
شعور وحش قوي
صدقونى
انا مجربه