السبت، يوليو 21، 2007




قبل البوست


يا جماعة عندى حفلة جامدة جدا جدا جدا


بس مش هاغنى فيها


طبعا و مش هاعمل فيها شقلباظات و لا هاقول نكت


لا


انا المفروض انى كنت هاغنى فيها


بس نظرا لظروف صحية هاكلمكوا عنها كمان شوية مش هاغنى الحفلة دي


بس ان شاء الله من الحفلة الجاية هاكون واحد من مطربي فرقة ايامنا الحلوة اللي شرف كبير جدا لكل مطرب في الدنيا انه يغني فيها


و المهم انا رايح الحفلة و هايتغنالى لحن فيها


فاكرين غنوتى الجامدة جدا جدا جدا و الرهيبة و اللي مالهاش زي ابعد بقلبيك"ولو مش فاكرين امشوا يمين شوية هاتلاقوالينك"الغنوة دى هايغنيها مطرب جامد جدا جدا جدا هو صاحبي المطرب شريف اسماعيل


و انا رايح و نفسي تبقى تجميعو جامدة جدا جدا لينا كلنا هناك و نتقابل كلنا على خير


و اهى فرصة احضر حفلة معاكم من تحت و احضر تجميعتنا كلنا


.............................................


هدية مميزة جدا اعطتها لي القاهرة


يا جماعة انا كنت عند الدكتور من شويتين و عرفت انى جالى حساسية في الصدر


و اصبحت من ذوى البخاخات و ادععولى


ان حلم عمرى الغنا كله مربوط بجهازى التنفسي


شفاه الله


و ادعولى




..................


البوست بقى اللي جاي اكتبهولكم




عن يوم الحفلة

يااااااااااااااااااااااااااااااااه
طبعا بعد العيد ما يتفتلش كحك"الا هو يعني ايه يتفتل"مش موضوعنا
بس انا اكتشفت انى اخدتكم في دوكة الاكتئاب و الاصحاب الله يقطعهم و دوكة المبروك و اللي اتجوز و اللي نجح
و نسينا نتكلم عن الحفلة و يومها
على فكرة و الله يوم ما يتنسيش
طبعا ماكنتش نمت من قبلها بيومين
و اخدت ادن من الشغل و روحت نمتلي بتاع ساعتين
و صحيت زى اى مطرب محترم و اى نجم طالع يقابل جمهوره
اخدت لى دش دافى و بدات مرحلة استرخاء
استرخاء ده يعني مكوى و تحضير هدوم
حضرت هدومى اللي هاغنى بيها
و نزلت
و زى اى مطرب محترم بردو شاورت لاول ربع نقل معدية
و طلعت ركبت في االصندوق
احساس رائع
كان جمهوري الحبيب شايلني على اكتافه
او يمكن واقف ع الصفين يلوح"حلوة يلوح دى؟"بايديه و انا من فوق ارد تحيتهم
و لا يقطع افكارى دي الا واحدة طالعة بالمشنة و محملاها بالخير كله
و من الصندوق ده لصندوق تانى لغاية ما وصلت المحور و منه لميدان لبنان
و بمنتهى التناكة و الالاطة طلبت بيتزا و وقفت استنى اى عربية ترميني عند الساقية و بعد تلت اربع ساعة طلعت اوتوبيس النقل العام و ايه الاحتضان الجماهيري ليا ده
عايز اقول لكم ان جمهور الباص كان متلاحم لدرجة ان البيتزا اتعجنت في علبتها و طبعا لاستحالة وصولي للسواق قدام نطيت من الاوتوبيس من الباب الورانى و وصلت الساقية و انا في اقصى درجات الاعياء من المشوار
و دخلت اودتى"تقولش يعني اللي الصاوي كاتب عليها اسمي"و ضربت البيتزا و اللي جابتلي تخمة و خلتنى مش قادر اتنفس
الطفاسة وحشة بعيد عنكم
و طلعت لاقيت اختنا وينكي داخلة عليا هى و وشوشنى و هاتك يا رغى
لكن محدش يتصور فرحتى لما زوغت من ظبط الصوت و خرجت لاقيت تقريبا معظم الناس اللي انا باحهبم و باحترم مدوناتهم موجودين
اه و الله
هم دول الناس اللي انا باحبهم حتى لوما علقتش عندهم
و الاحلى ان الناس دي انا السبب فس تجميعتهم
و بدات الحفلة
و ايه
اصحابي عملولى اجدعها تظبيط في الدنيا
تهييص و رقص
و كله كوم و لما وينكي زغرطت ده كوم تانى
لاقيت الفرقة كلها بتبص ليا و بتضحك تقولش انا اللي زغرطت
و خلصت الحفلة
و عايز اقول بجد ان وجود كل واحد فيكم كان سبب مهم لفرحتى و ربنا يفرح كل احبابي اللي نوروا الحفلة
و انى كان هاين عليا انزل من المسرح و اقعد معاكم و اعيش الجو الجامد ده بينكم
كام ملحوظة على جنب
شكرا جدا جدا لاخواتى الي جم من بورسعيد مخصوص و استحملوا السفر و البهدلة احمد عيسى و رودى
كنت سعيد جدا بعروسة المدونين انجى سمراء النيل
و ربنا يخلينا نتقابل اكتر و اشوف عريسها اللي لفت نظر الجميع بادبه الشديد و هدوؤه
كنت سعيد جدا لما شوفت البنوتة اللي مسمية نفسها مجنونة علي الالفي سدرة
اكيد الواحد بيبقى فرحان جدا بحب الناس ليه و بيفرح اكتر بالتواصل معاهم و ادينا كسبنا اخت تانية بس بتحب تسمعنا
اختى وينكي بجد شكرا ليكي
اختى نهى انا بردو مستنى نسختىىىىىىىىىى
و انا منتتظر الصور يا جماعة



هناك 13 تعليقًا:

أحمد عيسي يقول...

ايوة ياعم فين الصور؟؟؟

بس بجد كان يوم حلو وحفلة هايلة

وانت عارف ياعلي يا اخويا لو كانت اقل من اللي متوقعه مكنتش حجامل يعني واقول انها حلوة

بس بجد كانت جامدة


الف سلامة عليك جاتلك من ايه الحساسية؟
لا اله الا الله
بص هي والله اعلم قابله للعلاج مادام انت متولدش بيها
جايز يكون دور برد قلب بحاجة عشان متعالجش صح
متوهمش نفسك والف سلامة عليك
وان شاء الله كلهع تمام

طبعا انا معرفش ايه الفرقة الجديدة دي ولا ملابساتها بس هو انت سبت ستب باي ستب؟؟؟

عامة ربنا يوفقك يابني في كل خطوة دعوة و...احم احم ماعلينا ماعلينا

المهم حمد الله ع السلامة ياقمر

وينكى يقول...

سجل عندك يابنى اول تعليق
زى ماكنت اول واحده توصل لأرض الصاوى بالسلامه عشان تستقبل الوفود
أولا ..ألف ألف سلامه عليك من الحساسيه وان شالله اللى يكرهوك
خلى بالك من نفسك واوعى تهمل فيها
كل حاجه ممكن علاجها بس اهم حاجه دا مايأثرش على نفسيتك
تانيا
حفله يوم الجمعه دى ان شاء الله هاتلاقى فيها كل الحبايب
سيب الموضوع دا عليا وانت عارف وينكى بتعمل ايه
تالتا... بجد اورع حفله عدت عليا واروع يوم انبسطت فيه كان يوم حفلتك
متهيألى ما ضحكتش كده من كتير قوى
ربنا يخليك لينا ياعلى وتفضل مجمع الناس كمان وكمان
بس بقى كفايه رغى

Rana يقول...

على الالفى

مبروووووك مبروك على انضمامك لفرقة ايامنا الحلوه
فرقة ايامنا الحلوه اصواتهم جميله اوى ومواهبهم عاليه وبأنضمامك ليهم ان شاء الله هتعملو حاجات حلوه كتير
الف سلامه عليك وان شاء الله ربنا هيقف معاك وكل حاجه هتبقى أحلى فى حاجه قريتها ولازم تعمل بيها
--------------------
الناجحون يفكرون بهذه الطريقة.. إذا وجدوا طريقا مسدودا بحثوا عن آخر.. لو وجدوا سورا سيتسلقوه.. لو وجدوا حفرة سيقفزون من فوقها؛ لأنهم يريدون للحياة أن تستمر.. لا أن تقف عند أى مطب
-----
ان شاء الله تبقى احسن من الاول وخلى بالك على نفسك و كل حاجه هتبقى احلى
وان شاء الله تحقق كل احلامك وتنجح اوى بأنضمامك لايامنا الحلوه وفى مفاجأه هقولك عليها فى اقرب وقت
ومبرووووووووووووك والف سلامه عليك

وينكى يقول...

أحمد يا عيسى انت طلعتلى منين؟؟؟؟؟
أنزل تعليق ومره واحده ألاقيك فو وشى!!!؟
عااااااااا:(اااااااا

reem يقول...

على الالفى

اول حاجة الف سلامة عليك ومتخافش عشان اكيد يادور برد او من التلوث بس ربنا يشفيك ياعلى والف الف الف سلامة عليك

ومبروك الف الف الف مبروووووووووك على الحفلة اللى عدت ومقدرناش نحضرها ومبروك الف مبرووووووك عالحفلة اللى جاية وان شاء الله نحضرها

ومبرووووووووووك على الفرقة وان شاء الله تكون بداية خير عليك وتحقق كل احلامك من الفرقة لغاية ماتحقق احلامك التانية
ربنا يحميك ويوفقك ياعلى

§a§a يقول...

الف سلامه عليك يا جميل وان شاء الله خيرا

ان شاء الله هتبقى اكبر مطرب فيكى يا جمهوريه مصر العالميه

MONDAHESH يقول...

بداية الف سلامة عليك
وان شاء الله تكون حاجة عابرة

ثانيا الف مبروك علي الحفلة اللي فاتت اللي انا زعلان جدا علشان ماحضرتهاش

ثالثا الف مبروك علي انضمامك لايمنا الحلوة وان شاء الله هكون موجود يوم الجمعة معاكم

§a§a يقول...

ان شاء الله اكون فى الحفله باذن الله

غير معرف يقول...

hi ali
yemkn dy awl aw tany mara aktblk feha bs bgd enta ensan gamil w sotk w a3'anek heya ely 3abrt 3n keda
ll2sf el 7flat msh ba2dr a7darha l2ny msh mn el qahra bs ely sam3to 3nk w mn el linkat kan ra23
w a7'ern slamtk 1000 slama w 7'od balak mn s7tk w blash ehmal:)
some one

هيثم محفوظ يقول...

مبروووووووووووووك ياد
وحشنى قوى قوى قوى يا على
متزعلش منى فى بعدى الفترة اللى فاتت شوية زروف كده هبقى احكيلك عليها فى التليفون .
المهم الف مبروك على اللحن اللى هيتغنالك الجمعة الجاية .
وخد بالك من نفسك عشان بس الحساسية دة قدر الله ما شاء فعل بس متحطهاش فى دماغك.
سلام

tar7elba7r يقول...

الف الف الف الف الف الف الف الف مليون مبروك
و اعذرنى يا اجمد مغنى وملحن فى الدتيا كلهاانى ماقدرتشاجى الحفله اللى فاتت و ان شاء الله تتعوض الحفله الجايه

امرأة تقول الذي لا يقال يقول...

الف سلامة عليك يا علي

فوكيره يقول...

الف سلامه عليك يا على

ربنا يتمم شفاك على خير


انا كان نفسي اكون هناك

بس قدر الله وما شاء فعل

بالتوفيق دايما يا رب

ومستنيه الصور