الأحد، مارس 18، 2007

الله عليك يا عم احمد يا بتاع زمان







بعد صباح القشطة و الفل و الذي منه



احب اتطمن عليكم و اطمنكم عليا



انا لسة باعافر مع الدنيا و لسة هى كمان بتعافر معايا



و لازم بين كل جولة و جولة الاقي نسمة صافية بتريح ايامى



و النسمة الايام دي جت من نواحينا هنا



جت من اخويا و صديقي احمد شلبي



و عشان ما اطولش عليكم في رغى كتير و مقدمات مالهاش لازمة



اسمعكو الكلام الحلو ده



و قبل ما اسمعهولكوا



اقوللكوا استنوا قريب الكلام ده متلحن و قريب جدا ان شاء الله


ااااااااااااااااااااااااااه على فكرة في اعتذار و اجب عليا


الى الاخت الغالية روزاليا


روزا يا جماعة قدمت لي هدية حلوة قوى جدا جدا ع المدونة بتاعتها لكن انا كنت في وقت صعب عليا شوية و كنت في


حالة مخلياني مش عارف استقبل اي هدايا


عشان كدة انا متاكد من انى احبطتها و نكدت عليها


عن طريقكم باقول اهو


تسلميلي يا روزا


بجد البوست حلو قوى


بس انا كان لازم اخرج من المود اللي انا فيه و اقراه مرة تانية بعين تانية و مود تاني


و قبل ما اعمل كدة كانت هى شالت البوست



و اهو هندكو كلام الاغنية اهو







بين فرح وحزن الدنيا طريق
بيسعنا ساعات وساعات بيضيق
وعشان ما نكمل سكتنا
الفرح صديق والحزن صديق
تعالى
نودع زمان
نسيب المكان
نسافر لبكره
على نغمة كمان
تعالى
نحط الأنين
على حزن السنين
ونرميهم ورانا
ونعيش فرحانين
وتحضننى بعنيك
بلمسة ايديك
تدوبنى فى ملامحك
تفرح روحى بيك
تعالى
احضننى بعنيك
بلمسة ايديك
دوبنى فى ملامحك
فرح روحى بيك
بين فرح وحزن الدنيا طريق
بيسعنا ساعات وساعات بيضيق
وعشان ما نكمل سكتنا
الفرح صديق والحزن صديق
هتعدى السنين
وتجينا السنين
وتبص فى عنييا
يناديك الحنين
هيقولك تعالى
ومد الأيدين
وأمد الأيدين
نتلاقى فى لحظة
ونطير بجناحين
ونوصل للقمر
لأبعد م القمر
لكل نجمة حلوة
شاركتنا السهر
وتحضننى بعنيك
بلمسة ايديك
تدوبنى فى ملامحك
تفرح روحى بيك
تعالى
احضننى بعنيك
بلمسة ايديك
دوبنى فى ملامحك
فرح روحى بيك

هناك 7 تعليقات:

rosealia29 يقول...

يا علىىىىىى .. الأغنية هاتطلع تحفةةةةةةة كلماتها رائعة و أكيد بصوتك هاتطلع أروع .. و بعدين ماحصلش حاجة يا علوةة .. انا مقدرة الفترة دي و ربنا يكون في عونك يوفقك و يكرمك إن شاء الله ..

hesterua يقول...

ايه يا عمى الكلام الحلو ده
شكرا يا علوة بجد
مظبطنى بذوقك دايما

عامة مستنى اسمع يا ريس شغلك واتمزج بصوتك واحساسك اللى بموت فيهم

صباحه دفا واحساس يا هندسة

Sampateek يقول...

حلوة فعلا
مفرطة في التفاؤل و الحب

جميل انك تنكر ذاتك و تسلط الضوء على كل جميل في غيرك

دي قمة جمالك

تحياتي

أحمد عيسي يقول...

كلام حلو وصوت حلو وناس حلوة بتسمع اكيد

هيثم محفوظ يقول...

خوض معركتها زى جدك ما خاض
صالب و قالب شفتك ف امتعاض
هيه كده ماتنولش منها الأمل
غير بعد صد و رد و اوجاع مخاض
الرباعيه دى يا على من أجمل رباعيات صلاح جاهين
صدقنى إنت عمرك ما هاتحس بحلاوتها إلا اما تعيشها بجد و عشان تعيشها بجد لازم تتعب قوى
عارف أوقات كتير لما بقعد ف البيت و ما بخرجش بحس إن انا ماليش لازمه
المهم يا معلم حاول تنظم وقتك بعد الشغل عشان يبقى فيه مكان براح للمزيكا أما بقى بالنسبه للكلام الفاجر اللى إنت هتلحنه لأحمد فمنكوا لله إنتوا الاتنين :)
واحشنى قوى يا وحش

علي الألفي يقول...

سمباتيك
ما اتحرمش منك ابدا
ـــــــــــــــــــــ
هيثم محفووووووظ


يخرب عقلك يا هيثوم يا جميل
انا على وعدك الجمعة الجاية هنا في بورسعيد
و احتمال هايبقى فيه مفاجأة
مستنييييييييييك

mohammed يقول...

بين فرح وحزن الدنيا طريق
بيسعنا ساعات وساعات بيضيق
وعشان ما نكمل سكتنا
الفرح صديق والحزن صديق
تعالى
نودع زمان
نسيب المكان
نسافر لبكره
على نغمة كمان

:) الله عليك .. ذكرتني بداية الأغنية بكلمات شاعرنا الجميل " صلاح جاهين " عندما كان يذكر كيف ضاقت علينا الأماكن ، التي كنا نقطن بها ، بعدما كبرنا ، هناك فقط بعد المقاطع ، مثل

نحط الأنين
على حزن السنين
ونرميهم ورانا
ونعيش فرحانين

:) شعرت أن " فرحانين " هنا جاءت فقط لخدمة الوزن لا أكثر ، فكان من الممكن القول " ونعيش " فقط لا غير ، كما أن " نحط الأنين على حزن السنين " لا أعرف ، لكني لم أستسغها مُطلقاً ..

:) على كل حال كلمات الأغنية أعجبتني جداً ، فتحية للشاعر ، وبالتالي تحية لك أنت أيضاً مُقدماً ، لأنني أن تغني الأغنية

تحياتي
محمد عادل \ أوسكار
http://oscarization.wordpress.com/