الثلاثاء، أكتوبر 24، 2006

بانوا بانوا

بعد صباح القشطة و الذي منه
اخباركم ايه كل سنة وانتم طيبين جدا
و شكرا جدا لكل اللي ردوا ع اللي فات و ما زهقوش و دلوقتي اسمحولي نتكلم في موضوع غتت شوية بس استحملوا معايا

شفتوا المسلسل بتاع السندريللا؟؟؟
طبعا اللي كان بيقاطعني في اول تدوينة زمانه دلوقتي بيقوللي و ده موضوع غتت بالذمة؟!
اقوله اسكت يابني انت و ماتصدعنيش و اقرا للاخر
طبعا مش قصدي اسالكم عن رايكم في مستواه الفني وللا اسالكم عن رايكم في اللي عمل دور كامل الشناوي او صلاح جاهين
انا كنت عايز اتكلم معاكم زي ما اتفقنا من الاول عن حاجات جوايا و صادفت ان المسلسل ده فتح عيوني عليها و زود خوفي منها
عارفين انا اقصد ايه؟
اقصد الدنيا لما تتغير على الواحد و حياته تتشقلب
يعني لما النور يبقى مفتوح عليه و الدنيا كلها بتجرى وراه
و فجاة النور ده ينطفي و الدنيا كلها تديله ظهرها
شفتوا اكيد سعاد حسني كانت ازاي و ازاي كان كل واحد في الدنيا دي يتمنى بس انها تبصله ان شا الله حتى ما تتكلمش معاه و ازاي كان كل الوسط بيجري وراها عشان تشتغل معاهم
فجاة كدة الست دي ماتلاقيش حد ينتج لها اخر افلامها و تتبرع باجرها هي و العبقري احمد زكي عشان يظهر بالشكل اللي يناسب تاريخها
و كمان تموت وحيدة غريبة تشكي للدنيا جحود اقرب الناس و تموت
فقيرة مش لاقية تمن علاجها اللي بقرار رائع من فارس همام يتم و قف علاجها على نفقة الدولة
عارفين ليه لانها كانت ثروة فنية و طاقة رائعة في بلد لا يقدر ثرواته و لا يهتم بيها كما يجب
مش عارف انا جبت الكآبة دي منين بس ده اذا كانت واحدة من الناس اللي بنقول عليهم سوبر ستار و حصل لها كدة
اممال الناس اللي اقل منها في طاقتها و اجتهادها هايحصل معاهم ايه؟
و للا حتى الناس اللي ماتستاهلش اساسا لما حالهم يتغير هايحصل ايه؟
وللا الناس اللي محدش يعرف عنهم حاجة؟ دول بيتهيالي انهم حالهم احسن كتير لانهم محدش بيعبرهم لا وهم كويسين ولا هم حالهم وحش
المهم حبيت اسالكم في الاخر هو الواحد لازم يعمل ايه لبكرة و للناس عشان مايحصللوش كدة
و فجاة كدة لاقيتني باغني غنوة عمرى ما حبيتها بس دلوقت ماباغنيش غيرها الله يرحمك يا عم صلاح جاهين انت و السندريللا لما قلتم:
بانوا بانوا على اصلكم بانوا
و الساهي يبطل سهيانه
و لا غنى ولا صيت دول جنس غويط
و كتاب مايبان من عنوانه
بانوا
ايوة بانوا

هناك تعليقان (2):

18goosebumps يقول...

كتكلم في نقطتين يا على لو تسمحلى تسمع رأيي

النقطه الاولى الى قولتلك عنها في اول تدوينه ... ضروري الواحد يكون ليه مصدر لاكل العيش بعيدا عن الفن لان نادرا ما الفن الاصيل بيأكل عيش
ده غير ان اى حد فنان معرض يحصله ده ووقتها ضروري يكون عنده مصدر ياكل منه عيش

النقطه التانيه : بقولك انى معتقده بوجود الاصدقاء الحقيقيين والمهم ان الواحد يفضل يدور عليهم ويحافظ على صداقتهم دايما سواء كان مشهور مغمور او اى حاجه
لان هما دول الى حيفضلوا في النهايه بعد ما كل الموجات تروح
هما دول الاصل مش الصوره ... هما دول الى حيسألوا عنا لما الكل ميسألش

دور عليهم يا على وامسك فيهم بأيدك واسنانك

وسلام يا فنان

كراكيب نـهـى مـحمود يقول...

تعليقاتك جميله جدا على حياه السندريلا عندك حق سبحان المعز المذل
اما عن بانو دي فعلا من اجمل ابداعات جاهين انا شخصيا بعتبرها من اغنياتي المفضله
تحياتي لك