الجمعة، نوفمبر 23، 2007

ياللا نبقى وحوش

على طريقة خطبة التاميم اتوجه الى جيران الهنا اخواننا سكان القاهرة و اقول
اخوانى سكان القاهرة
تحية طيبة و بعد
يشرفتنى و بعد فترة ليست باليسيرة في بلدكم ال....ماشي ياسيدي نقول الموقرة
يشرفنى انى اقول ليكو
فلتفقدوا ادميتكم
فلتفقدوا ادميتكم و لن يلوم عليكم لائم
مادامت هى دى مواصلاتكم و هو ده الطريق الوحيد للوصول لبيوتكو بعد يوم عمل غير ادمى
يبقى ياللا
واحد
اتنين
تلاتة
ياللا نبقى وحوش
ياللا نرمى اي ضعيف او ست مش قادرة برة الميكروباص
ياللا نستسلم لتحكمات سائق المينيباص و التباع او الكمسارى اللي معاه
ياللا نستحمل اننا كل واحد يقف على رجل واحدة لان مفيش مكان يحط فيه رجله التانية
ياللا ما نعترضش لو كنا و اقفين ع الباب و متشعلقين و نلاقي السواق بيقف يركب زيادة علينا
عشان لو احنا لا سمح الله اجرمنا و اعترضنا هايقول كلمة واحدة
اللي مش عاجبه يبقى يركب تاكسي
ما تقرفونيش
و ياللا نتحمل انهم يقطعوا كل خط لتلاتة او اربع خطوط
يعني الهرم يبقى بدل جيزة مشعل او رماية
يبقى جيزة طالبية عريش مشعل
و هكذا
حسبي الله و نعم الوكيل
عمار يا بورسعيد
ـــــــــــــــــــــــــــــــــــــــــــــــــــ



لا زلت اعيش مرحلة نجاح الحفلة
اللهم لك الحمد و الشكر
بجد الحفلة دي تعتبر نقلة مهمة ليا و خطوة حلوة قوي
الحضور كان اكبر بكتير من عد الكراسي و كان ناس كتير واقفين
و الحمد لله كل فقرات الحفلة نجحت نجاح عالى جدا
عقبال الباقي
و نتقابل دايما
ـــــــــــــــــــــــــــــــــــــــــــــــــــــــــــ





شادي اتجوز يا جدعااااااااان
يمكن ماجاتش فرصة اتكلم عنه كتير
بس خصوصية العلاقة و الصحوبية بيني و بينه كانت اكبر من الكلام
شادي شوقى عوض
هو ده اسم صديقي الانتيم
اتعرفنا ببعض في تالتة اعدادى و ما اتقابلناش بعدها لحد ما دخلنا الكلية
و اتصاحبت انا و هو في تالت سنة في الكلية
و استمرت الصحوبية بيننا لحد دلوقت
تقريبا شادي هو و احمد عيسى الوحيدين من الكلية اللي لسة ليا علاقة بيهم
اتخانقنا بالهبل
لكننا كنا فعلا بنحترم تفكير بعض جدا و كنا قريبين من بعض جدا
و عمر ما كان فرق الديانة بيني و بينه سبب للافتراق
و كانت فترة تحضير مشروع التخرج من اصعب واغرب لحظات حياتنا


كنا دايما جنب بعض في لحظات صعبة قوي


لدرجة انى ساعات كنت مسميه صديق اللحظات السودة






شادي اتجوز
و كان المفروض انى مش هعرف احضر الفرح لانه كان يوم اربع يعني مفيش بعده اجازات


يعني بعد كل اللحظات السودة اللي شوفناها سوا كان ممكن ما احضرش يوم حلو زي ده
بس ربنا سهل كل حاجة و بقيت انا عامل زي ام العروسة باهرج و اغنى و ارقص و ملينا القاعة تهريج
الفرح كان حلو قوي و كل حد موجد فيه كان فرحان من قلبه






مبروك يا شوووووووووووووو

هناك 5 تعليقات:

وينكى يقول...

حمد لله على السلامه يا مان
ياعم احمد ربنا انك وصلت بلدكو بالسلامه.. مستغربه انك لسه بتشتكى من مواصلات القاهره لحد دلوقتى
معلش كلها كام شهر وجتتك تنحس زينا
مبروك كمان مره على الحفله يانجم..بجد حفله زى دى ماتتنسيش والناس لازم تحكى وتتحاكى عنه كمان 3 ايام
:P...باهزر طبعا
ومبروك لصاحبك يا أم العروسه
لولولولولوليييييييي وعقبال عندكم يا حبايب
عقبالك لما نفرح فيك انت كمان :))

أحمد عيسي يقول...

وماله نبقي وحوش يعني هي جت ع الميكروباصات؟؟؟؟

مبروك لشادي يا نجم وسلملي عليه لما تشوفه وقوله مبروك

غمض عينيك يقول...

الف مبروك نجاح الحفلة ياباشا
اما بالنيبة للمواصلات في القاهرة فبجد عندك حق..الله يعينا

وعمار يابورسعيد

tota_fm يقول...

انا في الاول عاوزه اشكرك مووووووووووووووت انت ووينكى الجميله لانى انا كنت بعانى من نفس مشكلتك انى جوايا كلام كتير ومش عارفه ابا ازاي وانت ادتنى الطريق وبعدين ياسيدي طالما اتهورت وقررت انك تنزل القاهره لازم يكون عندك على الاقل اتوبيس ملك علشان تقدر تبقي براحتك انا الحمد لله لما هتجوز هسكن في السويس بعيد عن زحمه القاهره والف مبروك لشادي وعقبال ما تشيل اولاده معلش انا عارفه انى اتكلمت كتير بس اتمنى انك تزور مدونتى ومعلش انا مكنتش اعرف معاد الحفله بس ان شاء الله مفيش ولا حفله هتفوتنى بعد كده

sad_doraa يقول...

يلهوي
دنا كل ما اشوف حد اقولو المواصلات المواصلات
بيبقى الدرس 9 واروح 10 والدرس 5 وروج 6 ربع
عارف يا علوة انا ابتديت حس اني كنت غلطانة لما حبيت البلد دي
الله يرحم العربيةو السواق الخصوصي
الله صحيح هو بورسعيد مفيهاش كده؟
وبالنسبة ل شادي
اولا الف مبروووووووووك ثانيا انا بردو صحبتي الانتيم مسيحية وعمر ما كانت الديانة فارقة بينا ياريت يبقى في ناس كتير كده
مشفتنيش عملت ايه يوم حفلتك عشان معرفتش اروح
كنت هتجننننننننننننننننننن
عموما انا متأكدة انها كانت هتبقى حلوة
دنتا نجميييييييي
ولا ناسي
يله يا عم طولت عليك انا قوي
ربنا يوفقك يا علوة
سلاماتي