الجمعة، أغسطس 17، 2007

هوامش

انا حاسس انها بقت ماسخة قوي فكرة انى كل شوية باكتب كذا بوست مجمع في بعض
بس بجد اعذروني نظرا لصعوبة الحصول على جهاز بسهولة
المهم ياللا بينا


نعرف و نؤمن و نصدق و نشهد بانه لا اله الا الله وحده لا شريك له و ان سيدنا محمد عبد الله و رسوله
لكن من اجمل نعم الله عندما يبعث لك رب العالمين برسالة
عندما يبرز دلائل قدرته
و هو لا يحتاجنا و نحن المحتاجين
لكنه يحبنا
و خلقنا لنعبده
اتكلم هنا عن تجربة مررت بيها من فترة مش بعيدة
مش عارف احكيها ازاي
لكنى عرفت معاني ايات الله اكثر عندما رايتها بعيني
" و من يتق الله يجعل له مخرجا"
طبعا معظمكم عاش معايا فترة الاكتئاب و النكد اللي كنت عاملهالكو
عرفت السبب بس متاخر
و لاقيت العلاج كمان
ياا جماعة و الله ربنا كبير قوي و من يتقيه يلاقيه
و نتيجة لكل ده ربنا عمل لى حاجة حلوة قوي في حياتي هانتكلم عنها بعدين
.......................................................
يبدو اننا خذلناها
البت دايما عاملة الواجب و زيادة و عاملة اللي عليها معانا كلنا
و يوم ما احتاجتنا ما لاقيتناش جنبها
ايوة باتكلم عن وينكي
قولنا ان عندها مسرحية يوم الخميس
انا شخصيا ظروف قهرية منعتني من الحضور
و اعتذرت لها من بدري
و كنت فاكر ان غيري كتير رايح
لكنى صدمت لما استقبلت منها كوممينت بتقول فيه الكلام ده
شكرا لكل من قال نعم
وشكرا لكل من قال لأ
شكرا للى اعتذروا من قبل ما تبتدى المسرحيه
لكن اللى عشمونى انهم ييجوا وماجوش
انا زعلانه بجد .
ماعلش يا وينكي
سامحينا
....................................................

ما كنتش عارف اني هاقع في الحب كدة بسرعة
كنت معزوم في فرح صديق ليا
و فجاة طلت علينا
كنت محذر نفسي و عامل حسابي ان كل واحد بيقرب من النار طمعا في نورها بيتلسع من نارها
لكنى زى المنوم مغناطيسيا قربت
و واحدة واحدة لاقيتني باتسحب و باتشد ليها
ايه ده
هو فيه كدة فعلا؟
انا مش مصدق الضحكة اللي ممكن تاكل بعقل قارة بحالها حلاوة
و للا الشياكة
و للا العسل الل دايب في الصوت و الطلة و الصورة
اكيد مافيش حاجة تيجي كدة
و مش عارف ايه اللي حصل لي لما جت عينها في عيني
و غمزت
انا فرفرت
و نسيت اللي حواليا
و روحت في عينيها لدنيا تانية
و فجاة رمت لي وردة
مش قادر احدد ايه اللي كنت فيه
و من ساعتها و انا دايب و مافيش على لسانى غير الكلمتين دول
انا باحبها قوي
انا دايب فيها
يخرب جمالك يا نانسي
نانسي عجرم يا اخوانناااااااااااااااااااااااااااااااااااااااااااااااااااااااا
......................................................
شوية جد
الفقرات دي من بوست رائع كتبه صديقي اللدود احمد عيسى عن واحد كان معروف انه عبيط الدرسة
و نفسه يبقى حاجة
لانها عارف و متاكد من جواه انه ولا حاجة
و دلوقت بقى حاجة
بس حاجة و سخة

وانا في اولي اعدادي كان معايا واحد كان مهزئة الفصل
امعة وملوش شخصية من الشخصيات الباهته اللزجة اللي لما كنا نحب نضحك كنا بنوقفه ونقوله غني يا حجازي
وكان بيغني اغنية السد العالي ويقلد عبد الحليم حافظ

كبر حجازي وسمعت انه بقي شاعر..عادي
كبر وسمعت انه في حركة كفاية...عادي جدا
كبر وسمعت انه مسيحي من وهو عنده 16 سنة لأن السيد المسيح جاله في رؤيا في المنام وده خلاه يدرس المسيحية واللاهوت واقتنع تمام الاقتناع ان المسيحية هي الدين الصح وان الاسلام يدعو للارهاب وبيغرس جوه المسلمين الخوف والرعب من العذاب عشان كدة بيتعبدو غصب عنهم مش حبا في العبادة
اه انا بتكلم عن محمد حجازي اللي رافع قضية علي الدولة عشان يشهر مسيحيته هو ومراته وابنه
كان صاحبي وزميل دراسة
ومن معرفتي بيه غاوي شهرة وامعة وملوش شخصية ومش من النوع اللي له موقف اساسا في اي حاجة
بالضبط عامل زي عادل امام في شاهد مشفش حاجة..نفس الطريقة ونفس الطباع
.................................................
اكيد شايفين حجم تفاهة التفكير...تفاهة كومبو حجم عائلي مش كدة؟؟؟؟؟؟؟؟
معتقدش ان الاسلام خسر كتير لما محمد حجازي ارتد عنه واعلن انه مسيحي
ومعتقدش ان حد مصدق المسلسل البايخ اللي بيقوله

اللي يسيب دينه عشان مش مقتنع بيه سهل يخون بلده عشان مش مقتنع بالنظام سهل يرمي مراته لو حد اقنعه بست تانية وسهل يرمي ولاده عشان مش مقتنع بيهم
ومش محمد حجازي اللي يستاهل الضجة دي
ـــــــــــــــــــــــــــــــــــــــــــــــــــــــــــــــــــــــــــــــ
الى هنا انتهى كلام احمد عيسى
و انا كمان عندى تجربة مع هذا الشئ اللي كان نفسه يبقى شئ
و بقى شئفعلا
بس شئ حقير
مش عشان غير دينه و للا ساب ديني
لان بصراحة ديني كسبان لما يتخلص من زبالات مكتوب في بطاقتها انها منتمية ليه
لكن انه عشان يتعرف برة مجال الناس اللي حواليه و بيشتغلوه يعمل الفيلم الاهبل ده هو و الهبل اللي بيطبلوله
يبقى.........و حطوا انتو مكان النقط كل عبارات الاحتجاجات المصرية القبيحة

هناك 9 تعليقات:

Meekness !!! يقول...

السلام عليكم
هييييييييه انا اول واحده عندك يا علي
اولا يا رب تكون كويس و بخير .. ةو بعدين يا عم هات لاب توب عشان تتواصل معانا علطوووول
ثانيا الاشتغاله حلوه موووووت بجد اشتغلتني
ثالثا انا من متابعينك علطوول في بلوجرز كده اول ما بدخل بدخل عليهم علطوول بشوف ايه اخر تطوراتهم .. انت منهم يا باشا
بجد ربنا يوفقك في كل حياتك
صوتك وهميييي على فكره ماشاء الله
على العمووم زي ما علقنا عند احمد عيسى و قلنا احنا مش خسرنا حاجه من حجازي ده بالعكس احنا كسبنا كتير قوي لان عرفنا ان في حد بيقول انه مسلم و هوه مش يعرف حاجه عن الاسلام اصلا

عموما نتمنى زيارتك يا علي و لو اني عارفه ظروفك و صعوبه الحصول على جهاز

سلام ..زيزي

وينكى يقول...

اولا حمد لله على سلامتك يا معلم واتمنى انك تكون قضيت اجازه كويسه وسط أهلك واحبابك تصبرك على الايام الجايه
تانيا بجد انا فرحانه قوى لانى عرفت ان نفسيتك بقت اهدى بكتير وعرفت قد ايه ان مافيش حاجه تستاهل
تالتا كتير قوى اعتذرولى على البلوج والايميل وبالتليفون وكنت مقدره دا تماما
لكن انا بجد زعلت من اللى عشمونى انهم ييجوا لحد اخر لحظه ولما دورت عليهم مالقيتهمش
مش عشان حاجه والله ..المسرحيه كانت ناجحه جدا ولاول مره ماكانش فيه مكان فاضى
لكن انا كنت محتاجه جدا انى اشوف كل الناس واحس بيهم حواليا
بس انت عارفنى..مابزعلش اكتر من دقيقتين ونص وبعد كده بانسى هو انا كنت زعلانه ليه اصلا
بجد كان كفايه عليا قوى لما لقيت بلوجرز مايعرفونيش ولا شافونى قبل كده جايين بس عشان انا وينكى
لأ وإيه...جتلى صينيه شيكولاته معتبره من لارين كمان
:P
رابعا..ايوه ياعم..نانسي عجرم مره واحده.. بس ايه موضوع الغمزات والورد والكلام دا كله
;)
تحب اخدلك منها معاد ولا حاجه؟؟
:))
أخيرا.. موضوع مايستاهلش الرد عليه
اللى بيحبوا يعملوا رأى عام حواليهم ,أقوى رد عليهم هو عدم الرد
متهيألى كفايه كده لحسن انا بلعت البوست كله
تبقى تطمنى عليك يا معلم
سلام

فوكيره يقول...

ههههههههههههه

الضحك ده على نانسي

حنسميك مُعجب نانسي

...

ربنا كبير اووى اووى يا على
وكل ما الواحد يستشعر حجمه الصغير كل ما يحس بعزه وجلال ربنا

...

بالنسبه لمحمد حجازى .. احقر من انى اكتب عنه كلمه

...

ربنا يعينك يا على

غير معرف يقول...

علي
موضوع حجازي دة لم يسبب لي اي نوع من الدهشة
لأني مؤمنة تماما
إن الاسلام لن يضره ابدا خروج البهلوانات و الفاشلين عنه
الإسلام ليس فس حاجة الى حجازي و لا ناهد و لا اي حد مريض
الاسلام لا يرقى بهؤلاء
الاسلام يرقى بالاقوياء
الناس اللي كل يوم بتارب عشان دينها
البنت اللي بتلبس حجابها و تنزل بيه متحدية دول الكفر اللي هي عايشة فيها
الطفل المسلم اللي بيحافظ على صيامه في يوم المدرسة الطويل اللي عايش في بلد غير مسلمة
كل دول الاسلام عشانهم
لكن هذا الشيء المسخ معتقدش انه يستاهل يكون اي شيء اصلا
و لا حتى يستاهل اني اتكلم عنه
شيماء علي

هيثم محفوظ يقول...

يا علوة مين فينا محلمش بنانسى يمكن جاتنى فى الحلم متاخر شوية من بعد اغنية اه ونص ..بس جتنى
بالنسبة لمحمد حجازى زى مقولت الاسلام مخسرش كتير او بمعنى ادق مخسرش اصلا باعتناقة المسيحية
انتا عارف المشكلة ان حركة زى حركة كفاية تلم الاشكال دى من البشر اللى دخلوا فى الزحمة عشان يدوب يكونوا متميزين ولان اللى زى دول عندهم احساس كبير قوى بالنقص .

غمض عينيك يقول...

ربنا معاك ياباشا
وكفاية انك بتطمنا عليك دايما

بس جامده حكاية نانسي ياعلي
ضحكة وغمزة ومش عارف ايه وفي الاخر صحينا معاك م النوم

زي مانت قلت الاسلام ماخسرش خالص بارتداد حجازي عنه ويمكن دي تكون غربله للي زيه

تحياتي ليك
محمد سمير

سهــى زكــى يقول...

على الالفى ... احساس جميل وكتابة رقيقة ومعبرة وبسيطة وصوت يتحاكى عنه الرايح والجاى فى وسط البلد ، تحياتى لك ولتواجدك الهادىء فى الانحاء

علي الالفي يقول...

شكرا على كروركم كلكم يا اخواننااااااااا
meekness
مش فاهم اسمك بس عجبني حاجات كتير جدا عندك

ــــــــــــــــــــ
وينكي

موضوع الغمزات و الورد دليل على صدق مشاعرها ناحيتي

ـــــــــــــــــــــــ
جوسي

انا باقيت عامل زي الراجل اللي في مسرحية شريهان بتاع
"ياخد من عمري و يديكي يا روزيتا"
ـــــــــــــــــــــــ
شيماء علي
اوافقك بشدة و عنف

ـــــــــــــــــــــ
هيثم محفوظ
لو انت حلمت بيها متاخر يبقى فاتك كتير
ــــــــــــــــــــ
غمض عينيك
شكرا ع السؤاااااااال

ــــــــــــــــــــ
سهى زكى

مش ممكن سهى زكى بجلالة قدرها تزورنى و تكتب الكلام ده كله
يعنى حدثين تاريخيين في نفس الشهر
نانسي
و زيارة سهى عندى

امرأة تقول الذي لا يقال يقول...

هههههههه
صدقتك في موضوع نانسي ((: