السبت، أبريل 28، 2007

الطريقة الخزعبلية لعمل مدونة شعبية و زغرطي يا ولية




تحديث:كان فيه هنا صورة و فيها كلمة انا ما اخدتش بالي منها و تمت ازالتها و خلاص

الطريقة السحرية لجعل مدونتك مدونة معروفة بين كل الناس
انا قلت قبل ما اسافر اتبحبح معاكو شويتين في موضوع كان فارسني حبتين
و هو الناس اللي بيعملوا مدونات عشان عايزين يعملوا مدونات و خلاص
لا و البجاحة انهم بيعملوا حركات مفقوسة جد عشان يعملوا مدوناتهن قال يعني مقطعة الدنيا زيارات و الناس داخلة خارجة عليها
و بما انى قعدت ارصد حاجات كتير من دى فاستخلصت ليكو معلومات نويت اوضعها في كتاب
الطريقة اللوزعية لعمل مدونة شعبية و زغرطي يا بهية
1- اتفسح يا سيدي ع النت و زور مدونات اخواتك المدونين عمال على بطال
2- اكتب عند كل واحد منهم تعليق و خلاص سواء البوست عاجبك و للا مش عاجبك
3- لو مالقيتش حاجة تقولها في ردك على الناس و خصوصا لو ما فهمتش البوست المكتوب بيقول ايه رد اى رد عايم كدة
رد ينفع كدة في كل المدونات
يعنى مثلا
بوست هايل جدا
انا مش لاقي حاجة اوصف بيها جمال البوست الروعة ده
الله يا سي محمد على راي محمد ع.الغفار
و كل واحد فيكو و شطارته
4- لو حابب تتفزلك و ترد في صلب الموضوع و احنا اتفقنا انك مش فاهم اساسا معنى الموضوع يبقى شوف ردوك زمايلك و اعمل كوبي منها و زود كلمتين عندك
5- طبعا نسبة كبيرة من اللي انت رديت عندهم هايدخلوا يردو عندك و دي بقى فرصتك انك تخللي نسبة الردود عندك عالية
محدش سالني ازاى؟؟!؟
اقوللك يا سيدي
كل ما واحد يرد عليك روح انت عامل رد عليه منفصل ولو لاقيت اتنين معلقين عندك رد عليهم في تعليقين مختلفين
و بكدة كل واحد رد عندك تبقى انت عامل قصاده رد او اتنين لو انت عايز تزود و اهو قشطة
7- عايز تعمل نفسك مثقف يبقى احشر في مدونتك كام كلمة مكعبرة من بتوع المثقفين و اتكلم عن ناس محدش يعرفهم
8- عايز تعمل نفسك مثقف زيادة يبقى اتفلسف في أي حاجة خد عندك مثلا السينما
اتكلم عن ناس عجيبة و تجارب فزلكية و اقعد اكتب فيها شعر
9- بردو لو عايز تحبك موضوع المثقف ده قول كام كلمة قذرة و زودها حبتين هاتلاقي نفسك بقيت زى الفل
10-رص أي كلام ورا بعضه قال يعني الواد شاعر و اقعد ارمي زلط من بقك بس فيه شوية كلام شوارع تبقى شاعر عامى قدير و محترف
11- حط لينكات لطوب الارض عندك سواء عاجبينك و للا لا
12- ادخل اى مدونة مشهورة او بتاعة حد مشهور و رد عنده كذا مرة
هاتلاقي مدونتك زياراتها زادت
13- حط العداد و اقعد كل شوية اعمل ريفريش هاتلاقي كل مرة بيزود لك رقم
و انت و صبرك ممكن تقفل المليون زيارة في يومين


اهو على ما قسم
اصلي ما اكدبش عليكو اتفرست من كام واحد كدة عاملين زي فرقع لوز و موجودين في كل المدونات و لو لاقيت في ردهم كلمة مفيدة يبقى ارقص على تربتي
و ادخل عنده هاتلاقي الدنيا هايفة جدا جدا جدا جدا
دول ما يعرفوش االلي حنا بنحسه تجاه مدوناتنا
مدوناتنا اللي بقت جزء مننا
و بنتبحبح فيها و نخرج شحنات لو كانت موجودة جوانا دلوقت كان زماننا فرقعنا
مدوناتنا اللي عملتلنا عائلات موازية جنب عائلاتنا اللي في البيوت
و عملت لنا اخوات و اصحاب يفرحوا لينا و يخافو علينا و كدة يعني
المهم
انا خلاص قربت اسافر جدا
اتمنولي الخير
و ادعوووووووووووووووووووووولى

هناك 27 تعليقًا:

حسام مراد يقول...

ههههههههههه رفرش عشان العداد يزيد
طب لو واحد زيي عامله بالـ اى بى و الكوكيز يعمل ايه ؟؟
نسيت تقولها دى هههههههههههههه
وحاجه تانيه الرد ده مفيد ولا زى ما انت بتقول هههههههههههههه
جد شويه
والله عندك حق
ربنا يوفقك

gogo we bas يقول...

تصدق فكرة حلوة فعلا
كانت غايبة عنى فين دى؟؟؟!!!ء
بس للاسف انا مش محملة العداد...بس معلش ملحوقة

يلا ادينا بناخد خبرات من السابقين
شكرا على الافادة

بس ليا سؤال...طب هما بيوزعوا فلوس على اللى مدونته عليها اقبال؟؟!!ولا بيدوا بونات فراخ الجمعية؟؟!!!اهو الواحد يستفاد برضه

Nouran يقول...

ههههههههه لا جاامدة
بس يعني فيه ناس بتعمل كده علشان الناس يقروا لها بس مش بالطريقة الخزعبلية ديه
بس اول مرة اعرف موضوع الرفرش ده انا اصلا مش عارفة احط عداد عندي شفت الهنا
ع فكرة انت نسيت تقول حاجة لو انا عايزة اعلق ع حاجة مش فاهماها ممكن اخد كوبي من الموضوع واقول ديه احلى حاجة عجبتني ف الموضوع
بس عارف اللي بيستفزني اني الاقي الواحد معلق لكل واحد لوحده تعليق تخش تلاقي 160 تعليق نصهم لصاحب المدونة اساسا بس فيه ناس ممكن تكون بتزهق من التعليق الواحد بس فبتكتب ف كذا واحد ممكن برضه

Dalia Ziada يقول...

هههههههههههههههههه

للأسف
للأسف الشديد يعني

عندك حق

ههههههههههههههههه

و الرد ده مستثنى من كل الردود أياها

هههههههههه

زحل الفلكي يقول...

تعرف
ساعات بتحتاج تدخل ترد على ناس في مواضيع مش فاهمها علشان متزعلهمش منك بس بيني وبينك معملتش الموضوع ده الا مره او 2 وبعدين اتفقست علشان مستحملتش ارد تاني

بالنسبة بقا لحكاية كل تعليق ترد عليه بتعليق
ساعات التعليقات بتحتاج تفردلها تعليق لواحدها لكا سبب
مثلا معزة الشخص ده عندك

ولكن عامة ردين في تعليق واحد او 3 ردود في تعليق واحد بيكون معقول

عايز اقولك بقا يا علوة في الاول وفي الاخر انا عارف ان دي فضفضة انت عايز تفضفضها علشان شكل الموضوع واكل دماغك بقاله كام يوم وكنت عايز تخرجه برا صدرك علشان متتخنقش
صح ؟

كلام لوجيك يقول...

الله عليك
بوست هايل
ايه الحلاوة دي
الله عليك يا سي على
ههههههههههههههههه

لا حقيقي يا صاحبى انت أصبت كبد الحقيقة
ودي احد سلبيات المصريين بشكل عام
لإننا شعب عاطفى ولازم يرد الواجب
الموضوع بقى اجتماعيات
وعشان ملتفقدش حد من زوارك يبقى لازم تعلق عندهم باستمرار
انا عن نفسى ما احبش أعلق على اي موضوع الا لو عندي اضافة مميزة او كلام مهم او تعقيب لازم انزل بيه للجمهور
وفى حالات نادرة بضطر انى اجامل احيانا

على العموم انا عرفت من وينكى انك مسافر القاهرة وهتستقر هناك
اتمنالك كل خير وتوفيق وربنا معاك

واعذرنى لتأخيري بس غصب عنى يا فنان

خالص تحياتى

Mohamed A. Ghaffar يقول...

لولولولولولى

hesterua يقول...

الله عليك

كلامك صح جدا جدا

بوست من اجمل واظرف واشيك ما قرأت

أتمنى تزورنى فى مدونتى باستمرار

hesterua يقول...

اه

نسيت أقولك انى عملتلك لنك عندى
واتمنى تعمل لينك ليا عندك

hesterua يقول...

اتمنى كمان

تمتعنا ببوستاتك العسولة زيك

وترد علي تعليقاتى فى 3 ردود مختلفة

sad_doraa يقول...

يغريبة مع اني عمري ماحد ضافلي تعليق
هههههههههههههه
البلوج ده فضفضة فوسط منتا بتبقى عايز تتكلم ومش لاقي الي تكلمو فتكلم نفسك وتقول رأيك رغم انك واثق انو حتى لو حد سمعو مش هيأثر
البلوج ده جزء من الهم الي عايش فينا
وامنية كبيرة نفسنا تتحقق

أحمد عيسي يقول...

وست جامد يابني
مش قادر الاقي كلام يعبر عن..استني لا ده مينفعش

تصدق عندك حق ..بقت مشكلة عامة والكل عشان ..لا ده كمان مينفعش

طب انا اقول ايه وانت قلت كل حاجة؟؟كدة
ههههههههههههههه

بس بجد بوست حلو

الا صحيح مين قالك علي موضوع العداد ده ورفرش؟
مش تبطل شقاوة بقي ماشاء الله يعني العداد عندك وصل لكام الف؟؟

حسام مراد يقول...

على باشا بقولك ممكن اخد صوره ادخل هنا وعلى ضمانتى عشان عايزه ياباشا

إبـراهيم ... معـايــا يقول...

مش هقول لك غير ما قالت الست :
أنا من ف انتظااااااااااارك :):)
.
.
.
حطيت .. إيدي على خدي ........إلخ
تحياااااتي يا علي

Esmeralda يقول...

ابوس كي بوردك خش عاللينك ده
و مش دعايه و ربننننننا


http://azmiralda82.blogspot.com/2007/04/blog-post_07.html

وينكى يقول...

هههههههههههههههههههههه
متهيألى انى سمعت الموضوع ده منك قبل كده
بصراحه يابنى معاك حق
لما ادخل عند مدونه بنى ادم والاقى مكتوب انى فيه عشروميت كومين عنده واكتشف انه هو نفسه كاتب ردود اكتر من زواره
بس فيه حاجه
البلوج اساسا من اهم اسبابه من وجهة نظرى هو انك تتعرف على ناس تانيه وتتعرف على ادمغتهم
يعنى موضوع انك تدخل عند امه البلوجرز دا شيء محمود
واحيانا الواحد لما يلاقى نفسه كاتب موضوع حاسس انه كويس بيصعب عليه ان الناس تقراه من غير ما حد يعدى ويصبح عليه حتى يعنى ممكن تكون النعليقات دى من باب جبر الخواطر
ودا ممكن يكون كويس
لكن اللى يعمل فيها على جمعه ويفتى ويهلس ويعك فى مواضيع ما أنزل الله بها من سلطان
فدا اللى لا ممكن ابدا
ربنا يجيبك بالسلامه.. وبادعيلك من كل قلبى.. وماتنساش الشيكولاته معاك بقى
اشوفك قريب يا قمر

علي الألفي يقول...

حسام مراد

انا شخصيا ما اعرفش غير العداد البدائي بتاعنا اللي بيزيد مع كل حركة في المدونة

ــــــــــــــــــــــــــــــــــــــــــــــــــــــــــــــــــــــــــــ
جوجو و بس

انا نفسي دورت على اجابة ع السؤال ده
هم ليه بيعملوا ده
بس واضح انهم محتاجين يحسوا انهم حاجة و زيادة الزيارات و الكوممينت بيحسسهم بكدة
ـــــــــــــــــــــــــــــــــــــــــــــــــــــــــــــــــــــــــــــ

نوران


تصدقى انا كمان اخدت بالي من الموضوع ده
بس نسيته
بس شكرا على اضافة القاعدة رقم14للقواعد

ملحوظة الصورة دي اتعوت عليها مع جوسي بومب صاحبة مدونة فوكيرة
واحدة منكم تتصرف و تغير الصورة عشان ماتلخبطوناش

ـــــــــــــــــــــــــــــــــــــــــــــــــــــــــــــــــــــــــــــــــ

داليا زيادة

نورتينا يا ستي

ـــــــــــــــــــــــــــــــــــــــــــــــــــــــــــــــــــــــــــ

زحل الفلكى

تمام كدة اصل زي ماقولتلك قدت اتفرج شويتين لاقيت كذا حد هم عارفين نفسهم عملين كدة


ـــــــــــــــــــــــــــــــــــــــــــــــــــــــــــــــــــــــــــــــــــــــ

اسامة كلام لوجيك

انت عارف
كان زمان ستات البيوت لما واحدة تعزم التانية على طبخة هى عاملاها تروح التانية مرجعالها الاطباق مليانة بطبخة تانية
و شكل الحركة دي بقت في المدونات كمان


ـــــــــــــــــــــــــــــــــــــــــــــــــــــــــــــــــــــــــــــــــــــــ

محمد عبد الغفار

للولولولولولولولولوللولولولولولولولولولييييييييييييييييييىىىىىىىىىىىىىىىىىىىىى

ـــــــــــــــــــــــــــــــــــــــــــــــــــــــــــــــــــــــــــــــــ
واد يا احمد يا شلبي

مش هارد عليك
روح العب بعيد يا شاطر

ــــــــــــــــــــــــــــــــــــــــــــــــــــــــــــــــــــــــــــــــــــــــ
سدرة

واضح بجد انك فاهمة وواعية للهدف الحقيقي من البلوجات

ـــــــــــــــــــــــــــــــــــــــــــــــــــــــــــــــــــــــــــــــ

احمد عييييييييييييييييسى

انا مش مصدق انك بتقول كلمتين عدلين في حقى
الحق روح للدكتور و اعرف سبب الحالة

ـــــــــــــــــــــــــــــــــــــــــــــــــــــــــــــــــــــــــــــــــ
حسام مراد

يووووووووووووووووووه انت تانى
بس مش مهم
البلوج كله تحت امرك يا برنس

ـــــــــــــــــــــــــــــــــــــــــــــــــــــــــــــــــــــــــــــــ

ابراهيم

خلاص الانتظار قرب يخلص

ـــــــــــــــــــــــــــــــــــــــــــــــــــــــــــــــــــــــــــ
ازميرالدا

من غير ما تبوسي الكيبورد دخلت يا ستي و عجبني كمان البوست

علي الألفي يقول...

وينكي اللذيذة

انا قررت انى ارد عليكي لوحدك

طبعا لانه النهاردة يوم تاريخي في حياة هذا الكوكب و الكواكب المحيطة
كل سنة و انت طيبة
و كل ماتمشي في الشوارع تتكعبلي في ناس يحبوكي و تفضلي زي ما انت اجدع بنوتة مدونة و مجمعة الكل

وينكى يقول...

دايما كده بتكسفنى بذوقك يا فندم
ميرسي كتير جدا قوى خالص
انا والله مش عشان ازودلك عدد الكومينتات اللى عندك ولا حاجه
انت مدونتك مشهوره من غير حاجه
وكفايه ثقتك فى حبايبك وكل اللى حواليك
على فكره انا مررتلك تاج من عندى
تعالى وخده

micheal يقول...

ههههههههههه...الله يا سي محمد
مش أنا علقت عند أهو..حستناك في مدونتي...ههههههههههه
روق يا عم..كل مجتمع فيه الحلو والوحش حتي لو كان مجتمع غير مرئي كمجتمع التدوين
تحياتي لك

Esmeralda يقول...

ما شاء الله على صوتك :)ربنا يكرمك يا رب

تلات سلامات بحبها اوييييييييييييي
و حبيت تنسينت النوم
بس ان شاء الله لما ربنا يكرمك اوعى تعمل فيديو كليب من بتوع اليومين دوووووووول :)
و من غير ما ابوس كيبوردك

محمد النقيب يقول...

رائع
ممتاز
شكراً على التدوينة الرائعة
:p

لا بجد , انت قلت كلام انا نفسي اقوله , انا مردش على حد غير لو لقيت كلام جديد اقوله مش كلام اتقال قبل كده ..
يعني لما ادخل عند حد الاقي عدد التعليقات عنده 100 تعليق ! واقول جابهم منين دول ابص الاقيه هو لوحده كاتب تلات ارباعهم دمي بيتحرق اوي :D

Ahmed Elsabbagh يقول...

بوست هايل جدا
انا مش لاقي حاجة اوصف بيها جمال البوست الروعة ده
هههههههه
وطبعا انتوا فاهمنى
وقوموا فزوا ادخلوا بصوا على مدونتى
وحطوا تعليقات وربع جنيه من كل واحد
على فكرة انا مش عارف احط عداد الزوار عندى تخيلوا
ياريت حد يكسب فيا ثواب ويقولى
كمان انا بتعلم جيتار ومحتاس بردة
انا هغير اسمى من أحمد الصباغ الى محتاس افندى
هههههههههههههههه

التوقيع:
محتاس
اااصدى
أحدم الصباغ

غير معرف يقول...

شكراااا يا باشا على الكلام الحلو دة والنصايح دي .... http://ema7moud.jeeran.com/ .... http://ema7moud.jeeran.com/

bar2ash يقول...

علي باشا الالفي
شكلك شخصيه جميله وجدع زي كل اهل بورسعيد
انا اتعاملت مع ناس منهم في الجامعه وبجد اثبتوا رجوله مدونته جميله ونصايحك غاليه
اتمني تنورني
في مدونتي المتواضعه

سلاموووووز

قمقمجي يقول...

وده إللي أنا حـ ع ــمله معاك في ردي

كلام جميل .. وإلى الأمام..

قمقمجي من السعوديه
http://somh2.maktoobblog.com/

StEElBeaUtY - موسوعة الجمال يقول...

هههههههههههه

دول هيعملوا كده لمدونة وصاحبها اسبام