الاثنين، أبريل 23، 2007





لانه جه الوقت
و ماعادش فاضل كتير
يبقى لازم احكيلكو
مش عارف ابدا منين الكلام
كان حلم مغرق ايامى
و عشت عمرى باجرى وراه
بس لما جه.....لاقيتني باعمل فيها عيل صغير و الاقيني بادبدب ع الارض و اقول
لا
مش لاعب
طبعا انتو دوختوا معايا
نتكلم من البداية
انا بقالى كتير هاموت انى استقر في القاهرة عشان ابدا ادور على اللي طول عمرى باحلم بيه
نفسي انحت في الصخر لغاية ما الاقي فرصة كويسة في الحلم البعيد اللي هو الغنا
الحلم اللي شحططنى كتير بسبب انه الحلم الوحيد اللي مرتبط جدا بمكان
يعني لازم اكون في القاهرة
و ياما كانت بهدلة و انا مخلص حفلتى و باجرى الحق اخر مترو يوصلني للبيجو
و اللي يدوس في شنطتى و اللي يهرس فيا
و غير كل ده
اهلى و رغبتهم في انى اكمل في هندسة و انهم كانوا بيصعبوها عليا جدا لما احاول الاقي فرصة للسفر
و فجأة بعد ما اتخرجت
لاقيتهم هم اول حد بيحاول معايا انى الاقي شغل في القاهرة
و حاولنا مرة و التانية
و للاسف كان احسن المقابلات حالا مقابلة في شهر اكتوبر اللي فات
وبعد كدة ولا حس و لا خبر
و راح الموضوع على ما راح
و ربنا بعتلي شغل هنا في بورسعيد
مصنع كبير ووظيفة محترمة ووضع مهم في المصنع
بس من جوايا ماكنتش مرتاح
لانى كنت عارف ان ده معناه3حاجات
مفيش سفر
مفيش حفلات
مفيش مزيكا
و كملت حياتي في المصنع لغاية ماجانى تليفون مفاجئ جدا
انى نجحت في المسابقة اللي عملتها الشركة و لازم اروح اعمل اجراءات تعييني
بعد 7 شهور من الانتظار
فجاة حسيت انى عايز اقول
لا مش لاعب
و ملعب خيول بحاله بيجرى في نافوخى
و التفكير جابلي ارتيكاريا و لومباجر و انفلوانزا الطيور
و اخيرا استقريت
و النتيجة اهى
انا خلاص
جاى القاهرة
و هاسيب بورسعيد
عارف انى ضحيت بشغل كويس و حياة مستقرة نوعا ما
و عارف انى باغامر بحاجات كتيرة اهمها حياتى كلها
بس خلاص
انا جاى فعلا ان شاء الله
و خلال اسبوع او اكتر بقليل هاكون من سكان القاهرة
و هانبدا مشوار جديد في حياتي
تجربة و قابلة لكل الاحتمالاااات
معايا ربنا
و ربنا بس هو اللي يقدر يسهلها عليا
و ربنا هو اللي يقدر يحبب الناس فيا و يبعتلي ناس و اصحاب و دنيا تانية غير الدنيا اللي انا سايبها هنا في بورسعيد بمحض رغبتي و اختياري
طبعا لا اخفى عليكم نظرات العتاب في عيون اصحابي المقربين
و كلمة"انت خلاص ناوى تنسلخ عننا"اللي شوفتها في عينيهم و قالتهالي روزاليا و جوسي ذات يوم
و للا كلام احمد عيسى ليا عن انى باغامر بمستقبلي كله و بلاش العب على عمرى
بس انا مش محتاج ده
انا محتاج منهم بجد كلمتين تشجيع و حبة دعاء
اهو انا رايح اشتغل و اجتهد و اعمل لي تجربة خاصة بيا
تجربة تخليني انا اللي بادير حياتي نوعا ما
و تجربة تخليني ابدا ادور في موضوعي
و رايح على دنيا تانية و مجتمع تانى و ناس تانية
من ساعتها و انا كلمت معظم اصحابي في القاهرة
و باقوللهم كلهم
خدوا بالكم منى
مش عايز اكون لوحدى
و انتو كمان خدوا بالكم منى
مش هاقول لكم ادعولى
بس بجد ادعوووووووووولى

هناك 26 تعليقًا:

ba7re يقول...

بندعيللللللللللك بجد
أولا طبعا لازم تعرف اننا كأصحابك و اصدقائك المقربين هنبقى زعلانين انك هتبعد
و فى نفس الوقت هنكون فرحانين انك ماشى فى طريق تحقيق حلمك
بس لينا حق عليك اننا نبدى تخوف انك تنسلخ مننا
و ده دورك انت لازم تحسسنا انك معانا حتى لو بعيد و متنساش فى أى فرصة تقدر تلقنا متجمعين كلنا تلقانا
انت عارف انى هعرف اجيبك حتى لو فى البيت بس متنساش ان لما تتجمع الشلة كلها بيكون لللقاء مذاق اخر
المهم كل الامنيات ليك يا على و ربنا يوفقك فى حياتك الجديدة
و لا تنسى هذه الرسالة
الانسان قليل بنفسه كثير باخوانه
فانت عندك اخوات كتير بسم الله ما شاء الله
فمتنساهمش و هما اكيد مش ناسينك
و اكيد مش هتكون لوحدك و شد حيلك
و هندعيلك بجدددد

Mohamed A. Ghaffar يقول...

فراق الأهل والعشيرة ومكان النشأة من اصعب ما يكون

ربنا يوفقك

hesterua يقول...

و لأن جه الوقت
لازم اقولك بالتوفيق يا على

وانت عارف رأيى فى التجربة دى من زمان

وانشاء الله تكون ...تانى...خطوة لتحقيق حلمك
لأن اول خطوة انت خدتها فعلا فى القاهرة من وانت فى بورسعيد هنا لسه

جمد قلبك ودوس يا فنان
وهتلاقى انشاء الله

تسـنيم يقول...

بص يا علي... محدش يعرف الخير فين ولا نعرف بكرة هنكون فين وأكيد روزاليا وجوسي بيتمنولك الأفضل والأحسن وإن الحلم يتحقق هما بس صعبان عليهم الفراق وخصوصا إنك قدامنا على طوول لكن في القاهرة هيبقى كل فترة.. عموما ركز وشد حيلك وربنا يكتبلك اللي فيه الخير دايما.

gogo we bas يقول...

مبروك على الوظيفة يا باشمهندس
يمكن تكون حياة جديدة واكيد عايزة تفكير جديد...... وقبل اى حاجة افتكر

اتقى الله فى كل خطوة بتخطيها واوعى تغفل عنه وبلاش تخلى حلمك اللى يحركك خليك انت اللى بتحركه واعلم ان لو الدنيا اجتمعت على ان ينفعوك بشئ لا ينفعوك الا بشئ قد كتبه الله لك

سلم انه لن يصيبك الا نصيبك فقط اخلص النية والعمل وتوكل على الله

ربنا يوفقك وتحقق اللى فيه خير ليك

اخت جديدة بس متبعاك)

gogo we bas يقول...
أزال المؤلف هذا التعليق.
bagabigo يقول...

مستنياك فى القاهرة
و اتأكد انى اختك و هاكون جنبك دايما

rosealia29 يقول...

ربنا يوفقك و يكرمك .. و إن شاء الله المستقبل هناك أحسن و أجمل و أفضل .. تأكد يا علي إنك هاتعمل هناك أصدقاء و أخوات زي ما عملت هنا .. (( بس خلي باااالك احنا الأصل ))إنت جميل يا علي في أي مكان .. و مافيش كلمة قولتلهالك غير و كانت من قلبي خوفاً عليك و ربي أعلم بكده ..


شد حيلك يا بشمهندس .. و دووووس و زي ما يتقاالك كتيررر اتقي الله في كل خطوة بتخطيها .. و إنت صاحب الحلم و إنت إللي بتمشيه مش العكس ..


ربنا يكرمك يارب ويوفقك .. و بعدين زي ما جودة قال هنا ولا هناك لو عايزين نجيبك هانجيبك ..

maha يقول...

سلام عليك يا علي
ربنا يوفقك و ان شاء الله تقدر تحقق حلمك
لو قلقان من موضوع الشغل و ان الموضوع يكون فيه مجازفه كبيرة
ممكن انك تاخد اجازة مؤقتا لو ينفع علي اساس ان يكون فيه بديل لو متحققش الغرض من السفر
لكن ان شاء الله ربنا يوفقك
بانتظار حفلة قريبة يا علي
سلام
مها

الوردة السوداء يقول...

صبح صبح ياعم الحاج

ربنا معاك ان شاء الله
ويكتبلك الاستقرار
وان شاء الله خير يعنى
وبجد لو مكتوبلك خير ان شاء الله يقربه منك
ولو شر يبعده عنك

david santos يقول...

Thanks for you work, is very nice, and have a good week.

sara يقول...

شوف ياعلى انا صحيح معرفكش اوى ومتقبلناش غير هى يمكن مرتين وحتى فيهم متكلمناش اوى بس ربنا يعلم اد ايه انا فرحنالك انك هتبتدى فى رحلة حياتك وربنا يعلم انى بدعيلك من قلبى لانك طيب وتستاهل كل خير .انا مش هنصحك تبقى واثق من نفسك فى كل حاجه هتعملها لانى انا اللى بحاول اتعلم منك الثقه فى النفس اللى لاحظتها فيك خليك متمسك بالثقه دى دايما. والايمان فى ان كل شىء بيد الله فنصيبك هو اللى هتشوفه .عشان كدا ماعليك الا الاجتهاد واول الغيث قطره زى ماانت عارف وبداية المشوار خطوه
انا بدعيلك ربنا يحقق امانيك لانك تستاهل فعلا كل خير وافتكر كمان
(ان الله لايضيع اجر من احسن عملا)
فتوكل على ربنا وارمى حمولك عليه
الانسان لازم يجرب وحتى لاقدر الله ان موصلش كليا لنتيجه عايزها فيجرب تانى وتالت ورابع وباصرار وتوفيق من ربنا صدقنى هيوصل وخليك عنيد مع الدنيا دى لانها دنيا عنيده اوى وللمحاوله فى حد ذاتها شرف انا بحترم فيك بجد انك بتحاول من غير خوف وبتاخد القرار من غير تردد وده الصح
وبعد الرغى ده كله , هلخلصلك اللى فى قلبى خد بالك من نفسك . ربنا يوفقك

علي الألفي يقول...

جودة نسيبي

طبعا انا دورى ان انا احسسكم ان انا ما انسلختش
بس دوركم انتو كمان انكو ماتحسسونيش ان انا بعدت و انتو نسيتونى
ـــــــــــــــــــــــــــ
محمد ع.الغفار
ااااااااااااه و الله
ــــــــــــــــــــــــ
احمد شلبي

ربنا يسمع منك
ــــــــــــــــــــــــــ

micheal يقول...

good luck ,ali

علي الألفي يقول...

تسنيم

و اكيد الفراق صعب جدا و غلس قوى عليا انا كمان
بس اهو لازم
و شكرا ع المروووووووووووووووووور الجميل
ــــــــــــــــــــــــــــ
جوجو و بس

ادعيلي ربنا يثبتني و يهديني للى فيه رضاه عنى

ـــــــــــــــــــــــــــ

بجابيجو

قد القول يا هاجر

ــــــــــــــــــــــــــــــ
روزا الشقيقة

ربنا ما يحرمنيش منك و ادعيلي بردو تاااااانى

ــــــــــــــــــــــــــــــ


مها

ان شاء الله في احتمال يكون فيه حفلى في شهر يونيو

ــــــــــــــــــــــــــــــ


الوردة السودة
صبح صبح يا عم الحج

ــــــــــــــــــــــــــــــ


ديفيد سانتوس

انت مين يااااااااااااااااض

عدو و للا حبيييييييييييييب

ـــــــــــــــــــــــــــــــ

بت يا سارة

انت ماتعرفيش حاجة
الثقة و الكلام الحلو ده بس في الحفلات
انما في الباقي لبخة

ـــــــــــــــــــــــــــــــ
ايكل
ثانك يو ماى فريند

حسام مراد يقول...

ربنا معااااااااااااااااااااك يا فنان
وان شاء الله تحقق حلمك

sad_doraa يقول...

على قد مانا فراحانة لأ هطير لأ بطنطط ان على هيبقى فالقاهرة جنب الى بيحبوه اوى على قد منا مش واثقة ان الخطوة دي تكون صح على العموم يا على انتا عارف انتا غالي فقلوب كل الناس في اي مكان تروحو ودعتلك انهارده على الفطار عشان كنت صايمة ربنا معاك
مع تحيات
مجنونة على الالفي

sara يقول...

هههههههه انا واثقه فيك برده بس بقولك ايه ياعلى, انا ملحقتش استمتع بصوتك عايزه اسمعك بتغنى بس هنشوفك فين تانى بس ياريت نشوفك عشان بقى هتوحشنا بعد كدا

18goosebumps يقول...

معرفش ليه عيونى دمعت وانا بقرأ الكلام ده

علي الانسان .. كما احب ان اناديك

ســافر ..شوف مستقبلك وشق طريقك

خلى كونك انسان ده قدام عنيك دايما

وحافظ اوى على الانسان ده في جو القاهره الصعب حبتين

خلى ربنا قدام عنيك ... وغنى وحس بكل كلمه بتقولها
ومتتنازلش عن اى مبدأ صالح سافرت بيه

وشد حيلك اووى واستعد لاستحمال
هرس من النوع التقيل

انت قدها

بدعيلك ... ربنا يحرصك
ويحفظك

ياسمين يقول...

مش هتبقى لوحدك
وهتحقق حلمك
بس انت ابقى افتكرنا لما تبقى مشهور
الإصرار والعزيمة اللى حسيتهم من البوست مش ممكن يكون نهايتهم غير النجاح
هتنجح
ماتنساش تبقى تبلغنا بحفلاتك
تحياتى

زحل الفلكي يقول...

يابني ده حلم
ولازم تحققه
مش اول متوصله تخاف منه

كويس انك اتكلت على الله وحتسافر
اوعا تخاف او تتراجع

دوس ياعلوة
وربنا يوعدنا يارب

شد حيلك
وافتكر

اوعا تتراجع

علي الألفي يقول...

حسام مراد


ربنا يخليك يا بلديات

ــــــــــــــــــــــــــــــــــــــــــــــــــــــــــــــــــــــــــــــ
سدرة
.
محدش عارف بكرة فيه ايه
بس احنا نعمل اللي علينا و في الاول و الخر توفيق ربنا هو الفيصل

ـــــــــــــــــــــــــــــــــــــــــــــــــــــــــــــــــــــــــــــــــ

جوسي اللي سابقة السن

مش قادر ارد
ربنا مايحرمنيش من كل اخواتى اللي باحس انهم الدعم الحقيقي ليا

ــــــــــــــــــــــــــــــــــــــــــــــــــــــــــــــــــــــــــــــ

ياسمييييييييين

يا رب ما يضيعوش منى الاصرار و العزيمة دول عند اول خبطة


ـــــــــــــــــــــــــــــــــــــــــــــــــــــــــــــــــــــــــــ
ـزحل الفلكى

راجع الكلام اللي انا قلته لاختك جوسي

REEMOO يقول...

رغم عذاب الفراق والبعد
لكنى اعتقد ان تحقيق الحلم بيعوض نوعا ما
ربنا يوفقك فى حياتك يا رب
وان شاء الله تحقق كل اللى بتتمناه

الأقطش الصغير يقول...

أخي العزيز علي ..
الدنيا هي التي تنادي علينا ولسنا نحن من نبحث عنها ..
حلم العيش في العاصمة يراودنا جميعاً خصوصاً وأن مجالنا الأدبي أو الفني يقتضي ذلك ..
أما بورسعيد فهي الوطن الذي يسكن قلوبنا جميعاً ولن تتغير هويتنا مهما ابتعدنا عنها ..
توكل على الله وما تشيلش هم

Dalia Ziada يقول...

علي
بهنيك على شجاعتك و بأكد عليك أنك لازم ما تخافش, أحنا مش هنعيش مليون مرة, و مش عندنا مليون حلم, و تضحيتك في سبيل حلمك شيء مش سهل أبدا علشان كده أكيد ربنا مش هيسيبك و أكيد هتنجح و تحقق كل اللي بتتمناه, راهن على عمرك و أيه يعني, و هو ايه هيكون معنى عمرك لو ما قدرتش تحقق حلمك و أملك فيه

تحياتي يا بطل
داليا

Esmeralda يقول...

انا من بلدنا برضه و استقريت فى القاهرة من تلات سنين

ممكن فى الاول تتعب شويه بس ده حيعتمد بشكل كبير عليك

بالتوفيق

محسوبتك من داخل الساقيه