الأربعاء، مايو 02، 2007

أمينة

مش عارف امتى العلاقة بيني و بينها بدات تبقى بالشكل العميق ده
بس انا فتحت عينيا ع الدنيا لاقيتها حاططاني في عينيها و قافلة عليا
و وعيت وانا باقولها يا ماما و هي اللي بتاكلني و بتحكي حواديت ارتجالية عجيبة بديعة
و جنب امي الحقيقية لاقيت عندي ماما امينة
و اللي يعرفني و كل اللي حواليا عارفين قد ايه امينة هي واحدة من 3 اشخاص في الدنيا شكّلوا شخصيتي و راعوني
آآآآه نسيت اقول لكم مين امينة
امينة هي جدتي والدة ابويا
لما باقعد جنبها في لحظات الصفا تقعد تحكيلي انا يا على حبيتك قبل ماتتولد و سميتك على واحنا رايحين نقرا فاتحة ابوك على امك وانا نازلة من بيت ابوها قلت لهم خلّوا بالكم من ام علي و لما انت اتولدت اصريت ان انا ادخل مع الدكتور و اكون اول واحدة تشيلك
كنت كل ما اكبر احس بحبها العجيب جدا و الخاص جدا ليا طبعا مانا اول حفيد ليها من اولادها و اسمي على اسم جدي و احنا عايشين معاها في يبت العيلة و كنت كل ما اكبر احس بحبها
بجد حب غريب عجيب جدا
امينة طول عمرها عنيدة جدا و كنا نتخانق خناقات لذيذة جدا و في الاخر انام في حضنها و تقعد تعيّط و ترقيني
عمري ما افتكر انها نادتني باسم دلع او أي اسم غير علي زي ما يكون اسمي مقدس عندها جدا و ماينفعش اتنادى بغيره لما كبرت شوية باقيت اناديها امينة كدة حاف و هي بقت تسمحلي اني ادلعها و امينة طول عمرها ست قوية جدا انا جدي مات بدري جدا في بداية الاربعينات من عمره و شالت هي الحمل هى و اكبر اولادها اللي هو ابويا عشان كدة تحس انهم بردو علاقتهم خاصة و انهم شركا في شيل الهم قوي و كانت عجيبة جدا و هي بتعاقبني على أي حاجة اعملها وانا صغير مش ممكن كل الحب اللي بلاقيه منها يبقى بردو كل العقاب القاسي ده تعرفوا ساعات جاراتنا لما بيتعبوا من اولادهم بيقولولهم هانجيبلكو طنط امينة
العيال يستخبوا رغم انها عمرها ماكانت بتاذي حد منهم بس السيرة القوية اللي معروفة عنها و قدرتها على السيطرة على أي عدد من الاطفال مهما زاد عالية جدا
ساعات الاعبها و اقول لها هاتي نتفرج على صورك القيمة يا موني
يااااااااااه دانت كنتي مزة زي القمر
طبعا ماهي بنت بيت ناس مهمين جدا في بورسعيد و كانت دلوعة تحكيلي ازاي كانت حماتها بتعاملها بحزم و شدة و ازاي ده خلاها تبقى جدعة و قادرة تشيل هم بيتها لوحدها
تضحك و تمصمص شفايفها وتقعد تحكيلي عن جدي لما كان ياخدها مصر و يحضروا حفلة ام كلثوم و للا لما يروحوا السينما يشوفوا فيلم جديد لليليى مراد
جدك ماكانش يجيب لي الروج غير ماكس فاكتر و اضحك انا و هي
افتكر امينة لما نبقى في المصيف و هي و امي جوة المطبخ بيعملوا أي حاجة ماتتعملش ابدا في مصيف و للا و هي قاعدة تلف محشي في الشاليه
حاسس قد ايه هي شافت كتير في حياتها و ازاي حتى لما كبرت اتحملت معانا تغير ظروفنا و ظروف مرض بابا و الازمات اللي لسة بنمر بيها لغاية دلوقت امينة الايام دي مش هي
تعبانة قوي و حالتها مش حلوة
انا بردو طول عمري عارفها و هي عندها السكر و القلب
بس ولا عمري حسيت بان ده بيوقّفها عن انها تعمل أي حاجة في حياتها
و انا مش مستوعب ان ست بالقوة اللي انا اتكلمت معاكو عنها ممكن تنام كدة لا حول لها ولا قوة و تكون في حالة غريبة عليها و عليا
و انا مش مستوعب ان الست اللي بروحها شايلة حياتي و ساندة البيت ممكن تروح
لما رجعت من الحفلة دخلت عليها اودتها و هي هاتبدا تنام و قعدت ع الكرسي جنب سريرها و حطيت راسي جنبها ع المخدة اتفاجئت انها حطت ايديها على راسي و قعدت تقرالي قرآن و ترقيني
كل شوية تقوللى البيت مالوش حس لما تسافر يا على
انا بجد يا جماعة مش مستوعب ان الست اللي شايلة بروحها حياتي ممكن تروح مني فجأة
عشان خاطري طلب
ادعو لامينة

هناك 19 تعليقًا:

Nouran يقول...

ربنا يخليهالك يا رب
تعرف بتبقى علاقة جميلة جدا ما بين الجدة والحفيد بالذات لو وصلت للدرجة ديه يعني نظام اعز الولد ولد الولد
تعرف انا جدتي زي جدتك كده ودلوقتي بقينا ندلعها كده حاف برضه
وزي ما انت طلبت ندعي لجدتك انت كمان ادعي لجدتي ماشي يا باشا :)
ربنا يخليهملنا يااا رب

Amr Ahmed يقول...

علوة

ازيك اولا

يارب تكون بخير

وربنا يخليلك جدتك ياااااااااارب

انا كانت جدتي ام ماما

الله يرحمها كنت بحبها جدا

وبرضو من الناس اللي اثروا فيا جدا

ربنا يدي جدتك الصحة

وينكى يقول...

ربنا يخليهالك ويشفيها ويقومها بالسلامه ياعلى
مش لاقيه كلام تانى أقوله.. بس انا عينى دمعت

اه على فكره
انا عامله حفله بلوجريه جامده يوم الخميس اللى هو بكره الساعه خمسه العصر
ياريت تيجى وقت ما تحب
السهره صباحى بعون الله
وقول للحبايب ييجوا معاك

hesterua يقول...

شوف يا بشمهندس

انت ياما أثرت فيا بصوتك وغناك

بس دى أول مرة اقرالك حاجة تهز الواحد

بجد قريت البوست مرتين

انا أعرف ماما امينة عن طريق التيلفون
هى اللى بترد عليا لما بكلمك

ومن غير ما تعرفنى لازم تدعيلى دعوتين حلوين كده بيحلوا اليوم

ربنا يخليهالنا بجد




أجمل ما فيكى يا أمينة
انك أمينة
امى
وحبيبتى
وصاحبتى
وستى
وتعدى السنين
وتفضلى تشيلينا

Memo يقول...

انت خلتنا كلنا خايفين عليها
و بندعيلها ربنا يشفيها

sara يقول...

يارب يقومهالك بالسلامه وتخف وتبقى احسن من الاول وترجع كلها نشاط وتدلع فيك زى الاول .ويارب يشفى كل مريض وتعبان من امة محمد عليه الصلاة والسلام
اللهم ياشافى ياحافظ يارحيم يامجيب
الدعاء تشفى ((نينه امينه)) وكل مريض
امين يارب العالمين
انا كمان ليا نينه بحبها اوى اوى اصلها هى اللى ربتنى وبتحبنى برده اكتر حفيده والباقى يتغاظو يقولوا اشمعنى الدلع ده كله لساره وانا برده برتاح اوى فى بيت نينه اكتر من بيتنا يمكن .الناس الكبار والجدود دول كنز وكلامهم حلو اوى وبلسم الناس دول كمان تعد معاهم تسمع اجمل كلام ونصايح يارب يخليهم لينا ويلطف بيهم.

reem يقول...

ربنا يخليهالك

Mohamed A. Ghaffar يقول...

جدتى لوالدى لها نفس الأسم أمينه وحمل من بعدها 9 فتيات من العائله نفس الأسم منهم اختى

لم يسعدى الحظ ان الحق زمانها فقد توافها الله قبل حضورى بزمن ولكنه تحمل نفس التأثير فى العائله كلها

ربنا يبارك لك فى جدتك

Esmeralda يقول...

احيانا الجد ا و الجده بيكون ليهم تاثير اقوى و الرتباط بيهم ممكنن يكون اقوى برضه
ربنا يشفيها

ادعى ربنا دايما

mesh2dra يقول...

السلام عليكم

ربنا يشفيها يارب
ويديها الصحة

متقلقش
خير إن شاء الله

سلاماتي ليها

18goosebumps يقول...

على

انا حبتها من كلامك عندها
وحاسه انها بقت صحبتى
ونفسي اشوفها
سلملى عليها يا على بجد سلملى عليها

ربنا يشفيها يا على يا رب ويبارك لك في عمرها

بس همسه صغننه
اتأكد مهما حصل ان ربنا مش بيعمل لينا حاجه وحشه ابدا

rosealia29 يقول...

و انا كمان حبيتها أوي من كلامك عنها .. و سمعت صوتها .. و حسيت بايديها من كلامك عنها .. ربنا يخليهالنا و يخليك ليها .. تسعد بوجودك في حياتها .. و إحنا نعيش على دعوة خالصة من قلبها أبيض ..

maha يقول...

ربنا يخليهالك يا رب يا علي
و تفرح بيك دايما
و تدعيلك و ترقيك
جمال اوي الناس دي
جدتك و جدتي و الناس بتوع زمان
تحس انهم بيحبوا بجد اننا اروحنا في قلبهم
عارف ان جدتي كده برضه معايا
بتحبني لدرجة اني بخاف عليها جدا ان يجرالي حاجة و تعرف اني تعبانه مثلا
في لحظة بلاقيها مش تتصل ..دي تيجي جري بلهفة غريبة تخلي الانسان يبتسم بجد
حبهم غالي اوي يا رب يخليهملنا يا رب
سلام
مها

بنت الحياه يقول...

الا قولي يا ألفي انت نفسك تغني ايه صحيح؟

الوردة السوداء يقول...

حلو اوى وصفك للعلاقة بجد

ربنا يخليكو لبعض

REEMOO يقول...

ربنا يخليهالك يا رب ومش يحرمك منها ابدا
انا بس عندى سؤال محيرنى كل ما ادخل عندك
هو انت ليه بتتكلم كانك مسافر ومش هتدخل البلوج تانى؟ هى القاهره مفيهاش نت ولا ايه؟
بلاش احساس الوداع ده وانت هتسافر ومش هتدخل تانى
يارب تبقى جدبتك بخير وتفضل معاك لغايه ما تشوفك وانت بتحقق حلمك يارب
تحياتى

heba labeb يقول...

اكيد يا على ست بالقوة دى
اكيد مش هتستسلم بالمرض بسهولة
ربنا يحفظها ويحميهالك ويخليهالك يارب
وان شاء الله تفضل معاك لحد ما تحقق كل احلامك وتشوف ولادك وتسميهم هم كمان
بجد انا حبيتها من كلامك عنها
تحياتى ليك

hamasat يقول...

علي ربنا يخلي لك جدتك
جميلة اوي الاحاسيس اللي وصفتها ربنا ما يحرمكوش من بعض ابدا ربنا يعفي عنها ويعافيها ويعافي كل مرضانا يارب

Rania يقول...

عارفة احساسك
كان ليا بردة والدة ابويا و كانت حته منى
اتوفت و كنت قبلها بيوم معاها
لحد دلوقت بفتكرها و بحس ان قلبى مخطوف
ربنا يخليهالك و مش يرحرمك من حنانهاااا ابدااااااا
قول يا رب

تحياتى