الأحد، ديسمبر 09، 2007

عندما تختصر شهور من عمرك في شريط كاسيت



انترو جيتار هادئ بيتسحب للودان و تدخل بعيه موسيقى ماتعرفش توصل منين للقلب و وراها انغام
كل مانقرب لبعض..كل مايزيد الاشتياق
اغنية سهلة صعبة
و هى شغالة ع الاف ام لاقيتني بيرجع ليا شريط حياتي لمدة ست شهور
من يوم ما سيبت بورسعيد و قررت انى انقل عمرى لبلد تانية انا فيها لوحدى
كان دايما نزل شريط انغام و انا في بورسعيد حدث مهم باستناه
لكن المرة دى كانت الاحداث كتير قوي ورا بعضها



تصدقوا انى رجعت لى كل لحظة مرت بيا خصوصا لما طلبت من صاحبي اللي كنت معاه في عربيته انه يشغل الشريط


يووووووووووووووووووه





كل ما نقرب










اول ما باسمع الاغنية بافتكر وانا مرمى في السكن بتاع الشغل اللي كان بعيييييييييييييييد عن الحياة و قاعد اترجى الواد بتاع وصلة الدش انه يشغل لى قناة روتانا عشان اتفرج ع الكليب



ما اتكلمتش معاكم عن الفترة دى كتير



يمكن لانى كنت وقتها مش مبسوط لدرجة انى ما باتكلمش اساسا بس اللي اقدر اقولهولكم انى كنت معزول عن الحياة




من شغلي للبيت



علما ان شغلي تحت البيت



و كنت لو حبيت اتهور و انزل نت كنت باقطع حوالى اربعين كيلو عشان اقعد ساعة و ارجع اتلقح في اوتوبيس المستعمرة"هى اسمها كدة"مستني انه يطلع



عارفين اوتوبيس المستعمرة ده شكله ايه؟



فاكرين لما نجاة الصغيرة كانت في فيلم طالعين رحلة و بتغني عاليادليا"الا هو يعني ايه عاليادليا؟"كانت راكبة اوتوبيس



اهو بتاع الشغل ده الاوتوبيس الاقدم منه



اوتوبيس ابو بوز كبير من قدام







مابتعلمش






مش عارف ليه كنت متضايق من الغنوة دى يوم ماسمعتها و كنت حاسس ان الموزع عامل فيها مزيكا مش قد حلاوة كلامها و لحنها



و لانى عشت هنا حاجة شبه كلام الاغنية دى



يمكن مش بالتفاصيل العاطفية الرهيبة هنا في الاغنية



و لانها تجربة سخيفة ما باحبش افتكرها



لكنها حصلت لى هنا في القاهرة





قولت ادينا نتكلم سوا و الملخص



ما تحاولش تجرى ورا صاحب هو مابيعتبركش صاحبه



و لا تحاول تدخل في وسط انت عارف انه ممكن ما تكونش واحد منهم



انتهى










هاتمناله الخير




حد فاكر البوست اللي انا كتبته عن الاغنية دي


انغام هانم غنت الاغنية دي قبل ما تنزل الشريط بحوالى خمس شهور في حفلة


وقتها كان واحد قريب منى قوي قوي في حياتي و صديق عزيز عليا قوي بيمر بتجربة سخيفة و انا كمان جت رجلى فيها


صاحبنا ده كان مرتبط ببنت و انفصلوا


لحد كدة و مفيش حاجة


انما بعد ما انفصلوا اتفاجئنا كلنا بالبنت ى هى وواحدة صاحبتها ماليين الدنيا حكايات عجيبة عنه و عمالين يشوهوا صورته قدام طوب الارض و هاتك يا تقطيع في الواد


مش بس هو لا و كل اصحابه و انا كمان كنت واحد منهم


فاتفاجئت لما سمعت الاغنية دي


هاتمناله الخير و هى بتتكلم عن حبيبين انفصلوا لككنها ما بتتمناش ليه غير كل خير لانه كان في يوم حبيبها و لانه كان يوم سبب في مداواتها حتى ولو ككان جارحها


فاكرين البوست ده






الامل




اول ما بسمعها بافتكر يوم واحدة من خناقاتي الكتيييييييييييييير مع مديري هنا في الشغل


يومها كان مجرجرنى معاه في مشوار في قرية في الفيوم على مسافة كبيرة من العمار


و كنت متفق معاه انى هامشي من المامورية بدرى لظروف عندى


و اتفقنا و سافرنا


و هناك عمل زى الافلام العربي القديمة


لما كمال الشناوي استغل براءة و طيبة و هطل شادية و اخدها معاه و مارضيش يسيبها


انا لازم امشي يا باشمهندس دلوقت انا اتاخرت


مانتاش ماشي الا لما نخلص شغلنا


شغل ايه يا باشمهندس ما انت قاعد تطفح اهو و شوية الشاي جاي لك و مفيش شغل


انت حر عايز تمشي اتفضل


بس مش هخلى السواق يوصلك في اي حتة


و انا عملت شملول و سيبته و وقفت في الصحرا اوقف اي معزة شاردة او جمل سفينة الصحراءاو حتى توك توك الصحراء


لغاية الحمد لله ما وصلت من الفيوم للقاهرة"اللي هم جنب بعض"في اربع ساعات و يا محاسن الصدف كان معايا الام بي ثري و سمعت الغنوة دى


اى نعم انا ما كنتش حابب كلماتها


بس ذكرياتها معايا عاشت قوي






باغير




الاغنية دى مش عارف اللي بيسحبني فيها ايه


يمكن لانى باحب قوي احساس البنوتة اللي بتغير بمناسبة و من غير مناسبة بس من غير ما تكون خنقة للي بتحبه


و يمكن لانى مفتقد انى الاقي حد احس انه بيحبني قوي كدة و متمسك بيا و بيغير عليا بالطريقة دى؟


يمكن






اهو ده اللي عندى




بتقول تعبتك ...اديني سيبتك...يا رب بس تكون مرتاح


باقل راحتك...خلاص براحتك...في ناس تحب تعيش في جراح


وجودى جنبك...ماكانش عاجبك...و عشان تحس بقيمتى مشيت


...دور عليا ...او حن ليا ...و ابقى افتكر انت اللي بديت


و اهو ده اللي عندى


و عيش في بعدي


قلبي عمل كل اللي عليه




مش لاقي حاجة احلى من الكلام ده اوصفه بيها


اصله حقيقي قوي






ما باحبش حد يشوف اى دموع في عنيه




مش عارف اذكر موقف من مواااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااقف كتير حسيت فيها بالاغنية دي


انا هنا مريت بمواقف لو كانت في وقت تاني غير اللي انا فيه


او في ظروف تانية


كان ممكن زمانى دلوقت مشلول


لكنى قررت انى اقاوم


و انه ماتجيش عليا لحظة الم هدومى و ارجع بورسعيد و اقول مش لاعب


و كانى قفلت باب بورسعيد ورايا و رميت المفتاح عشان ما ارجعش


و ده خلانى اشد على نفسي في حاجات كتير و اتماسك قدام حاجات كتير


الا حاجة واحدة


الوحدة


انا هنا لوحدى قوي


بس معايا ربنا






غيرتني


هنا بقى روحت انا دايس ريبيت و خليت الشريط يفضل يعيد و يزيد و يقول


اغنيتي المفضلة


و اللي باعشقها


و اللي باحس انها متكاملة قوي


و اللي بتفاجئني كل يوم باسمعها يه بحاجات حلوة كتيرة و جديدة


و اللي سحبتني


على فكرة دى كمان انا كتبت عنها قبل كدة هنا


و هاتلاقوها شغالة دلوقت


الاغنية دى على مدار ست شهور انا عشت فيهم هنا سمعتها كتير قوي قوي


هو انت ايه


مش بردو انسان زينا و ممكن تحس


و للا انت ايه


كل اللي عارفه عن الحياة تاخد و بس






مرة تانية

انغام

شكرا لانك موجودة بيننا

هناك 8 تعليقات:

smraa alnil يقول...

ايه يا عم هو مش في اي حد بيغني غير انغام ولا ايه

طبعا صوتها واختيارها لكلماتها والحانها لا يوصف

انت ازيك بقي
وبالنسبة للمواقف بتحصل يا علي كتير

§a§a يقول...

جامد جدا

انا بحب جدا انغام وبصراحه الاغانى بتاعت الشريط بتاعها جامد موت

وينكى يقول...

متهيألى احنا اتناقشنا قبل كده على الألبوم ده وكل أغنيه فيه

وكأنك بتتكلم دلوقتى بلسانى
شكرا أنغام
لأنك موجوده بيننا

امرأة تقول الذي لا يقال يقول...

يااااااااااااااه
ايه يا علي كل ده؟؟؟

أنا مش عارفة اقوللك ايه وللا ايه
كل حاجة قلتها يترد عليها بكلام كتير.. ومواقف كتير
مش عارفة حاجة حلوة وللا وحشة اني أقوللك انك مش لوحدك اللي حاسس بكده
بجد مش عارفة لما الواحد يقول كده يبأى بيآزر حد وللا بيزود همومه
بس دي الحقيقة

ما تحاولش تجرى ورا صاحب هو مابيعتبركش صاحبه
و لا تحاول تدخل في وسط انت عارف انه ممكن ما تكونش واحد منهم

الكلام ده أكنه ليا
وياما قلت ان في حاجات حسة انها ليا
بس يا ترى مين يتعظ؟؟

من الآخر
بجد احنا غاويين وجع قلب
ومش عارفة بمزاجنا.. ولا مكتوب علينا

كلمة أخيرة ليا قبلك
بجد كفاية كآبة كده
حياتنا الله أعلم نهايتها امتى
بس بجد أحلى فترة المفروض هي اللي احنا فيها
بلاش نضيعها في حاجات ما تستاهلش

tota_fm يقول...

بجد انغام رائعه فى صوتها واختيارها لاغانيها بس انا مش بحب اغنيه كل مانقرب لبعض اوى المهم حلو اوى ان كل اغنيه يكونلك معاها زكرى بس الاحلى ان تكون الذكريات دي حلو ربنا يحلى ايامك وذكرياتك
وكل سنه وانت طيب وكل عيد وانت بخير

gogo we bas يقول...

يامن تمنينا لهم الخير
واحببناهم فى الله لاغير
كل عيد وانتم بخير
*****************
عقبال يارب العيدالجاى تكون محقق كل اللى تتمناه

deja vu يقول...

عزيزي علي

انت تلمستَ الحرير المسمى بالقلب عندما تحدثتَ أنغام

هي المعادلة الصعبة الرقيقة في هدا الزمن ..

يقولون لي دائماً .. سوتك يشبه أنغام جداً .. أفرح رغم أنني هنا لم أجد من يقول لي فقط "صوتك حلو قوي" ههههه

أنغام هي العنصر المهم جداً في معادلة غنائي ومدرستي الغنائية

أترقب سماع صوتك جداً .. وشرفني بزيارة مدونتي "الغير موسيقية" هههه

لكن وجب عليك عندما تزرني أن تقول لي شيئاً .. أو سمها خدمة "والننننننبي" ههههه

كيف أستطيع أن اضع موسيقى في واجهة مدونتي أو في إحدى موضوعاتي .. الموضوع عامللي خنقة لأني عندي "كولليكشن" مش عارفة حضيفه امتى

مدونتك مختبئة خلف ستار يفضح رقته .. ابقه فهو ما يعطيها رونقها


ثم يسرني جداً أن أطرح موضوعات تخص قضايا فنية نناقشها مع أمثالنا من الآتين من كوكب الكائنات الموسيقية

تحياتي

hisham يقول...

تفاصيلك جميلة
منقاة بعناية المحب
رصد المتأمل
لكن مايدهشنى
أنه رغم ذوقك البين من اختياراتك
تقتصر انتقاءاتك على اغنيات معاصرة
جميلة حقا
لكننى أدعوك مثلا للإستماع
لأغنية للمبدعة شادية
اسمها " على فين .. على فين "
وخاصة مفتتحها الموسيقى
كلمات عبد الرحيم منصور
وتلحين بليغ
نقلة نوعية وفنية
فى ظنى أن خلودها
هو سر ابداعها
ولكن ندرة اذاعتها
تقلل من استمرارها
استمع لها
وقل لى مارأيك
نصها موجود فى مدونتى
لكن الأغنية ذاتها
خارج حدود الوصف
محبتى