الثلاثاء، فبراير 13، 2007

ماتحبنيش قد ما توريني انت قد ايه بتحبني


احساس حلو قوي لما تحس انك اثرت في حد بشكل من الاشكال ده اللي حسسهولي الواد حسام في زيارتي الاخيرة للسويس كنا زمان من حوالي اربع سنين كدة بنتكلم و شرحتله فلسفتي الخاصة في التعامل مع الناس و تعاملهم معايا كان وقتها لينا واحد صاحبنا دايما مشغول و مابيسالش على حد و تيجي تكلمه يلومك ازاي انت مش حاسس قد ايه هو بيحبك و انت واحشه رغم بعده و انشغاله فقلت الكلمة دي ماتحبنيش قد ماتحسسني انت قد ايه بتحبني بالعربي لو انت حد بيحبني و مابتعملش أي حاجة توريني انت بتحبني قد ايه انا استفدت ايه لو انت صاحبي و مفيش بيننا ع الاقل سؤال يبقى ايه؟ لو لما باشوفك بعد غياب ما بالقاش الحرارة في السلام و السؤال يبقى اهبب ايه بحبك و صداقتك و سبحان الله لاقيت الواد فاكر الكلام ده كويس و بيفكرني بايام ماقلناه و لاقيته بيتكلم معايا عن اسلوبي في التعبير عن حبي للاخرين و ازاي ان انا متفجر المشاعر ولما رجعت بورسعيد دخلت على مدونة الصديقة شيماء اللي اتفاجئت اساسا انها جت الحفلة من غير ما نتقابل لفت نظري في تعليقها عن الحفلة انها قالت لاقيت على الالفي في استقبالنا على باب ساقية الصاوي و فرحان قوي باصحابه البورسعيديين و البلوجرز كمان باسم اجدع واحد في الشارع علق على استقبالي ليه اكتر من مرة كلام حسام وباسم و شيماء خلاني الاحظ الحكاية دي في نفسي لاول مرة انا فعلا باكون طاير باي حد بييجي بورسعيد مخصوص عشاني و باكون طاير باي مكالمة سؤال عليا من أي حد من اللي باحبهم و باكون صريح قوي و واضح في التعبير عن حبي للاخرين و بصراحة بانتظر منهم كدة كمان يمكن ساعات ده بيسبب لي صدمة من اني مالاقيش كدة منهم و بيخليني ساعات اسال نفسي هو انا اللي غلط و للا هم يعني هو انا محدش محتاج مني اني اكون بالشكل ده معاه في استقبالي و تعاملي و يمكن اكون انا باطلب منهم اكتر من اللي هم يقدروا يعملوه عشاني مش عارف

هناك تعليقان (2):

وينكى يقول...

احساسك ده طبيعى يا علوه
اى حد من حقه انه يحس بأدله ماديه ملموسه لحب اللى قدامه ليه
يعنى لما واحد ييجى يقولك بحبك وهو مكشر فى وشك مثلا...انت هاتعمل ايه ساعتها غير انك تديله كشاف على دماغه
ممكن يكون رد فعلك اكتر من المتوقع شويه..سواء فى الفرح او فى الزعل
دا ناتج طبيعى لان شخصيتك عاطفيه قوى
انت مش لوحدك فى كده
اقولك حاجه حلوه؟؟

لا مش بسبوسه
حاول تتلمس العذر للمقصر..مره واتنين وتلاته
واعرف فى الرابعه انه بيستهبل وسيبك منه
وبكده ماحدش يبقى ظلم حد

أجدع واحد في الشارع يقول...

كل عيد حب وانت اجمل واحسن فنان

ربنا يسعدك يا على يا رب