الأحد، فبراير 11، 2007

الحمد لله خلااااااص


الاول عايز اشكر كل واحد وقف جنبي بكلمة تشجيع او خوف عليا و طبعا احنا عارفين ان الشكر بيبوظ جمال العمل و انكم مش محتاجيين
بس بجد متحرمش منكم
ماهو انا كان لازم اعمل أي حاجة تخرجني من اللي انا فيه
انا كان هايجرالي حاجة كنت وصلت لمرحلة مش طبيعية
و ربنا بعت لي العلاج على ايد صديق و اخ
فجاة لاقيت تليفون من عمرو صاحبي
الو انا هنا في بورسعيد انت فين
و نزلت
اااااااااااااه نسيت اقول لكم
عمرو ده صاحبي من السويس اتعرفنا من اربع سنين في اسبوع شباب الجامعات و من يومها الحمد لله ما انقطعناش عن بعض
المهم
تيجي يا واد يا لولو اللي هو انا ننزل اسماعلية نزور العيال؟
اه و الله فكرة يا واد يا مورو اللي هو عمرو
المهم و بعد شوية طلعت بفكرة تانية ان احنا نروح اسماعيلية نشوف اصحابنا اللي بيحضروا لاسبوع شباب الجامعات و بعد كدة نروح نكمل في السويس
كل ده في اقل من نص ساعة كنت محضر شنطتي الصغيرة و اتغدينا و هوب على اسماعيلية
ما طولناش هناك قوي
قعدنا من الساعة 7 للساعة 11و نص و طلعنا يا برنسات ع السويس
طبعا محدش كان فيه حيل للف و لا خروج
بس انا شبطت اني اروح ابص بصة على بورتوفيق عشقي كنا حوالي الساعة اتنين لما وصلنا بيت الواد سامو
اااااااااه سامو ده اللي هو حسام العجيب حاجة كدة طيبة قوي و مالوش في الاذية و انسان طيب كدة بطريقة اوفر شوية
المهم قبل ما ابدا احكيلكو ع المشوار
مش عارف ايه اللي بيني و بين السويس دي
اتعودت دايما ان كل لحظات اكتئابي او تعبي الاقيني باروح هناك اشوف كل الناس اللي باحبهم هناك و باحس ان كل اللي هناك اساسا بيدلعوني و مش الناس بس
لا الاماكن كلها
اللي مازارش فيكو السويس احب اعرفه انها بلد عادية جدا بس كله بعيد عن بعضه و دايما تلاقي وسط البلد في الاربعين و وسط السويس زحمة و تلاقي بورتوفيق دايما رايقة و جميلة
المهم قابلت هناك كل الناس اللي حابب اشوفهم في السويس قابلت تيكا اللي هو طارق الجدع
الواد ده يا جماعة طيب قوي و ادعوله لان فرحه خلاص كمان كام شهر
و قابلت سلاكة الواد اسلام الكراني مطرب لذيذ و واد جدع
هم دول الشلة اللي قضيت معاهم الاربع ايام
بس مش دول و بس
قابلت كمان ناس كتير من اصحابي في اسبوع شباب الجامعات اللي حكيت لكو عليه
روحنا مكان اسمة نادي التجديف هناك ع البحر و شفت بجد احلى مناظر للشمس و البحر و الاحلى اصحابي صبيان و بنات اللي كل واحد منهم ساب اللي في ايده عشان ييجي يسلم عليا
و الحمد لله الرحلة كان فيها شوية مفاجاات
يعني مثلا احنا قادين انا و مورو و حسام و فجاة نزل على راسنا مكالمة تليفون الحقوا النتيجة اتعلقت
طبعا نزلنا بسرعة و كل واحد فينا هايموت من الخوف
طب هم و خايفين لان نتيجة متحاناتهم
انا بقى خايف احسن تطلع خبر مش حلو و يتقال ياع الواد ده فقر علينا
المهم العيال نجحوا و كانت ليلة جامدة جدا الحمد لله
نيجي بقى لاهم حاجة حصلت في اخر يوم لما مورو اخدنا و طلعنا العين السخنة
بجد دي كانت احلى لحظات قضيتها من زمان
ايه الجمال ده و الروقان ده
طبعا العيال كانول مخنوقين لان المكان كان فاضي و مافيش زحمة الناس و المزز
بس انا كنت في احلى لحظات استمتاعي
و الدنيا بقت تمطر فوقنا و احنا قاعدين ع البحر نغني و نتصور
على فكرة انا لاول مرة اصر اني اتصور كتير كدة في أي مكان و مع اصحابي
بجد كنت عايز ارجع بشوية ذكريات حلوة عن الموضوع
ااااااااااااه
نسيت اقول لكم اني قبل ما اسافر بيوم كنت بردو باحاول اغير أي حاجة يمكن اتحسن شوية و روحت يا اسيادنا للحلاق شلت شعري كله نمرة اتنين
عشان اللي شافوني في الحفلة ممكن ما يعرفونيش في الصور
و رجعت من السويس ناوي ان شاء الله حاجات كتير ممكن تتغير
يعني يمكن ابدا الريجيم فعلا
و بدات احضر ال سي في بتاعتي من جديد
و نازل ان شاء الله اعمل جولة جديدة من اول و جديد

هناك 5 تعليقات:

rokaaa يقول...

على باشا
حبيب قلبى بجد
ربنا يخليك يا باشا لأصحابك واصدقائك , ويخليهم ليك بجد , انت عارف يا على من فتره قريبه اوى ما كنتش حاسس بمعنى الصداقه اللى بجد
كنت ديما بسال نفسى هو يعنى ايه صديق ؟
بس بجد والحمد لله قدرت اوصل لممفهوم الصداقه الحقيقى على ايد واحد زميلى فى الكليه على فكره اسمه على
وان شاء الله انت تكون تانى واحد
وعلى فكره انت شوقتنى اوى ازور السويس
ماليش دعوه بقى يا عم
انت تفسحنى مره فى بورسعيد ومره فى السويس
اوكى
اخوك اللى فى مصر بجد
روكااااااااااا

malish_da3wa يقول...

لوووول
انا زعلت كده

كلام لوجيك يقول...

تمام كده يا على
كده اتطمنا عليك وعرفنا انك طلعت من الموود المزعج اللى كنت فيه
احلى حاجه لما تكون حياتك دسمة ومليانه حيويه والاصدقاء حواليك
ربنا يديم عليك المحبة والصحبة الكويسه المحترمة
استثمر حياتك ووقتك على الوجه الامثل
وهننتظر جديدك

خالص امنياتى القلبية ودمت بخير

وينكى يقول...

الحمد لله انك فكيت شويه وخرجت من المود اللى كنت فيه
دا اهم حاجه عندى
يارب تفضل دايما مع اللى بتحبهم ويفضلوا حواليك
بقى معقول انت حلقت شعرك؟؟؟؟
ياخساره والف خساره
بس انا عارفه الاحساس ده كويس قوى
قبل امتحان النسبيه عملتها وقصيت شعرى
اكيد مش هايبقى زى شعرك...بس يعنى
اهو..كله بيعدى

بنى أدم مع وقف التنفيذ يقول...

انت من السويس يا باشا