الجمعة، ديسمبر 01، 2006

الهرس التاني

و تكمل الرحلة العجيبة بيوم جديد في القاهرة
كنت رايح اعمل اختبار لشغل في الجيزة و كنت في مدينة نصرو نازل من الساعة7الصبح
تصدقوا يا ناس ان سواق ميكروباص جيت اركب معاه نزلني و قال:انا عايز واحد رفيع!!!لامؤاخذة يا استاذ
دا مع ملاحظة التلاحم الجماهيري اللا انساني الموجود اساسا
و استنيت لغاية ما تكرم واحد منهم و اتعطف ووافق اني اركب
اما عن موقف السيدة عائشة او السيدة عيشة زي ما بيقولوا
ف انا شايف ان اكبر اهانة لام المؤمنين عائشة رمز الرحمة ان الجحيم ده يبقى على اسمها
ايه ده المفروض يبقى اسمه ميدان كونداليزا او ميدان امنا الغولة لان لا السيدة عائشة و لا أي حد يرضى باللي بيحصل
عربيات مكتوب عليها جيزة و مش راضية تحمل و امم من البشر منتظرة عربية و احدة عشان يهرسوا بعض و يهرسوا أي حد مش مهم راجل او ست
شايلة عيل او طالبة جامعة مش مهم أي حاجة المهم ان كل شخص ياخذ دوره في المعجنة و يتهرس له اكتر من مرة يوميا
و الحمد لله و صلنا الشركة في الجيزة عشان نبدا فصل جديد من الغتاتة
نيجي بقى للامن اللي واقف تحت الشركة
الظابط بيشوف ورقي و بطاقتي و فجاة لاقيته بيبص لي من فوق لتحت و هو بيقول:بقى سيادتك من بورسعيد
طبعا قلبي وقع و قلت يمكن ممنوع دخول البورسعيدية للمكان ده و للا يمكن اكتشفوا ان بورسعيد هي المقر الجديد لبن لادن و تنظيم القاعدة او او او او..................مافهمتش
المهم ما سابنيش كتير في تفكيري و سالني:بقى بورسعيد مش بتحب الاهلي
ليه بقى يا اخويا
.....................................................
(النقط دي مكانها شتيمة كنت باقولها في سري بس ما اقدرش اكتبها قدامكم
بس ممكن كل واحد منكم يحط أي حاجة شايفها مناسبة و خصوصا كلمات الاحتجاج المعروفة)
طب وانا مال امي
انا مابحبش الكورة اساسا و تتحرق الكورة بجاز
انا واحد طالع مشدود و عندي انتر فيوinterview
و مش ناقص و ما نمتش اساسا و سيادته و اخد موقف عشان ماتش خايب
و بعد فاصل الاستظراف و الدفاع عن جيش الاهلي المغاويير ضد الخونة البورسعيدية اخيرا طلعت الشركة و الحمد لله المقابلة عدت على خير وانتهت بالكلمة اللعينة
(هانبقى نتصل بيك يا باشمهندس)
و نزلت
ماكدبش عليكم كان نفسي اروح يومها اختبارات سوبر ستار
ايه مالكم تنحتم ليه
اه كان يومها الامتحانات شغالة و كان نفسي اروح بس ماكدبش عليكم كنت متردد جدا و خصوصا بعد تجربة مؤلمة لي هناك تحبوا تسمعوها؟
اوك
من 3 سنين كنت هاموت و اروح الاختبارات و حاربت الدنيا عشان اسافر و خصوصا انهم كانوا بيعملوها قريب من الامتحانات و كان عندي حالة وفاة في العيلة والظروف كانت نيلة بس رغم دا كله اصريت و سافرت
و قلت هم دول اللي هايدوني فرصة عمري اللي حلمت بيها و بعد كل ده اصطدمت بالوجه الجليدي لمعدة البرنامج اللي قالت في منتهى القلاطة
علي انت صوتك كتير منيح بس نحنا عندنا مستوى بالبروجرام ما بدنا غيره
رغم ان انا عارف كويس انا غنيت يومها ازاي و ما تونتش نهائي

نرجع للهرس
بعد ما نزلت دعيت ربنا و قلت يا رب لو ماهيش ليّا او هايتحرق دمي فيها ماتخلينيش اروحها يا رب
و فعلا لاقيت واحد صاحبي بيتصل بيا عشان نتقابل و كان قريب مني حمدت ربنا و رحت له
و سمعت منه العجب اللي حاصل في اختبارات سوبر ستار السنة دي
واحد انا عارفه كويس و عارف انه مطرب جامد اول ما دخل اساسا و بيقول اول كلمة اصطدم بالوجه الجليدي اللي انتو اساسا ما شفتوهوش لانه ما بيظهرش ع الشاشة بيقوله:شكرا محمد ما مشي الحال
و حكالي انهم خلّوا واحد يغني و يرقص زي هيفاء و انهم كانوا بياخدوا ناس كتير ما بيعرفوش يغنوا عشان يضحكوا الناس عليهم في الفقرة اللاانسانية سوبر مهضوم..........بجد احمدك و اشكر فضلك يا ربي انك مارضيتش لي ان دمي يتحرق و اروح هناك اساسا
صاحبي ده كان في فيصل و كل ده مفيهوش مشكلة لكن ان انا انزل من بيته الساعة اتنين عشان اوصل لابويا م.نصر الساعة خمسة و ربع يبقى كدة كتير جدا و غلاسة بجد و يا سلام كمان لما اقول لكم ان احد الاسباب في التاخير تشريفة كانت قافلة السكة عند مجلس الشعب خلتني انزل و امشي من قبل مجلس الشعب بشوية لغاية عبد المنعم رياض
و وصلت لابويا و الحمد لله
و نكمل كلامنا بعدين اصل الحاجّة بتنادي بقالها فترة

حاااااااضر يا امي جايلك اهو

هناك 9 تعليقات:

غير معرف يقول...

واضح انو الهرس عندك هيعمل متسلسله من الاعداد الطبيعيه
بس بجد على قد ما هو هرس يضحك فهو يبكي في نفس الوقت
ربنا في عونك و في عونا اهو كل واحد مهروس بشوكه شكل

nour يقول...

انت عسسسل
و بتفكرنى بنفسى اول مرة انزل القاهرة لوحدى من اربع سنين لما ابتديت ادرس فى ام الدنيا..نفس الصدمة نفس الاستغراب..ودلوقت بعد فوات الاربع سنسن و فاضل سنة واحدة كمان بقيت متعودة على الكلام ده..بمشى زى الروبوت و اركب الاتوبيس زى الروبوت
اما بقى عن الاختبابرات دى ف ده شىء متوقع يا معلم..

غير معرف يقول...

كلنا بنتهرس نتهرس نتفعص
علي فكره ليك حق الكوره دي شيء خايب و الناس بتتكلم عنه كأنه ازمه مصر الاقتصاديه و حلولها ... و بالنسبه للبرامج دي فهي شويهمسخره يا صاحبي فرصتك الحقيقيه هتجي لك هتجي لك لا تتعجل اعمل اللي عليك بس
هاني جورج

tamer يقول...

الناس اليومين دول محدش بقى طايق حد مش عارف لية

دة مرض وانتشر ولا اية الحكاية

تحياتى

غير معرف يقول...

مهروس مهروس يا ولدي
وخلي بالك كما تدين تدان

tafaseel يقول...

سمسم الجميلة
شكرا ع المرور بس ده اخر هرس في زيارتي اللي فاتت
نور
وانتي اعسل يا ستي المهم انا عندي فعلا حفلة قريب في الساقية و يوم ما هاعرف تاريخها خابلغك على طول
هاني
نورت يا جميل البلوج و شفت يا سيدي اللي بيحصل من الكورة و الناس
تامر
السبب معرووف جدا بس انا المشكلة مش اني مش طايق الناس المشكلة اللي بيحصل من الناس يعني ردفعل مش فعل
شادي
مش فاهمك فعلا

mohamed gouda يقول...

حمد لله على السلامة يا على
فى انتظار الهرس الثالث هههه
معلش المدونات عندى مكانتش شغالة
و أول ما اشتغلت رديت يا باشا
بس ازاى البورسعيدية يعلقوا يافطة بورسعيد مش بتحبك يا أهلى ههههههه

Geronimo يقول...

بتوع الميكروباص بيتنكوا على خلق الله
منهم اللي بيبقة مش عاوز يقعد جنبه غير بنات او مبيركبش عربيته منقبات ويقول للتباع منقبات لاء
واخرهم اللى نزلك وقالك عاوز واحد رفيع
وكمان ظابط الابن بتاع الاهلي
والبرنامج والفن الممسوخ اللى بيتقدم ف ستار اكاديمي والوادي والبرامج دي
والله الناس والقاهرة والعالم بقة لا انساني ولا اخلاقي
معلش ياعلى اتحمل تناقضات الحياة

18goosebumps يقول...

انا ضحكت جدا يا على

وكمان وصلنى جدا الى بيحصل وحسيت بيه

ربنا يعينك بجد على الوش التانى للقاهره

تسجيل متابعه اول ما بكون على الجهاز