السبت، ديسمبر 30، 2006

رغم أنف كل حاجة كل سنة و انا طيب و كل احبابي منورين حياتي


معكم علي الالفي يحدثكم من على عمق6بطانيات فوق سطح السرير حيث اعاني من نزلة برد حقيرة بوظت علينا امبارح ليلة العيد انا و العيال اصحابي و كادت ان تمنعني عن اداء الصلاة بس ربنا ستر
المهم
كل سنة و انا طيب رغم انف البرد الرهيب اللي مالي بورسعيد اللطيفة
كل سنة و انا طيب رغم انف الانفلوانزا البايخة اللي جايالي بشكل مختلف
يعني مش شوية رشح و عطس و كلام اهبل من ده
لا دي حرارة و رعشة و كحة من اللي بتوجع القلب
كل سنة و انا طيب رغم انف اودتي العجيبة اللي اكاد اجزم اني لو طلعت الاكل من التلاجة و سيبته فيها مش هايجراله حاجة و يمكن يتجمد اسرع
كل سنة و انا طيب رغم عدم و جود الشغل لحد النهاردة و ان شاء الله هابقى زي الفل قريبا
كل سنة و انا طيب رغم انف امريكا اللي قررت تصبّحنا اول يوم العيد بخبر اعدام صدام حسين و برغم انف الجزيرة اللي مالهاش هم غير تصبحنا بحاجة تسد النفس زي دي
كل سنة و انا طيب رغم انف فرصة الغنا اللي لسة باعافر عشان اجيبها و رغم انف شركة الانتاج النصابين اللي كانوا عايزين يدفعوني5000جنيه عشان يتكرموا و يحطولي غنوة في شريط معرفش هاينزل و للا لا
مش بس كل سنة وانا طيب
لا ده كل سنة و انا طيب و كل حبايبي منورين حياتي و مدلعينّي ع الاخر و محسسيني ان انا حاجة حلوة في حياتهم زي ما هم حاجة حلوة قوي في حياتي
كل سنة و ابويا الراجل الطيب زي الفل و حالته مستقرة و امي الحنينة قوي معايا و ماتحرمش منها
كل سنة و نينتي زي الفل و يارب تفضل معانا العيد الجاي و اللي بعده و اللي بعده الى ما لا نهاية
كل سنة و اخواتي البنات اللي جايين طايرين م الفرحة بدون سبب طيبين و اخويا محمد اهدا و اعقل السنة الجاية
كل سنة و اصحابي الغاليين حواليا و منورين الدنيا
كل سنة و زيكس المهاجم طيب و زي الفل
كل سنة و روزاليا العاقلة ب10000خير و بردو زي الفل
كل سنة و كراكيب رقيقة و منورة الدنيا رغم ضلامها
كل سنة و جوسي سابقة السن و اخوها مفتكس و لذيذ و مستحمل اشتغالاتنا التي لا تنتهي
كل سنة و هيثم محفوظ نجم الدنيا و منور الغنا في الدنيا
كل سنة و شادي صاحبي طيب و ييجي بورسعيد تاني
كل سنة و دكتور زيفاجو طيب و جنبي داعمني وواقف جنبي ماديا و معنويا و انسانيا و شعريا و كل حاجة
كل سنةو سماح جيرو نيمو رقيقة و عاقلة و متفتحة و فرحانة و سعيدة و يا رب الحكاية تكمل على خير
كل سنة و اللي بيدور على نفسه يفضل اجدع واحد في الشارع و يفضل كمان يحبني من غير مايشوفني
كل سنة و احمد عيسى صديقي اللدود موجود في حياتي و ينورها بغلاسته اللذيذة و تعليقاته العنيفة
كل سنة و شريف اعجب صاحب في الدنيا طيب و ربنا يهدينا و تقل عدد الخناقات اللي بيننا
اكيد نسيت ناس غاليين عليا دا و معرفتش اقول لهم كل سنة و انتو طيبين
بس انا عايز اقول للدنيا كلها بجد كل سنة و انتو طيبين و فرحانين وانا من ضمنكم

هناك 15 تعليقًا:

Geronimo يقول...

كل سنة وانت جميل

وصوتك واحساسك مالي الدنيا رغم انف كل شئ مش لذيذ

كل سنة واحنا صحاب وساندين بعض

أجدع واحد في الشارع يقول...

كل سنه وانت طيب يا فنان
وانا مش عارف اقولك ايه
بجد انت كده خلتنى عايز اشوفك اكتر
وبجد ربنا يشفيك يا على
من البرد اللى عندك ده
وكل سنه وانت طيب يا فنان

rosealia29 يقول...

شفاك الله و عفاك .. يا أجمل و أرق صوت في الدنيا .. كل سنة و إنت متألق ..

دمت ..

كراكيب نـهـى مـحمود يقول...

كل سنة وانت صوتك عالي بالغنا
وقلبان مليان احلام وارادة ورغبة تشوف كل الحاجات الحوة اللي يمكن معدتش موجوده غير جوانا
اقفل ايديك على الحلم اوي
وكل سنة وانت احلى علي

Omar يقول...

كل سنة وانت طيب يا علي، وسلامتك م البرد والرعشة

غير معرف يقول...

كل سنة وانت طيب واجدع وافن واحس
وكل سنة واحنا اصحاب وعاشقين الناس دى والبلد دى

غير معرف يقول...

اييه التفرقه العنصريه دى

طيب قول كل سنة والناس اللى هاتعدى من هنا وماجيبتش سيرتهم السنة الجايه يبقوا احسن واحسن

حتى عشان ندعيلك تخف السلامة وتروح الحفلة وتلعلع وصوتك يهز المنتشيقة

يلا خير

بس عاجبنى قوى نظرة التحدى اللى طالعه من صوتك رغم كبت البطاطيين على انفاسك المهتزة اهتزاز الشعب المرجانية فى اعماق البحار

كل سنة وانت اقوى واقوى واقوى والنسة الجايه نشترى شريطك ونشغله ليل نهار ونقول للعيال اصحابنا الاخ اللى بيغنى ده كنا متابعببن حالته الصحية العيد اللى فات

ماتاكلش لحمة ولا سمك ولا بيض عشان الريجيييم


باغييييظك :p

tafaseel يقول...

ماهو كل اللي بيمروا هنا بدج ناس غاليين عليا و كل سنة و هم و احنا طيبين
و على فكرة و الله مش قادر اكل اساسا لا لحمة و لا سمك و لا اي حاجة
عايش ع الحاجات السخنة لغاية ما بطني ما بقت عاملة زي حوض السمك من كتر المية

Supernova يقول...

كل سنه وانت طيب يا علوة
كل سنه وانت بخير
وتلبس الايس كاب والكوفية وتبقا شبه الايس مان
كل سنه وانت طيب يا فنان
وبنحبك كمان وكمان

ساعه الغروب يقول...

كل سنه وانت طيب
رغم انف كل حاجه ممكن تكون مضايقاك

كل سنه وانت متألق اكتر من السنه اللى قبلها

ويا رب السنه الجديده تكون افضل وتحقق فيها كل اللى بتتمناه

رودى

mohamed gouda يقول...

كل سنة و انت طيب و بصحة و عافية
و تحقق كل احلامك
مع انك نسيتنى ونسيت عمرو
يا عمررررررررررررررررررو

غير معرف يقول...

رغم أنف كل حاجه ألف سلامه عليك يا صاحبي وصديقي وأخويا وشريك الأيام الحلوه والمره والممطره والحاره
رغم أنفي أنا شخصيا كل سنه وأنت طيب ووحياة أبويا لأجيلك وأطمن عليك يا نجم

أجدع واحد في الشارع يقول...

ها يا فنا

اجهز

كلها 20 يوم

عايزين نشوف الفن

وفين الجديد يا على

احنا مخدناش على كده

18goosebumps يقول...

كل سنه وانت انسان

وتفضل على طووووول انسان بجد

والف سلامه

غير معرف يقول...

كل سنة وانت بالف صحة والف سلامة..يلا عشان متقولش تعليقات عنيفة...انا بتاع تعليقات هنيفة؟
الف سلامة يا علي وربنا يديم صداقتنا ولحد ماييجي اليوم اللي اقول لولادي فيه"شايفين اللي بيغني في الاوبرا ده..ده صاحبي وكنا بنخطف من بعض الشيبسي العائلي"ساعتها مش حيصدقو لكن الصور تشهد ياجميل..
كفاية عليك كدة بقي لحسن تفتكرني اتغيرت!!