لازم تحضروه
لازم تعيشوا تجربته
لازم تشوفوا ازاى ممكن الضحك يكون مؤلم اكتر من البكاء
قهوة سادة هو عرض ورشة التمثيل و الارتجال في مركو الابداع اللي في الاوبرا
مش عارف احكي عنه
يمكن لانى حضرته ليلتين ورا بعض
و لسة لحد دلوقت حاسس انى عايز اشوفه تانى
قهور سادة ع اللغة و اللي حصل فيها
قهوة سادة ع الفن اللي بوظوه بالفلوس و خللوا كل حاجة ناطقة بالخليجية
قهوة سادة على صلة الرحم اللي ممكن تخلي واحد يموت و ريحته تطلع و محدش يحس بيه
قهوة سادة ع الفتاوى اللي بقت في بق اللى يفهم و اللي مايفهمش لحد ما طلعت فتوى ارضاع الكبار
قهوة سادة على الموهوبين اللي مش لاقيين فرصة في ظل سيطرة الشللية و الجهل في سوق الفن
قهوة سادة ع البنت اللي عاشت تتمنى فستان الفرح لحد ما شابت و عجزت و ما شافتهوش
قهوة سادة ع الشباب اللي ضاقت بيهم و رموا نفسهم في حضن البحربيدوروا على رزقهم لحد ما بلعهم البحر
تخيلوا كل ده و انت بتضحك و مسخسخ من الضحك
العيال دي جامدة قوي
و الف الف الف تحية للمخرج خالد جلال ع العرض ده
العرض شغال كل يوم في مسرح مركز الابداع في الاوبرا
الدخول مجانى
بس لازم تلحقوا لان التذاكر بتخلص فورا الساعة سبعة و تلت
اوعوا يفوتكواااااا
بس اول ما تخرج هاتفكر كتير قوي في كل حاجة
هناك ٨ تعليقات:
الحياة كلها عبارة عن قهوة سادة وكلنا لازم نشربها .. أنا أكيد هادخل العرض ده
طيب يا على مش كنت تقول العرض من امتى لحد امتى
يعنى هيقعد مدة ولا كام يوم بس ؟
ياريت تقولنا تفاصيل اكتر لانه باين انه جامد اوى
جميل ياعلى البوست وكويس انك فكرت انك تدى اضاءة على انشطه بتحضرها او بتقوم بيها فى القاهرة ، شوقتنى لعرض ده وصفت توصيف عميق اوى على اللى جوه العرض اللى المفروض انه يضحك.....معادلة صعبة اوى
قبل ما اسيبك اعرفك بأن عندى حفله فى الساقية يوم التلات 24 يونيو بس المرة دى انا لوحدى بمصاحبة العود لان تجربة الفر يق اكدت لى ان مش بسهولة هلاقى حد يقتنع باللى انا مؤمن بيه مع ان نا واللى زيى كتير
على فكرة نفسى اشوفك
يا درش
رغم انها سودة قوي لكن يمكن يكون فيه امل
..............
قوس قزح العرض هايخلص الاسبوع ده
.....................
هيثم محفوظ
كنت ناوى افاجأك في الحفلة من يوم ما عرفت معادها
العيب يا صاحبي مش في تجربة الفريق
العيب في .........
و انت فاهم بقى
والله العظيم المسرحية دى احلى مسرحية شوفتها فى حياتى انا حضرتها مرة واحدة ,كانت يوم الاربعاء 2يوليو وكان موجود فى العرض مذيعين من قناة او تى فى (احمد العسيلى وانجى وناس تانية) وكمان خالد صالح والمفاجاة الكبرى وزير الثقافة فاروق حسنى .
ولما جيت احضرها تانى اليوم الجمعة 4يوليو لقيت زحمة جامدة اوى والطابور كان قافل على سبعين فرد على حجم السبعين تذكرة المتاحة
دة طبعا غير البهوات اللى جايين براحتهم ولا وقفوا فى طوابير ولا دياولو لكن دخلوا بالواسطة
يلا وياريت بجد تحضروها
العرض تحفة بجد خالد جلال ده جامد جداً ده غير يا جماعه ان في موسيقى تصويرية في العرض مش طبيعية موسيقى بجد قوية جداً جداً وعجبتني جداًطريقة الدخول والخروج بس انا كان عندي استفسار بمعرفتي البسيطة جداص وتذوقي المتواضع ليه قلبت اسكتشات سريعه لدرجة اني حسيت لوهلة ان الموضوع هايفلت وكل مجهودات النص ساعه الاولى هاتروح وهاخرج اقول ( مسرحية مش قوية قوي ) بس بسرعه رجعت ثاني من حالة الملل اللي كنت حاسيت بيها ورجعت ثاني بتفرج على نفس المستوى اللي بدأت بيه المسرحية بس انا أحب أقول للمخرج خالد جلال انه مخرج محترم وليه فكره اللي هايوصل ان شاء الله للجمهور وبسرعه لأن أحب أطمن أي فنان ان الجمهور بتاعنا بقى جمهور راقي وبيفهم وبيتذوق الفنون بجميع انواعها واشكلها وبرده احب اقوله انه اجاد اكثر في أختيار فريق العمل اللي كان معاه لانهم جامدين قوي قوي قوي وفعلاً ناس ممثلة جامدين جداً وشكراً وياريت لو شافوا اللي انا كاتبوا ده يراسلوني
hany_bagdise@hotmail.com
قبل مانسى
فيه عرض يوم الخميس الجاى اللى هو 1-1-2009
كلامك عن العرض حلو بجد
انا تقريبا حضرته 3مرات و بجد محتاجه اشوفه كمان كام مره :)
المشكله انك بتكون مش عارف تضحك ولا تعيط من اللى بتشوفه.
واقع مرير مع فنانين بجد و شويه صدق هايعملولك كل اللخبطه دى.
كتير من الناس صنفوها على انها كوميديا ساخره....انما انا شايفه انه واقع يلخبط
اسمحلى اقولك ان البوست ده من اجمل الحاجات اللى قريتها عن المسرحيه.
الى الامام دايما يارب :)
ولكل انسان له مذاق من الحياة
إرسال تعليق