الجمعة، سبتمبر ١٤، ٢٠٠٧

انا لله و انا اليه راجعون

يا جماعة لو حد ما بيستحملش بلاش يقرا
محمد شهاب
1984—2007
اخر يوم في شهر شعبان
عمي بيتصل بيا
فتحت على طول و بدات اغني
:رمضان جانا و فرحنا به..سيب رسالتك يا عمو بعد ما اخلص الاغنية
......................
......................
شهاب مات يا علي
كان مع احمد ووصله لحد البيت و بعدها بخمس دقايق اتقلب با الفيسبا و مات
و انقطع الخط
و عشان اللي ما يعرفش
شهاب صديق مقرب جدا لاخويا محمد
و كان معاه ليل نهار ايام الامتحانات و المذاكرة
و كان شخصية انا نفسي بابصلها بمنتهى الاعجاب
معجب باحترامه و وضعه بن اصحاب اخويا
كان بينهم زي الليدر
و فجاة راح
ــــــــــــــــــــــــــــــــــــــــــــــــــــــــــــــــــــــــــــــــــــ
أحمد الجزار
1981—2007
كان اول يوم في رمضان صعب عليا قوي
قاعد لوحدى و مش عارف هافطر فين لوحدى و مش معايا اهلي
و جت لي دعوة لطيفة من صديق للفطار معاه
و فجاة جالى تليفون من والدى
ايوة يا علي
انت بكرة عندك شغل و للا اجازة
احنا نازلين بورسعيد حالا"كانوا في راس البر في المصيف"
أنا:خير
حاجة وحشة حصلت.؟
بابا:احمد الجزار البقاء لله

احمد الجزار ابن عمتى و صديقي القريب قوي منى في العيلة
و تقريبا صاحبي الوحيد في اولاد عمامى
كان الفرق بيننا سنة و شهر بالظبط
كانت كل كتبه معايا سنة بسنة
و كانت هدومنا واحدة
و كانت افكارنا واحدة
كنت باحترم فيه هدوءه و قوة شخصيته
اللي كانت بتصدمنى ساعات و باحس انه برود او جمود
بس لما كبرت فهمت و احترمت ثباته
احمد اتخرج من سنتين من كلية طب
و روحت انا و هو فرز الجيش سوا
و اخدنا الاعفا سوا
و رجع دخل كلية الشرطة و اتخرج منها ملازم اول طبيب
و كانت حفلة تخرجه من حوالي شهر
تصدقوا انى ما كنتش عرفت انه اشتغل فعلا
انا مش قادر احزن او ابكي
انا مش مستوعب و مش مصدق
و الاصعب انى انا اللي كاتب نعيه بايدي
و انا اللي وزعته و لصقته في كل مكان
تصدقوا انى كنت بالصق نعى احمد في كل حتة جنب نعي شهاب
انا بجد مش فاهم
"و بشر الصابرين الذين اذا اصابتهم مصيبة قالوا انا لله و انا اليه راجعون"
انا لله و انا اليه راجعون
خدوا بالكو
الموت بقى جاي لنا احنا
مش للعواجيز
و جاي جاي
فجاة و من غير حساب

يا رب ارحم شهاب
و ارحم احمد
ادعولهم


هناك ٣٤ تعليقًا:

fawest يقول...

انا لله و انا اليه راجعون

fawest يقول...

شد حيلك

حسام مراد يقول...

انا لله وانا اليه راجعون

اللهم ارحمهم واغفرلهم انك انت الغفور الرحيم

اللهم ارحم موتى المسلمين

غمض عينيك يقول...

انا لله وانا اليه راجعون
البقاء لله

Amr Ahmed يقول...

انا لله وانا اليه راجعون

البقاء لله

rosealia29 يقول...

البقاء و الدوام لله ياعلي ..


شد حيلك ..

MONDAHESH يقول...

انا لله وانا اليه راجعون

البقاء لله

ربنا يصبرك ويصبر اهلهم

ويرحمهم ويغفرلهم بحق هذه الايام المفترجة

§a§a يقول...

البقاء لله يا على

وما تدرى نفس ماذا تكسب غدا وما تدرى نفس بأى ار ض تموت

الموت دا هو الحقيقه الوحيدة اللى فى حياتنا

هبه الاسكندرانيه يقول...

البقاء لله وحده يا على
اصبر و احتسب
اعملهم صدقه جاريه مبلغ صغير فى جامع بيتبنى او اى صدقه جاريه حتكون لهم عون فى حسابهم
الله يرحمهم و يرحمنا جميعا

باسم شرف يقول...

البقاء لله يا علي وشد حيلك
ان لله وانا اليه راجعون

محمد عبد الغفار يقول...

البقاء لله

gogo we bas يقول...

انا لله وانا اليه راجعون

الحمد لله الذى بلغنا رمضان

اللهم اغفر لهم وارحمهم
اللهم اجعل قبورهم روضة من رياض الجنة ولا تجعلها حفرة من حفر النار

اللهم تجاوز عن سيأتهم وبدلها لهم حسنات
اللهم حرم اجسادهم على النار
امين يارب العالمين

mariam يقول...

البقاء لله يا على
ربنا يرحمهم آمين
و يغفرلهم و يكون مثواهم الجنه يا رب
و يصبر اهلهم و يصبرك

غير معرف يقول...

شد حيلك يا على
الأعمار بيد الله
وماحدش عارف يمكن يكون ربنا اختارهم فى الايام دى لحكمه لا يعلمها الا هو
ربنا يرحمنا جميعا ويحسن خاتمتنا
البقاء لله, وربنا يصبرك
بجد سامحنى..انا متأسفه جدا
انا لسه عارفه دلوقتى حالا ..الدنيا شغلتنى كتير
لكن فيه حاجات بتقابل الواحد بتخلي لازم يقف عندها شويه
ادعيلهم من قلبك بالرحمه والمغفره واحنا فى ايام الرحمه
عسى الله ان يتقبل منا
شد حيلك وخلى صبرك بالله وايمانك بيه قوى
كل اللى احنا فيه ده اختبار عشان ربنا يشوف مين هايصبر
اسفه لو طولت عليك بس حسيت اننا لازم نكون جنبك

مـحـمـد مـفـيـد يقول...

علي
البقاء لله
ربنا يسكنهم فسيح جناته
ويجعل هذه الايام المباركه شاهده لهم

أبوشنب يقول...

البقـــــــــاء للـــــــه

Yasser Hussein يقول...

البقاء لله ربنا يجعلها آخر الأحزان ويصبر أهاليهم

Ehab يقول...

احتسبهم عند الله
وادعيلهم
ربنا يرحمهم ويغفر لهم ويرزقهم الجنه
ويعطيهم منزلة الشهداء
البقاء لله
سلاام

غير معرف يقول...

البقاء لله وحده
ربنا يرحمهم و يسكنهم فسيح جناته و يتوفهم مع الأبرار

اللهم انك عفو تحب العفو فاعفوا عنهم

شد حيلك
some one

. يقول...

عزاء الدنيا كلو ميكفيش البقاء لله يا علي طبعا وانا نفسي اتدايقت اوي ربنا يرحمهم يارب

شيماء الجيزى يقول...

البقاء لله

انا لله وانا اليه راجعون

على
ادعيلهم بالله عليك
ادعيلهم بصالح اعمالهم
ومتنساش
دول اختيروا فى ايام فضيله
الموت يا على مش بيركز على كبير او صغير
الموت حق على كل انسان
متخافش
وادعيلهم بالرحمة والمغفره

اللهم ارحمهم فأنك انت ارحم الراحمين
اللهم انه عبدك ابن عبدك ابن امتك
فارحمه واغفر له انك ارحم الراحمين

...........

Ensan يقول...

البقاء لله وحده ,
مفيش فى ايدى غير انى ادعيلهم بالرحمة و ادعيلك بالصبر انت واهلهم

dr_amr يقول...

البقاء والدوام لله , احمد الله يرحمه كان زميلي في الكلية وكان انسان محترم جدا وانا مش قادر استوعب الموقف ,اللهم ارحمه واعفو عنه ووسع مدخله واغسله بالماء والثلج والبرد .

Mony The Angel يقول...

ana 3arfa shhaab da..
msh am3refa sha5seia
bas enta talet sha5s a3eafo tetkallem 3anno :)

wel3'areeb al 2 ally alooly 3nao mai3rafoosh ba3d :)
w a3'lab alzan enak kaman mate3rafhomsh
bas ento altalata konto te3rafoo..
albaqaa2 lellah
w rabena yer7amo
yareet kolna ned3eelo fel ayaam de
de ayaam ra7ma w ma3'fera

hwa w a7mad akeed
rabbena yer7amhom game3an..

البِـئرُ والظمّأْ يقول...

السلام عليك يا علي
بص يا علي
انا اللي بجد وصلت ليه من فترة كده بسبب صدماتي برضه اللي شفتها و اللي مقتنعه بيه قوي
ان وجودنا هنا ده وجود مؤقت
يعني احنا جينا نعمل شويه حجاات يا كويسه يا وحشه عشان نمشي و في وقت ما هنتحاسب عليها كلنا
البقاء لله يا علي
و كلنا لها
على فكره
احب افكر كل شاب بحاجه مهمه قوي
انه يعمل حساب اللحظه دي
يعمل حساب انه يقف قدام ربنا يقوله ايه عن كل معصيه عملها
و ان شاء الله مش هتكون معاصي يا رب
ان شاء الله نطلع من رمضان ده كلنا حسنات مش زنوب
تحباتي ليك يا علي و كل سنه و انت طيب
و البقاء لله
.
زيزي

حصان بري يقول...

انا لله وانا اليه راجعون
البقاء لله يا علي
لله ما اخذ
احبهم الله بكل تاكيد ليقبضهم اليه في تلك الايام المباركه

Egyptiana Trapped Soul يقول...

البقاء لله
شد حيلك وربنا يصبرك ويصبر اهاليهم

بسمه عبدالباسط يقول...

انا لله وانا اليه راجعون
ربنا يرحمهم ويدخلهم فسيح جناته

Eric Matt يقول...


لا حول ولا قوة الا بالله

لله ما أخذ ولله ما أعطى

البقاء لله

وتذكر ان كلنا اخواتك في الله

اللهم أكرم مثواهما واغسلهما بالماء والثلج والبرد

فوكيره يقول...

انا لله و انا اليه راجعون

الكلمه دي بجد بتريح يا على

شد حيلك يا على واستعين بالله على الصبر
وهو كريم اوى

الكلام نوعان :كلام فارغ وكلام مليان كلام فارغ يقول...

البقاء لله يا على
واكيد طبعا الموت قريب جدا مننا كلنا
عشان كده لازم الواحد يعمل حساب الوقت ده
والسؤال يعنى
هل اى واحدفينا مستعد انه يقابل ربه؟
طبعا لا

dr.Roufy يقول...

انا لله وانا اليه راجعون
البقاء لله

كلنا رايحين هناك في يوم..ويمكن يكون اقرب من تصورنا
لكن الحياة هي الى بتلهينا

ربنا يصبرك على الفراق..ويعينك على احوال الدنيا

شد حيلك

دينا فهمي يقول...

لا حول ولا قوة إلا بالله
إنا لله وإنا إليه راجعون
لله ما أخذ وله ما أعطى وكل شيء عنده بمقدار
فلتصبروا ولتحتسبوا

ربنا يرحمهم يا رب ويغفر لهم

انت عارف
انا اخواتي الصبيان اسمهم أحمد وشهاب

ربنا يهدينا جميعا

غير معرف يقول...

شد حيلك عزيزي
ربنا يصبرك انت و اهاليهم