الثلاثاء، أكتوبر ٠٢، ٢٠٠٧

انا كنت............هناك




الخميس
حفلة محمد منير
انا كنت حاضر هناك


ما كنتش محضر و لا ناوى اروح
و فجاة لاقيت ناس كتير حواليا رايحين
قولت ما بدهاش
ياللا يا عم
ماهو مش كل يوم هايبقى فيه حفلة للملك
و روحت
ما اكذبش عليكم انبهاري الشديد بيه
ما اعرفش ايه سر التعويذة اللي بيرميها و هو داخل
حماسه
تشنجاته
غناه
ما تعرفش
و لا تعرف ايه سر الجنون العجيب بيه و بكل تفاصيل شكله و غناه و صوته
دي حاجة ربنا بيزرعها
و ربنا ما بيحتاجش سبب
ربنا هو اللي بيعمل السبب
الناس هناك كانوا كتير قوي
و كانوا ناس من نوع جديد عليا
ناس وصلوا من الحب لدرجة الانجذاب بصاحب المقام و عملوله مولد و جم يحيوه
وصلت بيهم لحظات الانجذاب لدرجة ان واحد منهم من كتر حبه فيه كان هايموته لما حب يهاديه و حدف له ساعة
الساعة يا اخواننا جت في دماغ منير و سورق و فرفر و كان هايروح فيها
و فجاة رجع من تانى زي ال السبع و فتح الدنيا غنا و حواديت و شبابيك و سياسة و حب
ومزيكا
****
ملحوظة عجية شويتين


الجو و الهوا اللي كنا بنتنفسه كان جديد حبتين
لان جمهور منير قرر يضيف للاكسجين و النتروجين و باقي مكونات الهوا
مكون جديد اللي هو الحشيش و البانجو
انا يومها يا جماعة شميت كمية مخدرات ماشوفتش زيها في حياتي
بس كان الحدث الاهم و الاعظم في الليلة
لما علي الحجار و محمد الحلو طلعوا و غنوا مع منير
ساعتها حسيت ان الكبار و قفوا يقولوا كلمتهم
قولوا بقى و ارحمونا من الكاكا الغنائي اللي ملا الدنيا


ـــــــــــــــــــــــــــــــــــــــــــــــــــــــــــــــــــــــــــــــــــــــ


الجمعة
حفلة ايامنا الحلوة
انا كنت باغني هناك


مش عارف احكي كتير عن الحفلة
بس عايز اقول انى خرجت منها سعيد جدا بكل ردود الافعال على غنايا والناس اللي حبوا صوتى و غنايا في الفرقة
و ربنا يكرمنى و اقدر ابقى من نجوم الفرقة بجد

ــــــــــــــــــــــــــــــــــــــــــــــــــــــــــــــــــــــــــــــــــــــــ


الجمعة بردو
سحور مع فرقة ايامنا الحلوة
ده بردو احلى بكتير من انى احكي عليه
بجد الناس دي عيلة حلوة قوي و قد كدة بيحبوا بعض و يكونوا مع بعض
و الصور تحكي احسن من الكلام


ــــــــــــــــــــــــــــــــــــــــــــــــــــــــــــــــــــــــــــــــــــــ
السبت
افطار مع شخصية فريدة في الحياة
انا كنت مستمتع هناك


تليفون رقيق من عمر مصطفى
الشاعر و الملحن و صاحب مدونة تجربة
و عزومة رقيقة جدا ع الفطار و انا ما كدبتش خبر
روحت يا اخواننا و اكتشفت عالم حلو قوي من الناس
الناس اللي ممكن يتقال عليهم اولاد ناس بجد
الاحترام و الهدوء و الموهبة و الذوق العالي
عمر مصطفى ليه ديوان اسمه
اسباب وجيهة للفرح
يا عمر
وجودك في حياة المتعاملين معاك
سبب وجيه جدا جدا للفرح


ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الاحد
بيت نهى محمود و روكا
انا كنت بافطر هناك


دعوة تانية رقيقة للافطار جاتني من الشقيقن الرائعين نهى و طارق
و بردو ما كدبتش خبر
واكتشف حاجات حلوة قوي
اولا ان نهى غير انها كاتبة رائعة
طبيخها حلو قوي يا جدعان
و لازم تجربوا الرقاق اللي هي بتعمله و الفراخ البانيه
بس سيبكم من ده
القلوب اللي شوفتها
تخيلوا لما بني ادم يبقى كله قلب
هم دول
ربنا يكرمهم و يخليهم دايما كدة
احلى عيلة و احلى ناس
************

هناك ٨ تعليقات:

كراكيب نـهـى مـحمود يقول...

الاخ الجميل علي - ربنا يسعد ايامك كلها يا رب
شكرا على كلامك الجميل
وعلى اغنية 3 سلامات اللي فرحتني جداااا
كل سنة وانت طيب وجميل

hesterua يقول...

جميل يا لول
منير جامد وعقبالك لما تبقه زيه
وعمر انسان يا بختك بيه فعلا
ونهى كاتبة رائعة طبعا

بالتوفيق

rosealia29 يقول...

حلووو أوي يا علي ده .. أيوة كده يا عم .. هو ده الأسبوع الحافل إللي مليان عزومات و حفلات و خروجات و سحورات و كل الكلام الموزون ده .. ربنا يكرمك يارب يا علي .. و تلاقي المكان المناسب إللي يرضيك و يرضي عشم الناس في موهبتك .. و انا إن شاء الله واثقة من إنه قريب و مش بعيد ..


ربنا يكرمك يارب .. و دايما عامر يا نهى ..

MONDAHESH يقول...

يا حظ يا حظ

انا مش بحقد يعني

بس ابقي ضيفنا بقي في الاجندة بتاعتك يوم كده

ومبروك تاني علي الحفلة ودخولك فرقة ايامنا الحلوة

زى الهوا يقول...

كل دى خروجات ( وش محول ) , يلا ربنا يسعدك وعوقبال لما تبقى تقف مكان منير ويبقى جايلك جماهير كتير زيه , وانا ساعتها مستعدة ابقى اجى اللتقط الهداية

بحاول اكون يقول...

كل سنة وانت طيب يا علي .. عيد سعيد عليك .. وانشالله تحقق كل احلامك
موني

hamasat يقول...

علي

تقبل الله اعمالكم ورفع قدركم وغفر لكم دنوبكم وبدلها حسنات وكل عام وانتم بخير وعيدكم مبارك

غير معرف يقول...

سلام عليكم يا جماعه
انا جايبه مفجأه جميله اوى جاتعجب على اكيد لانها من الحانه
انا جايبه جزء من اغنيةابعد بقلبك بصوت شريف الصيف اللى فات ..
انا عندى فيديوهات كتيره صورتهم و انا فى الحفله و نفسى ابعتهم للفرقه انما انا مش لاقيلهم اى اثر للاسف يعنى
انا فى كلام كتير اوى عايزه اقوله عن الحفله بصراحه , كان نفسى يبقى فى اى بلوج للفرقه او كده عشان اعبر و لو بشويه من اعجابى بيهم, لو فى اى طريقه ياربت اى حد يقولى
دلوقتى و بما انى فى البلوج بتاع على اولا شكرا ان ليك بلوج نقدر نوصلك بيه...انا مش عارفه اقولك ايه انما انت اكيد عارف قد ايه انت موهوب ما شاء الله و مش محجتاجه اقولك..
انا عندى صوره ليك انت و شريف برضه ححاول ابعتها ...
يارب الفيديو يعجبك . ياريت لو تقدر توريه لشريف ..مع انى متأكده ان الشريط عنده :)
شكرا يا على
سلام سلام ...
الفيديو
http://www.megaupload.com/?d=ILMSMB4E