الأحد، أكتوبر ١٤، ٢٠٠٧

العيد فرحة.......ياسلام ياختى


و بعد فترة من الغياب عن بورسعيد.....غياب؟
بالطبع كان فيه زيارات
لكنى لم احسبها
لانها كانت تتعب اكثر ما بتريح
بمعنى انك تكون قاعد في بيتك و التايمر شغال لحد ما الوقت بيخلص و تضطر تسافر
و انت ما قابلتش كل اللي نفسك تقابلهم
و لا عملت أي حاجة لان الوقت قليل جدا
يبقى ما تتحسبش الزيارة
المهم
يوم الخميس
اللي ما كانش باين اذا كان هو اخر يوم رمضان و للا لسة
قررت انى هاسافر في اوتوبيس سبعة و نص
وروحت شغلي و فضلت فيه لحد ما جت سبعة الا ربع
قولت ما بدهاش و ع الترجمان يا برنس
و كعادتنا الرهيبة في احترام مواعيدنا الباص بالصلاة ع النبي طلع الساعة تمانية و خمسة
و في مشواره الممل الي ألماظة عشان يجيبب باقي الركاب
لحد هنا و مفيش مشكلة
و الراجل حمل فعلا و طلعنا من الماظة و فجاة السواق وقف
و نزل من الباص

وو
الاوتوبيس عطل يا اخواننا
طرمبة البنزين اتقطعت
الله يخرب بيت شرق الدلتا و بيت اوتوبيساتها
و نزلنا على امل انهم يبعتوا لينا باص تانى
و كن هيهات يا بني ادمين
و فجاة
هل علينا المنقذ الجبار
اوتوبيس اسماعلية
الاوتوبيس كان فيه اماكن كتيرة فاضية
حوالى تلتاشر كرسي بس اللي كانوا مششغولين
و ده معناه ان حوالي خمستاشر من ركاب باص بورسعيد هايقفوا
لان السواق كان محمل ركاب زيادة اساسا
و كاد الامر ان يتحول لكارثة عندما قرر بعضهم انهم ما يركبوش الباص عشان محدش يقف
ساعتها اخوكم وقف زي السبع
يا ناس افهموا
انتو عندكم استعداد تقفوا ساعة او اتنين عشان تستنوا اوتوبيس يا اما ييجي او مايجيش
ما انتو عارفين الشركة دى ما تنتضمنش
ما تقفوا الساعة دي في الباص و هايوصل اسماعلية و تفضى الاماكن
و روحت رازع شنطتي في بطن الباص
و لحق بيا باقى الركاب
و طلعنا
و ما اكدبش عليكم انا اول مكان فاضي لاقيته قعدت فيه
بس و الله اتطمنت ان كل البنات و الستات اللي كانوا معانا قعدوا
و قعدت
طبعا كانت نظرات الركاب بتقوللى مش كنت عامل فيها بطل قومي و بتقول ها تقف
طنشت كل ده و ركبت
و عمار يا مصر باوتوبيساتك
و الله رجعت بازمة في صدري من ريحة الجاز و البنزين و الصنة اللي مالية الباص
بس وصلت الحمد لله
ــــــــــــــــــــــــــــــ
في بيتنا
من زمان و انا مشتاق لسريري و اودتى
نمت يا اخواننا
و افاجا لما صحيت ان محمد اخويا فتح المروحة و سابها دايرة و انا نايم
و الحمد لله معايا دلوقت جايزتين
اولا كحة شديدة من جراء جاز الاوتوبيس
و انفلوانزا تقيلة من بركات محمد اخويا
ـــــــــــــــــــــــــــــ
واضح ان العيد بالنسبالي بقى مناسبة جميلة للمرض
ما انتو فاكرين العيد اللي فات كان فيه ايه
ـــــــــــــــــــــــــــــــــــ
في بيت محمد زكى
صديقي الانتيم
و واحد من الناس اللي باعرف اتفك معاهم في الكلام و ارتاح
قعدت ع الجهاز بتاعه و اكتشفت ان الانسان ده عامل ارشيف لكل لحظة حلوة عشناها و اتصورنا فيها
ياااااااااااااه
دا احنا كنا حاجة حلوة قوي في حياة بعض
كل واحد في الصور ده فين دلوقت
ايام الهنا يا ريتها دامتكنا كلنا بنتجمع من كل حتة و كان كل هدفنا اننا نكون مع بعضاحنا فين دلوقتيكل واحد في بلد و مش عارفين بكرة فيه ايه
هاتلاقونى انا و اديني لوحدى في القاهرة
و شريف دلوقت في الامارات
و اللي في السويس
و السعودية
و المنصورة
و بورسعيد
تفتكروا هانتجمع تانى؟؟؟
يا رب

كل سنة و انتو طيبين
ـــــــــــــــــــــــــــ
على فكرة قريبا جدا ان شاء الله توقد الشموع و تعلق الزينات و تبدا الاحتفالات
بمناسبة مرور عام كامل على افتتاح مدونتى
تفاصيل
تصدقوا انى بقالي سنة حالها بارغى
و انتو بتقروا
ربنا يكون في عونكوا و الله
المهم
ياللا حضروا نفسكم لحفلة كبيرة و اجتماع بجد
عشان نحتفل كلنا سوا
و كل سنة و انتو طيبين تاني

هناك ٨ تعليقات:

gogo we bas يقول...

حمد الله على السلامة.. نورت بورسعيد

ربنا يعينك على شرق الدلتا واللى بيجى من شرق الدلتا
زمان اول مادخلنا الكلية عمرنا ماقولنا هنركب الباص ... كان اسمه
الناقة هههه

كل سنة وانت طيب وبخير وان شاء الله يكون عيد سعيد عليك (رغم بدايته)وربنا يتقبل منك رمضان

MONDAHESH يقول...

اولا كل سنة وانت طيب وعيد سعيد


ثانيا 10000 سلامة عليك من الكحة والانفلونزا

ثالثا مبروووووووووووك وكل سنة وانت ومدونتك بخير

وياريت لو في اي تجمع يكون يوم خميس علشان هو اليوم الوحيد الاجازة بتاعتي

§a§a يقول...

كل سنه وانت طيب يا يا باشا
والف سلامه عليك

وان شاء الله مستعدين لحفله على مرور السنه وانا كمان قريبا هتمر عنى السنه على انشاء المدونه

غير معرف يقول...

كل سنه وانت طيب يا على
ايامك دايما حافله بالاخبار
بس برضه زعلانه منك على المقلب اللى عملته فيا
انت عشمتنى انك حتحضر الفطار معانا
عموما ..اتمنى انك تكون قضيت عيد كويس

Dr.Diamond86 يقول...

اتوبيس شرق الدلتا مبيطلعش بدري غير لما أتاخر انا عليه
ولو معطلش ميبقاش شرق الدلتا
ربنا يصبرنا عليه
وحمدالله على سلامتك
وكل سنه وانت طيب وبخير ان شاء الله

الأباصيرى يقول...

ربنا يوفقك ياعلوة

:D

. يقول...

اغيب اغيب واسأل عليك
على فكرة مبقولش الكلمة دي لحد غيرك
اصلا متفتكرش اني نسيتك يا نجمي
انا مدمنة علي الالفي واغاني علي الالفي
كان عندنا سؤال عن اكتر مني بتحبو فالانجلش وطبعا كان مين؟؟
علي الالفي
اتشهرت حتى فالكتب الخارجية شفت بقة
كل سنة وانتا طيب على العيد ورمضان والستة البيض والمدونة وكلو مع بعضو بقة
مفيش حفلااااااااااااات قريب
الساقية من غير علي متبقاش الساقية
ارجو الرد كده حسسني اني بعمل حاجة
يله يا عم
كحك بقة وكده
سلااااااااااام

فوكيره يقول...

كــان نفسي نتجمع كلنـا في بورسعيـد
في العيـد

كل سنه وانت طيب يا علي ..