الجمعة، يوليو ٢٧، ٢٠٠٧

وجوه اقابلها


وجوه اقابلها
من زمان و انا نفسي اكتب البوست ده
عن وشوش باقابلها كتير
على فكرة
معظم القصص الواردة بالبوست من الحياة و اى ادعاء من الكاتب اللي هو انا انها من خياله يبقى لامؤاخدة شغل عوأ منه و استهبال لدا وجب التنبيه
...............................................
ارتعدت شفتاه و هو يتحدث
و تشنجت عروق رقبته وفي انفعال واضح و بدا انه على وشك الانقجار في وجه من يتحدث معه
و لم يهتم اساسا بالزحام اللي حواليه في واحد من اكثر شوارع الجيزة زحاماًَََ
و اخد يلوخ بيديه و هو يتكلم
و عينيه مصوبة كالرمح ناظرا امامه لمن يتشاجر معه
و فجاة حدث ما كنت احدر منه انا
وقعت عينيه في عينيا و انا مركز معاه
و نظر لي في خجل
ماهو اصله كان ماشي في الشارع بيكلم نفسه
و نظرت اليه في اعتدار
ما تزعلش قوي كدة يا صاحبي و ما تتكسفش
مانا بردو باعملها كتير

............................................
التنك
وانا قاعد في الاوبرا جت عينيا في عينيه
يعني خلاص لازم اقوم اسلم و خلاص
و كالعادة يصدمنى وجهه بتعبير مش عارف احدده
يعني هو خليط من البرود على الجمود علي التهكم على الاستخفاف
مش عارف الخصها
اااااااااه
التناكة
بس على ايه يعني ان شاء الله

..............................................
اعشق متابعة الوجوه اللي بتحبني ة انا باغني
اه اللي بتحبني
باحس بيهم و باتطمن بيهم
و باحب تعبيرات عضلات وشوشهم و عينيهم لما بتلمع معايا
باحبهم لما يحاولوا يحفظوا اللي باغنيه و يقولوه معايا رغم انهم بيسمعوه للمرة الاولى
مانا قلت
الوشوش اللي بتحبني

,...................................................
النجم
من الوشوش اللي بتفرسنى و ش بقى ناس كتيرة لابساه
وش النجم
نبقى قاعدين في البروقة
و تلاقي الواد في عز الظلمة لابس النظارة اللي واكلة معظم وشه شبه الغواصين
لا و اية
تلاقي الواد مرسوم و لا اجدعها موديل
و بيتكلم نص كلامه انجليش بس بلهجة بين الصعيدي و الفلاحى و النوبي
و لو فتح بقه من هنا
تطلع الدرر
طب لما سيادتك كدة مالكش فيها
بتترسم كدة لية
ياللا قطيعة
,,,,.................................................

اصطدم هنا في القاهرة بوشوش جامدة صلبة شرسة
عايزة تفترسك و خلاص
في المترو
في المكروباصات
محدش بيهتم غير بانه يمشي في طريقه و ان شاء الله يدوس على أي حد في أي حتة
او يمكن لانى اتعودت على وشوش سمحة في بورسعيد
ناس اتعودوا ع الخير و الهدوء
طبعا بورسعيد مش اليوتوبيا و لا اهلها ملايكة بجناحات
بس مش كدة
.................................................
كنت كلمتكم زمان عن انى باعشق الحرارة في السلام و اللهفة في الوشوش وده اللي انا باحبه في سلامى على اصحابي
و باحدد علاقتي بالناس على حسب اللي باشوفه في سلامهم و تون صوتهم في التليفون و...و...و
عموما يمكن اكون غلط بس هو ده انا و مش عايز اتغير

هناك ٩ تعليقات:

غير معرف يقول...

صباح الفل يا علي
بوست خفيف الدم زيك
ناس مش انت لوحدك اللى بتشوفهم..دول موجودين تحت كل حجر
التناكه ماليه الناس اللى بقوا عاملين زى البلالين
الناس ماشيه تكلم روحها
بس مش صح انك تقعد تقارن كل حاجه ببورسعيد ..محسسنى انك جيت جهنم
وناس كتير حواليك بتحبك
بس مش بالضروره انهم يزغرطوا لما يشوفوك
عشان ماحدش بيعرف يزغرط غيرى اصلا
:P
مستنيه اعرف عملتوا ايه فى الحفله من غيرى
سلام

The Alien يقول...

الوشوش اللي بتتكلم عليها موجودة كتير
وبنقابلها كتير
وأنا بالتحديد بحب اللي بيكلم نفسه لإني كتير بعملها
ومعاك إن إيقاع الحياة ف القاهرة مختلف عن أي محافظة تانية
وإن الناس أداءها بقي غريب ف الشارع

الحفلة كانت حلوة
واللحن بتاعك بجد جميل
ومش عارف ليه متهيألي إن صابر الرباعي المفروض يغنيه

مبسوط جدا إني إتعرفت عليك
وأتمني نتقابل دايما
تحياتي

§a§a يقول...

بالنسبه للبوست طبعا معاك ان هناك ناس كتير بوشوش مختلفه

وبعيدن لا تقارن القاهرة بأى محافظه تانيه
بصراحه انا رحت محافظات بعيدا عن القاهرة هناك اختلاف جامد جدا بين القاهرة والمحافظات حسيت بالراحه خارج القاهرة فى كل حاجه

____________

بالنسبه لحفلتك بجد كانت جامدة جدا جدا جدا وعجبنى جدا اللحن والاغنيه اللى عملتها

والاجمل انك طلعت وغنيت بجد كانت جميله جدا

وطبعا انا عاملك مفاجئه عن اغنيتك والحفله بوجه عام

ادخل بس انت على البوست وانت تعرف
http://tefa1.blogspot.com/

MONDAHESH يقول...

جامد جدا موضوع الحرارة في السلام

لان فعلا كل واحد بيبان ملامح شخصيته من طريقة سلامه

بالنسبة للحفلة بقي

انا مش لاقي تعليق

بجد بجد تحفة

واجمل ما فيها اللحن بتاعك

والله بجد مش علشان انت هنا يعني

:)))

فوكيره يقول...

البوست خلانى افكر في الوشوش

الى في حياتى

هما من اى نوع

ولا من نوع جديد

شفتهم كلهم وشوفت غيرهم

وتبقى الوشوش النقيه

هى الى بتعيش جوانا وبتسيب اثر

mariam يقول...

للأسف آدى حال الدنيا
الناس دى موجوده فى كل مكان

واضح انك مش عارف تاخد على القاهره

هى العاصمه كده الناس فيها بيكونوا جامدين عن باقى المحافظات مش عارفه ليه

تحياتى

hesterua يقول...

حلو كده
ادينى كمان

Unknown يقول...

موضوع جامد و حقيقى ... و بالنسبة للأخ التنك نفض له و متعبروش

و الأخ اللى لابس نضارة غوص و حاسس أنه نجم فيبقى لو هو صاحبك انصحه أن الناس مش بتحب اللى يتنطط عليها و لو مش بتحبه سيبه ... هو كدة بيضر نفسه

و بالنسبة لموضوع الحرارة فى السلام فصدقنى يا صاحبى مش كل اللى يسلم عليك بحرارة يبقى بيحبك .... ممكن قوى يكون بيمثل زى ما الناس كلها بتمثل و ممكن لو حد مسلمش عليك بحرارة ممكن اوى يكون بيحبك و طبيعته متحفظة عن أنه يظهر مشاعره

فعلا الدنيا كلها وشوش

غمض عينيك يقول...

معلشي ياباشا اصل القاهرة خلاص ضاقت على الناس
والناس فيها اللي مكفيها ومبقاش ناقصها

كله بقى كده والله ياعلى مستنيلك على غلطة..لا هفوة

انا نفسي اروح بورسعيد

تحيااتي ليك

محمد سمير