الأحد، أكتوبر ٢١، ٢٠٠٧

كل سنة و انا و انتو و كل اللي باحبهم و بيحبونى طيبين و منورين دنيتي

ياااااااااااااااااااااااااااااااااااااااااااااااااااااااااااااااااااااااااااه

تصدوا انى كدة بقالي سنة فاتح مدونتى؟

اه و الله

ما تيجوا نحكي من الاول ازاى بدأنا

سمعت من كل اللي حواليا ان فيه حاجة اسمها مدونة

حاجة ما تفهمش موقع و للا مقالات و للا حاجة غريبة

المهم اهى حاجة ببلاش و خلاص

و ما اهتميتش بالموضوع

و يعني كنت من وقت للتانى بادخل عند احمد شلبي اخد غنوة و للا اتنين و خلاص

لغاية ما جه يوم و كان في رمضان اللي فات

و قولتلهم انا عايز اعمل مدونة

و ساعتها قعد واحد صاحبي واحدة واحدة يعلمنى ازاى اعملها

و كتبت كلام عجيب

قولت استنونى

و هانبدا نحكي

تقولش يا اخويا الناس كانت مابتعملش حاجة غير انها تستناني

روّحت بيتنا متحمس جدا



و فجاة



لاقيتني مش لاقي حاجة اقولها



انا كنت من جوايا عايز اتكلم



و محتاج اتكلم



بس في ايه



و عن ايه محدش يعرف و لا انا كمان

و فجاة

فتحت اول بوست

لحد دلوقت ما اعرفش ازاى باكتب
و ازاى باتكلم


انا كدة

اللي باحسه باقوله

و اللى بيبقى جوايا و ينفع يطلع للناس ما باخبيهموش

بجد

فرحت قوي لوجود مدونتى في حياتي


كانت لحظة حلوة قوي اللي كنت بالاقي ناس ما اعرفهومش و ما يعرفونيش كاتبين عنى او حتى حاططين لينك ليا


و الأحلى كمان الناس اللي عرفتهم عن طريق البلوج


طبعا مش كلهم


بس بجد فيه ناس كتير بافتخر انهم اصحابي و انى عرفتهم من هنا


و كمان الاولاد اللي دخلوا التدوين عن طريقي و مفرحينني قوي


انا بافكر كتير في طريقة احتفل بيها معاكم


لاقيت حاجة حلوة قوي


تعالوا نفتكر البوستات اللي باعتبرها احلى و اهم بوستات عملتهم في مدونتى


و ع الاقل من وجهة نظرى


يعني اول بوست بجد ليا كان اسمه هذا انا


مجرد تعريف بيا


و بعد كدة بدات اتكلم في عموميات


يعني عملت بوست اسمه بانوا بانوا


و اتكلمت بعد كدة عن ناس قريبين منى او مهمين في حياتي


اتكلمت عن سلمى و انغام و احمد شلبي


و اتكلمت عن جدتى


و اتكلمت عن نفسي كتير


بس باعتبر ان البوستات اللي بتتكلم عن مواقف بتحصل لي هى اكتر حاجة حية بتتكتب هنا


يعني بدات مع بوستين متتالين اسمهم الهرس الاول و الهرس التاني عن كعبلات قابلتها هنا في القاهرة ايام ما كنت باجيها زائر


تصدقوا انى قعدت اتفرج على حياتي لمدة سنة ن خلال البوستات دي


يعني مثلا


لاقيت اكتر شهر عملت فيه بوستات


هو شهور البطالة في حياتي


وت ما كنت حاسس اني كائن بلا لزمة في الحياة


اليوميات و دة يعني


كمان بدات بوستات الاكتئاب و الحاجات دى


لكنى كمان كنت بابقى مبسوط قوي بردود الفعل على البوستات اللي فيها لينكات اغانيا


او الكلام اللي كان بيعرف الناس بيا كمطرب


فرحت قوي بكل اللي حضروا حفلاتى كمدونين


فرحت قوي لما حسيت ان فيه عمل انا عملته و نجح قوي بين شريحة معينة من الناس و بداو يتكلموا عنه


انا قصدي طبعا اغنية اللي انكسر يتطوح


اللي لاول مرة تحسسني بانتشار عمل ليا


دلوقتي لما بدات مرحلة جديدة في حياتى و بدا كلامى ياخد اتجاه جديد


اتجاه اكثر جدية


و اكثر اهمية


بدات اكون انسان كثير الانشغال و التعب و الهموم و الفرح


بدات تكون ليا حياتي و تجربتي و حاجات


اتغيرت حاجات كتير


و اتغيرت وجهة نظرى في حاجات كتير


المهم


نسيبنا شوية من الجد


و تعالوا نحتفل و ننبسط


كل سنة و انتو طيبين


و كل سنة و انا و انتو و كل اللي باحبهم و بيحبونى طيبين و منورين دنيتي




هناك ١١ تعليقًا:

شىء ما يقول...

كل سنه وانت طيب وعقبال100 سنه وتزيد نجحاتك يوم بعد يوم وانت تستاهل اكتر من كده بكتير
بسم الله ماشاء الله علي صوتك ربنا يزيدك ويحفظك
وربنا يوفقك في كل اللي بتتمناه

شىء ما يقول...

كل سنه وانت طيب وعقبال 100 سنه وتزيد نجحاتك يوم بعد يوم وانت تستاهل اكثر من كده بكتير
بسم الله ماشاء الله علي صوتك ربنا يزيدك ويحفظك
وربنا يوفقك في كل اللي بتتمناه

gogo we bas يقول...

كل سنة وانت طيب كده دايما على طول ومافيش حاجة تغير من برائتك دى ابدا

كل سنة والمدونة بخير وعقبال سنين كتير تعدى علىك باحلى يوميات تحقق فيها كل اللى تتمناه


لو هتكلم عن اكتر بوست ليك فرق معايا قوى....
اول بوست قريته ليك وهو نعى حادث
شرم الشيخ

وبوست وجوه اقابلها

وبوست كتبت فيه (لو لاقيت حد يحبك قوي و انت ماقدرتش انك تبادله نفس المشاعر حاول تانى و لما تفشل و تلاقي نفسك مش قادر تحبه اكيد هو لازم يلتمسلك العذر
بس خد بالك انك لو كنت مكانه عمرك ما كنت هاتلتمس أي عذر للي سابك"
..................

عقبال السنة الجاية ويكون اول بوست فيها لينكات لاعانى اول شريط وفيديو كليب ليك

Ahmed EIssa يقول...

سريعا كدة قبل منزل كالعادة متأخر كل سنة وانت طيب
وتفاصيل طيبة
ومش حنسالك ابدا انك انت اللي دخلتني التدوين ياعلوة

hesterua يقول...

كل سنة وانت طيب يا لول يا فنان يا ابو صوت بيخطفنى

اولا واحشنى كتييييييييير
ثانيا عاوز اقولك ان زى ما انت فرحان ان المدونة حاجة حلوة فى حياتك فاسمحلى اقولك انك حاجة حلوة برضه فى وسط زحمة التدوين اللى بقه مليان ناس عاوزة تتسلى وبنات بتدور على عريس...ففعلا وجود حد عنده حلم وهدف وطيابة ...وصوت مريح للواحد ده فى حد ذاته حاجة اقولك عليها ثانكيو

فى بقه حاجة هعارضك فيها وهى عبارة عجبتنى جدا وهى


بدات تكون ليا حياتي و تجربتي و حاجات



اتغيرت حاجات كتير



و اتغيرت وجهة نظرى في حاجات كتير




هقولك لأ ليه
لأنك اساسا كان ليك نوعا ما تجربتك الخاصة..واللى انا لمستها اول ما شفتك ...وهى اسلوب اختيارك لغناك وكلامك والحانك...لكن تقدر تقول انها اتصقلت وبانت مع وجود المدونة اللى اظهرت ردود افعال جميلة الحمدلله


اخير وليس اخير...بشكرك على كل الأغانى اللى عملنها مع بعض , وشكرا انك خلتنى اكتب حاجة من الحاجات اللى بحبها جدااااوهى هكتبلك غنوة ولحنها...ومستنى من كبشة الأغانى الأخيرة...خصوصا متنفعلكش ...وبالتوفيق يا لول


ونتقابل على خير قريب انشاء الله

علي الالفي يقول...

شئ ما
ربنا يخليك و شكرا ع الدعاء
ـــــــــــــــــــــــــــــــ
جوجو
كلامك و الله قشعرني و حسسني انى حد بيعرف يفكر
على فكرة انا عملت غنوة حلوة قوي بعد البوست ده و قريب هاتنزل بجد
ـــــــــــــــــــــــــ
احمد عيسى
مانا كنت قاصدك و انا باقول الاولاد
"وش واحد بيغمز"
ـــــــــــــــــــــــ
احمد شلبي


بجد انا حاجة حلوة في حياة اللي حواليا؟؟؟
ربنا يخليك و يخليك كدة اصدق حد عبر عن اللي جوايا
و اكتر حد باتطمن انى احكيله
و نفضل كدة طول العمر

YHYيــوســف الـمصـرى يقول...

السلام عليكم
كل سنة وانت طيب يا على باشا وعقبال 1000 سنة تدوين ان شاء الله
تحياتى

هيثم محفوظ يقول...

كل سنة وانت طيب يا جميل يعنى انت بادئ معايا تدوين تقريبا
تاثير اللى جد عليك من التدوين بجد تاثير محترم قوى وهو انك تعرف نفسك اكتر وتحدد اتجاهاتك اكتر وتاخذ بالك ان ازاى تفرح وازاى تحس بالهموم وازاى تبوح.
اهم حاجه انك تحاول تطور العلاقة مع المدونين من شاشات الكمبيوتر لاى مكان عام ونتلاقى .

Mohamed Sakr يقول...

كل سنة و أنت و مدونتك بألف صحة و نجاح و أستمرار ، أنا محمد بتاع الأوبرا المكان و المحطة .

§a§a يقول...

كل سنه وانت طيب يا على ويارب المدونه تظل موجودة ل 100000

سنه وانا ابقى المؤرخ بتاعها بقى

ههه

hamasat يقول...

علي كل سنه وانت ومدونتك الجميلة بخير وعقبال تريليون سنه وتتحفنا دائما بصوتك الجميل
علي فكرة في موقع معين ممكن نحمل منه اغاني ليك ياريت تبعته لغاية ما ننزل مصر ونتصرف بقي
كل سنه وانت طيب كمان مرة