الأحد، أكتوبر ٢٩، ٢٠٠٦

سلمى


سلمى
اسمحولي كمان احكيلكوا عن حد مهم في حياتي
حد ماشفتوش في حياتي ييجي 10 مرات على بعض لا و ايه متفرقين على سنة بحالها
بس من الناس اللي لازم يفرقوا معاك
الناس اللي مايحبوش حد يزود معاهم في الكلام او يلغي الحدود بينه و بينهم.
بس هم بيستمتعوا بانهم يلغوا أي حدود بينهم و بين كل الناس .......هى من الناس اللي ممكن يكونوا دايما سبب في سعادة كل اللي حواليهم حتى لو ماعملوش ليهم حاجة الناس اللي لازم يلفتوا نظرك و يعرفوا ازاي ينورا كل قعدة و كل مكان حتى لو مش قاصدين
انا باتكلم عن اختي اللي ماجابتهاش امي سلمى صباحي بنت عمنا حمدين اللي ممكن تتفق معاه او تختلف معاه بس لازم تحترمه
بس دي مش قضيتنا
المهم ياجماعة احب اقولكم عرفتها ازاي
اللي مايعرفش احب اقوله ان انا واحد من المطربين اللي بيغنوا في فرقة اسمها "ستيب باي ستيب" "step by sep
و كنت جديد في الفرقة و كانوا عاملين حفلة قبل ما اشترك معاهم و الحفلة كانت جامدة جدا و مكسرة الدنيا
كنت انا يا جماعة جاي من بورسعيد طازة ماعرفش حد و لا حد يعرفني و ماكانش عندي اصحاب اساسا
و لاقيت ان كل واحد في الفرقة بيحاول يدلعني فعلا و يحاول ينسيني الرعب اللي كنت فيه
عارفين فيلم النداهة و فكرة ابن الاقاليم اللي بينزل القاهرة
كنت سامع الغنوة بتاعة "شئ من بعيد ناداني" بترن في ودني و على فكرة سلمى ماكانتش بتحضر البروفات لانها كانت مشغولة في البرنامج
المهم كنت شفتها اخر بروفة قبل الحفلة و ماتكلمناش كتير
بس فاكر اني كنت مخضوض قوي يوم الحفلة و لاقيتها بتقولي
ايه يابني انت طالع تغني يعني احلى حاجة في الدنيا
و من يومها بقيت لما اطلع اغني في أي حفلة بابقى طالع اتبسط و استمتع مش طالع شغل
ده كان اول موقف
و كنت بعد ما اخلص الحفلة بكام ساعة باكون في الاوتوبيس راجع بورسعيد كاني خلصت مهمة و رجعت ماباحسش اني عامل حفلة و لا باسمع أي صدى
لاقيت اول حد بيهنيني ع الحفلة و بيعلق على ادائي و قبولي سلمى
المهم توالت الحفلات و بقيت اشوفها اما يوم الحفلة على طول او قبلها على طول
و فجاة لاقيتها بتتصل بيا عشان اكون معاها في البرنامج و حسيت قد ايه هي فرحانة بيا زي ماهي بتحاول تساعد كل اللي حواليها و الحمد لله الحلقة كانت حلوة جدا و عملتلي انا صدى حلو جدا من كل اللي شافها
عايز اقولكم بعد الحلقة دي كانت اخر حفلة ليها معنا في الفرقة
و بدات سلمى تجهز لاول حفلاتها في الساقية الحفلة يا جماعة بجد كانت تحفة رغم اني ماحضرتهاش بس كنت من اول الناس اللي كان معايا السيديهات و الحمد لله الاخوة اللي بيننا فضلت و استمرت و بقت من اهم الناس اللي ممكن اتسند عليهم و واحدة من عزوتي اللي كلمتكم عليها قبل كدة
كل ده انا كنت باتكلم عن اختي سلمى
بس دلوقتي اسمحولي اتكلم عن سلمى المطربة......بالنسبة لي سلمى مش مجرد مطربة لا دي غناء و فكر
وانا باحترم جدا المطرب اللي بيغني بقلبه و احساسه و كمان بعقله و بقضية و فكرة تشغله و الفكرة اللي بتبقى مسيطرة عليها في وقت معين هي اللي بيبقالها دور البطولة في الشئ اللي بتعمله
يعني كان مسيطر عليها فكرة الحلم و عشان كدة كانت الحفلة كلها حلم جميل ليها و لكل اللي حضروها
انتو عارفين اغنية فنان فقير بتاعة وجيه عزيز؟؟انا سمعت منها الغنوة دي كاني ماسمعتهاش من أي حد قبل كدة..الغنوة اتغنت زي ما اتكتبت مش زي ما اتغنت وحكت عن اللي بيحصل للغلابة اللي زينا اللي لسة ملطشة معاهم و بيدوروا على فرصة في الغنا
و سلمى من اول الناس اللي سمعتهم في مصر بيغنوا لمارسيل خليفة و عايدة الايوبي و من الناس اللي لما غنوا لمنير حافظوا على شكلهم و ادائهم بعيد عن سكة منير
الى سلمى
ربنا يملى حياتك فرحة و يسعدك انت و اللي في بالك زي ما انتم فرحة لكل اللي حواليكم



على فكرة يا جماعة سلمى عندها حفلة جامدة جدا في ساقية الصاوي يوم الخميس 23-11-2006
هاتغني بس لفيروز بمناسبة مرور 71 سنة على وجود قمر فيروز اللي بينور الارض و بيملاها رقة و عذوبة و احساس بس المفاجاة الحلوة اللي كانت لي
ان سلمى هاتغني غنوة من الحاني الغنوة دي كاتبها هو احمد البورسعيدي دكتور زيفاجو و على فكرة هو اللي فتحلي باب عالم التدوين و رغم ان هو بلدياتي لكن سلمى هي اللي عرفتنا ببعض !!!
و انا فرحان قوى بالغنوة و باختي سلمى و نفسي اقابلكم كلكم يوم الحفلة دي
علىة فكرة انا سامع الغلس اللي بيقاطعني كل مرة بيقوللي انت عمال ترغي من الصبح علشان تعمل دعاية لحفلة صاحبتك ؟
يابني بجد اخرس مانتاش فاهم حاجة بس بجد اللي انا نفسي فيه اني اتعرف على كل المدونين اللي في الدنيا و نتقابل و انا نفسي كلكم تيجوا الحفلة و نتقابل كلنا
كل سنة وانتم طيبييييييييييييييييي علي الالفي

هناك ١١ تعليقًا:

hesterua يقول...

الله عليك يا عم على بجد
تسمحلى اعدل النضارة واقولك اصبت كبد الحقيقة يا علوة
واهم حاجة ان سلمى نوع من الناس بتحس اول ما بتتكلم معاها انها اختك على طول...حاجة نادرة جدا جدا
فعلا انت جبت اللى كنت عاوز اقوله
كمان
ذوقها فى المزيكا واحساسها..وحلمها الكبير ..حاجات بتخليك تكاشف انك قدام شخصية جميلة فعلا
بجد عندى كلام كتير قوى كنت عاوز اقوله بس انت قلته...ميه ميه يا علوة بجد
وانشاء الله الحفلة تنجح جدا ونتقابل هناك

Unknown يقول...

ربنا معاكي يا سلمى
ومعاك يا على
وانت كمان يا احمد
ف الحفلة الجاية وتبقة نجاح جديد ومتميز

Dananeer يقول...

انا معرفش سلمى شخصيا
بس سلمى من الوشوش المريحه اللى بتحسسك بالدفا و الطيبه و انك تعرفها
و على طبيعتها دايما فى شبابيك
ان شاء الله حاحاول اروح
انا عاجابنى صوتها

7eddo يقول...

السلام عليكم..يسعدني ان اتعرف عليك ،أنا اعرف سلمي من 4 سنين كنا زملاء في الجامعة ومنتخب المسرح وكنت مسميها أخويا الصغير حلاوة..سلمى جدعة جدا وبمليون راجل واحساسها عالي اوي وفنانة بجد ..وللحديث بقية
محمد الحداد

غير معرف يقول...

ازيك يا على
لا كده لازم نسمعك بقى
انا كمان بحب سلمى كصوت و فكر جدا
احساسها ما شاء الله عليه
بس عندى سؤال بقى
لو عايزة اجيب السى دى بتاع سلمى اجيبه منين وهل الحفلة بتاعة الخميس الجاى ليها سى دى و للا متعرفش

سعيدة بمرورى من هنا

Hanytoto12 يقول...

أنا عاوز أقوللك إني دخلت عندك بالصدفة لأني كتبت عنوان غلط وكانت أجمل صدفة لما لقيت صورة حبيبة قلبي ( سلمي ) إللي بجد بموت فيها زي ماهي لأنها ببساطة زي ماهيا من غير ألوان ولا رتوش ولا تفاصيل معقدة.
علي العموم أتمني تقبل صداقتي لأنك إنسان جدير بالاحترام وأنا عرفت ده من أسلوبك في الكلام , علي فكرة أنا إسمي هاني أبو هاشم ولما تقابل سلمي تاني أو أقابلك في الحفلة إنده وقول يا توتو واسأل سلمي هاتقوللك.

Unknown يقول...
أزال أحد مشرفي المدونة هذا التعليق.
Unknown يقول...

سلمى من أجمل الناس اللي عرفتهم في حياتي على الإطلاق.. أصحاب بقالنا ييجي 8 سنين كدة.. يمكن مش بنشوف بعض كتير لكن دايما هي على بالي.. من الناس اللي مستحيل تتنسي.. بحب فيها جدعنتها و صراحتها.. مالهاش في اللف و الدوران و أطيب خلق الله.. بجد يا سلى ربنا يوفقك النهاردة في الحفلة وتكون أكبر من حفلة خيرت يا ستي اللي حضرناها سوا في الساقية..

شباب المدونيني: أحسن أداء و أشوفكم في الحفلة بالليل إن شاء الله

نيرة
ganoub.wordpress.com

غير معرف يقول...

من الاخر
محدش بيحب البت دي قدي
وانا مش هاعرف اتكلم فيها ولا اقول لان الصفحة دي صغيرة اوووي عليها
انا وسلمي اصحاب من اكتر من 17 سنة الله اكبر الله اكبر
انا بعتبر سلمي اختي اصلها مالهاش حل
اول ما تسمع مايتحكيش عليها
انسي الدنيا وافتكر سلمي وضحكتها
مروة

. يقول...

بجد يا جماعة انا بعشق البت دي ربنا يهنيها وبجد بدعيلها من كل قلبي كفاية طلتها القمر فشبابيك ووشها الىكلو نور وايمان وجدعنة يا بخت اشرف بيها
ربنا يهنيها ويهنينا معاها
وياريت تقرا الكلام ده
عشان تعرف هيا قد ايه محبوبة

. يقول...

بجد يا جماعة انا بعشق البت دي ربنا يهنيها وبجد بدعيلها من كل قلبي كفاية طلتها القمر فشبابيك ووشها الىكلو نور وايمان وجدعنة يا بخت اشرف بيها
ربنا يهنيها ويهنينا معاها
وياريت تقرا الكلام ده
عشان تعرف هيا قد ايه محبوبة