الخميس، نوفمبر 09، 2006

3 سلامات

اسمحولى انى اتكلم معاكوا عن غنوة بحبها اوى
مش عارف ليه
و لا يمكن عارف
اقولكم انى بحس ان الغنوة ده معمولة علشان اللى حابب يغنى و يستمتع فى نفس الوقت يقدر يعمل الحاجات ده سوا
الأول احكيلكم على سر ؟ انتوا عارفين ان اللى بيغنى بيستمتع جدا و هو بيغنى و يمكن اكتر من اللى بيسمع
و يا سلام لو حس ان اللى هو بيغنيله مبسوط ده بيخليه يغنى أحلى و يكون اسعد فى غناه
و ده اللى انا بحسه و انا بغنى الغنوة ده
3 سلامات
الغنوة ده غناها ابونا محمد قنديل و اسمحولى اقول ابونا لأنى بحس قد ايه صوته مليان رجولة و خشونة و مليان حنيه فى نفس الوقت و بحس ان صوته فيه عشق الحبيب و دفاء الاب
فاكرين اخر حاجة عملها ؟؟التتر بتاع مسلسل الأصدقاء ؟؟
شفتوا الروعة ؟
و نرجع تانى ل 3 سلامات
الغنوة ده كمان غناها استاذنا مدحت صالح و عرف بيها ناس كتير و انا منهم
انتو عارفين الغنوة ده سرها ايه
الغنوة ده بتسمح للمطرب انه يطلع فيها كل احاسيسه و الحنيه اللى ممكن يغنى بيها
و كمان بتسمح للمطرب انه يغنى و يسلطن و يلعب بصوته
رغم انها بسيطة جدا لكن فى نفس الوقت بتدى مساحات للابداع الشخصى للمطرب
التسجيل ده موجود من الحلقة اللى انا كنت فيها فى برنامج شبابيك على دريم1 مع اختنا سلمى
و طبعا لظروف السفر محدش يدقق كتيرفي الارهاق الباين في صوتي
و بكده أكون بدات حاجة جديدة فى المدونة بتاعتى يعنى جنب التفاصيل الجوانية بتاعتى هتلاقوا كمان لينكات لاغانى انا مغنيها سواء أعمال معروفة أو أغانى خاصة بيا
ملحوظة الصوت واطي شوية بس انا معرفتش اعالج الحكاية دي بس يا رب تعجبكم
كلمة اخيرة
هيثم محفوظ و احمد شلبي
شكرا ليكم

هناك 8 تعليقات:

Geronimo يقول...

انا باموت ف الغنوة دي ياعلى
بجد هى حلوة واول مرة اسمعها كانت من حد مش معروف تصور
بس عجبتنى موت واتسلطنت

18goosebumps يقول...

الغنوه
رهييييبه

وانت يا على بتغنيها باحساس عالى جدااااا
جداااا
بجد بتتألق فيها

انا سمعتها لايف منك تقريبا مرتين
وسعيده بده
جدااا

بس سؤال سازج بره الموضوع
هى الغنوه مذكر ولا مؤنث يا علي
يعنى الغنوه ده ولا الغنوه دي
هههههههه

بالتوفيق دايما يا فنان

غير معرف يقول...

باقول ايه يا على
لما تيجى تكتب المره الجايه ما تبكاش تقول اسمحوا لى اسمحوا لى اصل اتخنقنا من الاخر هو فى ايه يا عم الحاج. والاموره بتاعه 18goosebumps السؤال السازج ازاى الاغنيه رهييببه اوى وماانتش عارفه هى لراجل ولا لوحده سيت

تحياتى
رخم ورخمه

غير معرف يقول...

انتو اتهبلتوا ولا واكلين مستهبله
انغام ايه يابنى انت وهوه. ورجاله وشنبات . وانت يا عم على بعد ما بابا اشترالك الشريط وما جبلكش مستيكه. ما تنشف ياض واخشن كده انت وهوه دا خيبه ايه دى يارب

جاتكم نيله نسيتونى اوقع

رخم ورخمه

tafaseel يقول...

الى الرخم
بالنسبة ل اسمحولي ف ده نوع من الذوق في الكلام
اما بالنسبة لكلمة بابا فانت لو بتعرف تقرا كويس
هاتعرف اني كتبت الكلام ده عني وانا عندي 6 سنين
و بعدين هو ده انا
حابب تقرا اهلا
مش حابب براحتك
و كمان مش لازم تعلق ع اللي بيعلقوا زيك
علي

Omar يقول...

للأسف يا علي اللينك فيه مشكلة، لكن انا سمعتك بالفعل في الغنوة اللي عاملها انت واحمد لسلمى، طلبت من احمد يسلم عليك ويهنيك على الشغل الجميل والصوت الحساس ده، لكن بما اني ممكن اعمل ده بنفسي، فباسجل هنا اعجابي بصوتك وموهبتك كملحن ومطرب جميل، بالتوفيق واهتم انك تحط شغلك دايماً ع المدونة

rosealia29 يقول...

إللي ميّز الأغنية دي عن غيرها .. إنها كانت أول أغنية تقول مساحتك آد ايه في التعابير بإحساسك .. بس لو جه غيرها إللي هاتعبر فيها أكتر هياخد نفسك تقدير و احترام الأغنية دي .. و بعدين إنت في كل الأمور الحياتية الطبيعية إحساسك عالي ... مش هاتيجي في الحاجة إللي بتحبها و تبدع فيها ؟؟؟


دمت ..

غير معرف يقول...

اغنية تحفة بجد
وياسلام لو سمعتها من ايهاب توفيق
غناها في برنامج زائر ليل مع محمود سعد
كان اداءه تحفة بجد