الأربعاء، نوفمبر 15، 2006

التدوين مش كدة!!!!!محدش ليه دعوة

صباح الفل و حاجات كتير من كدة
بجد وحشني اني اقعد احكي معاكم احكي ع التفاصيل اللي جوايا
و معلهش ما كنتش قادر اتكلم الفترة اللي فاتت بس الحمد لله اهي عدت
على فكرة ناس كتير اتكلموا معايا ان التدوين مش كدة يعني انا مش المفروض اكتب عشان حد يقرا.
المفروض اني اكتب اللي جوايا و خلاص وغلط ان انا عمال اكتب كاني باوجه الكلام لحد
بس كدة عاجبني انا حاسس ان التدوين فتح لي باب ممكن اتنفس من خلاله و ارغي و لاني زهقت جدا من كتر ماكنت باتكلم مع نفسي فقررت ان يكون لي مجتمع و ناس و اصحاب و حبايب اتكلم معاهم
ناس مش هاتكسف و انا باحكيلهم عن اللي جوايا
ناس ممكن اللي باكتبه ده مايهمهمش بس هم ضيعوا شوية وقت و قروه و منهم اللي اتعاطف و منهم اللي شتم و منهم اللي كسل يقرا و لاني مش شايفكم و انتم بتقروا الهلاوس بتاعتي دي فقررت ان انا اعمل كاني باكلمكم و جها لوجه و اتخيل ان في حد بيقاطعني و ها رد عليه و زي ماتفقنا ان اللي ع المدونة ده هو انا بكل ما في و بكل غلاستي و طيبتي و غبائي و ذكائي و و و و و الخ
عايز اقول بجد الحمد لله انه بعت لي الناس اللي عرّفوني ازاي ادون و اتكلم و فتحولي طاقة نور جديدة و كمان ان ربنا بعت لي ناس من المدونين حسوا بي و اتكلموا معايا و فهموا و تفاعلوا
انا مش هاشكرهم بس هاشكر ربنا انه بعت لي دكتور زيفاجو و هيثم محفوظ و سماح موزاييك و كراكيب و جوسي و روزاليا و ابو حميد الشاعر و كونان
و ربنا ما يحرم حد من اللي يحبهم

هناك 17 تعليقًا:

غير معرف يقول...

يا باشا اكتب اللي انت عايزه براحتك ولا يهمك من حد انت ما تعرفش ان الشخبطه اللي انت بتكتبها بنعتبرها خريطه لحياتنا

غير معرف يقول...

صباح النور عليك وكده

مين قال ان التدويين مش كده

فيه فرق بين المدونة وبين المذكرات الشخصيه

طبيعى مذكراتى غالبا ماحدش هايشوفها لكن التدويين معمول علشان اتفاعل مع الناس

علشان الناس تقرانى واقراها والا كنت اكتفى بملف وورد على الكومبيوتر بتاعى وخلاص !!

ثم ان اغلب البلوجات بقى فيها عداد زووار طبيعى انه ده معناه ان يهمنى ان حد يسمعنى وان اللى باكتبه فيه عيون بتقراه

وفيه تواصل مع الناس وهكذا

اما بخصوص طريقة الكتابه ..انك تبقى بتوجه الكلام للناس اللى بتقرا او تبقى بتشتغل نفسك ان ده ليك وماحدش بيقراه فده يخصك انت لواحدك

ده بيتك ..تقدم فيه لضيوفك اللى انت عايز تقدمه وبذوقك انت وبكرمك انت بردو

اللى عاجبه يزوورك اهلا وسهلا واللى اسلوبك مش عاجبه من حقه يدور على بيت تانى يزووره ويرتاح فيه


دوووو وات يو وانت تو دوووووووو

بالمناسبة

قريت بوست انغام وسلمى

اسمحلى ارفعلك القبعه احتراما لاختيارك الراقى

ابقى تعالى بنوزع عندنا شرايط انغام مع اللمون

صباحك حلو وكده يعنى

باسم شرف يقول...

دون عزيزي كيفما تريد
لا احد يعرف الحقيقة
حتي لو علقت بوست فاضي .. مححدش ليه عند حاجة

كراكيب نـهـى مـحمود يقول...

العزيز جدا تفاصيل – مين قال ان التدوين مش تواصل
احنا بنكتب لنفسنا صحيح من مبدأ إن المدونة مذكرات شخصية حكايتنا اوجاعنا وافراحنا لكن اكيد بنفرح وبيرضي فضولنا اوي لما نلاقي ناس شبهنا واننا مش وحدنا اكتب اكتب واحنا سامعني ومستمتعين

Love & Friendship,this is my life يقول...

مبروك على المدونة متأخرة
مين قالك ان التدوين مش كده ... ده كده ونص
انا ليا رأى غريب بس انا شخصيا جتى مدوناتى الشخصية الورق يعنى بكتبها كأنى بكلم حد يعنى بلغة الحوار
برتاح اكتر وبحس كأن حد سامعنى مع ان الحد ده مش اكتر من الورق والقلم
خلى رأيك لنفسك ومش مهم اراء الناس فى موضوع زى ده لأنه بيختلف من فرد للتانى

Epitaph يقول...

اكتب و طلع اللي جواك

سمعنا صراخك و ضحكك

و انضم الي صحبة البلوجراوية
ع الحلوة و ع المرة

اهلا بك في عالم التدوين الصاخب
:)

rosealia29 يقول...

بكلام من غير كلام .. بتدوين من غير تدوين .. بمقابلات من غير مقابلات .. في بيني و بينك شكل و مذاق خاص من التواصل أبعد و أرقى من كل تلك الوسائل .. ربما الكيميا .. و على أي وضع من الأوضاع معاك لنهاية الخط ..

rosealia29 يقول...
أزال أحد مشرفي المدونة هذا التعليق.
tafaseel يقول...

ياااااااااااااااااااااااااه
بقى انا كنت حارم نفسي من عيلة زي دي
ربنا يخليكو و تتحملوا صراخي و ضحكاتي
اشكركم واحد واحد على المرور الرائع

tamer يقول...

منور والله


والكتابة ياريس بحر واسع ومجالاتها كتير واكتب اللى جواك والكل هيسمعك


تحياتى

Supernova يقول...

دوس يا على وعرفنا تفاصيلك
مش ممكن تفاصيلك دي تغير في وجة الكرة الارضية
ممكن
دوس ولا يهمك التدوين طاقة واتفتحت لناس كتير عايزه تعبر عن اللي جواها
تعرف
يكفي اني ممكن اخش اقرأ مدونتك ومنها لمدونة تانية وثالثة وهكذا
اتعرف على اشخاص كتير من خلال دماغهم
مش يمكن الاشخاص دول يغيروا حياتنا واحنا مش عارفين
دوس ياعلى ولا يهمك
سمعنا تفاصيلك

مُزمُز يقول...

تحياتي

الموضوع فعلا متباين من فرد لآخر
ومن وقت للآخر
يعني أنات مثلا لما قررت اني أعمل مدونة كان عشان نفسي بالدرجة الأولى والأخيرة يعني عشان أقدر أحقق اتساق مع ذاتي وتصالح مع أفكاري واستكشاف أعماق جديدة في نفسي المركبة

لكن فيما بعد بدأت أهتم اني يكون ليا أصدقاء في عالم التدوين يشاركوني الرأي ويطلعوا على ما أقوله لأنه من المهم أن تشعر أنك عريان أمام بعض الناس حتى تحقق الصدق مع نفسك
عموما ده كله ما لوش علاقة بطريقة الكتابة

ممكن أكون بكتب لنفسي وأكتب بالطريقة اللي انت بتتكلم عنها
يعني بتخيل ان فيه أصدقاء وهميين هيقروا كلامي
كنت بعمل كده زمان في مفكرة صغيرة
بس ده بقى اسمه الجنون ولا مؤاخذة
يللا معلش على الاطالة وأهنيك على المدونة وأتمنى المتابعة

Geronimo يقول...

شفت بقيت مشهور
والتعليقات نازلة ترف اهي
ياعم اتكلم على كيفك ياعم
ومتعنا بتفاصيلك
زي ما بتمتعنا بغناك

هيثم محفوظ يقول...

يا عيلوه إكتب اللى إنت عايزه بالطريقه اللى إنت عايزها أهم حاجه تبقى نفسك ف التدوين ف البيت ف الشغل و أهم حاجه ف الفن
ماتنساش فنك و بعدين بتشكرنى على إيه يا اهبل :)
ربنا يوفقك و لحنك اللى هاتغنيه سلمى ف حفلتها يوم الخميس يعجب الناس ساعتها هاتلاقى نفسك بجد
عايز أقولك إنه كان نفسى أكون موجود يوميها بس أنا لسه مش عارف ظروف شغلى إيه
على ياريت تتصل بيه بجد عايز أسمع صوتك
0108737173

MAKSOFA يقول...

مبروك المدونه
وفي أنتظار الجديد
وشكرا علي زيارتك لمدونتي

mohamed gouda يقول...

باشا
ازيك يا قريبى
مدونتك عجبانى مع انك لسه مدخلتش فى الجد
بس ليك أسلوب مختلف
أما على موضوع التواصل فمتهيقلى انه عالى اوى بيننا احنا بنفهم بعض علطول و من غير كلام و لا أيه
دمت بصحة و عافية و حب

18goosebumps يقول...

ازيك يا علي

دون يا على وصدقنى بنقرأ ليك واحنا عايزين نعمل ده
وجداا كمان

دون ما تشعر به بالطريقه التى تنطق وتقول انا علي الالفي

دون ونحن نتابع ونتفاعل ونقرأ ونتناقش ونختلف ايضا ...

سلام
يا صديقنا الانسان الي بجد