الجمعة، نوفمبر 10، 2006

كن صديقي ولكن

كن صديقي........ ارجوك كن صديقي ربنا يكرمك و يسعدك كن صديقي
مش فاهمني؟؟؟؟أقولك يا سيدي
كون المرايا اللي ممكن اشوف فيها نفسي و توريني الوحش فيا و تزن علي لغاية ما اغيره
و كون المرايا اللي توريني كل حلو فيا و تكبرهولي و تساعدني افرح بكل شئ اعمله حتى لو مش كبير
كون الكتف اللي ممكن اتسند عليه قبل ما اقع و كون اول ايد تتمد لي لو وقعت و كون القلب اللي ممكن يتفتح لي لما اكون تعبان
و كون اول نمرة ممكن اطلبها لما اكون مخنوق و محتاج افضفض و لما اجيلك انسى القرف اللي جوايا و الاقي مافيش حاجة احكيها
كن صديقي و لكن قبل ماتكون صديقي خد بالك
اعرف ان انا مش انت و ان انا مش ممكن اكون انت وان انا لو كنت زيك انت اكيد هاتيجي اللحظة اللي يبان فيها الاختلاف اللي مايخلينيش انا ابقى انت
احترم اختلافي عنك و مش لازم ان انا احب الشئ اللي تحبه انت و مش لازم تكون الناس اللي حواليا هم اللي حواليك
كن صديقى اللي بيحترم مساحتي الخاصة و مايسمحش لنفسه يتطفل على حاجة انا ماحكيتهالوش لاني لو كان ممكن احكيهاله كنت حكيتها من زمان
و اعرف ان اللي انا حكيته ليك حكيته ليك انت بس و لاني ما حكيتوش لحد غيرك يبقى انا مش عايز غيرك يعرفه يبقى انت ماتتطوعش و تحكيه
اعرف ان اللحظات اللي ممكن نكون فيها بتبقى غالبا للهروب من قرف عايشينه مع ناس تانيين سواء قريبين او بعاد فلا تجعل اللحظات دي زيادة لللقرف و الزهق في حياتي
ماتبالغش قوي في اظهارك لخوفك على مصلحتي و تحس انك الناضج قوي المسئول عن القاصر اللي هو انا و تقعد تزن بنصايح كتير لدرجة تخليني ممكن انفذ العكس لمجرد العند
و ده مش معناه انك تطنش يوم ما تلاقيني هاودي نفسي في داهية المهم انك تعرف ازاي ترجعني للطرق الصح بطريقة مظبوطة
كن صريح معايا يوم ماازعلك مني و عاتبني سريعا لان انت لو حوشتها هاتزيد جدا و يوم ما انت هاتخزن لى غلطة في حقك يوم ما هايبدا العد التنازلي للنهاية لان لو حصل حاجة تانية مش عايز اسمع منك كلمة" انا زعلان منك من زمان و انت غلطاتك كترت " و الكلام ده
ما تفهمش مني غير اللي انا قلته بنفسي لفظيا و ماتحاولش تلاقي له معنى تاني غير اللي انا قلته بيه و كون واضح معايا في كلامك جدا
ماتحاولش تضغط عليا ابدا في عمل شئ انا مش مقتنع بيه و اتكلم معايا كتير فيه و يا تقنعني يا اقنعك و لو ماحصلش يبقى عمره ما هايحصل
لو بيني و بينك شغل يبقى ده بعيد تماما عن صداقتنا وحافظ فيه على حقي زي مانا هاحافظ على حقك و لو في يوم الاوراق دخلت في بعضها هاتبقى خلطبيطة لا الشغل هايبقى شغل و لا الصحوبية هاتبقى صحوبية
عمري ما اسمع منك كلمة "اما فلان و اما انا" او "ياتعمل الشئ ده يا ماحناش اصحاب " لان ساعتها فعلا ما احناش اصحاب لان صحوبيتنا دي لازم تكون اكبر من كل شئ و لو اتحطت في الميزان مع أي حاجة لازم تبقى اتقل و اكبر من أي حاجة
حاول دايما انك تكون سبب في قربي من ربنا بالطريقة الصح اللي يرضى عنها ربنا
و عن نفسي انا ممكن اضمن لك كل ده من نفسي ولو ده كله كان منك ناحيتي فاسمح لي اقولك بجد كن صديقي و ربنا مايحرمنيش منك و ربنا يجمعنا ان شاء الله يوم القيامة سوا في جناته

هناك 9 تعليقات:

Nohaz يقول...

انت بتدور علي المستحيل
انا يمكن شفته مرتين بس
سيدنا هارون مع أخاه سيدنا موسي
و سيدنا أبو بكر مع سيدنا محمد عليه الصلاة و السلام

غير كده
الخل الوفي من المستحيلات الثلاثة الي ملهاش رابع

KHALED-ELSAWY يقول...

انا شايف انك بتقترح دستور ممتاز للصداقة بشرط واحد هو انك تملا كفة الالتزامات قد كفة المطالب:)

tafaseel يقول...

نورت يا استاذنا
لكن على فكرة كل المطالب اللي انا طالبها تعتبر التزامات عليا
و عشان كدة هايحصل عدل في اي علاقة حتى لو صداقة
الى خالد الصاوي ماتيجي تكون صديقي

Romahali يقول...

great.. very great ya Ali
i could not stop my self to comment. it is realy great one.
to have really a good friend .. listen and ..care it is very important .
i do not think it is rules but it is wish from u 2 him to be the same as u describe.

by the way there are good friends in our world ..there r people care abou u want to make u happy and wish to u the best and u also i am sure that u r good friend but the proplem that is no one is perfect and if he did somthing bad with me ...of course i did the same with him once time before.
and if there one bad friend why i think about him if i have another good one.

wish u to have this friend

Romah

18goosebumps يقول...

كن ليكون


وصلت ... اكيد لصديقنا الجدع علي

tafaseel يقول...

طبعا لا احتاج ان اقول كم قوتني كلماتكم الجميلة و دعمتني كثيرا
لكن لى صديق و بجد صديق حاولت ازوره كتير و ماعرفتش و وبيقولوا البلوج بتاعته مش موجودة
الى روما
نزورك ازاي؟؟؟

tafaseel يقول...
أزال أحد مشرفي المدونة هذا التعليق.
Romahali يقول...

Ali
begad how nice ur words ... it made me happy..but 4 my blog ... i do not have the courage yet to express about me..may be i can see my self in other blogs ...
reading made me happy more.
i said that before to every one i visit him when he or she ask me why i did not put any thing in my blog.
by the way i was like u i do not what the blog made for.

but when i find great guys and girls like you..sure i will think about it ...thanks again

Romah

ساعه الغروب يقول...

جميل اوى انه يكون ليك صديق صدوق بمعنى الكلمه والاجمل ان انت كمان تكونله كده
بس هل ده لسه موجود؟؟؟

جميل اوى كل اللى بتطلبه يا على بس لو لقيته ارجوك ادعونى لصداقته