الأحد، يناير 14، 2007

لاول مرة حد يناقشني في بوست كتبته و كنا بنتكلم انا و الصديقة الغالية اختي روزاليا عن تفاصيل الموضوع
و حسيت انها اتفاجأت من كلامي لما قلت لها ان الحب بقى رفاهية مش كل الناس تقدر تحصل عليها و ان اللي معهوش مايلزموش
ردت و قالت:بس انا اعرف ان الحب حق طبيعي لكل الناس و كل الناس لازم تعيشه مش رفاهية مقتصرة على حد معين
سكتتني كلماتها بس لما فكرت لقيتني باكلم نفسي
و هو ايه مش حق طبيعي للناس
و أي حق طبيعي للناس واخدينه
معلش كلامي مفركش شوية؟؟؟ استحملوا ماحنا متفقين
قصدي انه فيه حقوق بديهية لكل البشر و كتير من الناس مش قادرة توصل لها و عشان كدة اقتصرت على ناس معينين و بقت نوع من الرفاهية
طب مش هي اللقمة النضيفة الهنية حق لكل البشر
مين لاقي ياكل الايام دي
و اللي لاقي تفتكروا مبسوط باللي بياكله و هو محروم من حاجات كتير مش عارف يجيبها و نفسه يتعرف على طعمها
و لو لقى اللي عايزه مش بيبقى طالع ميتينه على ما يقدر يخطف اللي يجيب بيه اللقمة دي
بلاش اللقمة
طب مش هو السكن حق بديهي و مشروع لكل البشر
مين لاقي يسكن في اربع حيطان يلموه هو و اللي متحمل مسئوليتهم
و لو لقى تفتكروا ده هو السكن الحلو اللي بنحلم بيه كلنا ؟
تفتكروا حد هايتبسط في الجحر اللي عايش فيه و هو شايف اعلانات دريم لاند و مدينتي و الرحاب و هو مايقدرش اساسا يهوّب ناحيتهم حلوة"يهوّب"دي؟
طب مش الهوا حق كل الناس مين قادر يتنفس في الخنقة و السحابة السودة و مصانع الموت اللي بتتفتح جوة المناطق السكنية
حتى بورسعيد اللي فيها انضف جو في الدنيا
عايزين يشوهوها و يفتحوا فيها مصنع اسمنت
كان نفسي اوضح لها ان فيه حقوق كتير للبشر مش عارفين ياخدوها و ما جاتش ع الحب يعني و ان اللي ما معهوش مايلزموش
و عايز اسالكم في حاجة
مش بردو العجز هو العدو الحقيقي لاي مشاعر صادقة و رقيقة جوة البشر
زمان قالوا:ان دخل الفقر من الباب هرب الحب من الشباك
و بصراحة انا لو لقيت واحدة بتحبني و دايبة فيا و انا باحبها و مش قادر ارتبط بيها عشان الظروف ممكن اكره نفسي و اكره عجزي قدامها و يمكن اكرهها هي كمان
و كل ما هالاقيها متمسكة بي اكتر كل ماهاتعذب اكتر
يبقى انا كدة في السليم
يعني مثلا تفتكروا ان انا مالاقيتش البنت اللي تهز الدنيا في عينيا
عايز اقول ان ده مر في حياتي كتير جدا و اني الاقي البنت اللي لو حلمت بشئ بالاقيه فيها و بابقى نفسي اكمل معاها عمري
بس لاني صادق قوي مع نفسي و رافض اعيش تجربة مؤلمة
بابعد عنها بكل الطرق الممكنة
و ساعات بابقى غتت جدا جدا معاها عشان ما احسش بيه و لا هي تحس بيا اساسا
و اهي ماشية
انا مش هاحب و لا ارتبط الا لما اقف على رجليا و ابقى قادر على اني احب و يبقى فيه نور و ناس و بيت
على فكرة اكبر هاجس ليا في الحب هو النور
طبعا مش نور الكهربا
لكن النور اللي فيه ما ابقاش خايف من حبي و لا خايف من حد و ابقى ماشي ايدي في ايديها
مش حابب اني احب و اخاف من الناس و لا هي تكون خايفة من باباها مثلا او اخواتها عشان انا مش قادر ارتبط رسمي
و كمان مش عايز ابقى رايح اتقدم لواحدة و كل امكانياتي هي علبة جاتوه اللي داخل بيها ع الناس
معلهش المرة دي خرجت بيكم من موضوع لموضوع و لفينا لفة كبيرة حمد الله ع السلامة
*************************************************
و في الاخر احب اقول لكم
كان فيه غنوة عبقرية لأنغام اسمها معنى حبي بتقول



معنى حبي
ان قلبي يلقى كل حاجة انت
تبقى ليه و مين و امتى
و الاجابة
تبقى نور و ناس و بيت
تبقى صوتي لما اغني
او دموعي لو بكيت
معنى حبي
ان قلبك لو ناداني
اجمع العمر في ثواني
و اهديهولك في ابتسامة
احلى من كل المعاني
معنى حبي
لو حياتي ساعات خديتني
و في زحام الخوف رميتني
اجري
و احلم بين عيونك
لو بقلبك يوم ناديتني
معنى حبي
ان قلبي يلقى كل حاجة انت
تبقى ليه و مين و امتى
و الاجابة
تبقى نور و ناس و بيت
تبقى صوتي لما اغني
او دموعي لو بكيت

هناك 14 تعليقًا:

rosealia29 يقول...

البوست المرة دي جميل جداً .. و إنت كنت لسه على رأي .. و رغم إني متفقة مع كلامك .. و على إن كتير من الحقوق الطبيعية ناس كتير مش واخداها لكن الحقوق كلها ماينفعش احطها جمب بعض و أساومها .. و أقولك تحب ولا تاكل لقمة نضيفة ... أو تحب ولا تعيش عيشة حلوة .. كلهم مطلوبين و كلهم مش رفاهية .. و بعدين إنت بتتكلم على حاجة إنت مش ماسك مفاتيحها .. ولا أزرارها .. زرار - افتح قلبك و حب يا علي - زرار - قلبك مقفول و خارج نطاق الخدمة - انا مؤمنة بإن الكفاح جزء مهم من بناء الحب .. لأني شوفت على الوجه المقابل الناس إللي ارتبطت و بابا جاب الشقة و العربية و عمل الفرح و بيدي في اييد ابنه المصروف .. و هل دي بقى عيشة يا فندم ؟؟ الحب مش بيستنى .. ولا بيتحط على المنبه .. (( لو سمحت فكرني أحب كمان خمس سنين من دلوقتي الساعة 6 المغرب )))دمت يا علي .. و أدام الله عليك نعمته ..


محدثتك روزاليا ..

rosealia29 يقول...

نسيت أقولك أغنية أنغام راائعة ..

وينكى يقول...

هاى
عرفت مدونتك عن طريق الفنان اللذيذ دكتور زيفاجو
دى اول مره ليا عندك عندى..وبصراحه..فعلا تستاهل كل الكلام اللى قالهولى عليك
انت فنان بجد واحساسك عالى
البوست دا خلانى افكر كتير
معاك حق ان اساسيات كتير المفروض انها حق لينا..لكن كتير ما بيحصلوش عليها
صحيح الحب شىء غريزى واساسي جوا كل بشرى..لكن برضه فيه حاجات كتير ماينفعش الحب ينجح من غيرها
يعنى م الاخر..ممكن نحب لكن صعب اننا نطبقه او نحصل عليه
تحياتى ليك واسمحلى ازورك من وقت للتانى

غير معرف يقول...

واللة انا عايزة اجى الحفلة بتاعتك يا على عشان اسمعك ولان يوم الحفلة يوافق يوم عيد ميلادى. ميادة

غير معرف يقول...

بص يابني ..خليك واقعي...متتوقعش انك تبقي خريج جديد ولا تملك شروي نقير"هي بتتقال كدة انا معرفش يعني ايه نقير!!" وعايز تشتري شقة وعربية وتتجوز..صحيح انا مع روزاليا في ان الحب ملوش متبه ولا وقت لكن ترتيب الاولويات مهم..انت دلوقتي تفكر في مستقبلك واللي انت شايفه حقك لازم تحارب عشان تاخده متستناش يجيلك عشان يبقي حقك..لازم تعرف ان شريكة حياتك دلوقتي موجودة وانت متعرفهاش..ياتري هي تستاهل منك تكون باليأس والضعف ده ولا تحارب عشانها؟..وبعدين مهما قلتلي..متربطش نفسك وانت لسة مستقبلك مش واضح المعالم..الفترة دي حتعدي حتعدي بس لازم تعدي وتخرج منها وانت اقوي..علي اليأس اللي انت فيه مش عاجبني ولازم لازم تبقي اقوي..عامة لينا كلام تاني..علي فكرة ابله ميادة حتموت وتيجي الحفلة..ابقي رتب بقي عشان احتمال اجي بجد!!

ساعه الغروب يقول...

شوف يا على
انا على يقين تام بان الحب مش يايدينا ولا اختيارنا
هو كل اللى بنقدر نعمله اننا نقول لنفسنا اه ممكن اكمل القصه دى للنهايه او انى لازم اقف هنا واتعقل شويه
يعنى مش بالمنبه زى ما روزا قالت

و بمناسبه اغنيه انغام انا فيه جمله بحبها اوى لايمان البحر

عايز اشوفك لما بغرق وسط بحر الكون جزيرتى

الجمله دى بتعنيلى كتير
ياريت تحسها باحساسى هتفهم كل اللى عايزه اقوله

غير معرف يقول...

الحب حق
الحرية حق
البيت حق
الاكل حق

الحقوق تأخذ ..... لا تمنح

مينفعش نستنى حد يدينا حقنا

ولازم ناخده

وعشان نقدر ناخد حقنا لازم نتحلى بالقوة الكافية لأخذه

وده محتاج اننا نقوم بواجباتنا الاول نكبر و نكتسب خبرة و نقوي عينا واحنا بنطلب حقنا

لازم نعرف مفردات الواجبات قبل المطالبة بالحقوق

والحب لو احساس وحق بيتولد ويا الشوق والتواصل .... ممكن يموت لو مقومناش نحيته بالواجب .....

ممكن يتخنق لو كان قصادنا وعجزنا اننا نمد ادينا وناخده ف حضننا

لو فكرنا في حقوقنا واحلامنا من غير ما نفكر في واجباتنا والتزامتنا يبقة احنا عايشيين الوهم ....

وغنوة انغام تحفة بجد

انتهى المشوار يقول...

مش عارفه كلامي ده هايزعلك ولا لا بس انا ملاحظه ان كل اللى كتبته بيشع منه الاحباط واليأس بعينه ....مانت ممكن تقهر حاجات كتيره اوى من اللى حواليك يعنى مثلا:
موضوع الغناء ده وان انت تخين ومش هاينفع تغنى ليه ماتركبش الموجه وتخس وتطلع للنور بشكلك وصوتك الحلو تعالى بص على اللى اسمه محمد عطيه ده هايف وصوته وحش ومع ذلك نجح لانه عنده ذكاء وعارف ازاى يتماشى مع اللى حواليه عشان يوصل لاللى هوه عايزه
تانى حاجه موضوع الحب ده واللى انا فهمته انك كنت مرتبط وحبيبتك اتخطبت...ليه تزعل هيه الغلطانه في الاول والاخر لانها لما ارتبطت بيك كانت عارفه ظروفك كلها فمكانش ليها لازمه انها تقولك كل شويه انا جالى عريس وده اللى خلاك تحس بالعجز...وانت مش المفروض انك تزعل لانها ماتستهلكش لانها كانت عايزه تتجوز وخلاص مش تعيش مع الانشان اللى هيه بتحبه
تالت حاجهخ واضح انك طموح وانك بتحب موهبتك جدا وعشان كده المفروض منك انك تثقلها بالدراسه مفيهاش حاجه لو دخلت معهد الموسيقى العربيه وتغنى في الاوبرا وتتشهر واوعى تقف محلك سر ابدااااااااااااا
معلش طولت عليك جدا بس ده رايي وكان نفسي اقوله لك
وانا بدعوك لزياره مدونتى اللى انا لسه بدأها وتقولى رايك فيها ايه بصراحه

انتهى المشوار يقول...

من شويه كنت بتفرج على سوبر ستار واستغربت جدا من اللى بيحصل ناس صوتها وحش كتييييييير اتقدموا ماتفكر يا اخ على وتشوف يمكن المره دي تلفق معاك وماتخافش مش بيهمهم الشكل

علي الألفي يقول...

صباح القشطة
بس انت فاهم الحكاية غلط جدا جدا جدا
انا اساسا مش عايز ارتبط و باتكهرب اول ما يبدا يحصل بداية ارتباط
عشان انا مش جاهز ماديا
و احيانا انا كمان ممكن احب الانسانة دي بس انا متاكد ان ظروفي هاتخلينا نفترق عشان كدة بابعد عنها و ده بيعذبها
انا حاسس اني جرحتها وانا باسيبهابي عارف انها هاتتجرح اكتر لو كملنا و افترقنا بعد فترة اطول
بس كدة
و شكرا ع المرور

مبرمج حر يقول...

أزيك يا على
عرفت مدونتك الجميلة عن طريق ملكة الأحساس روزاليا

بص انا هافكر بصوت عالى

وجهة نظرى أن الاختلاف بين حاجتين الحب و النجاح فى الحب

الحب بيدخل القلب بدون أستئذان
النجاح و الأستمرار فى الحب هو المشكلة لأنه بيرجع لعوامل كتير أهمها الصبر على مشاكل الحياة و عدم الأستعجال و ارادة لا يمكن أبدا أبطل أحب حبيبى

مصر أم الدنيا فيها مشاكل أساسية رهيــــــــــــــــــــــبه بتخلى الواحد دائما يوقف عند مرحلة ما قبل الحب
حاجة كده عاملة زى هرم ماسلو ..

هل أحنا بنفتقر لنموذج كفاح لأتنين حبوا بعض و كان مش معاهم أى حاجة و أجتهدوا و صبروا لغاية ما أتحسنت الحياة .. هل الأعلام ركز فينا بأفلام و
مسلسلات مالهاش أول من أخر بتتكلم عن أستحالة نجاح الحب بدون فلوس ولا الأعلام ماهو الا مراية لواقع أليم.

أعتقد أن أحنا محتاجين نشوف نماذج ناجحة أوى فى الحتة دى

طب أستنى أستنى
ماهو فى ناس بتتجوز وعن حب و حالتهم المادية كويسة جدا جدا لكن بتعدى الأيام و مش بيفضل غير الكراهية المحضة أو حتى عدم الأكتراث بشىء كان أسمه فى يوم من الأيام حب

طب لنفرض أن واحد لقى حب حقيقى قبل ما يقدر يكون نفسه كويس يعمل أيه و طبعا من النادر أساسا أن الواحد يلاقى حب حقيقى

يمكن المشكلة فى حاجة تانية خالص أن احنا عايزيين كل حاجة الحب و الفلوس و بسرعة
ممكن الحب و الفلوس لكن بسرعة مستحيل

الخلاصة و وجهة نظرى الشخصية
لما الواحد يلاقى حب حقيقى بمعنى الكلمة , لازم يجتهد فى عدم تركه أبدا و يجتهد كمان فى الفوز بيه
لأن الحب الحقيقى هو بطارية الحياة الحقيقة.. بس الأول يتأكد أنه حقيقى

تحياتى ليك يا على

Memo يقول...

إهيئ..إيهيئئ..إهيئئئ...إيهيئئئ

ههممممممممممممممفففففففففففففف
ممكن كلنكس لو سمحت
ليه بتعملو فيا كده كل اما اخش بلوج اتبهدل البهدله دي
البلوج موئثر قوي
لسه مش عارف ان الحب قضاء وقدر زي الموت بالظبط
متخافش هيا واحد بس الي هتليقيها و في الوقت المناسب حياتك هتبقا ليها يا سلاااااااام كاتني خيبه فخبتي
و لاد الناس مش لعبه روح يا شيخ اللاهي يجبر بخطرك زي ما جبرت بخترهم رغم اني شايفه انك تجيب مع الجاتوه قزازه بيبس مش عايزين بخل بقا و الحركات دي

ريما يقول...

عارفة اني بعمل كومينت على بوست قديم بس موضوعه بجد شدني
في الاول كلامك فيه درجة كبيرة صح
لكن ده يتقال لما يكون حد عايز كل حاجة في وقت واحد عايزة يلاقي الانسان اللي تحبه ويحبها ويلاقي السكن المريح والشغل المناسب والحياة تبقى رفاهية ومفيش بعد كده
بس تعالى بص حواليك كام واحد عايش كده
مش حاتلاقي انا بتكلم عن الناس العاديةمش مثلا الاثريا
حتى دول حتلاقي حاجة ناقصهم او عنده قصر وبدل العربية اربعة حتلاقي نقصه الحب ومستعد يستغنى عن اي حاجة في سبيل انه يلاقيه عشان كده حاتلاقي العكس
في ناس بتلاقي الحب ومش عارفة تكمله لقصة كاملة بالارتباط
مش عيب انك تعرف ظروفك وتعيش عليها لفترة معينة
بس الخوف ان ده يكون مبداء في الحياة
سوري اني طولت عليك بس الفكرة خلتيني عايزة اقول رايي على طول
وانشالله تلاقى الحب المناسب في الوقت المناسب

big big girl...in a big big world يقول...

اول زياره ليا لمدونتك

بحس سعات ان الحقيقه عباره عن كوره
مكتملة الاستداره
بنقف منها فى حتت مختلفه
فبنشوف اللى حوالينا من المكان اللى واقفين فيه
مبنشفش الحقيقه كلها

انت اتكلمت ان الحب رفاهيه مش بيمتلكه غير الناس اللى ممتلكين اوجه الرفاهيه
بس ده شىء مش صحيح
الحب مرتبط بمعنى انسانى جوانا
الحب مش محتاج فيلا فى دريم
ممكن تلاقيه فى عشه من العشش
كلامى كلام افلام؟؟
الدليل الوحيد ان البيوت اللى فيها كل اوجه الرفاهيه هتلاقى الحب رافض انه يسكن فيها الا لو كانوا السكان يستحقوا

الحب مرتبط بالاشخاص..مش بالامكنيات
هيجيلك يوم مش هتقدر ترفضه..مش هتقدر تقله لا متدخلش بيتى المتواضع...
صدقنى لو كنا احنا بنى ادمين صح...لو الانسان جوانا مكنش مات...لو استعنا بربنا فى كل خطواتنا
هتلاقى ان الحب و الرضى بيملا قلبك مهما كانت امكانياتك

معلش طولت فى الكومنت
:)
مرسى على طرحك الموضوع