الثلاثاء، يناير ١٦، ٢٠٠٧

يا خوفي يا جدعان

صباحو قشطة على كل المحبين و الناس اللي بقوا جوايا من اهلي
يمكن دي تاني مرة اكرر
يا جماعة عندي حفلة يوم 30/1 في الساقية
و بجد انا دايما اتعودت في كل حفلاتي مع الفرقة اني باحس اني لوحدي و مابيبقاش معايا حد من اصحابي او اهلي
تصدقوا ان امي عمرها ما حضرت ليي حفلة
عارفين ده ليه
لاني من بورسعيد و كل الحفلات بتبقى في القاهرة و السفر ممكن يكون متعب لناس
و يمكن ده عمل لي كدة حالة خاصة بين الناس اللي في الفرقة و كمان جمهور الفرقة
تصدقوا انا انا بقى ليا اصحاب من جمهور الفرقة و منهم ناس سافروا بورسعيد عشان يقضوا معايا يوم
و بلاقي في الناس اللي بيحضروا كل حفلاتنا نظرات حنيّة و احيانا تعاطف
هبل شوية اللي انا باقوله؟؟
يمكن
بس بجد انا حسيت ان فيه ناس كتير من المدونين بقوا اهلى و هم موجودين في القاهرة جاهزين و ممكن ييجوا و نفسي اشوفهم
بجد نفسي اشوف نهى كراكيب و باسم شرف و هيثم محفوظ و سماح جيرونيمو و باسم اجدع واحد في الشارع و غيرهم و غيرهم كتير
انا هاروح اسجل كوممينت عند كل و احد فيهم و اعزمه ع الحفلة
و هاشدد عليه ييجي
على فكرة انا عرفت ان فيه مدونين كتير جايين بس كلهم من بورسعيد و اول مرة احس بوقفتهم جنبي
روزاليا جاية و جوسي و زحل الفلكي و دكتور زيفاجو و ساعة الغروب
و لسة
انا مستني حد يقول لي انا جاي
بس ياخوفي الحفلة دي زي كل حفلة اتكبس و انا مش لاقي حد معايا

على فكرة في بوست تاني جديد تحت




هناك ٢١ تعليقًا:

فوكيره يقول...

يوووبي انا اول حد يرد

متقلقش يا علي

ان شاء لله احنا وغيرنا حنكون هنااك

يا ابنى مال انتاجك للتدوينات زاد كده

مش لاحقه ارد على كله

عندى امتحااااااااااااااانات

رديت في مش حابب احب
و استنى ردى في الباقي

سلام يا انسان

فوكيره يقول...
أزال أحد مشرفي المدونة هذا التعليق.
غير معرف يقول...

اولا اشكرك جدا على المرور وعلى رايك الصريح في المقاله
وماتخافش كلنا معاك يا اخ على وماتخافشسافر وانت مطمن

غير معرف يقول...

ربنا معاك ياعلى
ان شاء الله هاعملك دعايه للحفله بتاعتك عندى..زى ما عملت لسلمى لحفلة فيروز
وهاجى واجيب فى ايدى شوية بلوجرز حلوين ويشرحوا القلب
شد حيلك..وياريت تبقى تعمل اغنيه مخصوصه للتدوين والمدونين
:P

rosealia29 يقول...

حفلتك هاتبقى راائعة يا علي .. زي ما انت عودتنا .. و بعدين إللي جاي واثق من إحساسك .. فا جايلك محتاج جرعة مكثفة من الإحساس الصادق .. فا اطمن إللي عايز الموضوع ده كتير ...

تــسنيـم يقول...

علي إزيك عامل إييه؟؟
أنا بقى كان نفسي أجي جدا من ساعت ما نهى قالتلي إحنا رايحين لعلي بس المشكلة إن حفلتك يوم تلات ومهرجان التنمية البشرية اللي هنروحه يوم حد فالواحد مش عارف إنتو ناويين ترفدوني من الشغل وألا تقهروني ومحضرش حاجة حلوة مهمة زي دي.. :(
عموما هعملك نداء للمدونين علشان ييجو يقفوا جنبك وأقعد أنا هنا أستنى أخباركم لما ترجعو بورسعيد.
تحياتي يا علي

الكلام نوعان :كلام فارغ وكلام مليان كلام فارغ يقول...

هاى على ان شاء الله صوتك يلعلع في الحفله وتسعدنا كلنا

malish_da3wa يقول...

ربنا سوفقك يا باشا و تنضف لنا الساحه الفنيه من البراغيت اللي بتقرص في الودان

باسم شرف يقول...

مبروك يامعلم
واكيد هاحضر الحفل لان ده شرف ليا
لكن مقولتش الساعة كام
بالتوفيق

أجدع واحد في الشارع يقول...

كلنا معاك يا على بجد
وان شاء الله هيكون يوم جامد
بس انا مستنيك تيجى عندنا الاول
ها يا على

rokaaa يقول...

انا كمان اكيد هحضر لان معظم الناس اللي بتقدمهم الساقيه بيكونوا موهبين وانت من مدونتك باين عليك حد جميل
هاجي مع اختى كراكيب نهى

big big girl...in a big big world يقول...

يا رب تكون حفله تمام
ابقى طمنا على الاخبار
:)

الوردة السوداء يقول...

طب والبنات الغلابة اللى مبيعرفوش يسافروا لوحدهم

بص بقى
كلنا ولله هندعيلك
وهتكون احسن حفلة ان شاء الله
وكفاية تحس ان كل واحد مر هنا
قلبه معاك يوم الحفلة
وتانى يوم كلنا هنكلمك
ونسألك عملت ايه
بس بجد
كلنا معاك

nour يقول...

على...
انا من كام شهر كده قلتلك انى هحضر الحفلة بتاعتك مش عارفة انت فاكر و لا لا
لما قلتلك ان الساقيه جنب كليتى و ححضر الحفلة اكيد
و قلتلك عيد ميلادى هيكون بعدها على طول و هعتبر نجاح الحفلة دى و انك تكون جاااامد جدا فيها ان شاء الله هديتى..بس بليز قول الساعه كام و نحجز قبلها و لا ايه؟؟

bagabigo يقول...

ربنا معاك ان شاء الله يا على

bagabigo يقول...

ممكن تقول معاد الحفلة و اذاى نجيب التذكر

علي الالفي يقول...

يااااااااااااااه
ربنا يخليكوووووووو بجد و الله انا فرحان قوي
مش عشان ناس هاتيجي الحفلة و و خلاص
لا دانا مش هاكون لوحدي
هايبقى معايا اخواتي و ناس جايين عشااااني
يوبييييييييييييييي
بس يا رب تنبسطوا بجد
و الموضوع سهل الحفلة هاكون ان شاء الله يوم 30/1 الساعة 8 في قاعة الحكمة في ساقية الصاوي اللي في الزمالك و مفيش حجز
وانتو داخلين اقطعوا التذكرة و ادخلوا على طول
على فكرة في حفلة تانية مش عارف لفرقة تاني في قاعة النهر
و عشان ماتتلخبطوش اسم الفرقة
step by step
اشوووووفكوووووو على 100000000خييييير

علي الالفي يقول...

و على فكرة فيه باص طالع من بورسعيد هايروحوا معرض الكتاب و هاييجوا الحفلة ان شاء الله
اللي عايز يقووووول

zordeak يقول...

شكرا على زيارتك مدونتى

مدونتك جميلة جدا


وشكل صوتك كمان جمييل زيك كده

ربنا معاك بجد فى حفلتك


وان شاء الله هتكون جامدة زيك كده



تحياتى

Al Tagreba يقول...

enta 3arefni...awel wa7ed bagy el 7afla...:) w insha2allah hatb2a 7afla nag7a insh2allah...w tab3an enta 3aref ennak enta men el nas elly betedy mazaq khas lel 7afla..b o3'nyeteen..soret malak..w qatreen....w yarab asma3 "kont fakrek" fakerha ya3am 3ali ..7atta law mesh ma3 el fer2a yareet tekoon megazha 3ashan awz asma3 7ata f ay youm ba3d el 7afla...rabna m3ak ya 3ali...ya fanan

hesterua يقول...

على صديقى

شد حيلك يا معلم مش عارف اعلق خالص

انشاء الله يكره هتبدع يا فنان

ده لنك اغنية من اجمل اغانى اللى غنتها

وهى غنوة محمد محى مالى انهاردة

http://www.4shared.com/file/9667487/2b0ae387/__online.html