الاثنين، أبريل ٠٩، ٢٠٠٧

ما بقيتش اخاف في الدنيا دي غير م الوداع





ما بقيتش اخاف في الدنيا دي غير م الوداع

ده اللي جه في بالي و انا باشوف صور جنازة ضحايا حادثة انقلاب الاوتوبيس
بورسعيد فجاة اتحولت من فوقان و تحضير لحفلات في كل حتة و على كل لون الى شئ واحد
صدمة
ذهول
بكاء
اكتئاااااااااااااااااااااااااااااااااااااااااااااااااااااااااااااااااااب
اصوات عربيات اسعاف رايحة جاية
مطار بورسعيد اول مرة يكون ليه لازمة
و تكون وظيفته استقبال الجثث
شوارع مقفولة مش من زحمة المحتفلين لا عشان مواكب جنائزية
مش عارف اقول ايه
انا اعرفهم
و شفتهم
و منهم اللي حبيته
و منهم اللي كنت بازعل منه
لكن عمرى ما تخيلت ده
كل لحظة يظهر خبر جديد
فلان مات
فلان حالته خطيرة
و رغم ان عددهم ما زادش عن خمسين
لكن مليون قصة و قصة بتظهر
كفاية قصة البنتين التوام اللي ماتت واحدة منهم قدام عينين اختها
و للا اللي نجوا و هم شايفين ناس كانوا معاهم من لحظات بقوا جثث
و اعضاء مبتورة
وللا اهالى مستنين اولادهم يرجعوا يحكوا عن شرم الشيخ اللي بيسمعوا عنها في التليفيزيون كمنطقة محظورة للناس البسطاء
انا شوفت بعيني باب الكللية في عز الليل و هو مليان ناس
اللي بيصرخ
و اللي بيتكلم في التليفون بمنتهى التوتر
و الامهات اللي قاعدين ع الارض
و للا الطلبة اللي ماكانش بايدهم حاجة غير انهم يروحوا يقعدوا على باب الكلية بالليل
انا تعبان قوي
و الله تعبان قوى
يا رب انجدنى
حاسس ان الحادثة دى رامياني في بير حزن غويط قوي
.........
انا لله و انا اليه راجعون

هناك ١٨ تعليقًا:

khaled يقول...

لا حول و لا قوة الا بالله
ربنا يصبر اهاليهم و يرحم الاموات و يشفى المصابين
انا لله و انا اليه راجعون

Ahmed EIssa يقول...

البقاء والدوام لله
ربنا يصبرنا جميعا والله يعلي متعرف انا حالتي عاملة اذاي من ساعة معرفت الموضوع ده
عارف اني كنت رايح الرحلة دي
؟

rosealia29 يقول...

لا حول ولا قوة إلا بالله ..


ربنا يصبر أهاليهم .. و يصبرنا على فراقهم ..

. يقول...

لا اله الا الله متدايقش يا على وقول الحمد لله ربنا بيورينا الحاجات دي علشان نرجعلو متكتئبش وزي ما في حزن ان شاء الله في فرح
وياريت ناخد عظة من الي حصل ومنرجعش نبكي يومين وننسى بعدها
ربنا يصبر الاهالي
انا لله وانا اليه راجعون

ساعه الغروب يقول...

انا لله وانا اليه راجعون

ربنا يصبر اهاليهم

ويصبر بورسعيد كلها

ويجعلها اخر احزان بورسعيد

ربنا يصبرنا جميعا

ويشفى المصابيبن فى الحادث

كلام لوجيك يقول...

انا لله وانا اليه راجعون
خالص عزائى لشعب بورسعيد ولإهالى اخوتنا الطلبة فى كلية التربية النوعية
ويارب اجعلها اخر الاحزان والهم اهالى الضحايا الصبر والسلوان

ليس هناك كلام يقال بعد هذه المأساة
ربنا معاك يا على ومع كل مكلوم ومصدوم

خالص عزائى

كراكيب نـهـى مـحمود يقول...

إن لله وانا اليه راجعون
علي اصبر ربنا افرغ علينا صبرا

gogo we bas يقول...

انا لله وانا اليه راجعون



اللهم هؤلاء عبادك يقبلون عليك و انت الكريم الذى يكرم كل من حل عليه
اللهم قد قدرت لهم ما قدرت من الابتلاء
اللهم جازهم برضاهم و بصبرهم جزاء الصابرين
جزاء من يوفون بغير حساب
اللهم كتبت عليهم و علينا فراق الاحباب بحكمتك
فاكتب لنا الرضا و الصبر بما قضيت برحمتك
و لاتكتب علينا بعد فى دار الجزاء فراقهم


اللهم انهم مقبلون عليك مدبرين من دنيانا
مقبلين على اكرم الاكرمين
مقبلين على اجود الاجودين
اللهم جازهم بالاحسان احسانا
و بما اساءوا عفوا و غفرانا
اللهم احسن نزلهم
وسع مدخلهم
فرج كربتهم
انس وحشتهم
اغسلهم بالماء و الثلج و البرد
اغسلهم بالماء و الثلج و البرد
اجعل ما كتبت عليهم من ابتلاء مكفرا لكل ذنوبهم
اجعل ما كتبت عليهم رفعة لهم فى مكانتهم فى جنة الخلد
اللهم كما ربطت على قلوب اهلهم فصبروا و رضوا بما كتبت عليهم
اربط على قلوبهم و املاءها لهم صبرا و رضا حتى يلقوهم فى دار الجزاء فى الفردوس الاعلى


اميييين يا رب العالمين

hoda omran يقول...

انا لله وانا اليه راجعون
مينفعش يتقال غير كدة

غير معرف يقول...

البقاء لله شد حيلك وربنا يصبرك ويصبرنا ياعلى بورسعيد كلها لسه حزينه وانا نفسى معرفش اللى اتوفوا شخصيا بس حزينه عليهم ومش عارفه اعمل اى حاجه فى حياتى لحد الوقتى خايفه اوى على دكتور حسام وخايفه على صاحبتى اللى اتشوه وشها بس مش هنقدر نعمل حاجه غير الدعاء للاموات بالرحمه والدعاء بالشفاء للى اتصابوا والمجروحين. كل نوعيه سواد دلوقتى وبره نوعيه كمان انا حتى لحد دلوقتى ربنا يعلم بحالى بس. سبحان الله يحط عباده فى شدائد ومحن عشان نفوق من غفلتنا ونلجأ لربنا المهم نعرف ان ده قدر وعظه لينا ياعلى . حياة الانسان كلها فى ثانيه تبقى فى خبر كان يمكن الحادثه دى خليتنى افكر ان مفيش حاجه مستاهله الدنيا كلها كلها بتروح فى اقل من لحظه ومبيقاش فى الاخر غير العمل اتمنى نفضل نحب بعض كلنا فى الدنيا لان هيجى يوم ولحظه اخيره. لحظه مش متوقعه مش هنشوف بعض تانى ومش هيبقى موجود ادامك غير عملك ونفسك مش هيبقى موجود غير وحشة القبر والحساب يارب يغفر لينا ويغفر لضحايا الحادثه ويرحمهم ادعيلهم بس بالرحمه دى اهم حاجه ده اللى هينفعهم دلوقتى . ربنا يثبتهم عند الحساب ويصبر اهاليهم ويشفى المصابين وحبايبنا امين يااااااااااارب وخلى بالك انت من نفسك

micheal يقول...

البقاء لله
ربنا يصبرهم

الي ان تشرق الشمس يقول...

البقاء لله يا اخي وشد حيلك وربنا معاك ومع اهلهم وربنا يرحمهم

K & T & B يقول...

لا حول و لا قوة الا بالله
ربنا يصبر اهاليهم و يرحم الاموات و يشفى المصابين
انا لله و انا اليه راجعون

غير معرف يقول...

انا لله وانا اليه راجعون
ربنا يصبرنا جميعا على الحادثه الأليمه دى
ويصبر اهل كل واحد من الضحايا دول
ربى ارحمهم واجعل مثواهم الجنه
آآآآآآمين
دا حال الدنيا ياعلى وكلنا لها
شد حيلك

maha يقول...

سلام عليك يا علي
ربنا يرحمهم جميعا يا رب و يثبتهم عند السؤال و يصبر اهاليهم
لااله الا الله
"ان لله و الا اليه راجعون "
الله يرحمهم يا رب
و يستر علي المسلمين و يحسن خاتمتهم
اللهم امين
سلام
مها

دينا فهمي يقول...

لا حول ولا قوة إلا بالله
ربنا يصبر أهلهم ويرحمهم ويدخلهم فسيح جناته

hamasat يقول...

انا لله وانا اليه راجعون
لا نملك سوي العاء للموتي بالمغفرة والرحمه وللمصابين بالمعافاة والصبر
اللهم افرغ علي الاهالي كلها الصبر والجلد.

خمسة فضفضة يقول...

السلام عليكم ورحمة الله وبركاته

انا لله وانا اليه راجعون
ربنا يصبر اهلهم