الجمعة، مايو ١١، ٢٠٠٧

اتنين...تلات...اربع....خميس


ملحوظة البوست ده ممكن يكون طويل حبتين عشان كدة ماتزهقوش
..................
..............
الاثنين
سافرت انا ووالدى و والدتى هم كانوا في مشوار عائلي
و سيبتهم انا و روحت الجيزة عشان اشوف شقة كنت وصيت احد اقاربنا عليها
و هنا يبدا الشللوت الاول في المشوار
روحنا عشان نقابل صاحب البيت
و كان في استقبالنا الست والدته في حوش العمارة
فاكرين مارى منيت في المسرحية لما كانت بتنط من الشباك و تقول"انت جايية اشتغلي ايه"المهم لاقيت الولية مسكت قريبي اللي كان معايا و افترسته بوس لدرجة ان الواد وشه كان مزرق و اقسم انه هاينقع وشه في بوطاس عشان يطهره
المهم و بعد السلامات و اللوك لوك اللي ميجيبش همه
-احنا جايين يا حاجة عشان الشقة اللي في التالت
واحنا كلمنا الحاج سيف امبارح عليها و قال انها فاضية
لاقيت وش الولية فجاة قلب بقت شبه عربيات سابق و لاحق
ماكانش يتعز يا نضري
الشقة متسكنة من مدة
طبعا انا وقفت و بصيتلها كدة
راحت باصة ناحيتي في نظرة متحفزة
مالك انت قومت لية
لا يا حاجة مافيش
و مشيت انا و الواد قعدنا في قهوة جنبها و فجاة لاقينا الحاج سيف رايح يصلي العصر
سلامو عليكو يا حاج
و بعد فاصل من الكلام اللي مايجيبش همه بردو
ماكانش يتعز يا نضري
راح الواد قايل له
هو مش انا كلمتك امبارح و انت قولتلى انها فضيت؟
و بمنتهى البرود
ماحصلش
و مشينا و سيبنا الحاج و تبددت امالى في السكن
عموما هى كانت شقة بيئة و انا مش عايزها من الاول
ده وانا باسرح على نفسي قال يعني باواسيها

......................................
.....................................
....................................
الثلاثاء
روحت ادارة التعيينات عشان اسلم الفيش و التشيبه بتاعى
و هناك لاقيت المفاجأة في انتظارى
يا باشمهندش قرار تعيينك اتمضى خلاص
و اتفضل استلم شغلك في أي وقت
طبعا وشي قلب احمر و ازرق و كل الالوان
طب هانام فين
طب هاعمل ايه
قولت للست انا هاجى اول الاسبوع استلم
و خرجت كلمت والدى هنا في بورسعيد و لاقيته بيقوللى روح استلم بدري احسن بدل ما تتعطل اكتر
طب يا حاج
يا بابا
يا حاج
.............
هو الراجل الح و اصر
دخلت للست مش عارف اوريها وشي
طيب انا عايز جواب تعييني
طبعا و انا شكلى اساسا ما يتشافش من التفكير
لاقيت الست بتقوللى مالك يا باشمهندس
قولتلها اصلي عندى مشكلة في السكن
و الشقة الوحيدة اللي ظهرت لي في اااااااااااااااااااخر الهرم جنب المريوطية
لاقيت الست بتبصلي و بتضحك
طب ما انت كدة تبقى قريب من الشغل
انا-شغل مين يا حاجّة
هو مش الشغل في شارع مراد دانا على ما اوصل من الشقة للشغل يبقى فات معاده ساعة و للا اتنين
قالتلى مراد مين يا هندزة
انت هاتشتغل في محطة نقل الكهربا اللي في طريق مصر اسكندرية الصحراوى
و هنا كان الشلوت الاكبر و الاقوى في تاريخي
الدنيا لفت بيا
طريق مين
و ده نروحه ازاى
و لاقيتني هايغمى عليا
و اخدت الجواب و انا باكلم نفسي لدرجة ان كان معايا صديق بيساعدنى عشان انا ما اتوهش صعبت عليه و اشترالي عصير و شيكولاتة عشان يصالحنى
و انا مافيش على لسانى غير كلمة واحدة
ايه اللي انا عملته في نفسي
ايه اللي انا عملته في نفسي
ايه اللي انا عملته في نفسي
و اقيمت سرادقات النواح على طول الخط الواصل بين القاهرة بورسعيد
و اتصلت بكل من اعرفهم لكي اسالهم على الشركة ان فيه حد يفيدني بكلمة
مافيش
..............ز
...............

الاربعاء
قام احد اصدقاء والدي جزاهما الله خيرا بتوصيلي و الحمد لله الراجل اتصل بيا من الصبح عشان نتقابل بدري و نلحق
نزلت الساعة سبعة و نص
و بعد مشوار جميل جدا من التوهان في المحور و لقينا الحاجة و عشرين كيلو كذ مرة طلعلنا عامل من مزرعة و قاللنا تعالو اوصلكم
الحمد لله و صلنا الساعة عشرة و نص
و دخلت عشان اسلم ورقى
الحمد لله اتفاجئت بانى هاشتغل على حدود القاهرة مع الاسكندرية الشقيقة
كل ده كوم
و استقبال واحدة من موظفات شؤون العاملين ليا كوم تانى
اسمك ايه يا عسل
عسل مين يا ولية .....طبعا في سري
انت مين من اهلك بقى بيشتغل في الكهربا
محدش
طب و جيت ازاى
مفيش....... سمعت عن المسابقة و امتحنت و نجحت
طب و اشمعنى احنا ما سمعناش عنها
ماحنا بردو عندنا عيال عايزين نشغلهم
و فجاة دخلت في فاصل من الشتية المتغطية و الدعاء على اللي عملوا المسابقة بدري بدري
و خرجنا من عندها استقبلنا المدير العام
ملحوظة انا باتكلم بصيغة الجماعة لانى انا و المهندسة اللي معايا اللي اتعيننا مع بعض
و فجاة لاقت الضلمة بتفتح واحدة واحدة
دخلنا على القسم بتاعنا و رحبوا بينا المهندسين و الفنيين و بدانا في التدريب خفيف نوعا ما
و لاقيت المهندس رئيس القسم بيرحب بينا جامد
و لما عرفوا ان انا مغترب كل واحد فيهم عايز يساعدني
و كلهم مع بعض بيعرفونى باوتوبيس الشركة و السواق عشان ييجي ياخدني من ناحية البيت
الحمد لله
بدات نفسيتي ترتاح نوعا ما و كلمت اهلى و بدات اطمنهم
و انتهى اول يوم ليا على خير و رجعت البيت
و لانى عودت نفسي ان اليوم في القاهرة يساى اربع ايام بتوقيت بورسعيد و لازم يحصل فيه احداث كتير
كنت عرفت انا بطريق الصدفة ان الندوة بتاعة مناقشة رواية نهى محمود"الحكي فوق مكعبات الرخام"هايكون في وسط البلد الساعة سبعة
روحت يا اخواننا ضربت الدش التمام و ظبطت شكلى حبتين و نزلت
و هناك اكتشفت انى لم اتخلص من عادتى السيئة بالمبالغة في الحذر بالنسبة للمواعيد مما جعلني انتظر تحت باب دار ميريت ساعة و ربع كاملين حتى وصلت نهى
و كما توقعتها فهي تتكلم كما تكتب و تكتب كما تحس و تحس بما نريد ان نحس به و لكن قد لا نقدر ان نعبر عنه جيدا
نهى دخلت سلمت على كل الناس و منهم انا
قولتلها مبروك يا نهى
الله يبارك في حضرتك
انا على الالفي يا نهى
يا سلااااااااااااااااااااااااااااااااااااااااااااااام
انت بتتكلم جد؟
انت شكلك متغير جدا غير اللي في المدونة
و من هنا احذر كل الاخوة و الاخوات
اوعوا تنخدعوا بشكلي اللي في المدونة
دول شوية الزواق بتوع التصوير و الذي منه
و بدات الندوة
الندوة كانت بجد حلوة قوى و الناس اللي فيها كانوا بجد مثقفين مش مدعيين
لكن لا اخفي عليكم انى ما كنتش مرتاح بوجودى و ذلك لانى ما بحبش احمد فؤاد نجم اللي بدا الليلة بكام لفظ قذر و خلاص
و لاني كنت مرتبط بموعد اخر في وسط البلد
ما قدرتش انى اكمل الندوة
لكن بجد انا كنت فرحان جدا باختى نهى و اخويا طارق و حسيت انها في فرحها
ربنا يديم عليكي الفرح يا نهى

الخميس
نزلت كالعادة بدرى قوي و ده خلانى انتظر اوتوبيس الشركة لمدة3/4ساعة
بس روحت و بدات يوم جديد
ماكانش يوم مزدحم بالعمل و هم كانوا مراعيين اننا لسة جداد
المهم استاذنت من المدير عشان الحق اسافر اوضب حاجاتى بس يا اخواننا اخدت مشوار هرس عجب لحد ما وصلت رمسيس و بدا مشواري في السوبر جيت حتى وصلت الي بورسعيد سالما
و سافرت بحال
و رجعت بحال
صدق رب العزة في قوله عز و جل"ليس لها من دون الله كاشفة"صدق الله العظيم
و انتظروا قريبا حكايات الباشمهندس على

هناك ١٩ تعليقًا:

rosealia29 يقول...

بداية تطمن أي قلب كان قلقان عليك ..


ربنا يوفقك ..

كراكيب نـهـى مـحمود يقول...

على شكرا لك على كل حاجة
نورتني امبارح معلش كنت متلخبطة معرفتش اسلم عليك براحتى
المرة دي متتحسبش شكرا على كلامك الجميله مودتي

غير معرف يقول...

الحمد لله على كل حال
مهما حصل بجد دا يعتبر كويس قوى
الحمد لله انها جت على قد كده
بس انا زعلانه بجد لانى ماعرفتش موضوع الندوه دى الا منك دلوقتى
ليه ماحدش قالى يانااااااس
ياعلى انت مكلمنى يوم التلات على طول..ماقلتليش ليييييييييه؟؟؟؟
عموما حصل خير والجايات اكتر م الرايحات
كده بقى هاوقف حملات البحث عن شقه ليك متهيألى
ولا ايه يا مان؟

gogo we bas يقول...

الحمد لله
ضاقت ولما استحكمت حلقاتها .. فرجت ياعم

شد حيلك فى الشغل بقى.. قدامك 3 شهور بالكتير والاقيك كاتب انك بقيت مدير الشركة كلها(وبالمرة تنقلها وسط البلد)واهو يبقى اول تغيير على ايدك

ربنا يعينك ويقويك

Amr Ahmed يقول...

خير خير

مفيش حاجة في البلد دي بالساهل يابرنس

وكفاية اننا بنفرح بخطواتك

انا حاسس انها معركة المدونين كلهم ياراجل

بس اجمد كده

علشان سمعة المدونين

ربنا معاك ويوفقك

ابقي ادينا بقيت التفاصيل بقي

علي الالفي يقول...

اخوانى و اخواتى
روزاليا

ما اتحرمش منك و من سؤالك عليا و دعواتك انت و طنط وصلوا و جابوا كل النتايج

ـــــــــــــــــــــــــــــ
نهى

انا و اللهفعلا كنت فرحان قوي بيكي
و فرحان اكتر بكلامك و استمتعت بالجزء القصير اللي انا حضرته جدا

ــــــــــــــــــــــــــــــ

وينكي

انا عرفت اساسا متاخر جدا و ما كنتش عارف انت هاتيجي و للا لا بس حضري الحفلة

ـــــــــــــــــــــــــــــــ

جوجو و بس

هى وسعت حبتين زيادة
بس يسمع منك ربنا

ــــــــــــــــــــــ

عمرو احمد


يا خبر ابيض
معركة المدونين مرة واحدة
وحياة والديك بلاش الكلام اللي يخوف ده
ما اتحرمش من متابعتك و سؤالك يا برنس البرنسات
ــ

علي الالفي يقول...

الاخوة المدونين و المدونات
نظرا لانى هاكون بعيد شوية عن النت
او الى ان اعرف سيبر كويس و اضرب صحوبية مع اصحابه
قد اتاخر قليلا عن الرد
بس بالله عليكم ما تقطعوش بالمدونة
مش هاتبقوا انتو و انا مرة واحدة

Reem يقول...

ربنا معاك ياعلى ويوفقك

تــسنيـم يقول...

المفروض تسمي البوست ده وما يليه.. مغامرات الباشمهندس علي في المحروسة..


شد حيلك يا علي وربنا معاك

فوكيره يقول...

علىىىىىىىىىى

ها هى العاصمه

بحلوها ومرها ... بخبرتها وعذبها

تتكشف بين يديك

دوووووووووووس واتعلم و عيش وركز في الى سافرت علشانه
ومخليش النيل ينسيك
بحر بورسعيد

مع انك نسيت تقول ادعولى

ربنا معااااااااك

reri يقول...

أول مره أزورك يا علي ... ألاقيك مستلم شغل جديد ومتظبط ... ياللا خير .. ربنا يوفقك وعايزين نعرف يومياتك في القاهره

سلامااااااااااااااات

Esmeralda يقول...

ربنا يزيح عنك بجد الوش ده و يكرمك بحاجه بتحبها

Reemo يقول...

اى حاجه فى اولها بتبقى صعبه اكيد
وواحده واحده بالتعود هتلاقىالامور بقت تمام ويمكن انت اللى تستقبل المهندسين الجداد فى المستقبل
وهتحس بنفس احساسهم وهتعرف ممكن يكونو متلخبطين ازاى فى الاول
بس انا شيافه ان الامور بدات تستقر معاك
وبدات ترتب امورك
ده شئ كويس اوى
ميرسى بجد على الكلام الجميل اللى سيبته عندى فى المدونه
انت انسان جميل وتستاهل كل خير
واكيد كلامى فى البوست اللى فات لاننا فى اخوات فى الانسانيه قبل كل شئ
تحياتى

غير معرف يقول...

ربنا يوفقك يا علي , بما انك اشتغلت في شركة النقل (ده اللي فهمته من البوست) بتاعة الكهرباء , يبقى ان شاء الله سهل تحول فيها , انت بس خد خبرة وحول على بورسعيد على طول , اما القاهرة دي فانا بكرهها اوي بزحمتها ومشاويرها اللي بتاخد وقت طويل اوي مش زي الاسماعيلية ولا بورسعيد ..
نصيحة يعني من واحد بيفهم شوية في الحاجات دي , حاول تنقل شركة انتاج الكهرباء او شركة التوزيع لأن فيهم خبرات افضل لمهندسين الكهرباء ومجال أوسع للعمل ..

Rosa يقول...

مبرووك يا علي معلش بعيد بعيد بس تشتغل وخلاص
:)
الف مبروك
ومتنساش تسلملنا على امينه وانت في بورسعيد دا اذا ماكنتش لسه رجعت
:)

إبـراهيم ... يقول...

علي علوة ، أقول لك ... على طريقتهم ... أهـلاً بيك ف بلدك التاني ..مـصـر .. :) القاهـرة يعني !!!

أنا كنت ف ندوة نهى ، بس للأسف جيت متأخر !! ........ الظاهر ملانش نصيب نتقاااابل ياااا باشا !!!

أعذرني ، بس أكيييد هيحصل ، وإن شاااء الله قريب


في انتظـارك يا جمييييييل

كلام لوجيك يقول...

ربنا يكرمك ويوفقك
احنا معاك دائما وبندعيلك يا فنان

طمنا باستمرار

فوكيره يقول...

فينك يا على من كام يوم

دون وعرفنا اخبارك

بسمه عبدالباسط يقول...

شد حيلك يا باشمهندس
وكده يعتبر كويس وبداية كويسة
خلى بالك من شغلك