الجمعة، مايو ١٨، ٢٠٠٧

وحشنى النت

خبر عاجل
يحتفل كل سكان كوكب الارض و الكواكب المجاورة بعد غد الاحد
20/5
بذكرى عزيزة على قلب كل انسان
الا و هى ذكرى وجودى على هذا الكوكب
بالعربي يعني عيد ميلادي بعد بكرة
و مش عايز ادخل بيكم في متاهات ان ده اول عيد ميلاد ليا و انا بعيد عن اهلى و اصحابي و اخواتى و بورسعيد و الكلام ده
انا مش طالب هدايا
كل اللي عايزه ان كل واحد فيكم يبعتلي هدية بانه يدعيلي ان ربنا يساعدنى و يصلح حالى
و اتفضلوا ادخلو على اول بوست من القاهرة
ـــــــــــــــــــــــــــــــــــــــــــــــــــــــــــــــــــــــــــــ
وحشني النت
اولا بجد شكرا جدا جد لكل واحد كتب لي كلمتين دعم و دعالي في الايام للي فاتت
و عايز اقول
ان الحمد لله ربنا خلى دعاكم يجي بفايدة و الحمد لله
انا مبسوط جدا في شغلي و مع الناس اللي نا معاهم
و كان فيه مفاجاة في انتظارى
انا دلوقت ساكن في مستعمرة سكنية جنب الشغل
الحياة هنا جميلة و هادية
و الناس هنا بسيطة جدا جدا
و كل واحد زارع قدام بيته فاكهة
طول ما انت ماشي تلاقي حد يعزم عليك بكوباية شاي
و للا يرحب بيك و يوقفك يتعرف
مكان فعلا جديد و غريب الحميمية اللي فيه دي
كل الناس ساكنين فى منطقة واحدة و بيروحوا يشتغلوا في مكان واحد و يرجعوا تانى علي بيوتهم
و عيالهم مع بعض من بتدائي لثانوى
و سهل جدا انك تلاقي كل الناس هنا اصحاب
طبعا باتكلم على اللي من سنى لانهم بيعتبروا نفسهم ولاد المكان من صغرهم
و كل المكان بينام من الساعة عشرة
العيب الوحيد هو بعد المكان عن العمار و عن القاهرة
حوالي تلاتين كيلو بس
و ده بيضطرنى كل ما احب انزل اركب اوتوبيس المستعمرة بتاع الساعة خمسة
هو اساسا بيطلع6ونص
تصدقوا انا كنت مدي ميعاد لواحد صاحبي السعاعة6.5في الدقى و صلتله8إلا تلت عشان الباص عطل بينا مرتين
بس مش مشكلة
على فكرة انا عندى تفاصيل كتيرة عايز اكتبها بس لانى قعد في سيبر و الوقت مش مكفيني عشان راجع كمان شوية المستعمرة هابقى حكيلكوا عليها قريب
لن بردو ما حبيتش اجي بايدي فاضية
طبعا كلكم عارفين هيثم محفوظ صاحب مدونة صبا
هيثم عامل فرقة جميلة اسمها صبا و عنده حفلة في ساقية الصاوي ان شاء الله يوم الاحد
3/6/2007
و الاحلى انه دعانى لانى اغنى معاه في الفرقة و خلاص هانبدا بروفات قريب
ادعولنا و هانستناكو في الحفلة ان شاء لله
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

هناك ٢٥ تعليقًا:

Ahmed EIssa يقول...

ربنا يعينك ويوفقك ياعلوة
وان شاء الله المرة دي انا جاي الحفلة
وحشتني ياصديقي اللدود

hamasat يقول...

علي كل سنة وانت طيب وعقبال مية سنه كمان فين ياراجل التورت والحلويات والذي منه صحيح ناويين علي رجيم بس عشان خاطرك هانكسره المرة دي
ان شاء الله تتعدل وتجيبلك عربية حلوة ولا بهدلة المواصلات ربنا يفرجها علينا كلنا يارب

Reemo يقول...

كل سنه وانت طيب يا على
وعقبال يا رب مليون سنه
العمر كله ليك يا رب
بجد سعيده انك استقريت وبدأت الأمور تتظبط معاك
ربنا هيوفقك ويكرمك بإذن الله
حفله سعيده عليك ان شاء الله
تحياتى

Reem يقول...

كل سنة وانت طيب ياعلى

ربنا معاك ويوفقك
ربنا معاااااااااااااااااااك

ShAb 3AdY يقول...

كل سنة و انت طيب يا على و عقبال مليون سنة

يا ريت بالمناسبة الحلوة دى تشوف مدونتى الجديدة

http://www.picsawy.blogspot.com

Amr Ahmed يقول...

كل سنة وانت طيب يا فنان

وربنا معاك

غير معرف يقول...

علي أنا مبسوطةو جدا بالاخبار اللي باقراها في البوست بتاعك
و ربنا يوفقك و يسعد أيامك كلها
و يرزقك كل خير
شيماء علي

غير معرف يقول...

آه صح
نسيت أقورك .. كل سنة و أنت بألف خير يا علي و ان شاء الله السنة الجاية تكون كل حاجة بقت أحلى
شيماء علي

gogo we bas يقول...

happy birth day to you
happy birth day to you
سنة حلوة ياجميل
يلا حالا بالا بالا حى ابو الفساط
هيكون عيد ميلاده بكره اسعد الاعياد
فليحيا ابو الفساط
(صوتى وحش معلش استحملنى..واهو عيد ميلاد صغنون كده على قد المدونة)

عقبال 800 سنة ونشوفك فى بيت العدل بقى زهقتنا


ربنا يكرمك فى الشغل ويثبتك يارب

rosealia29 يقول...

ربنا يكرمك يارب يا علي .. الحمد لله إنك مرتاح نفسياً .. و بدأت تحط رجلك على أول الطريق .. ربنا يوفقك يارب يا علي ..

و كل سنة و إنت طيب يا أجمل صوت في الدنيا ..



دمت ..

هيثم محفوظ يقول...

انا هيثم محفووووووووووووووووووظ يا جماعة.
على فكرة واضح ان انا لما سبت على راح سيبر كتب البوست د....على فكرة برده اديتو السى دى بتاع الشغل اللى هيحفظوا وربنا يسهل.
بس تعرفوا دى اول مرة بقابل فيها على وبجد اللى مقابلهوش فاتو كتيلر جدا على المستوى الانسانى .
ادعولنا وتعالوا الحفلة.
وكل سنة وانت طيب يا علوة

فوكيره يقول...

كل سنه وانت طييييييييييييييييب

ياااااااا علىىىىىىىىىىىىىىىىى

وعقبال مليون سنه

انا داخله اقولك الساعه 12 اهوو

ربنا معاك يعينك ويوفقك يااااا رب

hesterua يقول...

ربنا معاك يا لووووووووول

كل سنة وانت طيب يا فنان


الناس هنا احتفلوا بعيد ميلادك والجو ناقصه صوتك بس


جايلك الحفلة انشاء الله

mahmoud يقول...

كل سنه و انت طيب و نشيط
كل سنه و انت فنان و مغرد
انشالله اكون فى الحفله عشان اسمعك لايف
و ربنا يوفقك و يقويك

Ahmed EIssa يقول...

نسيت اقولك كل سنةوانت طيب ياعليوة

كلام لوجيك يقول...

كل لحظة وانت طيب وكل ثانية وانت سعيد وبتحقق نجاحات

بجد بجد انبسط جدا باخبارك المبهجة دي
ربنا يوفقك وييسرلك كل امورك ويوفقك فى كل مساعيك

بندعيلك دايما

وحفله ناجحة انشاء الله مقدما
دمت فى حفظ الله

حقى اهرتل يقول...

انا كنت من غير الصحاب صاحب قلق
وكنت عايش ف الحياه ع المفترق
مين اللى قال انك هتقدر تنتفض
من غير ما حد يشد ايدك م الغرق

sara يقول...

يارب يوفقك يالووءه انا مبسوطه عشانك مبسوط وكان نفسى اجى اتفرج عليك فى حفله بس ربنا يسهل

غير معرف يقول...

عليوه
كل سنه وانت طيب ويارب تفضل دايما سعيد
انا فاكره تاريخ ميلادك والله وعامله ريمايندر على موبايلى عشان اكون اول واحده تقولك كل سنه وانت طيب يوميها بس الرصيد عملها فيا
كويس اننا اتطمنا عليك
ربنا استجاب دعواتنا بس عشان انت راجل طيب
ادعيلى انا بقى اقدر احضر الحفله دى.. حد يعمل حفله فى عز الامتحانات يابنى؟؟؟؟؟؟؟
ادعيلى انت بقى شويه
سلام

نفسنا يقول...

تم أفتتاح العدد الأول من مجلة نفسنا
نتمنى منكم زيارتنا

Unknown يقول...

كل سنة وانت طيب

وربنا معاك

يوفقك وينجحك ويجعل لك في كل خطوة سلامة وحلم بيتحقق


ويارب تكون حفلة حلوة

خصوصا انى بقالي كتير محضرتش حفلات ومعرفش هيثم بس هاجي على ضمانتك

heba labeb يقول...

كل سنة وانت طيب يا على
مع انها متاخرة بس الجهاز خربان دايما والله
وعقبال مليون سنة
والحمدلله انك خلاص استقريت والدنيا اتظبطتت معاك
ويارب تحقق كل الى بتتمناة
بجد مبسوطة عشانك
وربنا يوفقك

micheal يقول...

كل سنه و أنت طيب يا علي و عقبال المئويه
تحياتي لك

Nouran يقول...

طيب ينفع بعد 8ايام من عيدميلادك اقول كل سنة وانت طيب وبعد الامتحانات انزلها فالنشرة :)د
كل سنة وانت طيب ومبروك ع الشغل يا هندزة وربنا معاك ومعانا يا رب

mohamed sabry يقول...

كل سنه وانت طيب يا لول
علي فكره اغنيه وسط البلد جااااااااااااااااااااااااااااااااااااااااااامده اوي
انا كنت مخطط لما اخلص اسافر بره مصر
بجد انا اغنيتك حركتني بجد
جزاك الله خيرا