الأحد، نوفمبر ٢٦، ٢٠٠٦

الهرس الاول

اتكلم معاكم شوية عن الرحلة العجيبة دي
طبعا انتم خلاص عارفين ان انا مطرب في فرقة بنغني في ساقية الصاوي و اماكن تانية
يعني خلاص ما بقاش غريب ان انا اكون في القاهرة و اتحرك فيها لكن المرة دي حسيت ان في مشكلة بيني و بينها لدرجة انها كانت بتتفنن في انها تعجنّي و تتوهني
القاهرة يا اخواننا بلد صعب انها تعلمك أي حاجة بس لازم انها تعلم فيك و تعلم عليك احيانا
بلد كل يوم تديك غصب عنك درس او ممكن تقول هرس و كان كل يوم لي نصيب في هرسة جديدة يعني مثلا:
اصرت نقابة المهندسين المفتكسة انها تجيب كل واحد اتخرج من هندسة و طالع فيها عينه و ميتينه هو و اللي خلفوه و قرر في لحظة افتكاس من عنه انه يطلع الكارنيه
قررت النقابة اللوزعية انها تشحططنا كلنا و تجيبنا القاهرة و منعوا ان اي حد خريج جديد يطلع الكارنيه من النقابة الفرعية اللي فيها بلده لا و كمان تسافر مرتين لو مش اكتر
مرة عشان تدفع الرسوم و تسجل بياناتك و مرة عشان تستلم الكارنيه في احتفالية سيريالية عجيبة لن انسى فيها ان الراجل اللي كان ماسك الميكروفون كان بيقدم حد تاني و قال خلال دقيقتين 32 مرة كلمة يشرفني و يشرفكم و يشرفنا و نتشرف و كل تصريفات الشرف عشان واحد تاني هايقوم يقول خطبة مليانة تهيؤات عن اللحظة التاريخية في عمر كل واحد فينا و اللي هي لحظة استلام الكارنيه العجيب السحري لا و ايه بيقولوا ان دلوقت بدات اول لحظة في حياتكم العملية و رقصني يا جدع على واحدة و تلات اربع ما احنا خلاص معانا كارنيه فشر مصباح علاء الدين
و فجاة طلع من سماعات الدي جي المرحوم عبد الحليم حافظ باغنيته المملة"وحياة قلبي و افراحه"و سبحان الله عمري ما حسيت ان الغنوة دي بتعبر عن أي حد ناجح في أي حاجة بس اهي حاجة لاقيناها موجودة و مفروضة عليناو خلاص
و اللي زاد اني الاقي ناس مصدقين الهبل ده لاء و ايه
العيال جايين لابسين بدل "جمع بدلة" و جايبين امهاتهم و الستات بيزغرطوا و بيصوروا فيديو
كل ده ليه؟ عشان رايحين يستلموا كارنيه
اممال لو اشتغلوا بجد كان حصل ايه
لا و ايه افتكسوا لهم قسم يخلونا نحلفه مالوش علاقة بالهندسة و لا باي حاجة في الدنيا
مجرد كلام يبدا بكلمة"اقسم"و ينتهي ب"و الله على ما اقول شهيد"و جوة أي حشو مالوش علاقة باي حاجة
و هنا مايخلصش اليوم المفتوح كان كمان لي نصيب في حاجات تانية
طب و دا دخل القاهرة بيه ايه؟
الناس جرى لها ايه و المواصلات جرالها ايه بجد؟
ايه الهبل المروري و التوحش اللي بقى مالي الدنيا و ايه اللي بيعمله سواقين الميكروباصات في الناس ده؟
تصدقوا ان سواق كان بيعلم الزباين الادب لمجرد ان واحد منهم اتجرأ و نط جو العربية و هي فاضية قبل ما جناب قبطان الميكروباص يسمح له؟
و طبعا لاني ماعرفش عن المكان اللي انا رايحه اكتر من عنوان في ورقة ف طبعا مصر فيها72مليون مفتي يوصفوا لك السكة اللي تتوهك اساسا و تروح فيها ماترجعش
و بعد كدة كان لازم اروح مدينة نصر عشان اشوف فيها ابويا العيان و قاعد في المستشفى
المهم اتظبطت يومها يا برنسات و بقيت مش شايف قدامي اساساو تهت في اليوم ده ييجي مرتين مرة في الزمالك رايح و مرة جاي
و ماخلصتش الحكاية على كدة
بس انا شايف ان انا طولت عليكم
هانقول كمان بعدين
معلهش استحملوني

هناك ١١ تعليقًا:

غير معرف يقول...

معلش يا علي
ما هما مسموهاش قاهرة من فراغ
و بعدين احساسك دا طبيعي لانك داخليا بتقارن بينها و بين بورسعيد الجميلة
و عموما مبروك عليك الكارنيه
و عقبال الكهربا :D

زحل الفلكي يقول...

ياباشا ده عادي ان يحصل حاجات زي دي في كايرو

بس تعرف انا مثلا حبيت افتكس افتكاسة من دي
مكنتش اعرف اي حاجه في اي حاجه في مصر
وراح اتوبيس الجامعة رمانا في معرض الكتاب
وقررت اني اسيب الاتوبيس واقابلهم في الحسين
وفجأه قررت اني اروح الحسين مشي انا وواحد صاحبي
من معرض الكتاب للحسين مشي من غير منعرف السكة
وادينا اسئلة بقا
اللي يقولك ياااااااااه لحد الحسيييين
انت منييين
اقولهخ من بورسعيد
يقولي عارف لما تمشي من العرب للمناخ
طبعاً مرضيتش اكسفه واقوله ان العرب والمناخ دول مش دولتين يعني مينفعش يقول كده بس رحت مديله حتة اندهاش وقولتله ياااااااااه
قالي اركب اتوبيس
بس اتوبيس مين يا معلم
المهم عرفت منه رقم الاتوبيس وبدأت استناه وامشى وراه
وييجي اللي بعده وامشي وراه
لحد ملقينا نفسنا ماشيين في شارع طويل
شوفنا القلعة في قمته
ولما نزلنا اختفت القلعة
ولقينا نفسنا في وسط مقابر
وبرضه فضلنا ماشيين
وبعدين شارع طويل تاني برضه فضلنا ماشيين
وبعدين لقينا جامع كده اسمه الجعفري
عدينا شوية ولقيت الحسييييين

يووووه انا عملت تدوينة في الرد اساساً
معلش يا علوة طولت عليك
بس عادي يا باشا اسأل بس انت في مصر واللي يسأل اييييه

يروح من المناخ للعرب مشي طبعاً

هيثم محفوظ يقول...

حمدلله بالسلامه
المهم سلامت الوالد
يا عم على ده عادى أنا و ابو الفتوح بنتحرك فى القاهره باسلوب معين و خطسير معين أكتر و ماعندناش إسنعداد نغير الاسلوب ده الا فى الشديد القوى يعنى
و ربنا يخلى لنا مترو الانفاق
أما بالنسبه للشباب اللى لابسين بدل جمع بدله فدول زاميلك الحقن يعنى فيه منهم سرنجات فاستحملهم معلش قولى بقى
أخبار حفلة سلمى إيه و غنوتك عملت إيه؟
سلاااااااااام يا وحش

علي الالفي يقول...

نمنماية
تصدقي ان دي اول مرة اركز مع الاسم شكرا على مرورك
سوبر نوفا
للاسف ان كل الناس مايعرفوش ان بورسعيد تتلف كلها بالعربية في نص ساعة يعني اصغر من مشوار في المعادي
هيثم الغالي
للاسف المترو ما بيروحش م.نصر كان سهل حاجات كتير عليّا
و حفلة سلمى كانت جامدة جدا جدا جدا
بس للاسف ما غنيتش الغنوة و قررت انها تغني كل الحفلة فيوز بس
خيرها في غيرها

كراكيب نـهـى مـحمود يقول...

الف سلامه لوالدك
وموتني من الضحك وانتي بتحكي عن القاهرة حبيبتي هأهأ ها تعيش وتاخد غيرها
ومبروك الكارنيه يا بشمهندس
تحياتي

Unknown يقول...

شوف جيت يومين طلعت عينك
اومال اهلها
بقة نعمل ايه ؟؟؟
القاهرة قهرتنا

rosealia29 يقول...

هو فعلاً رأي نمنماية : ما سموهااااش قاهرة من فراااغ .. و فعلاً في القاهرة إنت بتاخد هرس مش درس ..


ربنا يكون بجد في عون الناس إللي عايشة هناك .. لأنه بجد لو كان اتعودوا على الحياة بالمنظر ده .. فا ده تعود مأساوي .. عايز علاج .. لأن الدنيا كلها مش القاهرة ..


دمت ..

غير معرف يقول...

صباح الفل يا ابو علوة

ايه الشغل الجامد ده

مدونة واغاني ومهندس كمان

لا لا

كده تتحسد

عموما مبروك الكارنية

على ايامنا مكنش فيه كرنيه اساسا

كنت تكتب اسمك على اي كرتوة وتدبس صورتك

وتدخل يختم لك على يدك اليمين

وبكده تبقى مهندس

مساء الهرس يا هندسة

وسلم لي على المترو

فوكيره يقول...

الف حمد لله على سلامه الوالد

ومبرووك لكارنيه ... على فكره اعتقد انى ح اكون فرحانه يوم الكارنيه

شد حيلك يا علي وطور نفسك لو حابب تشتغل في الهندسه

اما عن القاهره واه من القاهره
كلما ذهبت اليها تعجبت من ملامح الناس وقت الظهر الكل مركز ووشوش شقيانه ..قرفانه.. وحرانه .. وبعضها طيب واصيل

وربنا يستر عليها من الي جاي

hesterua يقول...

حمد لله ع السلامة يا علوة
ويا رب باباك يكون احسن

القاهرة قاهرة يا علوة

بس انت اجمد منها برضه
عيش
وخبط

nour يقول...

مبروك الكارنيه يا معلم
:))))
بس فعلا بتغنى فى ساقية الصاوى ده لازقة فى الكليه بتاعتى يا بنى الحفلة بتاعتك الجاية لاوم تنوه عنها علشان احضرها
انا فى فنون جميلة على فكرة