الأربعاء، يناير ١٠، ٢٠٠٧

مش حابب اني احب

من اجمل الاغاني اللي انا لحنتها يمكن عشان اتكتبت لي مخصوص و لحالة انا لسة باعيشها لحد النهاردة
غنوة اسمها مش حابب اني احب
ايه مالكم تنحتم ليه اه مش حابب اني احب
اه يا عم مش حابب اني احب
و احب ليه اساسا؟؟انا ناقص تعب اعصاب و مرمطة
و تليفونات و بعد ماتتكلم معاك بالساعات تقولك :حبيبي بلاش تكلمني اليومين دول عشان بابا
و للا انا ناقص مصروف الفالانتاين و اشتري دباديب و هدايا مالهاش لازمة و بردو اهو رزق الهبل
و لو ما اخدناش الحكاية هزار و اتكلمنا بجد هو انا فعلا جاهز لاني احب و ارتبط بواحدة
لالالالالالالا بلاش دماغكم تروح حتة غلط خالص
انا قصدي انه أي شاب في حالتي المادية لسة مش لاقي شغل و لسة ما بناش نفسه ماديا و مش مسنود على أي حاجة و مش منتظر ان اهله يساعدوه في أي حاجة مش ندالة منهم و لكن لانهم هم كمان مستنيين اللي يساعدهم
تفتكروا انه يبقى جاهز لحب و انه يربط نفسه و اعصابه و حياته بواحدة ممكن تكون مخلصة ليه جدا و ده يزود عذابه طبعا و يفضل يحرق في نفسه و يشتغل أي حاجة و السلام المهم يجيب تمن الشبكة و الشقة و الذي منه و في الاخر تتجوز واحد غيره عشان اهلها شايفين انه مناسب ليها اكتر و جاهز اكتر
و على فكرة الحاجات دي عمرها ما حصلت لي بس حصلت حواليا كتير و اكتشفت ان واحد زيي مش ممكن يرتبط الا بواحدة تكون ميتة في التراب اللي بامشي عليه عشان ترضى تستحمل ظروفى و بردو هي لو استحملت اهلها مش هايرضوا يسيبونا في حالنا و مش هاتكمل الحكاية
ايه؟؟؟؟؟؟؟؟؟الغلس اللي بيقاطعني كل مرة شايفه قاعد هناك على جنب بيعيط على حاله
معلهش يا سيدي بكرة تروق و تحلى بس ابقى افتكرنا


!!!!!!!!!!!!!!!!!!!!!!!!!!!!!!!!!!!!!!!!!!!!
دانا نسيت نا كنت عايز اقول لكم ايه!!!!!؟اه الغنوة اللي اتكلمت عليها في الاول
على فكرة هي مش كلام جامد و تفعيلات و حاجات من دي بس هي كلام صادق جدا و قريب هانزلها ليكم بس لظروف النت عندي اعذروني
الغنوة بتقول:
مش حابب اني احب
ولا ادخل قصة حب
انا يعني هاحب ليه
كدة عايش متهني
هم اللي حبوا يعني
اخدوا م الحب ايه
لا انا عايز شوق بجنون
ولا قلبي عليا يهون
و لا عايز عقلي يطير
انا قلبي غالي عليا
ليه اجني عليه بايديا
ليه ارضى بعذابي
و حبيبي يقسى عليا
و اسهر ما تنام عينيا
و يضيع كدة شبابي
مش حابب اعيش اوهام
ساعة فرح و ساعة الام
و لا عايز عقلي يطير
كدة عايش متهني
هم اللي حبوا يعني
اخدوا م الحب ايه

دي كلمات واحد صاحبي اسمه محمد التابعي و على فكرة هو بطل كتابة بعد ما شاف انه مفيش فايدة و قاعد دلوقت في محل لتغيير زيوت السيارات
ايه لسة فيه فايدة؟؟

هناك ٩ تعليقات:

Unknown يقول...

مش عارفة ياعلي والله
الموضوع يلغبط
لانه فيه كذا قضية منطقية متداخلة ف بعضيها
مثلا
أي انسان ميقدرش يعيش من غير حب
كل انسان يبحث عن الحب الحقيقي
الحب أخرته المنطقية الجواز
الجواز هو الصخرة التي يتحطم عليها الحب
اي شاب في ظروفك وزي معظم الشباب المصري مش جاهز للارتباط
اي بنت بتخلص جامعة مبتكونش عاوزة تعمل حاجة ف حياتها غير انها ترتبط رسمي
بجد حاجات ياما
تخليك
تلعن ابو الحب لابو الجواز لابو الربطة لابو العجز وقلة الحيلة
في الحالات العادية الفيزتا خمسة جنيه
لكن ف حالتك دي أنا هديك ربع جنيه تروح بيه من غير حب ولا دوشة زي ما انت حابب

غير معرف يقول...

بص ياعلي خدها حكمة من اخوك..اي حب نهايته لازم تكون مأساوية...الفراق او الجواز..وانت يابني اتكتبلك دلوقتي عمر جديد..!!
انت عارف كويس انه مش وقته جواز..لسة السكة طويلة..يبقي اقفل علي قلبك وارميه..حقولك ايه احنا كلنا كدة..قدرنا كلنا نحب ومنرطبتش..هي ظروفنا كدة ياعلي حاول ترضي بيها بمزاجك..بدل مترضي غصب عنك!!

غير معرف يقول...

وماله لما البني آدم يكون خفيف، ياخد قراراته براحته!
أنا اعرف كتير من اللي انت قلت عليهم، اتربطوا بدري بدري بعلاقة كان باين انه محكوم عليه بالفشل...

غير معرف يقول...

ليه يا إخواننا التشاؤم ده .. هو كويس إنكوا تكونوا واقعيين .. لكن تقلبوا الواقعية للتشاؤم .. يبقى مش صح

واحدة واحدة ربنا هايرزق من غير ما تعرفوا إزاي .. أنتوا عليكوا السعي وإخلاص النية وسيبوا الباقي على ربنا

إنووا الخير وإطلبوا من ربنا العفاف وشوية صبر .. هتلاقوا فرج ربنا قريب

غير معرف يقول...

هو أكيد حابب يحب لكن الواقع يصدم كثيرا ... مين مش عايز يحب و يتحب
بس هي حاله كلنا بنمر بيها
نوع من اليأس من تحسن الأحوال

غير معرف يقول...

مش عارفه اقول ايه بس حلوه حلوه حلوه لاقصا درجه وصحبك ده لعيب قولو يرجع يكتب تاني احلا اغاني ويسيب موضوع الزيت دة
و يا سيدي الجواز ده نصيب معاك ممعكش نصيبك مكتبلك و هيصيبك
اينما تكونوا يدرككم الموت ولو كنتم في بروج مشيدة

غير معرف يقول...

الاغنيه بجد تحفه قوى
خفيفه ولذيذه
ومعبره لاقصى درجه
مستنيين نسمعها متلحنه ومتغنيه

فوكيره يقول...

تصور يا على انى عندى نفس الفكره
وان كان في سبب مشترك
وهو حب في وقت غير مناسب =عزاب
و حاجه ملهاش لازمه
لانها مش في مكانها او وقتها الصح

يعنى الانسان بيكون في حاجه شد وجزب مع نفسه
بيمنع نفسه لان عقله مش حابب ان قلبه يحب

كلمات هايله

ضروري نسمعها بصوتك قريب

sama_nour يقول...

elkalam gameel awy ya aly we hateb2a ahla bsotak