الاثنين، فبراير ٢٦، ٢٠٠٧

بورسعيد اون لاين....ربنا يفتح نفسكوا




طبعا لا اخفي عليكم حماسي الشديد لبلدي بورسعيد
حبي لبورسعيد مالوش علاقة باني مولود فيها و لا لاني عايش فيها من يوم ما شوفت هذا الكوكب

لا.........انا باحس تجاهها بكوكتيل مشاعر


اولا الاإعجاب لاني انا فعلا بحب نضافة جوها و جمال بيوتهخا القديمة و شوارعها و طبيعة الحياة فيها


ثانيا التعاطف انا شايف ان البلد دي من اكتر البلد اللي اتبهدلت في الدنيا و ناسها اتشحططوا في كل حتة ايام الحرب و انها من الممكن تاخد وضع تاني مهم جدا لو اهتموا بيها سياحيا لان جوها مميز جدا و فيها مقومات جامدة بجد


ثالثا التعاطف مع ناسها لان للاسف السينما و الدراما عموما تفننوا في انهم يطلعوا البورسعيدية بشكل كاريكاتيري مشوه بعيد تماما عن الشكل الحقيقي للشخص البورسعيدي


و ع الاقل كفاية ان ناس البلد دي نزلوا على جيوش تلت قوى عظمى بسكاكين المطابخ و بشكل بدائي بس طلعوهم و حرروا بلدهم


و برغم كدة مابيظهرش غير الشخص الاهطل الاهبل اللي فاكر نفسه فهلوي و بيحاول يضحك على طوب الارض


بس سيبكم من كل ده


طبعا اي حد بلاقيه بيحب البلد دي بيخليني مش مصدق نفسي و كمان اللي بيحاول يعمل فيها روح حلوة و خصوا في المواضيع الثقافية و الفنية


و لان احنا بلد مافيهاش لا ساقية الصاوي و لا حتى ساقية قلابة


و مفيش داعي نتكلم عن قبر الثقافة


يبقى لما الاقي جهة بتحاول تعمل حاجة تفرح زي ما قلتلكو لازم نقف كلنا وراها


المهم انتو طبعا اكيد سمعتوا عن موقع بورسعيد اون لاين


انا اكتشفت قد ايه الناس دي بيحبوا البلد و نفسهم يعملوا فيها حاجة


هم طول عمرهم بيعملوا حاجات و مشاريع مهمة تخص بورسعيد


لكن محدش يقدر يوصف سعادتي بالمشروع الجديد اللي هم عاملينه


يا جماعة الناس دي عاملين ان شاء الله يوم الجمعة دي و اول جمعة من كل شهر حاجة اسمها سوق الفن


هايعرضوا فيه كل حاجة داخلة تحت اسم الفن


موسيقى و فنون تشكيلية و نحت و تصوير فوتو جرافي و مجوهرات كمان


لا و ايه انا كمان هاغني هناك ان شاء الله


طبعا هاغني مش لوحدي احنا انا و اصحابي عاملين باند جامد كنا بنحاول نغني فيه غربي و شرقي كدة بشكل جديد


و ان شاء الله كلنا هانكون موجودين ان شاء الله عشان نحضر سوق الفن


و ان شا الله يكون موضوع ناجح و نشوفه كل شهر ان شاء الله


يا جماااااااااااااااااعة الدعوة عامة و تنوروا بورسعيييييييييييييييييييييييييييييييييييييييييييييييييييد

هناك ١٨ تعليقًا:

زحل الفلكي يقول...

شد حيلك يا علوة

اليوم ده ان شاء الله يبقا يوم جامد

وشوية شوية يبقا حاجه ثابته في بورسعيد ان شاء الله

يارب خير بإذن الله

كلبوزة لكن سمباتيك يقول...

علا الاعلام شوة سمعة البورسعيدي و كذلك النكت اكيد تعرف نكتة
سيبها انا مخاصمها
و اجمل حاجة في البورسعيديا لكنتهم الشقية
يا رب نشوفها عروسة
و اجمل مدن القناة
زي ما هي

تحياتي

Amr Ahmed يقول...

مبروك يا مان

وتحياتي لبورسعيد

بس نادي المصري لا

اللي يحب الاهلي اه

بالتوفيق يا معلم

hesterua يقول...

حلو قوى يا على

وفعلا الناس دى عاوزة تعمل وبتعمل , وعملت كمان , وبعيد عن الشعارات والمنظرة وكلام المثقفين اياهم , حقيقى نرفع القبعة لعمنا نصر الألفى

مستنيك تبدع كالعادة يا لول

علي الالفي يقول...

يخرب بيت الكورة ماهي اللي جايبالنا الهم ده كله
تعرف يا عمر ان ناس كتير بيكرهوا البورسعيدية بس بسبب الكورة
و ان اساسا اللي بيروحوا الماتشات هنا شريحة صغيرة جدا لا تتعدي 15% نت اهل بورسعيد
ياللا المهم تنوروونااااااااااا

شيماء الجيزى يقول...

جميل الى عملته يا على على البلوج بتاعتك

انا شوفت موضوعك فى بورسعيد اون لاين

ويارب السوق يكون جميل انا هروح واستنى حفلتك

شد حيلك

شيماء الجيزى يقول...
أزال المؤلف هذا التعليق.
Ahmed EIssa يقول...

بص بقي انت متروحش من غيري...يعني نتفق نتقابل ونروح مع بعض

فكرة حلوة بس ياااااااارب تتنفذ صح

انا معاكو يا رجالة..وحجبلك معايا يانسون ياعلي..يلا عشان متقولش لدود وحارمك من اي حاجة

Memo يقول...

يا سيدي يا سيدي علي الوطنيه يا سي على ماشي ربنا معاكم و يارتني كنت معاكو
تحياتشي

metcy يقول...

akiiid akiid a7na bardo mat3'aziin la2nina mosh 7ana2dar nigii,,we akid akiid anta lazem ta7'od shots bal digital camera for every show in porsa3id online festival ....we a3mlooh 7iloo ba2a 3ashan ta3'izona aktar we aktar

كراكيب نـهـى مـحمود يقول...

الجميل اوي اوي علي
لازم تكون بورسعيد جميله وتحبها كده وهيه تحبك كده وتديك تعويذتها
كن جميل ترى الوجود جميل يا علي وانت غرقان طيبة ورقه وفن وحب للناس وللدنيا
انا متشكره اوي على تعليقك عندي وعلى كلامك مع طارق
يا رب الحفله في بورسعيد تكون جميله وجامده قولعلى معادها وهنحاول نيجي طبعا على فكرة صوتك حلو اوي في اغنية اللي انكسر يطوح سمعتها كتير يا فنان

micheal يقول...

بالتوفيق يا علي باذن الله..و كلنا بنفخر ببورسعيد كبلد صغير نجح في طرد 3 جيوش و لو أننا في ماتشات الكوورة بنقلق من جمهور المصري
تحياتي لك

فوكيره يقول...

اشعر بشرف كبير

انى انتمى الى هذه المجموعه

مجموعه بورسعيد اون لاين

احمد ربي على هذا

اتمنى ان يكون سوق الفن على القدر المتوقع واكثر

اعتقد وجود الفرقه حيعمل جو مختلف تماما

بالتوفيق ي على دايما

أنا أفكر إذن أنا موجود يقول...

إنت أنسان جميل قوي يا علي ورقيق جداً

لما شوفت البوست ده حسيت اد أيه أنت بتحب البلد دي بجد

ونفسك تعمل و تساهم بحاجه

بجد أنتم خيره شباب بورسعيد
وأفخر أني وسطكم

وفقنا ووفقكم الله

smraa alnil يقول...

اولا انا هعيط
عاااااااااااااااااااااا
لان كنت كاتبة كلام كتير اوي علي البوست دة والبوست اللي فات ومش كان عاوز يبعت التعليق

smraa alnil يقول...

هيييييييييييييييييييه
تعليقي نزل ارغي براحتي بقي

بورسعيد مش كنت اعرف عنها حاجة غير تاريخها
بس رفت ناسها منك يا علي ومن رضوي ومن اهلها اللي قابلتهم بجد
بس انا حزينة اني مش هكون موجودة اليوم دة
معلش بقي مش عرفت ارغي اصل بصراحة مرعوبة لحن يعمل عملته معايا تاني

غير معرف يقول...

عااااااااااا
طب انا كده مش هاعرف اجى
اهئ اهئ اهئ
اعمل ايه؟؟؟
ربنا يوفقكوا ان شاء الله
ايوه ياعم.. بورسعيد شايلاكو من على الأرض شيل
يا بختكوا بيها وبختها بيكو
ربنا معاكو
وياريت تبعتلى اى حاجه جديده عندك انت غنيتها او شاركت فيها
اوكى؟

vision يقول...

يا ريتنى كنت معاهم