السبت، فبراير ٠٣، ٢٠٠٧

اكتئاب ما بعد الحفلة


إحساس سخيف بينكد عليّا في أحلى أوقاتي
عارفين اللي بيبقى مشغول و مهتم بحاجة و منهمك"حلوة منهمك دي"فيها جدا جدا و فجأة تخلص
و يرجع و لا حاجة
و يرجع مابيعملش حاجة
عارفين حتى لو الواحد مشغول بحاجة صعبة و مضايقاه ممكن يتعود عليها و لما بتخلص بيحس انه ناقصه حاجة
اهو ده اللي حاصل لي الأيام دي
طبعا محدش في الدنيا يقدر يوصف قد إيه فرحتي بالحفلة و الناس اللي حضروها و قد إيه أنا ما كنتش متخيل كل اللي حصل في الحفلة و حب الناس اللي اتحاوطت بيه
بس رجعت بورسعيد
و لسة بادور ع الشغل
و مفيش حاجة
و مش عارف إيه اللي حاصل لي
مخنوق شويتين زيادة
عمال افتعل مشاكل مع كل اللي حواليا
و مش متحمل حاجات كتير
تعرفوا
أول مرة افهم يعني إيه اكتئاب بعد الولادة
المفروض الواحدة يتبقى في اسعد حالاتها لأنها خلصت من تعب و إرهاق و آلام الحمل و الولادة
و الأحلى إنها جابت ابن أو بنت ها يكونوا سبب في سعادتها
لكن بعد الإحساس بان فيه حاجة مهمة هي فيها و بتخلص فجأة
ده بيسبب حالة اكتئاب عجيبة
؟
بتقولوا إيه؟
ممكن مايكونش هو ده السبب في حالة الولادةو السبب الحقيقي هرمونات من المخ تسبب الشعور بالاكتئاب عند الولادة؟
ماشي يا سيدي
انا اقصد حدث حلو قوي بعديه اكتئاب و نكد جامد قوي
و مثال سخيف
عادي بقى
المهم هو ده تفسيري للكلمة
و هو ده اللي أنا حاسس بيه الأيام دي
و زي مانتو كنتوا السبب في احلى لحظات حياتي
استحملوني في شوية لحظات غامقة كدة
طلب اخير
ادعولي تمر الفترة دي قبل ما تحصل مشكلة كبيرة بيني و بين أي حد من المهمين عليا
ملحوظة أنا نفسي اشكر تاني كل واحد حضر الحفلة كل باسمه و صفته
لكن حصلت حاجة عجيبة جدا جدا جدا ها بقى اكلمكوا عليها البوستين الجايين

هناك ٢٠ تعليقًا:

rosealia29 يقول...

ربنا يكرمك .. و تلاقي شغل .. و تبقى إللي بتتمناه و أحسن .. و نفضل معاك بندعمك و بنحب صوتك للأبد ..

فوكيره يقول...

اولا : يا على تماسك كده واحنا جنبك

ثانيا : يااااااااااااااااارب تلاقى شغل ... وتنشغل كده على طول ونبقا مش لاحقين نشوفك :D

ثالثا: انا عايزاك تبقا فرحان انك في الحاله دي (ده مش كلام تقريري) لا
ده بجد
ليه بقا لان لو مفيش ده ..مفيش ده

لو مش حتحزن مش حتفرح لو مش حتغضب مش حتهدى

يعنى اتضايق وخد وقتك لكن في نفس الوقت طمن نفسك ان ده طبيعى ون دى هى الحياه

وحل كمان متجرب وفعاال
صلى وقرأ قران وعيط لربنا
وقولى على النتيجه

وسلام يا انسان

أحمد يقول...

أستمتع بنصرك يا على
ومعلش مسيرها تروق و تحلى

تحياتى لك يا على

الوردة السوداء يقول...

لا حول ولا قوة الا بالله
هو الشعب المصرى كدة يفرح ينكد على نفسه
على فكرة انا مقدرتش اجى الحفلة
بس اختى راحت
وقالت عليك هايل جدا
وسمعت من ناس كتير انها كانت تحفة
افرح يابنى بنجاحك
وخلى كل شىء ياخد وقته
بالنسبة للشغل ده رزق
وكلوه مكتوب عن ربنا
بس انت اسعى
افرح
اتعلم ازاى تفرح

غير معرف يقول...

معلش ......شدة وتزول ...إكتئاب ويومين وهيروح

مش عارفه أساعدك إزاى و أشيل المود الوحش ده عنك ....بس معلش
:(

......
يارتنى كنت فى الحفله

غير معرف يقول...

معلش ياعلوه
انا مجربه الاحساس ده كتير
انت انشغلت قوى بالحفله دى والاعداد ليها
وبعد ماخلصت اكتشفت انك ماكنتش بتعمل اى حاجه تانيه غيرها
طبعا ده شعور قاتل
بجد ماتزعلش..اكيد اللى انت فيه ده ابتلاء من عند ربنا عشان يختبر بيه صبرك
وان شاء الله ربنا يفرجها من أوسع الابواب
انت بس ماتفقدش الأمل
ربنا معاك ويوفقك دايما
خلاص بقى يخرب بيت اللى مزعلينك
قولى بس عليهم وانا ابقلظهملك
ولا يهمك
احنا معاك وواك ياريس..اهم حاجه عندنا مزاج سعادتك
حلو الجو اللى انا عاملاه ده؟؟
اوكى..امشي بقى وكفايه رغى

كراكيب نـهـى مـحمود يقول...

يا رب يكون الاكتئاب راح
كله بيعدي يا علي
مش كد ولا ايه

Memo يقول...
أزال المؤلف هذا التعليق.
Memo يقول...

بعد الشر عليك من الاكتاب و الف مبروك على الحفله الرائعه دي
روق كدا و فكك
تحياتشي

Dalia Ziada يقول...

أكتئاب ليه بس يا علي؟

شوف الحكاية و ما فيها إن الواحد بس فجأة بيلاقي نفسه فضي فبيضايق لكنه مش اكتئاب

و أنا عندي حل حلو قوي, أنسى الحفلة خاااااااااالص و أرجع فكر من جديد أكنك ما عملتش حاجة , فكر في الخطوة الجاية في حياتك شوف عاوز تعمل أيه تاني, عاوز تنتشر أكتر أزاي, أيه الكلام الجديد اللي انت عاوز تغنيه, أفتح أي كتاب شعر أو أي موقع عليه شعر و أقاره و عيش معاه و غوص فيه, أو سيب ده و ده و أقفل عليك أوضتك و فكر في حاجة أنت بتحبها قوي و غني غني لغاية ما تتعب, صدقني بعدها هتلاقي نفسك في قمة السعادة و هتنسى الاكتئاب تماما, أقولك على سر, أحيان كتيرة بنتخيل أن لما نكون مكتئبين لازم ننزل من البيت و نخرج مع اصحابنا و كده, لكن الحقيقة احنا بندخل في حالة اكتئاب لأن نفسنا بتكون وحشانا, يعني أنت مكتئب دلوقتي لأن "علي" وحشك, أقف قدام المرايا و كلم نفسك و قولها وحشتيني و سلم عليها, و و الله هترتاح

معلش طولت عليك بس أنا ما احبش فنان في رقتك يكون زعلان و مكتئب

تحياتي بانحياز يا بطل

كلام لوجيك يقول...

ازاي بس تكتئب وتتضايق وانت والحمدلله محاط بكل الناس الحلوة اللى بتحبك وتحترمك دي؟؟
روق وانسى وانتبه لحياتك وركز فى الخطوة الجاية
وخلى مثلك فى الحياة

طنش... تعش ... تنتعش
عشان ماتخنقش نفسكوربنا يديم المحبة والخير وبوفقك باذن الله
خالص تحياتى ودمت بالف خير

Ahmed EIssa يقول...

انت يابني مبتعرفش تفرح؟
عملت حفلة حلوة والكل مبسوط بيها كن بقي شوية..افرح بانتصارك علي اي مستوي..اللي انت عملته حاجة كويسة افرح بيها
متفكرش كتير ياعلي كله بيهون بس انت متقعدش ساكت

Abo Amr يقول...

شوف يا علوة
دي اول مرة ادخل البلوج بتاعك
سمعت عنه كتييييييييير
من الصراحة و كراكيب
لكن ما شاء الله لم يوفوك حقك
و للاسف محضرتش الحفلة لتواجدي خارج مصر حاليا

اخيرا يا سيدي

خليك فاكر ان اشد لحظات الفجر سوادا هي اللي بتسبق بزوغ الفجر

و حكاية الشغل دي نصيب
خدها من واحد عمل 43 انتيرفيو في 5 محافظات
و بعدين ربنا يسرها
اهم ما اقوله ليك يا جميل

استعن بالله ثم السعي السعي السعي

اتمنى تقدر تفرح قلبك قد ما فرحت كل اللي حواليك

osam يقول...

alf mabrwk ya 3ale wkan nfse aba mwgad fe masr wahdar hafletak bs yalla 2la el3mwm nfse ashafak dayman kda nageh wfrhan wbatal 3lasa wefrah ensa hemamak wefrah shwaya

Unknown يقول...

جاية اقول

مسا... مسا

على كل الناس الكويسة

واقولك ربنا يقومك بالسلامة

أجدع واحد في الشارع يقول...

هو انت لسه يا على فى الحاله دى
فك بقا يا عم
متعملش فى نفسك كده

خلاص انا هعملك عقد موقت

تغنى كل يوم

بس فين مش هقولك

لما اسمع صوتك الاول

فك بقا

ده انت صعب اوى

الكلام نوعان :كلام فارغ وكلام مليان كلام فارغ يقول...

اضحك للدنيا تضحك لك
مش هاقول اكتر من كده
وياريت تدخل على البلوج بتاعي وتجاوب على التاج .....ممكن؟

غير معرف يقول...

ايه يا على
بجد كده هابتدى اقلق عليك
انت فين من زمان يابنى
اتمنى ان يكون سبب بعدك دا خير..مش اكتئاب يعنى

raspoutine يقول...

اولا انا زعلان منك لانى كنت عايز اشاركك فرحتك واكون جنبك
بس تتعوض
وبقولك خليها على الله والشغل كتير وانشاء الله هنلاقى حل واحنا كلنا معاك
احنا اخوات

sama_noor يقول...

ekte2ab leh bas ya aly enta masha2 allah sotak helw we isa rabena yekremak we teb2a mn ahsan elnas elly betghany we ba3den dy haga 3adya lazem tezha2 shoaia ba3d mateb2a mestanny haga we lamma bte5las beteb2a nefsak t3eesh elhala elly kont feha tany btewhashak bas matewsalsh lelekte2ab ya aly rabena ywafa2ak ya gamel wehna ma3alena gher en ehna nes3a welba2y 3ala rabena