الجمعة، مارس ٢٣، ٢٠٠٧

المركب بتغرق يا قبطان.....المركب غرقت يا قبطان




تحذير: هذا الموضوع يوضع تحت تصنيف وجع قلب حقيقي لذا وجب التحذير ممنوع لمرضى القلب و الضغط و ذوى القلوب الرهيفة


تعرفوا كل ما بنسمع عن حد مات فجأة و هو مش واخد باله ان ده هايحصل
بيخلينا نفكر في حاجة واحدة
يا ترى ايه اخر حاجة فكر فيها؟؟..يا ترى ايه اخر كلمة قالها
وهو ده اللي شغل بالي و كان في حياتي طول اليومين دول

اكيد محدش فيكو غايب عنه ان فيه عبارة مصرية غرقت و مات فيها 1100انسان كانوا بيحلموا بلحظة يرتاحو فيها من غربة برة الوطن و بعيدة عن الاهل
و فجأة
المركب بتغرق يا قبطان...المركب غرقت يا قبطان
......
...
......

انا كان ليا تجربتين مع العبارة دي بعد ما غرقت
طبعا كلنا عارف وواثق ان اعلامنا المبجل كان اساسا و لا كإن الحدث ده حصل في شمال جنوب شرق اسيا الغربي
لان بالصلاة ع النبي كانت مصر مشغولة اليومين دول و مش مهم قوي الناس اللي ماتوا
اصل احنا كان عندنا كاس الامم الافريقية
و ماكانش الحدث واضح قوي
تقولش ناس كان عندهم رحلة صيد و القارب بتاعهم اتقلب
وانا شخصيا كنت في القاهرة عندى حفلة و ما كنتش مستوعب حجم اللي حاصل
لانى ما كنتش باشوف غير اغاني التليفيزيون و المصريين اهومما و شرفونا يا ابطال في معركتكو
............
؟.....

مرة كنت مع احمد عاصم بنسجل غنوة و اتاخرنا و اخدني نصلي الفجر في جامع عمرو بن العاص
و كنت انا مشدود قوي بالجامع و جماله
و فجاة دخل نعش و هانصللي الجنازة عليه
و سمعت من اللي حواليا بعد خروح النعش
لقيوه ميت و لابس سترة النجاة
وسألت عرفت انه من ضحايا العبارة
و ماكانتش الصورة اكتملت
عارفين اكتملت امتى
من كام يوم
لما اتذاع تسجيل الصندوق الاسود
عمركو سمعتو صوت الموت
عمركو سمعتو اخر كلمة قالها حد و انتو عارفين انه مات
عمركو سمعتوا صوت ناس من بعيد بيصرخوا و بيتشاهدوا
عمركوا اتخيلتوا حد وهو في عز ضلام الليل موجود في اشد درجات البرودة و ما بين ده و بين وحوش البحر و ما بين انعدام فرص النجاه
عمركوا جه في نظركوا منظر الاب اللي لبس ابنه سترة النجاة و استقبل الموت بنفسه
عارفين يعني ايه غرق
يعني مفيش هوى بيدخل للرئة يعني الم رهيب لا يطاق و ضغط ماء رهيب ع الودان و الم في كل مكان في الجسم بيتعصر و الم لا ينتهى الا برحمة ربنا و اذنه لملك الموت


عارفين يعني ايه منظر اهالي الضحايا و هم مستنيينهم و فجأة يسمعوا خبر زي ده
عارفين ايه معنى عنوان البوست
دي اخر جملتين اتقالوا في التسجيل
المركب بتغرق يا قبطان.......المركب غرقت يا قبطان.. المركب غرقت يا قبطان
هاتسمعوا في اخر ثوانى من التسجيل صوت المية و هي بتقتحم الكابينة و هاتسمعوا صوت الناس من بعيد و هم بيصرخوا و بيتشاهدوا و هاتسمعوا صوت القبطان و هو بيتشاهد
فعلا اللي مش هايستحمل
بلاش يحمل التسجيل
في النهاية انا هاسيبكم مع3حاجات
هاسيبكو مع صور اهالي الضحايا و الناجين
عشان اللي نسي يشوف
و هاسيبكو مع تسجيل الصندوق الاسود
صدقوني تجربة مؤلمة قوي
و اللي يحمله على مسئوليته الخاصة و محدش يلومنى
و هاسيبكم مع ضمايركم

انا لله و انا اليه راجعون





هناك ١٧ تعليقًا:

hesterua يقول...

لا حول ولا قوة الا بالله

بس خد بالك

لكل شئ نهاية

وربنا ما يجيب حاجة وحشة

Ahmed EIssa يقول...

عارف انا سمعت الشريط ده قبل كدة..وسبحان الله استغربت لاني حسيت ان الناس دي كانت بتتكلم زي متكون حادثة عربية..اصواتهم كانت هادية زي ميكون عادي انها تغرق
يلا حسبنا الله ونعم الوكيل

smraa alnil يقول...

انا سمعت الشريط دة برضه قبل كدة هو عندي اصلا علي الكمبيوتر بتاعي

كل منا يستقبل مصيره بهدوء
نغمض اعيننا لنصل للراحة الابدية

دة اللي حسيته لما سمعت الشريط
حسبي الله ونعم الوكيل

Eric Matt يقول...


لا حول و لا قوة الا بالله

بتفكرنا ليه بس ماكنا بننسى و في حالنا

الموضوع ده بقاله سنة

لك الله يا مصر

اللهم انتقم

تحياتي من ماناساس البلد يا أخويا

محمد عبد الغفار يقول...

أه . . . اه . . . اه

nour يقول...

يا على انت تعبتلى اعصابى
كفايه اصلا ايامها الواحد كان مكتئب
و انت رجعتلى نفس الشعور تانى
انا لله و انا اليه راجعون

raspoutine يقول...

لا اله الا الله
انا لله وانا اليه راجعون
وحسبنا الله وهو نعم الوكيل

فعلا يا على احساس محدش يقدر يوصفو

لا حول ولا قوة الا بالله

basma saghir يقول...

انا مش هقدر اوصف احساسي لاني في يوم من الايام سافرت في عبارة من عبارات الشركة دي كان ممكن الناس الي غرقت دي يكونوا انا واهلي
انا بجد مش قادرة اصدق ان ده حصل..وممكن يحصل تاني..احساس بشع انك تبقى شايف موتك قدام عينك ومش قادر تعمل حاجة لأ وتموت بالبطئ كمان وفي ظلمة ووحدة ومجهول وخوف
الخوف شعور صعب قوي...وده الي انا حساه دلوقتي

حبيبها يقول...

با علي يا صديقي هاسألك سؤال واحد أنت تمنك كام النهارده في مصر بس قبل ما تجاوب أحب أعرفك أن أنت تمنك كتيير يعني لو فكرنا أن عندك كليتين وقلب وكبد وحاجات تانيه ممكن تتباع نلاقيك يا نجم تعمل قرشين حلوين بس تمنك كبني آدم ككيان لامؤاخذه ربع جنيه مخروم. بص يا باشا علي اللي بيموتوا كل يوم في مستشفيات السرطان والكبد والكلي دول برضه ناس زي اللي في العبارة لكن اللي ماتوا في العبارة حظهم احسن اصلهم ماتوا بسرعه نسبيا بالنسبة للتانيين وربنا يجعله عامر

change destiny يقول...

لا الاه الا الله

لا الاه الا الله

shermen يقول...

لما العبارة تغرق
يبقى انت اكيد في مصر
لما يحصل حوادث قطار
يبقى انت اكيد في مصر
رابسوا جه
مين رابسوا ده؟
ده اللي هينضف الوزارة

mohammed يقول...

أول مرة أسمع الشريط
وبعد ما سمعته مش عارف أقول إيه
حسيت إن الناس دي كانت متوقعة اللي بيحصلها..
وإنها هتموت ..
مهما عارفين إنهم ملهمش ثمن ، وهما عايشين
هيكون ليهم ثمن ، وهما ميتين ؟!

إذا كانوا هما أصلاً عايشين أموات ، هنا ، في بلد المصري فيها متهان جوه ، وكمان متهان برة

بجد مش عارف أقول إيه

محمد عادل \ أوسكار
http://oscarization.wordpress.com/

فوكيره يقول...

سمعت الشريط في العاشره مسـاء

وانا بسمع تخيلت مشهد الموت

والبحاره الى كان بيقول المركب غرقت يا قبطان ... بلهجه اسكندرانيه

تخيلت نفسي في وسط تلك الاهوال وصوت الموت والصراخ

لم استطع السيطره على دموعى
لم استطع ان الوم نفسي قبل اى حد لحدوث هذا
لان لو مش احنا احنا مش حيكون هما هما

وحسبي الله ونعم الوكيل

اسأل الله ان يعينى على اصلاح نفس لانها نواه لمجتمع بـ اكمله

كلبوزة لكن سمباتيك يقول...

تعددت الاسباب و الموت واحد
الميت ارتاح
و العايش يتعذب ان كان عنده ضمير

ShAb 3AdY يقول...

لا حول ولا قوة الا بالله

انا لله و ان اليه راجعون

ان شاء الله ربنا هينتقم من كل اللى كان يد فى المأساة اللى حصلت دى

hamasat يقول...

حقيقي ابكيتني وكنت قد بكيتها من قبل
نعم شعرنا بكل ما تحدثت عنه واكثر فنحن هنا في الخارج تصل لنا الحقائق
معظمها دون زيف
لا نملك سوي حسبنا الله ونعم الوكيل
وفعلا اذا الايمان ضاع فلا امان!!!

Rivendell** يقول...

لا حول ولا قوة الا بالله

يارب سامحنا

واغفرلنا

يارب سامحنا

سامحونا انتوا كمان

سامحوني