رغم أنف كل حاجة كل سنة و انا طيب و كل احبابي منورين حياتي

معكم علي الالفي يحدثكم من على عمق6بطانيات فوق سطح السرير حيث اعاني من نزلة برد حقيرة بوظت علينا امبارح ليلة العيد انا و العيال اصحابي و كادت ان تمنعني عن اداء الصلاة بس ربنا ستر
المهم
كل سنة و انا طيب رغم انف البرد الرهيب اللي مالي بورسعيد اللطيفة
كل سنة و انا طيب رغم انف الانفلوانزا البايخة اللي جايالي بشكل مختلف
يعني مش شوية رشح و عطس و كلام اهبل من ده
لا دي حرارة و رعشة و كحة من اللي بتوجع القلب
كل سنة و انا طيب رغم انف اودتي العجيبة اللي اكاد اجزم اني لو طلعت الاكل من التلاجة و سيبته فيها مش هايجراله حاجة و يمكن يتجمد اسرع
كل سنة و انا طيب رغم عدم و جود الشغل لحد النهاردة و ان شاء الله هابقى زي الفل قريبا
كل سنة و انا طيب رغم انف امريكا اللي قررت تصبّحنا اول يوم العيد بخبر اعدام صدام حسين و برغم انف الجزيرة اللي مالهاش هم غير تصبحنا بحاجة تسد النفس زي دي
كل سنة و انا طيب رغم انف فرصة الغنا اللي لسة باعافر عشان اجيبها و رغم انف شركة الانتاج النصابين اللي كانوا عايزين يدفعوني5000جنيه عشان يتكرموا و يحطولي غنوة في شريط معرفش هاينزل و للا لا
مش بس كل سنة وانا طيب
لا ده كل سنة و انا طيب و كل حبايبي منورين حياتي و مدلعينّي ع الاخر و محسسيني ان انا حاجة حلوة في حياتهم زي ما هم حاجة حلوة قوي في حياتي
كل سنة و ابويا الراجل الطيب زي الفل و حالته مستقرة و امي الحنينة قوي معايا و ماتحرمش منها
كل سنة و نينتي زي الفل و يارب تفضل معانا العيد الجاي و اللي بعده و اللي بعده الى ما لا نهاية
كل سنة و اخواتي البنات اللي جايين طايرين م الفرحة بدون سبب طيبين و اخويا محمد اهدا و اعقل السنة الجاية
كل سنة و اصحابي الغاليين حواليا و منورين الدنيا
كل سنة و زيكس المهاجم طيب و زي الفل
كل سنة و روزاليا العاقلة ب10000خير و بردو زي الفل
كل سنة و كراكيب رقيقة و منورة الدنيا رغم ضلامها
كل سنة و جوسي سابقة السن و اخوها مفتكس و لذيذ و مستحمل اشتغالاتنا التي لا تنتهي
كل سنة و هيثم محفوظ نجم الدنيا و منور الغنا في الدنيا
كل سنة و شادي صاحبي طيب و ييجي بورسعيد تاني
كل سنة و دكتور زيفاجو طيب و جنبي داعمني وواقف جنبي ماديا و معنويا و انسانيا و شعريا و كل حاجة
كل سنةو سماح جيرو نيمو رقيقة و عاقلة و متفتحة و فرحانة و سعيدة و يا رب الحكاية تكمل على خير
كل سنة و اللي بيدور على نفسه يفضل اجدع واحد في الشارع و يفضل كمان يحبني من غير مايشوفني

كل سنة و احمد عيسى صديقي اللدود موجود في حياتي و ينورها بغلاسته اللذيذة و تعليقاته العنيفة

كل سنة و شريف اعجب صاحب في الدنيا طيب و ربنا يهدينا و تقل عدد الخناقات اللي بيننا

اكيد نسيت ناس غاليين عليا دا و معرفتش اقول لهم كل سنة و انتو طيبين
بس انا عايز اقول للدنيا كلها بجد كل سنة و انتو طيبين و فرحانين وانا من ضمنكم

الى من اصبح شهيدا بدون مناسبة

لما حد بيستنى منك انك تاخد خطوة معينة
و انت بتبقى عايز جدا انك تاخد الخطوة دي
و ما بتكونش قادر انك تاخد الخطوة دي
يبقى الطرف التاني لازم يعذر و يقدّر
يقدّر انك بتتعذب و انت بتبعد عشان ماينفعش
و يقدّر انك بتتعذب و انت بتبعد عشان مايتعذبش في انتظار طويل لشئ ممكن يبقى صعب انه يحصل
ويقدّر انك بتتعذب و انت بتبعد عشان ما تفقدوش كصديق حتى و لو ماحصلش نصيب و عشان ماتفقدش علاقة صافية طيبة رقيقة في حياتك
و يقدّر انك فكرت فيه و التزمت ناحيته و مارضيتش ليه انه يمر بتجربة صعبة معاك و مش معروف نهايتها ايه
و يقدّر انك مارضيتش تستغل بداية حب رقيق و تعيش اللحظة و خلاص
عموما انا نايم و ضميري مرتاح
بس بردو ضميري بيعذبني لاني حاسس ان فيه حد مجروح بسببي رغم اني حاولت ماجرحوش
بيقولوا دايما وجع ساعة و لا وجع كل ساعة
و اذا كانت الجراحة مؤلمة لكن ألم الوجع اكبر
كدة و للا ايه

عرفنا ميعاد الحفلة يا جدااااااااااااااااااااااااااااااااااان

فاكرين لما اتكلمنا و قلنا عندي حفلة
و رجعنا و قلنا الحفلة اتاجلت عشان الناس هايكونوا في امتحاناتهم و محدش هايعرف يجيلنا
اهو الحفلة اتاجلت فعلا و بقت فب الاجازة
يا جماعة عندي حفلة يوم التلات 30-1 في ساقية عبد المنعم الصاوي مع فرقة
Step by step
و ان شاء الله اشوفكم كلكم هناااااااااك
و أي اخبار جديدة هانقول لكم
ياللا موبايلات بقى

كلاكيت تاني مرة انت تخين ماينفعش تغني

لاول مرة باكرر موضوع ع المدونة بس يمكن عشان الموضوع ده شاغلني

زي ماباحب اقولكم عن حاجات كتير جوايا باحبها و ناس مهمين في حياتي اسمحولي النهاردة اتكلم عن حاجة تانيةانا

كنت حكيت لكم قبل كدة اني فتحت عينيا ع الدنيا مالقيتش نفسي باعرف حاجة غير اني اغنيو طبعا الغلس بتاع كل تدوينة بيقول دلوقت :دانت صدعتنا و قرفتنا كل شوية بتغني بتغنيو ارد عليه و اقوله ربنا يخليك ابعد عني الساعة ديالمهم طبعا لان كتير منكم ماشافنيش فاماتعرفوش الحقيقة العجيبة اللي في حياتي و هي اني تخينمش مفشول قوي بس تخينو ده اللي باصتدم بيه جدا و باتفاجئ بيه كل ماباروح اشتري هدومتقولش الدنيا ما فيهاش ابدا غير مانيكانات و موديلز ولو لاقيت البياع يطلع عيني في السعر و هو بيقول الكلمة الخالدة:معلهش يا بيه مقاسات خاصة و مش هاتلاقي في السوقكل ده مش مهم لكن اللي باصطدم بيه بجد الكلمة اللي قرتوها في العنوانانت تخين يابني ماينفعش واحد زيك يغنيروح خس الاول قبل ماتفكر تيجي هناباحس ان عماد حمدي طلع من فيلم الخطايا و غير الكلام بدل ما يقول انت لقييط بدا يقول انت تخيين اخرج من بيتيهم اللي ماسكين صناعة المزيكا في مصر مايعرفوش ان في كل بيت و عيلة في الدنيا في واحد و اتنين و عائلات كاملة كلهم تخانوللا خايفين يجرحوا نظر الناس بواحد تخين اللهم احفظنا زي ماكون جربان وللا عندي اعاقة او من المشوهينو للا هو مافيش تخان بيمشوا في الشارع و بيروحوا الجامعة و بيحبوا و بياكلوا و بيدخلوا الحمام زيهم زي أي كائن حقيقي ماشي على رجليه سواء كانت اتنين و للا اربعةو الغلس عايز يقول حاجة ّ!!!!عارف يا سيدي ان اللي عندهم اربع رجلين مابيروحوش الجامعة بس انت بتوقف الكلام عند ملحوظات رزلة زيك!!وللا هو المفروض ان التخان يتلموا في مراكز لاصحاب الاحتياجات الخاصة و يتعمل ليهم اعادة تاهيلانتو عارفين ان ده خلاني احب تخني و شكلي جدا و عامل اليوزر نيم بتاعي في كل حاجة كلبوزو ازاي في الخليج يقيموا الناس على اساس انهم مطربين جامدين و موهبتهم عالية و اللي في ايديهم صناعة المزيكا في مصر بيدوروا بس ع المزز الجامدة و الشباب اللي طالع طازة من الجيم و فاتح زراير القميص للاخريعني لو حسين الجسمي دا كان بيدور على فرصة هنا في مصر كان زماننا اتحرمنا من مطرب عبقري بقى!!!! وللا ايه؟على فكرة انا كمان مش بتاع اامان يا لالاللي و للا الاغاني اللي بتتقاس التايمرلا .....انا واحد باحب اغني الاغاني اللي كل اللي في جيلي و سني بيحبوها و على فكرة اللي فوق دي صورتي انا من غير فوتو شوب والله

والله دا انا جامد قوي

تعرفوا؟

حسيت ان رد اعتباري الحقيقي حصل لما بدا البرايم الاولاني لبرنامج ستار اكاديمي

ما كنتش فاهم ليه ما قبلونيش و لا خلوني اكمل الختبار

و كنت حاسس ان فيه حاجة غلط

و الحمد لله فهمت و عرفت و اتاكدت

انا صوتي مش نشاز عشان كدة ما اخدونيش

يومها ماكونتش فاتح القميص لحد بنطلوني و لا كنت ماشي عامل فيها نجم و لا كنت باتتنك ع الناس

و لا كنت بادخل اعمل افلام ع اللجنة

عشان كدو ما طلعتش

قشطة

طظظظظظظظظ

انا جامد غصب عنكم

و الله ما غرور ولا تنطيط

بس عرفت بجد ان انا مطرب كويس لما شفت الحفلة

بس بردو هافضل اتفرج و اتسلي بالهزار و الكلام و المشاكل المفتعلة و الهيصة

نعمل ايه فاضي بقى

و طبعا حد هايقول عشان ما اخدوهوش الواد هايطق و منفسن ع البرنامج

لا والله

بجد

يابني انا لو كنت رحت و انطبقت عليا الشروط دي كان ممكن يجرالي

و لسة قدامنا كلام

........

...

..

بس تعالوا هنا

شفتوا الحفلة كانت الابهار فيها عالي ازاي

طب شفتوا شيرين كانت جامدة ازاي

الحفلة اتاجلت يا جدعاااااااااااااااااااااااااااااااااااان

اه والله اتأجلت و على فكرة كدة احسن عشان اللي عنده امتحانات يكون مالوش حجة
و خلاص

نتقابل هناك ان شاء الله

على فكرة هي اتجلت اسبوع و بقت اول اسبوع في شهر فبراير

مش بعيدة يعني

و بردو ياللا موبايلات بقى

عندي حفلة يا جدعاااااااااااااااااااااااااااااااااااااان

اسكتوا اسكتوا

اقولكوا مفاجاة

مش طلع عندي حفلة قريب

اه والله يا كل مدونييييييين الدنيا والله عندي حفلة قريب في ساقية الصاوي

مع فرقة

step by step

يوم 23/1/2007و لو حصل اي تعديل هانبلغكم

ياللا موبايلات بقى

مالحقتش ارجع..............مسافر تاني

كان دايما بيبقى اليوم اللي باروح فيه القاهرة زي ما يكون العيد

ما بيجيش نوم

و افضل اخطط هاعمل ايه

مش عارف في ايه المرة دي مش حاسس بأي حاجة اهو مسافر و خلاص

يمكن عشان لسة راجع ماكملتش اسبوعين و للا يمكن عشان السفرية اللي فاتت تعبت فيها شوية و القاهرة كانت مغلسة معايا

مش عارف

يا رب خير

المهم عايز منكم شوية حاجات عايز يافطة كبيييييييييييرة جدا مكتوب عليها مصر بترحب بيك يا علوة

و عايز fire works

و عايز بالون شووووووو و احتفالات في كل حتة

و عايز مترو انفاق رايق و مش زحمة و مفيهوش روايح من اللي انتو عارفينها

و عايز ميكروباسات مكيفة و سواقينها زوق

و عايز اتوفق في الشغل اللي رايح اعمله

و عايز ارجع منها مبسووط

بصراحة مش عايز ارجع اكتب الهرس التالت

طبعا عارف اني هاوحشكم

لي طلب اخير لاول مرة اطلبه

ادعولي

حفلة سلمى

ممكن نستريح شويتين من الهرس و نتكلم بقى في حاجة حلوة حصلت وانا في القاهرة الحاجة دي هي حفلة اختي و صديقتي الغالية سلمى صباحي
ايوة اللي انا كنت باكلمكم عنها قبل ما اسافر
الحفلة بجد كانت حلوة قوي و يمكن احلى من حفلتها الاولى
كل شئ كان متوضب كويس
الفرقة و الصوت و حتى الشكل و المناسبة الجامدة طبعا
عيد ميلاد فيروز
حاجتين لفتوا نظري في الحفلة
حسيت ان معظم الناس اللي كانوا موجودين كانهم بيسمعوا الاغاني دي لاول مرة رغم انها غنت الاغاني المشهورة بس
و الحاجة التانية ان كان في اوتوبيس طالع من بورسعيد عشان يحضروا الحفلة و كلهم كانوا سعدا قوي بسلمى و بالساقية اللي طبعا عقدّتهم زي ما عقدتني عشان مفيش مكان زيها ولا حتى اقل منها شوية في بورسعيد

و رغم ان سلمى ما غنيتش الغنوة اللي كنا عاملينها ليها الا ان الروعة اللي كانت فيها الحفلة و اغاني فيروز كانت كفاية عشان تخلي الواحد ينسى الاغنية و الدنيا و الهرس اللي انتم بس تعرفوه
100000000000000 مبروك يا سلمى و يا رب عقبااااااااااااااااااالي
و اسيبكم مع احلى صورتين شفتهم للحفلة
و احدة للمصور االبورسعيدي الموهوب جدا وليد منتصر

و التانية للمصور الجامد جدا جدا جدا محمد عز"ميزو"

الهرس التاني

و تكمل الرحلة العجيبة بيوم جديد في القاهرة
كنت رايح اعمل اختبار لشغل في الجيزة و كنت في مدينة نصرو نازل من الساعة7الصبح
تصدقوا يا ناس ان سواق ميكروباص جيت اركب معاه نزلني و قال:انا عايز واحد رفيع!!!لامؤاخذة يا استاذ
دا مع ملاحظة التلاحم الجماهيري اللا انساني الموجود اساسا
و استنيت لغاية ما تكرم واحد منهم و اتعطف ووافق اني اركب
اما عن موقف السيدة عائشة او السيدة عيشة زي ما بيقولوا
ف انا شايف ان اكبر اهانة لام المؤمنين عائشة رمز الرحمة ان الجحيم ده يبقى على اسمها
ايه ده المفروض يبقى اسمه ميدان كونداليزا او ميدان امنا الغولة لان لا السيدة عائشة و لا أي حد يرضى باللي بيحصل
عربيات مكتوب عليها جيزة و مش راضية تحمل و امم من البشر منتظرة عربية و احدة عشان يهرسوا بعض و يهرسوا أي حد مش مهم راجل او ست
شايلة عيل او طالبة جامعة مش مهم أي حاجة المهم ان كل شخص ياخذ دوره في المعجنة و يتهرس له اكتر من مرة يوميا
و الحمد لله و صلنا الشركة في الجيزة عشان نبدا فصل جديد من الغتاتة
نيجي بقى للامن اللي واقف تحت الشركة
الظابط بيشوف ورقي و بطاقتي و فجاة لاقيته بيبص لي من فوق لتحت و هو بيقول:بقى سيادتك من بورسعيد
طبعا قلبي وقع و قلت يمكن ممنوع دخول البورسعيدية للمكان ده و للا يمكن اكتشفوا ان بورسعيد هي المقر الجديد لبن لادن و تنظيم القاعدة او او او او..................مافهمتش
المهم ما سابنيش كتير في تفكيري و سالني:بقى بورسعيد مش بتحب الاهلي
ليه بقى يا اخويا
.....................................................
(النقط دي مكانها شتيمة كنت باقولها في سري بس ما اقدرش اكتبها قدامكم
بس ممكن كل واحد منكم يحط أي حاجة شايفها مناسبة و خصوصا كلمات الاحتجاج المعروفة)
طب وانا مال امي
انا مابحبش الكورة اساسا و تتحرق الكورة بجاز
انا واحد طالع مشدود و عندي انتر فيوinterview
و مش ناقص و ما نمتش اساسا و سيادته و اخد موقف عشان ماتش خايب
و بعد فاصل الاستظراف و الدفاع عن جيش الاهلي المغاويير ضد الخونة البورسعيدية اخيرا طلعت الشركة و الحمد لله المقابلة عدت على خير وانتهت بالكلمة اللعينة
(هانبقى نتصل بيك يا باشمهندس)
و نزلت
ماكدبش عليكم كان نفسي اروح يومها اختبارات سوبر ستار
ايه مالكم تنحتم ليه
اه كان يومها الامتحانات شغالة و كان نفسي اروح بس ماكدبش عليكم كنت متردد جدا و خصوصا بعد تجربة مؤلمة لي هناك تحبوا تسمعوها؟
اوك
من 3 سنين كنت هاموت و اروح الاختبارات و حاربت الدنيا عشان اسافر و خصوصا انهم كانوا بيعملوها قريب من الامتحانات و كان عندي حالة وفاة في العيلة والظروف كانت نيلة بس رغم دا كله اصريت و سافرت
و قلت هم دول اللي هايدوني فرصة عمري اللي حلمت بيها و بعد كل ده اصطدمت بالوجه الجليدي لمعدة البرنامج اللي قالت في منتهى القلاطة
علي انت صوتك كتير منيح بس نحنا عندنا مستوى بالبروجرام ما بدنا غيره
رغم ان انا عارف كويس انا غنيت يومها ازاي و ما تونتش نهائي
نرجع للهرس
بعد ما نزلت دعيت ربنا و قلت يا رب لو ماهيش ليّا او هايتحرق دمي فيها ماتخلينيش اروحها يا رب
و فعلا لاقيت واحد صاحبي بيتصل بيا عشان نتقابل و كان قريب مني حمدت ربنا و رحت له
و سمعت منه العجب اللي حاصل في اختبارات سوبر ستار السنة دي
واحد انا عارفه كويس و عارف انه مطرب جامد اول ما دخل اساسا و بيقول اول كلمة اصطدم بالوجه الجليدي اللي انتو اساسا ما شفتوهوش لانه ما بيظهرش ع الشاشة بيقوله:شكرا محمد ما مشي الحال
و حكالي انهم خلّوا واحد يغني و يرقص زي هيفاء و انهم كانوا بياخدوا ناس كتير ما بيعرفوش يغنوا عشان يضحكوا الناس عليهم في الفقرة اللاانسانية سوبر مهضوم..........بجد احمدك و اشكر فضلك يا ربي انك مارضيتش لي ان دمي يتحرق و اروح هناك اساسا
صاحبي ده كان في فيصل و كل ده مفيهوش مشكلة لكن ان انا انزل من بيته الساعة اتنين عشان اوصل لابويا م.نصر الساعة خمسة و ربع يبقى كدة كتير جدا و غلاسة بجد و يا سلام كمان لما اقول لكم ان احد الاسباب في التاخير تشريفة كانت قافلة السكة عند مجلس الشعب خلتني انزل و امشي من قبل مجلس الشعب بشوية لغاية عبد المنعم رياض
و وصلت لابويا و الحمد لله
و نكمل كلامنا بعدين اصل الحاجّة بتنادي بقالها فترة

حاااااااضر يا امي جايلك اهو

الهرس الاول

اتكلم معاكم شوية عن الرحلة العجيبة دي
طبعا انتم خلاص عارفين ان انا مطرب في فرقة بنغني في ساقية الصاوي و اماكن تانية
يعني خلاص ما بقاش غريب ان انا اكون في القاهرة و اتحرك فيها لكن المرة دي حسيت ان في مشكلة بيني و بينها لدرجة انها كانت بتتفنن في انها تعجنّي و تتوهني
القاهرة يا اخواننا بلد صعب انها تعلمك أي حاجة بس لازم انها تعلم فيك و تعلم عليك احيانا
بلد كل يوم تديك غصب عنك درس او ممكن تقول هرس و كان كل يوم لي نصيب في هرسة جديدة يعني مثلا:
اصرت نقابة المهندسين المفتكسة انها تجيب كل واحد اتخرج من هندسة و طالع فيها عينه و ميتينه هو و اللي خلفوه و قرر في لحظة افتكاس من عنه انه يطلع الكارنيه
قررت النقابة اللوزعية انها تشحططنا كلنا و تجيبنا القاهرة و منعوا ان اي حد خريج جديد يطلع الكارنيه من النقابة الفرعية اللي فيها بلده لا و كمان تسافر مرتين لو مش اكتر
مرة عشان تدفع الرسوم و تسجل بياناتك و مرة عشان تستلم الكارنيه في احتفالية سيريالية عجيبة لن انسى فيها ان الراجل اللي كان ماسك الميكروفون كان بيقدم حد تاني و قال خلال دقيقتين 32 مرة كلمة يشرفني و يشرفكم و يشرفنا و نتشرف و كل تصريفات الشرف عشان واحد تاني هايقوم يقول خطبة مليانة تهيؤات عن اللحظة التاريخية في عمر كل واحد فينا و اللي هي لحظة استلام الكارنيه العجيب السحري لا و ايه بيقولوا ان دلوقت بدات اول لحظة في حياتكم العملية و رقصني يا جدع على واحدة و تلات اربع ما احنا خلاص معانا كارنيه فشر مصباح علاء الدين
و فجاة طلع من سماعات الدي جي المرحوم عبد الحليم حافظ باغنيته المملة"وحياة قلبي و افراحه"و سبحان الله عمري ما حسيت ان الغنوة دي بتعبر عن أي حد ناجح في أي حاجة بس اهي حاجة لاقيناها موجودة و مفروضة عليناو خلاص
و اللي زاد اني الاقي ناس مصدقين الهبل ده لاء و ايه
العيال جايين لابسين بدل "جمع بدلة" و جايبين امهاتهم و الستات بيزغرطوا و بيصوروا فيديو
كل ده ليه؟ عشان رايحين يستلموا كارنيه
اممال لو اشتغلوا بجد كان حصل ايه
لا و ايه افتكسوا لهم قسم يخلونا نحلفه مالوش علاقة بالهندسة و لا باي حاجة في الدنيا
مجرد كلام يبدا بكلمة"اقسم"و ينتهي ب"و الله على ما اقول شهيد"و جوة أي حشو مالوش علاقة باي حاجة
و هنا مايخلصش اليوم المفتوح كان كمان لي نصيب في حاجات تانية
طب و دا دخل القاهرة بيه ايه؟
الناس جرى لها ايه و المواصلات جرالها ايه بجد؟
ايه الهبل المروري و التوحش اللي بقى مالي الدنيا و ايه اللي بيعمله سواقين الميكروباصات في الناس ده؟
تصدقوا ان سواق كان بيعلم الزباين الادب لمجرد ان واحد منهم اتجرأ و نط جو العربية و هي فاضية قبل ما جناب قبطان الميكروباص يسمح له؟
و طبعا لاني ماعرفش عن المكان اللي انا رايحه اكتر من عنوان في ورقة ف طبعا مصر فيها72مليون مفتي يوصفوا لك السكة اللي تتوهك اساسا و تروح فيها ماترجعش
و بعد كدة كان لازم اروح مدينة نصر عشان اشوف فيها ابويا العيان و قاعد في المستشفى
المهم اتظبطت يومها يا برنسات و بقيت مش شايف قدامي اساساو تهت في اليوم ده ييجي مرتين مرة في الزمالك رايح و مرة جاي
و ماخلصتش الحكاية على كدة
بس انا شايف ان انا طولت عليكم
هانقول كمان بعدين
معلهش استحملوني

حمد الله على سلامتي

حمد الله على سلامتي
و رجعنا يا اسيادنا بورسعيد مرة تانية بعد اسبوع عجيب قضيناه في القاهرة
اسبوع اتفقت كل الظروف و المشاوير اللي ممكن تتعمل هناك انها تبقى فيه
و مش كدة و بس
ابويا كمان يتعب و يروح المستشفى بردو في القاهرة
بس لما رجعت عايز اقول حاجة و احدة
بجد وحشني الفضفضة و الهلوسة اللي كنت باعملها معاكم قبل ما اسافر و كان نفسي جدا اكتب لكم من هناك بس ظروف
كمان انا كنت عامل بوست و كاتب فيه اني رايح و كان نفسي اقابل ناس كتير من اصحابي المدونين لكن حسيت قد ايه و سخيف و مالوش لازمة
بس بردو كان نفسي اشوف الناس اللي حبيتهم هناك
بس خلاص رجعنا و محصلش نصيب
خيرها في غيرها
و هانرغي كتير ان شاء الله
معكم علي الالفي
من بورسعيد

التدوين مش كدة!!!!!محدش ليه دعوة

صباح الفل و حاجات كتير من كدة
بجد وحشني اني اقعد احكي معاكم احكي ع التفاصيل اللي جوايا
و معلهش ما كنتش قادر اتكلم الفترة اللي فاتت بس الحمد لله اهي عدت
على فكرة ناس كتير اتكلموا معايا ان التدوين مش كدة يعني انا مش المفروض اكتب عشان حد يقرا.
المفروض اني اكتب اللي جوايا و خلاص وغلط ان انا عمال اكتب كاني باوجه الكلام لحد
بس كدة عاجبني انا حاسس ان التدوين فتح لي باب ممكن اتنفس من خلاله و ارغي و لاني زهقت جدا من كتر ماكنت باتكلم مع نفسي فقررت ان يكون لي مجتمع و ناس و اصحاب و حبايب اتكلم معاهم
ناس مش هاتكسف و انا باحكيلهم عن اللي جوايا
ناس ممكن اللي باكتبه ده مايهمهمش بس هم ضيعوا شوية وقت و قروه و منهم اللي اتعاطف و منهم اللي شتم و منهم اللي كسل يقرا و لاني مش شايفكم و انتم بتقروا الهلاوس بتاعتي دي فقررت ان انا اعمل كاني باكلمكم و جها لوجه و اتخيل ان في حد بيقاطعني و ها رد عليه و زي ماتفقنا ان اللي ع المدونة ده هو انا بكل ما في و بكل غلاستي و طيبتي و غبائي و ذكائي و و و و و الخ
عايز اقول بجد الحمد لله انه بعت لي الناس اللي عرّفوني ازاي ادون و اتكلم و فتحولي طاقة نور جديدة و كمان ان ربنا بعت لي ناس من المدونين حسوا بي و اتكلموا معايا و فهموا و تفاعلوا
انا مش هاشكرهم بس هاشكر ربنا انه بعت لي دكتور زيفاجو و هيثم محفوظ و سماح موزاييك و كراكيب و جوسي و روزاليا و ابو حميد الشاعر و كونان
و ربنا ما يحرم حد من اللي يحبهم

كن صديقي ولكن

كن صديقي........ ارجوك كن صديقي ربنا يكرمك و يسعدك كن صديقي
مش فاهمني؟؟؟؟أقولك يا سيدي
كون المرايا اللي ممكن اشوف فيها نفسي و توريني الوحش فيا و تزن علي لغاية ما اغيره
و كون المرايا اللي توريني كل حلو فيا و تكبرهولي و تساعدني افرح بكل شئ اعمله حتى لو مش كبير
كون الكتف اللي ممكن اتسند عليه قبل ما اقع و كون اول ايد تتمد لي لو وقعت و كون القلب اللي ممكن يتفتح لي لما اكون تعبان
و كون اول نمرة ممكن اطلبها لما اكون مخنوق و محتاج افضفض و لما اجيلك انسى القرف اللي جوايا و الاقي مافيش حاجة احكيها
كن صديقي و لكن قبل ماتكون صديقي خد بالك
اعرف ان انا مش انت و ان انا مش ممكن اكون انت وان انا لو كنت زيك انت اكيد هاتيجي اللحظة اللي يبان فيها الاختلاف اللي مايخلينيش انا ابقى انت
احترم اختلافي عنك و مش لازم ان انا احب الشئ اللي تحبه انت و مش لازم تكون الناس اللي حواليا هم اللي حواليك
كن صديقى اللي بيحترم مساحتي الخاصة و مايسمحش لنفسه يتطفل على حاجة انا ماحكيتهالوش لاني لو كان ممكن احكيهاله كنت حكيتها من زمان
و اعرف ان اللي انا حكيته ليك حكيته ليك انت بس و لاني ما حكيتوش لحد غيرك يبقى انا مش عايز غيرك يعرفه يبقى انت ماتتطوعش و تحكيه
اعرف ان اللحظات اللي ممكن نكون فيها بتبقى غالبا للهروب من قرف عايشينه مع ناس تانيين سواء قريبين او بعاد فلا تجعل اللحظات دي زيادة لللقرف و الزهق في حياتي
ماتبالغش قوي في اظهارك لخوفك على مصلحتي و تحس انك الناضج قوي المسئول عن القاصر اللي هو انا و تقعد تزن بنصايح كتير لدرجة تخليني ممكن انفذ العكس لمجرد العند
و ده مش معناه انك تطنش يوم ما تلاقيني هاودي نفسي في داهية المهم انك تعرف ازاي ترجعني للطرق الصح بطريقة مظبوطة
كن صريح معايا يوم ماازعلك مني و عاتبني سريعا لان انت لو حوشتها هاتزيد جدا و يوم ما انت هاتخزن لى غلطة في حقك يوم ما هايبدا العد التنازلي للنهاية لان لو حصل حاجة تانية مش عايز اسمع منك كلمة" انا زعلان منك من زمان و انت غلطاتك كترت " و الكلام ده
ما تفهمش مني غير اللي انا قلته بنفسي لفظيا و ماتحاولش تلاقي له معنى تاني غير اللي انا قلته بيه و كون واضح معايا في كلامك جدا
ماتحاولش تضغط عليا ابدا في عمل شئ انا مش مقتنع بيه و اتكلم معايا كتير فيه و يا تقنعني يا اقنعك و لو ماحصلش يبقى عمره ما هايحصل
لو بيني و بينك شغل يبقى ده بعيد تماما عن صداقتنا وحافظ فيه على حقي زي مانا هاحافظ على حقك و لو في يوم الاوراق دخلت في بعضها هاتبقى خلطبيطة لا الشغل هايبقى شغل و لا الصحوبية هاتبقى صحوبية
عمري ما اسمع منك كلمة "اما فلان و اما انا" او "ياتعمل الشئ ده يا ماحناش اصحاب " لان ساعتها فعلا ما احناش اصحاب لان صحوبيتنا دي لازم تكون اكبر من كل شئ و لو اتحطت في الميزان مع أي حاجة لازم تبقى اتقل و اكبر من أي حاجة
حاول دايما انك تكون سبب في قربي من ربنا بالطريقة الصح اللي يرضى عنها ربنا
و عن نفسي انا ممكن اضمن لك كل ده من نفسي ولو ده كله كان منك ناحيتي فاسمح لي اقولك بجد كن صديقي و ربنا مايحرمنيش منك و ربنا يجمعنا ان شاء الله يوم القيامة سوا في جناته

3 سلامات

اسمحولى انى اتكلم معاكوا عن غنوة بحبها اوى

مش عارف ليه

و لا يمكن عارف

اقولكم انى بحس ان الغنوة ده معمولة علشان اللى حابب يغنى و يستمتع فى نفس الوقت يقدر يعمل الحاجات ده سوا

الأول احكيلكم على سر ؟ انتوا عارفين ان اللى بيغنى بيستمتع جدا و هو بيغنى و يمكن اكتر من اللى بيسمع

و يا سلام لو حس ان اللى هو بيغنيله مبسوط ده بيخليه يغنى أحلى و يكون اسعد فى غناه

و ده اللى انا بحسه و انا بغنى الغنوة ده

3 سلامات

الغنوة ده غناها ابونا محمد قنديل و اسمحولى اقول ابونا لأنى بحس قد ايه صوته مليان رجولة و خشونة و مليان حنيه فى نفس الوقت و بحس ان صوته فيه عشق الحبيب و دفاء الاب

فاكرين اخر حاجة عملها ؟؟التتر بتاع مسلسل الأصدقاء ؟؟

شفتوا الروعة ؟

و نرجع تانى ل 3 سلامات

الغنوة ده كمان غناها استاذنا مدحت صالح و عرف بيها ناس كتير و انا منهم

انتو عارفين الغنوة ده سرها ايه

الغنوة ده بتسمح للمطرب انه يطلع فيها كل احاسيسه و الحنيه اللى ممكن يغنى بيها

و كمان بتسمح للمطرب انه يغنى و يسلطن و يلعب بصوته

رغم انها بسيطة جدا لكن فى نفس الوقت بتدى مساحات للابداع الشخصى للمطرب

التسجيل ده موجود من الحلقة اللى انا كنت فيها فى برنامج شبابيك على دريم1 مع اختنا سلمى

و طبعا لظروف السفر محدش يدقق كتيرفي الارهاق الباين في صوتي

و بكده أكون بدات حاجة جديدة فى المدونة بتاعتى يعنى جنب التفاصيل الجوانية بتاعتى هتلاقوا كمان لينكات لاغانى انا مغنيها سواء أعمال معروفة أو أغانى خاصة بيا

ملحوظة الصوت واطي شوية بس انا معرفتش اعالج الحكاية دي بس يا رب تعجبكم

">لو حابب تحملها اضغط هنا

كلمة اخيرة

هيثم محفوظ و احمد شلبي

شكرا ليكم

طبيب نفسي

يعني ايه طبيب نفسي؟؟
السؤال غبي شوية؟؟شويتين؟؟طب بلاش شتيمة و استنوا معايا و اصبروا شوية و حاولوا تفكروا معايا
يعني ايه طبيب نفسي؟
و ايه اللي يخليك تروح له اساسا؟
هل هو زي مانا باتخيله حلال العقد اللي بمجرد ما هاروح له هلاقي حل لكل القرف اللي باشوفه و يكون السبب في اني هاتخلص من الحالة اللي بتيجي ساعات و تخليني اسيب دقني و ماخرجش من البيت و بابقى نفسي اتكلم مع أي حد وافضفض له وفي نفس الوقت مش طايق ابص في خلقة أي حد
و للا هو صديق بالفلوس تقعد تشكي همك قدامه و هو يعمل انه مركز معاك و في الاخر انت بتكع دم قلبك و اهو رزق الهبل؟
وللا هو راجل تروح له عشان ترمي قدامه كام كلمة و في الاخر يكتب لك شوية ادوية تدوخ و تجيب صداع و تشيل الصداع و لا بتاثر فيك
و هو فعلا فيه حد يقدر يفهم اللي جواك و يتصرف معاك بشكل ممكن يغير حاجات كتير في حياتك؟و يكون امين على سرك و يتعاطف معاك و يشد عليك و حاجات كتير من ده؟


انا مش من الجهلة اللي مش بيآمنوا بالطب النفسي لكن انا مش مصدق انه موجود في حياتنا الشخص اللي بيمارسه صح
و لو كان موجود يا ريت حد يكلمه عني و يوصيه عليا و يديني رقمه عشان نفسي اتكلم شوية معاه في حاجات تخصني و مالكوش بيها أي دعوة
هلوسة مش كدة؟؟معلهش استحملوني الايام دي

امتحانات تاني لااااااااااااااااااااااااااااااااااااا

امبارح رحت اختبار عشان ادخل في المنحة اللي عاملاها وزارة الاتصالات عشان اخد كورسات في web developing
و يا صلاة النبي يا صلاة النبي لو الامتحان ده عشان ناس عايزين يتعلموا اممال امتحانات الناس اللي عايزين يعلموا الناس و يدرسولهم يبقى ازاي
انا دخلت امتحانات IQ كتير بس عمري ماشفت الكلكعة دي قبل كدة
المهم من الحاجات اللي مزعلاني اني كنت نسيت الاحساس ده
احساس انك تكون خارج م الامتحان مش عارف انت عملت ايه و بيبقى اكبر امل ليك في الدنيا انك تقابل اقل عدد من الناس او ماتقابلش حد احسن لانك ما بتبقاش مسئول عن تصرفاتك ساعتها
و كنت نسيت الكبسة اللي كنت باحس بيها بعد الامتحان
تصدقوا ان اللي سمى الامتحان امتحان عنده كل الحق
لان الامتحان ده نوع قوي جدا و مؤلم جدا من المحنة ربنا ما يوريكم

و بكدة يبقى امل تاني من احلام الشغل للفتى الخريج بيضيع و سعيكم مشكور
ملحوظة انا باشكر جدا الغلس اللي متعود يقاطعني كل مرة انه قدّر حالتي و بعد عني من نفسه

سلمى

سلمى
اسمحولي كمان احكيلكوا عن حد مهم في حياتي
حد ماشفتوش في حياتي ييجي 10 مرات على بعض لا و ايه متفرقين على سنة بحالها
بس من الناس اللي لازم يفرقوا معاك
الناس اللي مايحبوش حد يزود معاهم في الكلام او يلغي الحدود بينه و بينهم.
بس هم بيستمتعوا بانهم يلغوا أي حدود بينهم و بين كل الناس .......هى من الناس اللي ممكن يكونوا دايما سبب في سعادة كل اللي حواليهم حتى لو ماعملوش ليهم حاجة الناس اللي لازم يلفتوا نظرك و يعرفوا ازاي ينورا كل قعدة و كل مكان حتى لو مش قاصدين
انا باتكلم عن اختي اللي ماجابتهاش امي سلمى صباحي بنت عمنا حمدين اللي ممكن تتفق معاه او تختلف معاه بس لازم تحترمه
بس دي مش قضيتنا
المهم ياجماعة احب اقولكم عرفتها ازاي
اللي مايعرفش احب اقوله ان انا واحد من المطربين اللي بيغنوا في فرقة اسمها "ستيب باي ستيب" "step by sep
و كنت جديد في الفرقة و كانوا عاملين حفلة قبل ما اشترك معاهم و الحفلة كانت جامدة جدا و مكسرة الدنيا
كنت انا يا جماعة جاي من بورسعيد طازة ماعرفش حد و لا حد يعرفني و ماكانش عندي اصحاب اساسا
و لاقيت ان كل واحد في الفرقة بيحاول يدلعني فعلا و يحاول ينسيني الرعب اللي كنت فيه
عارفين فيلم النداهة و فكرة ابن الاقاليم اللي بينزل القاهرة
كنت سامع الغنوة بتاعة "شئ من بعيد ناداني" بترن في ودني و على فكرة سلمى ماكانتش بتحضر البروفات لانها كانت مشغولة في البرنامج
المهم كنت شفتها اخر بروفة قبل الحفلة و ماتكلمناش كتير
بس فاكر اني كنت مخضوض قوي يوم الحفلة و لاقيتها بتقولي
ايه يابني انت طالع تغني يعني احلى حاجة في الدنيا
و من يومها بقيت لما اطلع اغني في أي حفلة بابقى طالع اتبسط و استمتع مش طالع شغل
ده كان اول موقف
و كنت بعد ما اخلص الحفلة بكام ساعة باكون في الاوتوبيس راجع بورسعيد كاني خلصت مهمة و رجعت ماباحسش اني عامل حفلة و لا باسمع أي صدى
لاقيت اول حد بيهنيني ع الحفلة و بيعلق على ادائي و قبولي سلمى
المهم توالت الحفلات و بقيت اشوفها اما يوم الحفلة على طول او قبلها على طول
و فجاة لاقيتها بتتصل بيا عشان اكون معاها في البرنامج و حسيت قد ايه هي فرحانة بيا زي ماهي بتحاول تساعد كل اللي حواليها و الحمد لله الحلقة كانت حلوة جدا و عملتلي انا صدى حلو جدا من كل اللي شافها
عايز اقولكم بعد الحلقة دي كانت اخر حفلة ليها معنا في الفرقة
و بدات سلمى تجهز لاول حفلاتها في الساقية الحفلة يا جماعة بجد كانت تحفة رغم اني ماحضرتهاش بس كنت من اول الناس اللي كان معايا السيديهات و الحمد لله الاخوة اللي بيننا فضلت و استمرت و بقت من اهم الناس اللي ممكن اتسند عليهم و واحدة من عزوتي اللي كلمتكم عليها قبل كدة
كل ده انا كنت باتكلم عن اختي سلمى
بس دلوقتي اسمحولي اتكلم عن سلمى المطربة......بالنسبة لي سلمى مش مجرد مطربة لا دي غناء و فكر

وانا باحترم جدا المطرب اللي بيغني بقلبه و احساسه و كمان بعقله و بقضية و فكرة تشغله و الفكرة اللي بتبقى مسيطرة عليها في وقت معين هي اللي بيبقالها دور البطولة في الشئ اللي بتعمله
يعني كان مسيطر عليها فكرة الحلم و عشان كدة كانت الحفلة كلها حلم جميل ليها و لكل اللي حضروها
انتو عارفين اغنية فنان فقير بتاعة وجيه عزيز؟؟انا سمعت منها الغنوة دي كاني ماسمعتهاش من أي حد قبل كدة..الغنوة اتغنت زي ما اتكتبت مش زي ما اتغنت وحكت عن اللي بيحصل للغلابة اللي زينا اللي لسة ملطشة معاهم و بيدوروا على فرصة في الغنا
و سلمى من اول الناس اللي سمعتهم في مصر بيغنوا لمارسيل خليفة و عايدة الايوبي و من الناس اللي لما غنوا لمنير حافظوا على شكلهم و ادائهم بعيد عن سكة منير
الى سلمى
ربنا يملى حياتك فرحة و يسعدك انت و اللي في بالك زي ما انتم فرحة لكل اللي حواليكم



على فكرة يا جماعة سلمى عندها حفلة جامدة جدا في ساقية الصاوي يوم الخميس 23-11-2006
هاتغني بس لفيروز بمناسبة مرور 71 سنة على وجود قمر فيروز اللي بينور الارض و بيملاها رقة و عذوبة و احساس بس المفاجاة الحلوة اللي كانت لي
ان سلمى هاتغني غنوة من الحاني الغنوة دي كاتبها هو احمد البورسعيدي دكتور زيفاجو و على فكرة هو اللي فتحلي باب عالم التدوين و رغم ان هو بلدياتي لكن سلمى هي اللي عرفتنا ببعض !!!
و انا فرحان قوى بالغنوة و باختي سلمى و نفسي اقابلكم كلكم يوم الحفلة دي
علىة فكرة انا سامع الغلس اللي بيقاطعني كل مرة بيقوللي انت عمال ترغي من الصبح علشان تعمل دعاية لحفلة صاحبتك ؟
يابني بجد اخرس مانتاش فاهم حاجة بس بجد اللي انا نفسي فيه اني اتعرف على كل المدونين اللي في الدنيا و نتقابل و انا نفسي كلكم تيجوا الحفلة و نتقابل كلنا
كل سنة وانتم طيبييييييييييييييييي علي الالفي

انت تخييييييييييييييييييييييييييييييين ماينفعش تغني

زي ما باحب اقولكم عن حاجات كتير جوايا باحبها و ناس مهمين في حياتي
اسمحولي النهاردة اتكلم عن حاجة تانية
انا كنت حكيت لكم قبل كدة اني فتحت عينيا ع الدنيا مالقيتش نفسي باعرف حاجة غير اني اغني
و طبعا الغلس بتاع كل تدوينة بيقول دلوقت :
دانت صدعتنا و قرفتنا كل شوية بتغني بتغني
و ارد عليه و اقوله ربنا يخليك ابعد عني الساعة دي
المهم طبعا لان كتير منكم ماشافنيش فاماتعرفوش الحقيقة العجيبة اللي في حياتي و هي اني تخين
مش مفشول قوي بس تخين
و ده اللي باصتدم بيه جدا و باتفاجئ بيه كل ماباروح اشتري هدوم
تقولش الدنيا ما فيهاش ابدا غير مانيكانات و موديلز ولو لاقيت البياع يطلع عيني في السعر و هو بيقول الكلمة الخالدة:
معلهش يا بيه مقاسات خاصة و مش هاتلاقي في السوق
كل ده مش مهم لكن اللي باصطدم بيه بجد الكلمة اللي قرتوها في العنوان
انت تخين يابني ماينفعش واحد زيك يغني
روح خس الاول قبل ماتفكر تيجي هنا
باحس ان عماد حمدي طلع من فيلم الخطايا و غير الكلام بدل ما يقول انت لقييط بدا يقول انت تخيين اخرج من بيتي
هم اللي ماسكين صناعة المزيكا في مصر مايعرفوش ان في كل بيت و عيلة في الدنيا في واحد و اتنين و عائلات كاملة كلهم تخان
وللا خايفين يجرحوا نظر الناس بواحد تخين اللهم احفظنا زي ماكون جربان وللا عندي اعاقة او من المشوهين
و للا هو مافيش تخان بيمشوا في الشارع و بيروحوا الجامعة و بيحبوا و بياكلوا و بيدخلوا الحمام زيهم زي أي كائن حقيقي ماشي على رجليه سواء كانت اتنين و للا اربعة
و الغلس عايز يقول حاجة ّ!!!!عارف يا سيدي ان اللي عندهم اربع رجلين مابيروحوش الجامعة بس انت بتوقف الكلام عند ملحوظات رزلة زيك!!
وللا هو المفروض ان التخان يتلموا في مراكز لاصحاب الاحتياجات الخاصة و يتعمل ليهم اعادة تاهيل
انتو عارفين ان ده خلاني احب تخني و شكلي جدا و عامل اليوزر نيم بتاعي في كل حاجة كلبوز
و ازاي في الخليج يقيموا الناس على اساس انهم مطربين جامدين و موهبتهم عالية و اللي في ايديهم صناعة المزيكا في مصر بيدوروا بس ع المزز الجامدة و الشباب اللي طالع طازة من الجيم و فاتح زراير القميص للاخر
يعني لو حسين الجسمي دا كان بيدور على فرصة هنا في مصر كان زماننا اتحرمنا من مطرب عبقري بقى!!!! وللا ايه؟
على فكرة انا كمان مش بتاع اامان يا لالاللي و للا الاغاني اللي بتتقاس التايمر
لا .....انا واحد باحب اغني الاغاني اللي كل اللي في جيلي و سني بيحبوها و على فكرة اللي فوق دي صورتي انا من غير فوتو شوب والله
و كمان لكل اصحابي انا بدات اسجل كام حاجة و هانزلهم قريب جدا ع المدونة و على فكرة كمان في لحن جديد لي هايتغننى قريب جدا و استنوا اخباره في التدوينة الجاية

انغام

احكيلكوش عن حاجة تانية باحبها في حياتي
حاجة ماعرفش ليه لاقيتني باتشد ليها و باحترمها جدا
الحاجة دي هي انغام اه والله انغام المطربة ايه مالكم مستغربين ليه؟
و نفس الشخص بتاع كل مرة بيقولي طب واحنا مالنا؟؟ ياعم مانا قلتلك قبل كدة حابب تقرا اهلا بيك مش حابب ماتتعبش نفسك وتتعبني معاك
و الغريبة يا جماعة انه بيقعد يقرا للاخر!!!!!
المهم كنت اتفقت معاكم اني هنا هاتكلم عن حاجات تهمني و تخصني و موجودة جوايا و دي من ابرزها
تقولولي انت ايه اللي خلاك تتشد لصوتها اقولكم ماعرفش
واقولكم كمان اني كان عندي 6 سنين لما نزل شريط اسمه
"لا لي لي لا لي" و شبطت فيه و ابويا جابهولي و من يومها الست دي ما قالتش غنوة و ماسمعتهاش
بس الغريبة بجد اني باحس انها متابعة حياتي و بتغنيلي انا بس في كل اللي بيحصل لي يعني اقولكم
انا كنت في الاعدادية ايام اول تجربة مراهقة و حسيت فيها بنفسي شوية لاقيتها بتغني باحبك قولها للعالم و حسيت قد ايه اني منطلق زيها و لما القلب الصغير بدا يشتغل لقيتها بتقول غنوة عجيبة اسمها معنى حبى هاكتبهالكوا في الاخر
المهم دخلت ثانوية عامة و بدات اعيش في الدور و احس اني كبرت و لازم اتصرف بطريقة رزينة او يعني بدات اتصرف بطريقة مش طبيعية ولا قد سني لاقيتها نزلت كمان شريط اسمه "بتحب مين" برده تحس ان اللي عاملاه واحدة كبيرة قوى في السن و التجارب مش شابة صغيرة
اقولكم على حاجة؟ باحس ان المزيكا اللي في الالبوم ده ممكن تتدرس من جمالها لكن باحس كمان انها حرام تنزل في السوق في نفس الوقت اللي كن فيه ايهاب توفيق شغال علينا ب عدى الليل و مصطفى قمر لسة دايب في دباديبو
يعني و الشريط نجح عند الانغاميين ولكن حبسها في شكل انها مطربة الصفوة و بس وعمل لهم حالة حلوة لكن كان لازم تحصل نقلة كبيرة
وده للي حصل الست عملت البوم خطير اسمه وحدانية مش عارف اقولكم ايه اللي حاصل فيه غير انها بدات تحس بسنها و باللي من قدها و تمزج بين اللي اتعلمته من الغنا الكلاسيكي قوى و الغنا اللي فيه تجارب مختلفة بس بشكل مقبول جدا في السوق و في الوقت ده كنت انا لسة في سنة اولى جامعة "اعدادي هندسة و العياذ بالله"
و كنت بدات أكبر بجد و دماغي تبدا تشتغل و تفكر في الدنيا و اوازن تصرفاتي مع اللي حواليا بس لسه كننت مقفل
كبرت شوية كمان و بدا يتكون لي ذوق بجد في المزيكا اللي باحبها و انطلقت اسمع كل الناس و هي كمان كانت قد الوقت ده
في السنة دي كان عمرو اكتسح الدنيا و عامل حبيبي ولا على باله و محدش قادر ينزل أي حاجة و نزل شريط نغام ليه سيبتها مزيكا ايه و غنا ايه و ذوق ايه و ماكدبش عليكم ان يوم مااشتريت الشريط ده
زعلت قوي و قلت هي بدات تهبل وللا ايه و مش عارف اقولكم اني بعدها ماكنتش باستغنى عن الالبوم ده و كان لكل حاجة في سنتها موقف ليه غنوة
بصراحة كمان استغربت ان فيه مطربة يكون عندها الجراة و تقول حاجة زي ليه سيبتها وللا ماجابش سيرتي؟
و لما بدات ادرس مزيكا و فهمت اكتر نزلت هي البوم عمري معاك و اللي انا شايف انه هايعيش كتير جدا رغم انه نزل بعده حاجات تانية لكن المزيكا اللي موجودة فيه صعب ان انغام نفسها تقدر تكررها
و على فكرة بيتهيالي ان ده اللي حصل فعلا
المهم مش عايز اكمل حكايتي مع انغام لاني شايف كتير منكم بدا يتتاوب و ينام مني بس اللي اقدر اقوله اني اول مرة ابدا اغني غنيت لانغام و على فكرة انا مش من نوع المعجبين اللي لما بيحبوا نجم بيحبوا كل حاجة بينزلها حتى لو قال ريان يا فجل
لكني باحس ان الست دي بتحترمني انا و كل اللي بيسمعوها
بتحترمني في اختياراتها و في كلامها و في اغانيها
و باحس ان أي حد بيفهم مزيكا حتى لو مش بيحبها اكيد بيحترمها جدا و بيستنى يسمع هي هاتعمل ايه
و على فكرة اكتشفت ان فيه نوع زي انغام و منير الناس دي ليهم ناسهم اللي ممكن يزيدوا اه لكن مش ممكن ينقصوا يعني ليهم جمهورهم الثابت ممكن يزيد لكن مايقلش
في الاخر اسمحولي اقول ان اللي انا كتبته ممكن مايهمش ناس كتير منكم لكن دا اتفاقنا من الاول انا هافضل اكتب كل اللي جوايا و اللي انا حابب اكلم فيه اصحابي
انغااااام شكرا لانك موجودة بيننا
علي الالفي

احب اقول اني بجد اتشرفت جدا و فرحت جدا بدخول عالم التدوين

لكن اللي فرحت بيه اكتر الناس اللي عرفتهم عن طريق العالم ده

و الناس اللي لسة ماعرفتهمش و عرفت مدوناتهم و نفسي اعرفهم زي العبقري خالد الصاوي

انتو عارفيين انا باحب و باحترم الراجل ده من قد ايه و انبهرت و انصدمت و فرحت جدا بالضجة اللي عملها في يعقوبيان

و فرحت جدا كمان لما عرفت مدونة سامية بنت ععمنا صلاح جاهين

ده غيرعزوتي اللي انا باعيش بيهم واولهم دكتور زيفاجو و خيوف و روزاليا وجوسي و زحل و شاهد ع العصر

عشان كدة حاطط عليهم اسم ناس باتشرف بيهم

كل سنة وانتم طيبيييييييييييييييييييييييييييييييييييييييييييييييييييييييييين

بانوا بانوا

بعد صباح القشطة و الذي منه
اخباركم ايه كل سنة وانتم طيبين جدا
و شكرا جدا لكل اللي ردوا ع اللي فات و ما زهقوش و دلوقتي اسمحولي نتكلم في موضوع غتت شوية بس استحملوا معايا

شفتوا المسلسل بتاع السندريللا؟؟؟
طبعا اللي كان بيقاطعني في اول تدوينة زمانه دلوقتي بيقوللي و ده موضوع غتت بالذمة؟!
اقوله اسكت يابني انت و ماتصدعنيش و اقرا للاخر
طبعا مش قصدي اسالكم عن رايكم في مستواه الفني وللا اسالكم عن رايكم في اللي عمل دور كامل الشناوي او صلاح جاهين
انا كنت عايز اتكلم معاكم زي ما اتفقنا من الاول عن حاجات جوايا و صادفت ان المسلسل ده فتح عيوني عليها و زود خوفي منها
عارفين انا اقصد ايه؟
اقصد الدنيا لما تتغير على الواحد و حياته تتشقلب
يعني لما النور يبقى مفتوح عليه و الدنيا كلها بتجرى وراه
و فجاة النور ده ينطفي و الدنيا كلها تديله ظهرها
شفتوا اكيد سعاد حسني كانت ازاي و ازاي كان كل واحد في الدنيا دي يتمنى بس انها تبصله ان شا الله حتى ما تتكلمش معاه و ازاي كان كل الوسط بيجري وراها عشان تشتغل معاهم
فجاة كدة الست دي ماتلاقيش حد ينتج لها اخر افلامها و تتبرع باجرها هي و العبقري احمد زكي عشان يظهر بالشكل اللي يناسب تاريخها
و كمان تموت وحيدة غريبة تشكي للدنيا جحود اقرب الناس و تموت
فقيرة مش لاقية تمن علاجها اللي بقرار رائع من فارس همام يتم و قف علاجها على نفقة الدولة
عارفين ليه لانها كانت ثروة فنية و طاقة رائعة في بلد لا يقدر ثرواته و لا يهتم بيها كما يجب
مش عارف انا جبت الكآبة دي منين بس ده اذا كانت واحدة من الناس اللي بنقول عليهم سوبر ستار و حصل لها كدة
اممال الناس اللي اقل منها في طاقتها و اجتهادها هايحصل معاهم ايه؟
و للا حتى الناس اللي ماتستاهلش اساسا لما حالهم يتغير هايحصل ايه؟
وللا الناس اللي محدش يعرف عنهم حاجة؟ دول بيتهيالي انهم حالهم احسن كتير لانهم محدش بيعبرهم لا وهم كويسين ولا هم حالهم وحش
المهم حبيت اسالكم في الاخر هو الواحد لازم يعمل ايه لبكرة و للناس عشان مايحصللوش كدة
و فجاة كدة لاقيتني باغني غنوة عمرى ما حبيتها بس دلوقت ماباغنيش غيرها الله يرحمك يا عم صلاح جاهين انت و السندريللا لما قلتم:

بانوا بانوا على اصلكم بانوا
و الساهي يبطل سهيانه
و لا غنى ولا صيت دول جنس غويط
و كتاب مايبان من عنوانه
بانوا
ايوة بانوا

اللهم انا نعوذ بك من شرور انفسنا و سيئات اعمالنا

بعد صباح الفل والذي منه حبيت اشكركم جدا ع الاقبال البشع ع المدونة الاولى لي

و حبيت اكتر اشكركم على انكم استحملتوا الرغي اللي فيها

خلص رمضان و الشيطان خرج و سانن سكاكينه

و مش عارف اقوللكم بجد قد ايه اترعبت ساعة اذان المغرب اخر يوم رمضان

يمكن انا باهلوس دلوقت بس اتفقنا اللي حابب يقرا اهلا بيه و اللي مش حابب مايشتمش

اللهم انا نعوذ بك من شرور انفسنا و من سيئات اعمالنا

علي

هذه انا واول كلامنا سلام

هذا انا
اول حاجة جوايا احب احكي معاكو فيها هو انا
اه انا
و ماتستغربوش لما تلاقوني باقول حاجة جوايا ماعرفش ليه باحس اني متعاطف معايا لدرجة مش طبيعية بس المهم
ان انا علي الالفي
مولود يوم 20/5/1982 يعني السنة دي بقى عندي 24 سنة منهم 7 سنين بالتمام و الكمال في كلية هندسة و ده هانجيله بعدين
فتحت عينيا ع الدنيا ما لاقيتش نفسي باعرف اعمل حاجة بجد غير اني اغني!!!! اه باغني و طبعا حد مستعجل بيقول وده ايه علاقته بالهندسة اقوللك يابني استنى و ماتتعبنيش معاك
المهم يا اسيادنا زي ما قلت لكم من شوية ما بعرفش اعمل حاجة بجد و بابقى فرحان و انا عاملها غير اني اغني
بس كمان مالقيتش غير ان ظروفي و اهلي و الدنيا كلها واقفة قصاد فكرة اني اغني
و نفس اللي كان بيقاطعني من شوية سامعه بيقول : اهو بدا يشتكيي و يصدعنا
يابني بجد اسكت و لو مش حابب تكمل تبقى فرصة سعيدة مالكش نصيب تكمل معانا
المهم انا كنت باقول ايه ؟؟؟ اه ظروفي و اهلي و الدنيا كلها واقفة قصاد فكرة اني اغني
و انا ذنبي ايه اني طلعت شاطر شوية في المدرسة و مجموعي جاب هندسة
عمري ما اتمنيتها و عمري ما تخيلت اني اكون فيها بس ده النصيب و اللي ربنا قدره لي
المهم ماكدبش عليكم العملية عصلجت معايا قوي و كل سنة كانت بتبقى اصعب م للي قبلها
واللي زاد اني الاقي فرص معقولة جدا لي ك مطرب بتضيع بسبب الكلية و الدراسة
ماطولش عليكم ماهو برده الواحد في اول موضوع لازم يخفف عشان ماتزهقوش من اولها
المهم انا و بعد 7 سنين من المعاناه ربنا اكرمني واتخرجت لا و ربنا كرمه مايقفش عند كدة بس و كمان اخدت اعفاء من الجيش
بس تعالوا بقى هنا و الدراما هاتبدا
عارفييين انا عامل ايه دلوقت
انا بجد في اكبر حيرة ممكن حد يبقى فيها و واقف في الاختيار بين 3 اختيارات اصعب من بعض
اولا انا طالع من الكلية زي معظم الخريجين ميييييييييييييييح
يعني مستوايا كمهندس كومبيوتر ما يسمحليش اني اشغل مراجيح
يبقى لازم يابني تبدا تاخد كورسات و تظبط نفسك
و هنا تبدا الحيرة التانية
مانا كنت قلت لكم اني بقى عندي 24 سنة يعني بالصلاة ع النبي واحد زي اللوح ماينفعش يقعد كدة من غير شغل و بقيت بجد مش حاب اخد المصروف من ابويا لحد كدة دا غير ان اساسا الكورسات دي لوحدها مشكلة كبيرة في تمنها
و بعدين مانا كنت قلت لكم ان انا اساسا ماباعرفش اعمل حاجة غير اني اغني و ده يعني ان انا لازم ابدا ادور على فرصة كويسة لنفسي عشان ابدا اغني لان كمان الفرصة بتقل مع مرور الزمن
ماعلش لو كنت غلست على حد فيكم ده لو كان حد قرا اللي انا كتبته اساسا
المهم لو حد منكم قرا و اتعاطف معايا و يحب يفكر معايا اهلا بيه
و اللي يحب يقرا و يمصمص شفايفه و يقول ياعيني عليه برده اهلا
بس محدش و النبي يشتم و يقول ايه ده
دي المدونة بتاعتي و حبيت اكلمكم عن كل اللي انا باحبه و اهم حد باحبه في الدنيا اللي هو انا
كل سنة و انتم طيبييييييييييييييييييييييييين

دي البداية

قريبا هانبدا نجكي سوا
استنوني
كل سنة و انا و انتم طيبين