عارفين

دخلت النت اكتر من مرة و من كتر اللي كنت عايز اكتبه

ماقدرتش اكتب اي حاجة

المهم

انا هاختار مقطتفات من التلات اسابيع و نحكي سوا فيها

طبعا انتو عارفين ان فات عليا عيد ميلادي و كنت لوحدي هناك في الواق الواق اللي انا فيها

قررت انى يومها اتهور و اعمل يوم عربدة و ادخل ع النت

طبعا فرصة وجود نت في المكان ده

شبه فرصة انك تكون ماشي في جزر المالديف و تلاقي حد بيسمع شعبان عبد الرحيم

و عشان يا حبايبي ادخل من اقرب سيبر

يادوبك باخدلي مشوار بتاع كدة32كيلو عشان اوصل الجيزة و اتكلم بس مش مهم

و طبعا كانت كبسة سخيفة انى الاقى و لا واحد ع الماسنجر اون لاين

بس بردو ده كان ليه فايدة

اتصلت بامى و دخلتلى ع لنت و ملت انا و هى احلى عيد ميلاد لمدة ساعة اون لاين انا و هي بس

بعدها يجي بكام يوم
طلعت مامورة
اول سفر ليا عن طريق الشغل
عارفين لفين؟
الواحات البحرية
و يا ريت الواحات اللي بنسمع عنها
يعني مش عيون المية و النخيل و الحاجات الحلوة دى
لا
انا كنت في مستعمرة سكنية على بعد ييحي 50كيلو من العمار
لا و ايه
تفتح الحنفية تلاقي مية حمرة

الجو ما شاء لله مشبع ببرادة الحديد الخام
لدرجة ان الواحد بعد ما بيدخل ياخد دش بيطلع ريحة عرقه ارحم من ريحة الصدى اللي بتبقى فيه
و الاحلى و الاحلى المشوار و الصحبة مع مديري
بلاش اتكلم لاحسن يدخل ع النت و يقرا

المهم
انا النهاردة سافرت المنصورة لهيثم محفوظ و عملت معاه بروفة عشان حفلة يوم الاحد الجى
و رجعت الحمد لله على بورسعيد
لاول مرة اتعلم معنى الشوق في الدنيا
البد بجد وحشتنى ووحشنى الشوارع
وحشتنى نضافة شوارعها و صوت اهلاها العالى و تاكسياتها الرخيصة
و وحشني قوى امى و ابويا
ووحشتني جدتى امينة

الحمد لله انا شوفتهم

آآآآآآآآآآآآآآآآآآآآآآآآآآآآآآآآآآآآآآآه

نسيت احكيلكو عن وجود حد مهم جدا في حياتى الايام اللي فاتت

و هو صديقي الغالي او زى ما بنقول له عمىىىىىىى ساهر

ساهر الايام الاخيرة بدانا نتقابل و خرجت معاه اكتر من مرة و كنت يا عيني باشحططه معايا عشان يوصلنى لمكان سكني ع الصحراوى

كمان عرفنى باصحابة

فعلا ناس حلوة قوى و شلة بجد جدعان و لذاذ جدا

المهم سيبكم من كل ده
انا مستنيكم ان شاء الله الاحد الجاى
3/6
في ساقية الصاوي قاعة الحكمة في حفلة فرقة صبا
و ان شاء الله تبقى حفلة حلوة و تنبسطوا منها

وحشنى النت

خبر عاجل

يحتفل كل سكان كوكب الارض و الكواكب المجاورة بعد غد الاحد

20/5

بذكرى عزيزة على قلب كل انسان

الا و هى ذكرى وجودى على هذا الكوكب

بالعربي يعني عيد ميلادي بعد بكرة

و مش عايز ادخل بيكم في متاهات ان ده اول عيد ميلاد ليا و انا بعيد عن اهلى و اصحابي و اخواتى و بورسعيد و الكلام ده

انا مش طالب هدايا

كل اللي عايزه ان كل واحد فيكم يبعتلي هدية بانه يدعيلي ان ربنا يساعدنى و يصلح حالى

و اتفضلوا ادخلو على اول بوست من القاهرة

ـــــــــــــــــــــــــــــــــــــــــــــــــــــــــــــــــــــــــــــ

وحشني النت

اولا بجد شكرا جدا جد لكل واحد كتب لي كلمتين دعم و دعالي في الايام للي فاتت

و عايز اقول

ان الحمد لله ربنا خلى دعاكم يجي بفايدة و الحمد لله

انا مبسوط جدا في شغلي و مع الناس اللي نا معاهم

و كان فيه مفاجاة في انتظارى

انا دلوقت ساكن في مستعمرة سكنية جنب الشغل

الحياة هنا جميلة و هادية

و الناس هنا بسيطة جدا جدا

و كل واحد زارع قدام بيته فاكهة

طول ما انت ماشي تلاقي حد يعزم عليك بكوباية شاي

و للا يرحب بيك و يوقفك يتعرف

مكان فعلا جديد و غريب الحميمية اللي فيه دي

كل الناس ساكنين فى منطقة واحدة و بيروحوا يشتغلوا في مكان واحد و يرجعوا تانى علي بيوتهم

و عيالهم مع بعض من بتدائي لثانوى

و سهل جدا انك تلاقي كل الناس هنا اصحاب

طبعا باتكلم على اللي من سنى لانهم بيعتبروا نفسهم ولاد المكان من صغرهم

و كل المكان بينام من الساعة عشرة

العيب الوحيد هو بعد المكان عن العمار و عن القاهرة

حوالي تلاتين كيلو بس

و ده بيضطرنى كل ما احب انزل اركب اوتوبيس المستعمرة بتاع الساعة خمسة

هو اساسا بيطلع6ونص

تصدقوا انا كنت مدي ميعاد لواحد صاحبي السعاعة6.5في الدقى و صلتله8إلا تلت عشان الباص عطل بينا مرتين

بس مش مشكلة

على فكرة انا عندى تفاصيل كتيرة عايز اكتبها بس لانى قعد في سيبر و الوقت مش مكفيني عشان راجع كمان شوية المستعمرة هابقى حكيلكوا عليها قريب

لن بردو ما حبيتش اجي بايدي فاضية

طبعا كلكم عارفين هيثم محفوظ صاحب مدونة صبا

هيثم عامل فرقة جميلة اسمها صبا و عنده حفلة في ساقية الصاوي ان شاء الله يوم الاحد

3/6/2007

و الاحلى انه دعانى لانى اغنى معاه في الفرقة و خلاص هانبدا بروفات قريب

ادعولنا و هانستناكو في الحفلة ان شاء لله

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اتنين...تلات...اربع....خميس

ملحوظة البوست ده ممكن يكون طويل حبتين عشان كدة ماتزهقوش

..................

..............

الاثنين
سافرت انا ووالدى و والدتى هم كانوا في مشوار عائلي
و سيبتهم انا و روحت الجيزة عشان اشوف شقة كنت وصيت احد اقاربنا عليها
و هنا يبدا الشللوت الاول في المشوار
روحنا عشان نقابل صاحب البيت
و كان في استقبالنا الست والدته في حوش العمارة
فاكرين مارى منيت في المسرحية لما كانت بتنط من الشباك و تقول"انت جايية اشتغلي ايه"المهم لاقيت الولية مسكت قريبي اللي كان معايا و افترسته بوس لدرجة ان الواد وشه كان مزرق و اقسم انه هاينقع وشه في بوطاس عشان يطهره
المهم و بعد السلامات و اللوك لوك اللي ميجيبش همه
-احنا جايين يا حاجة عشان الشقة اللي في التالت
واحنا كلمنا الحاج سيف امبارح عليها و قال انها فاضية
لاقيت وش الولية فجاة قلب بقت شبه عربيات سابق و لاحق
ماكانش يتعز يا نضري
الشقة متسكنة من مدة
طبعا انا وقفت و بصيتلها كدة
راحت باصة ناحيتي في نظرة متحفزة
مالك انت قومت لية
لا يا حاجة مافيش
و مشيت انا و الواد قعدنا في قهوة جنبها و فجاة لاقينا الحاج سيف رايح يصلي العصر
سلامو عليكو يا حاج
و بعد فاصل من الكلام اللي مايجيبش همه بردو
ماكانش يتعز يا نضري
راح الواد قايل له
هو مش انا كلمتك امبارح و انت قولتلى انها فضيت؟
و بمنتهى البرود
ماحصلش
و مشينا و سيبنا الحاج و تبددت امالى في السكن
عموما هى كانت شقة بيئة و انا مش عايزها من الاول
ده وانا باسرح على نفسي قال يعني باواسيها

......................................
.....................................
....................................
الثلاثاء
روحت ادارة التعيينات عشان اسلم الفيش و التشيبه بتاعى
و هناك لاقيت المفاجأة في انتظارى
يا باشمهندش قرار تعيينك اتمضى خلاص
و اتفضل استلم شغلك في أي وقت
طبعا وشي قلب احمر و ازرق و كل الالوان
طب هانام فين
طب هاعمل ايه
قولت للست انا هاجى اول الاسبوع استلم
و خرجت كلمت والدى هنا في بورسعيد و لاقيته بيقوللى روح استلم بدري احسن بدل ما تتعطل اكتر
طب يا حاج
يا بابا
يا حاج
.............
هو الراجل الح و اصر
دخلت للست مش عارف اوريها وشي
طيب انا عايز جواب تعييني
طبعا و انا شكلى اساسا ما يتشافش من التفكير
لاقيت الست بتقوللى مالك يا باشمهندس
قولتلها اصلي عندى مشكلة في السكن
و الشقة الوحيدة اللي ظهرت لي في اااااااااااااااااااخر الهرم جنب المريوطية
لاقيت الست بتبصلي و بتضحك
طب ما انت كدة تبقى قريب من الشغل
انا-شغل مين يا حاجّة
هو مش الشغل في شارع مراد دانا على ما اوصل من الشقة للشغل يبقى فات معاده ساعة و للا اتنين
قالتلى مراد مين يا هندزة
انت هاتشتغل في محطة نقل الكهربا اللي في طريق مصر اسكندرية الصحراوى
و هنا كان الشلوت الاكبر و الاقوى في تاريخي
الدنيا لفت بيا
طريق مين
و ده نروحه ازاى
و لاقيتني هايغمى عليا
و اخدت الجواب و انا باكلم نفسي لدرجة ان كان معايا صديق بيساعدنى عشان انا ما اتوهش صعبت عليه و اشترالي عصير و شيكولاتة عشان يصالحنى
و انا مافيش على لسانى غير كلمة واحدة
ايه اللي انا عملته في نفسي
ايه اللي انا عملته في نفسي
ايه اللي انا عملته في نفسي
و اقيمت سرادقات النواح على طول الخط الواصل بين القاهرة بورسعيد
و اتصلت بكل من اعرفهم لكي اسالهم على الشركة ان فيه حد يفيدني بكلمة
مافيش

..............ز

...............

الاربعاء
قام احد اصدقاء والدي جزاهما الله خيرا بتوصيلي و الحمد لله الراجل اتصل بيا من الصبح عشان نتقابل بدري و نلحق
نزلت الساعة سبعة و نص
و بعد مشوار جميل جدا من التوهان في المحور و لقينا الحاجة و عشرين كيلو كذ مرة طلعلنا عامل من مزرعة و قاللنا تعالو اوصلكم
الحمد لله و صلنا الساعة عشرة و نص
و دخلت عشان اسلم ورقى
الحمد لله اتفاجئت بانى هاشتغل على حدود القاهرة مع الاسكندرية الشقيقة
كل ده كوم
و استقبال واحدة من موظفات شؤون العاملين ليا كوم تانى
اسمك ايه يا عسل
عسل مين يا ولية .....طبعا في سري
انت مين من اهلك بقى بيشتغل في الكهربا
محدش
طب و جيت ازاى
مفيش....... سمعت عن المسابقة و امتحنت و نجحت
طب و اشمعنى احنا ما سمعناش عنها
ماحنا بردو عندنا عيال عايزين نشغلهم
و فجاة دخلت في فاصل من الشتية المتغطية و الدعاء على اللي عملوا المسابقة بدري بدري
و خرجنا من عندها استقبلنا المدير العام
ملحوظة انا باتكلم بصيغة الجماعة لانى انا و المهندسة اللي معايا اللي اتعيننا مع بعض
و فجاة لاقت الضلمة بتفتح واحدة واحدة
دخلنا على القسم بتاعنا و رحبوا بينا المهندسين و الفنيين و بدانا في التدريب خفيف نوعا ما
و لاقيت المهندس رئيس القسم بيرحب بينا جامد
و لما عرفوا ان انا مغترب كل واحد فيهم عايز يساعدني
و كلهم مع بعض بيعرفونى باوتوبيس الشركة و السواق عشان ييجي ياخدني من ناحية البيت
الحمد لله
بدات نفسيتي ترتاح نوعا ما و كلمت اهلى و بدات اطمنهم
و انتهى اول يوم ليا على خير و رجعت البيت
و لانى عودت نفسي ان اليوم في القاهرة يساى اربع ايام بتوقيت بورسعيد و لازم يحصل فيه احداث كتير
كنت عرفت انا بطريق الصدفة ان الندوة بتاعة مناقشة رواية نهى محمود"الحكي فوق مكعبات الرخام"هايكون في وسط البلد الساعة سبعة
روحت يا اخواننا ضربت الدش التمام و ظبطت شكلى حبتين و نزلت
و هناك اكتشفت انى لم اتخلص من عادتى السيئة بالمبالغة في الحذر بالنسبة للمواعيد مما جعلني انتظر تحت باب دار ميريت ساعة و ربع كاملين حتى وصلت نهى
و كما توقعتها فهي تتكلم كما تكتب و تكتب كما تحس و تحس بما نريد ان نحس به و لكن قد لا نقدر ان نعبر عنه جيدا
نهى دخلت سلمت على كل الناس و منهم انا
قولتلها مبروك يا نهى
الله يبارك في حضرتك
انا على الالفي يا نهى
يا سلااااااااااااااااااااااااااااااااااااااااااااااام
انت بتتكلم جد؟
انت شكلك متغير جدا غير اللي في المدونة

و من هنا احذر كل الاخوة و الاخوات

اوعوا تنخدعوا بشكلي اللي في المدونة

دول شوية الزواق بتوع التصوير و الذي منه
و بدات الندوة
الندوة كانت بجد حلوة قوى و الناس اللي فيها كانوا بجد مثقفين مش مدعيين
لكن لا اخفي عليكم انى ما كنتش مرتاح بوجودى و ذلك لانى ما بحبش احمد فؤاد نجم اللي بدا الليلة بكام لفظ قذر و خلاص
و لاني كنت مرتبط بموعد اخر في وسط البلد
ما قدرتش انى اكمل الندوة
لكن بجد انا كنت فرحان جدا باختى نهى و اخويا طارق و حسيت انها في فرحها
ربنا يديم عليكي الفرح يا نهى

الخميس
نزلت كالعادة بدرى قوي و ده خلانى انتظر اوتوبيس الشركة لمدة3/4ساعة
بس روحت و بدات يوم جديد
ماكانش يوم مزدحم بالعمل و هم كانوا مراعيين اننا لسة جداد
المهم استاذنت من المدير عشان الحق اسافر اوضب حاجاتى بس يا اخواننا اخدت مشوار هرس عجب لحد ما وصلت رمسيس و بدا مشواري في السوبر جيت حتى وصلت الي بورسعيد سالما
و سافرت بحال
و رجعت بحال
صدق رب العزة في قوله عز و جل"ليس لها من دون الله كاشفة"صدق الله العظيم
و انتظروا قريبا حكايات الباشمهندس على

و اما بعد

و كانها تابى الا انها تديني قرصة ودن و انا لسة في حضن امى

طب كنتى استنى شوية عليا

مش من اولها

اولها ايه

من قبل ما نبدا و الهرس اشتغل

و كعادتى بابدا بالنهاية و اقول لكم نبدا الكلام من الاول

النهاردة السبت و امبارح اتعملت لي احلى حفلة وداع في الدنيا و كنا جايين نكتب عنها

الا انه قد حدث مالم اتوقع انه يحدث

فجاة و بدون مقدمات

اتصال من الناس اللي كنت متفق معاهم على انى سوف اؤجر منهم الشقة

الو ايوة يا على

اصل حصل ما اعرفش ابصر ايه و ظرف ما ادرك ايه

يعنى ايه يا اخواننا

و الله احنا اسفين يا على

يا لهوى

يا مصيبتي

بالبساطة دى كدة

دانا حضرت شنطتى

دانا كنت جاى بكرة

ان شاء الله نعوضهالك

تعوضوا ايه ياناس يا اولادال...............طبعا ده في سري

طلعت على احمد شلبي

اصل كنت متفق معاه ان انا هاروح اسلم عليه

و عنده عملنا غرفة عمليات مغلقة

لحساب كل الاحتمالات و الناس اللي ممكن يساعدونا في هذه المشكلة العويصة جدا

و قررنا ما يلي

انا جاى فعلا ان شاء الله بعد بكرة

الاتنين عشان اشوف شقة تانية ان شاء الله و يا رب يطلع خير

هاكون ضيف على صديق ليا لحد ما نرسى على بر

و ها هى دعوة لكل مهتم

انا بادور على سكن في الجيزة او اول الهرم

يا ريت تكون اودة و حمام و خلاص

حاجة تكون رخيصة و بنت ناس

تيجوا اقوللكم على حاجة تانية؟

ادعولى

ادعولى قوي

أمينة

مش عارف امتى العلاقة بيني و بينها بدات تبقى بالشكل العميق ده

بس انا فتحت عينيا ع الدنيا لاقيتها حاططاني في عينيها و قافلة عليا

و وعيت وانا باقولها يا ماما و هي اللي بتاكلني و بتحكي حواديت ارتجالية عجيبة بديعة

و جنب امي الحقيقية لاقيت عندي ماما امينة

و اللي يعرفني و كل اللي حواليا عارفين قد ايه امينة هي واحدة من 3 اشخاص في الدنيا شكّلوا شخصيتي و راعوني

آآآآه نسيت اقول لكم مين امينة

امينة هي جدتي والدة ابويا

لما باقعد جنبها في لحظات الصفا تقعد تحكيلي انا يا على حبيتك قبل ماتتولد و سميتك على واحنا رايحين نقرا فاتحة ابوك على امك وانا نازلة من بيت ابوها قلت لهم خلّوا بالكم من ام علي و لما انت اتولدت اصريت ان انا ادخل مع الدكتور و اكون اول واحدة تشيلك

كنت كل ما اكبر احس بحبها العجيب جدا و الخاص جدا ليا طبعا مانا اول حفيد ليها من اولادها و اسمي على اسم جدي و احنا عايشين معاها في يبت العيلة و كنت كل ما اكبر احس بحبها

بجد حب غريب عجيب جدا

امينة طول عمرها عنيدة جدا و كنا نتخانق خناقات لذيذة جدا و في الاخر انام في حضنها و تقعد تعيّط و ترقيني

عمري ما افتكر انها نادتني باسم دلع او أي اسم غير علي زي ما يكون اسمي مقدس عندها جدا و ماينفعش اتنادى بغيره لما كبرت شوية باقيت اناديها امينة كدة حاف و هي بقت تسمحلي اني ادلعها و امينة طول عمرها ست قوية جدا انا جدي مات بدري جدا في بداية الاربعينات من عمره و شالت هي الحمل هى و اكبر اولادها اللي هو ابويا عشان كدة تحس انهم بردو علاقتهم خاصة و انهم شركا في شيل الهم قوي و كانت عجيبة جدا و هي بتعاقبني على أي حاجة اعملها وانا صغير مش ممكن كل الحب اللي بلاقيه منها يبقى بردو كل العقاب القاسي ده تعرفوا ساعات جاراتنا لما بيتعبوا من اولادهم بيقولولهم هانجيبلكو طنط امينة

العيال يستخبوا رغم انها عمرها ماكانت بتاذي حد منهم بس السيرة القوية اللي معروفة عنها و قدرتها على السيطرة على أي عدد من الاطفال مهما زاد عالية جدا

ساعات الاعبها و اقول لها هاتي نتفرج على صورك القيمة يا موني

يااااااااااه دانت كنتي مزة زي القمر

طبعا ماهي بنت بيت ناس مهمين جدا في بورسعيد و كانت دلوعة تحكيلي ازاي كانت حماتها بتعاملها بحزم و شدة و ازاي ده خلاها تبقى جدعة و قادرة تشيل هم بيتها لوحدها

تضحك و تمصمص شفايفها وتقعد تحكيلي عن جدي لما كان ياخدها مصر و يحضروا حفلة ام كلثوم و للا لما يروحوا السينما يشوفوا فيلم جديد لليليى مراد

جدك ماكانش يجيب لي الروج غير ماكس فاكتر و اضحك انا و هي

افتكر امينة لما نبقى في المصيف و هي و امي جوة المطبخ بيعملوا أي حاجة ماتتعملش ابدا في مصيف و للا و هي قاعدة تلف محشي في الشاليه

حاسس قد ايه هي شافت كتير في حياتها و ازاي حتى لما كبرت اتحملت معانا تغير ظروفنا و ظروف مرض بابا و الازمات اللي لسة بنمر بيها لغاية دلوقت امينة الايام دي مش هي

تعبانة قوي و حالتها مش حلوة

انا بردو طول عمري عارفها و هي عندها السكر و القلب

بس ولا عمري حسيت بان ده بيوقّفها عن انها تعمل أي حاجة في حياتها

و انا مش مستوعب ان ست بالقوة اللي انا اتكلمت معاكو عنها ممكن تنام كدة لا حول لها ولا قوة و تكون في حالة غريبة عليها و عليا

و انا مش مستوعب ان الست اللي بروحها شايلة حياتي و ساندة البيت ممكن تروح

لما رجعت من الحفلة دخلت عليها اودتها و هي هاتبدا تنام و قعدت ع الكرسي جنب سريرها و حطيت راسي جنبها ع المخدة اتفاجئت انها حطت ايديها على راسي و قعدت تقرالي قرآن و ترقيني

كل شوية تقوللى البيت مالوش حس لما تسافر يا على

انا بجد يا جماعة مش مستوعب ان الست اللي شايلة بروحها حياتي ممكن تروح مني فجأة

عشان خاطري طلب

ادعو لامينة

الطريقة الخزعبلية لعمل مدونة شعبية و زغرطي يا ولية

تحديث:كان فيه هنا صورة و فيها كلمة انا ما اخدتش بالي منها و تمت ازالتها و خلاص

الطريقة السحرية لجعل مدونتك مدونة معروفة بين كل الناس
انا قلت قبل ما اسافر اتبحبح معاكو شويتين في موضوع كان فارسني حبتين
و هو الناس اللي بيعملوا مدونات عشان عايزين يعملوا مدونات و خلاص
لا و البجاحة انهم بيعملوا حركات مفقوسة جد عشان يعملوا مدوناتهن قال يعني مقطعة الدنيا زيارات و الناس داخلة خارجة عليها
و بما انى قعدت ارصد حاجات كتير من دى فاستخلصت ليكو معلومات نويت اوضعها في كتاب
الطريقة اللوزعية لعمل مدونة شعبية و زغرطي يا بهية
1- اتفسح يا سيدي ع النت و زور مدونات اخواتك المدونين عمال على بطال
2- اكتب عند كل واحد منهم تعليق و خلاص سواء البوست عاجبك و للا مش عاجبك
3- لو مالقيتش حاجة تقولها في ردك على الناس و خصوصا لو ما فهمتش البوست المكتوب بيقول ايه رد اى رد عايم كدة
رد ينفع كدة في كل المدونات
يعنى مثلا
بوست هايل جدا
انا مش لاقي حاجة اوصف بيها جمال البوست الروعة ده
الله يا سي محمد على راي محمد ع.الغفار
و كل واحد فيكو و شطارته
4- لو حابب تتفزلك و ترد في صلب الموضوع و احنا اتفقنا انك مش فاهم اساسا معنى الموضوع يبقى شوف ردوك زمايلك و اعمل كوبي منها و زود كلمتين عندك
5- طبعا نسبة كبيرة من اللي انت رديت عندهم هايدخلوا يردو عندك و دي بقى فرصتك انك تخللي نسبة الردود عندك عالية
محدش سالني ازاى؟؟!؟
اقوللك يا سيدي
كل ما واحد يرد عليك روح انت عامل رد عليه منفصل ولو لاقيت اتنين معلقين عندك رد عليهم في تعليقين مختلفين
و بكدة كل واحد رد عندك تبقى انت عامل قصاده رد او اتنين لو انت عايز تزود و اهو قشطة
7- عايز تعمل نفسك مثقف يبقى احشر في مدونتك كام كلمة مكعبرة من بتوع المثقفين و اتكلم عن ناس محدش يعرفهم
8- عايز تعمل نفسك مثقف زيادة يبقى اتفلسف في أي حاجة خد عندك مثلا السينما
اتكلم عن ناس عجيبة و تجارب فزلكية و اقعد اكتب فيها شعر
9- بردو لو عايز تحبك موضوع المثقف ده قول كام كلمة قذرة و زودها حبتين هاتلاقي نفسك بقيت زى الفل
10-رص أي كلام ورا بعضه قال يعني الواد شاعر و اقعد ارمي زلط من بقك بس فيه شوية كلام شوارع تبقى شاعر عامى قدير و محترف
11- حط لينكات لطوب الارض عندك سواء عاجبينك و للا لا
12- ادخل اى مدونة مشهورة او بتاعة حد مشهور و رد عنده كذا مرة
هاتلاقي مدونتك زياراتها زادت
13- حط العداد و اقعد كل شوية اعمل ريفريش هاتلاقي كل مرة بيزود لك رقم
و انت و صبرك ممكن تقفل المليون زيارة في يومين


اهو على ما قسم
اصلي ما اكدبش عليكو اتفرست من كام واحد كدة عاملين زي فرقع لوز و موجودين في كل المدونات و لو لاقيت في ردهم كلمة مفيدة يبقى ارقص على تربتي
و ادخل عنده هاتلاقي الدنيا هايفة جدا جدا جدا جدا
دول ما يعرفوش االلي حنا بنحسه تجاه مدوناتنا
مدوناتنا اللي بقت جزء مننا
و بنتبحبح فيها و نخرج شحنات لو كانت موجودة جوانا دلوقت كان زماننا فرقعنا
مدوناتنا اللي عملتلنا عائلات موازية جنب عائلاتنا اللي في البيوت
و عملت لنا اخوات و اصحاب يفرحوا لينا و يخافو علينا و كدة يعني
المهم
انا خلاص قربت اسافر جدا
اتمنولي الخير
و ادعوووووووووووووووووووووولى

لانه جه الوقت
و ماعادش فاضل كتير
يبقى لازم احكيلكو
مش عارف ابدا منين الكلام
كان حلم مغرق ايامى
و عشت عمرى باجرى وراه
بس لما جه.....لاقيتني باعمل فيها عيل صغير و الاقيني بادبدب ع الارض و اقول
لا
مش لاعب
طبعا انتو دوختوا معايا
نتكلم من البداية
انا بقالى كتير هاموت انى استقر في القاهرة عشان ابدا ادور على اللي طول عمرى باحلم بيه
نفسي انحت في الصخر لغاية ما الاقي فرصة كويسة في الحلم البعيد اللي هو الغنا
الحلم اللي شحططنى كتير بسبب انه الحلم الوحيد اللي مرتبط جدا بمكان
يعني لازم اكون في القاهرة
و ياما كانت بهدلة و انا مخلص حفلتى و باجرى الحق اخر مترو يوصلني للبيجو
و اللي يدوس في شنطتى و اللي يهرس فيا
و غير كل ده
اهلى و رغبتهم في انى اكمل في هندسة و انهم كانوا بيصعبوها عليا جدا لما احاول الاقي فرصة للسفر
و فجأة بعد ما اتخرجت
لاقيتهم هم اول حد بيحاول معايا انى الاقي شغل في القاهرة
و حاولنا مرة و التانية
و للاسف كان احسن المقابلات حالا مقابلة في شهر اكتوبر اللي فات
وبعد كدة ولا حس و لا خبر
و راح الموضوع على ما راح
و ربنا بعتلي شغل هنا في بورسعيد
مصنع كبير ووظيفة محترمة ووضع مهم في المصنع
بس من جوايا ماكنتش مرتاح
لانى كنت عارف ان ده معناه3حاجات
مفيش سفر
مفيش حفلات
مفيش مزيكا
و كملت حياتي في المصنع لغاية ماجانى تليفون مفاجئ جدا
انى نجحت في المسابقة اللي عملتها الشركة و لازم اروح اعمل اجراءات تعييني
بعد 7 شهور من الانتظار
فجاة حسيت انى عايز اقول
لا مش لاعب
و ملعب خيول بحاله بيجرى في نافوخى
و التفكير جابلي ارتيكاريا و لومباجر و انفلوانزا الطيور
و اخيرا استقريت
و النتيجة اهى
انا خلاص
جاى القاهرة
و هاسيب بورسعيد
عارف انى ضحيت بشغل كويس و حياة مستقرة نوعا ما
و عارف انى باغامر بحاجات كتيرة اهمها حياتى كلها
بس خلاص
انا جاى فعلا ان شاء الله
و خلال اسبوع او اكتر بقليل هاكون من سكان القاهرة
و هانبدا مشوار جديد في حياتي
تجربة و قابلة لكل الاحتمالاااات
معايا ربنا
و ربنا بس هو اللي يقدر يسهلها عليا
و ربنا هو اللي يقدر يحبب الناس فيا و يبعتلي ناس و اصحاب و دنيا تانية غير الدنيا اللي انا سايبها هنا في بورسعيد بمحض رغبتي و اختياري
طبعا لا اخفى عليكم نظرات العتاب في عيون اصحابي المقربين
و كلمة"انت خلاص ناوى تنسلخ عننا"اللي شوفتها في عينيهم و قالتهالي روزاليا و جوسي ذات يوم
و للا كلام احمد عيسى ليا عن انى باغامر بمستقبلي كله و بلاش العب على عمرى
بس انا مش محتاج ده
انا محتاج منهم بجد كلمتين تشجيع و حبة دعاء
اهو انا رايح اشتغل و اجتهد و اعمل لي تجربة خاصة بيا
تجربة تخليني انا اللي بادير حياتي نوعا ما
و تجربة تخليني ابدا ادور في موضوعي
و رايح على دنيا تانية و مجتمع تانى و ناس تانية
من ساعتها و انا كلمت معظم اصحابي في القاهرة
و باقوللهم كلهم
خدوا بالكم منى
مش عايز اكون لوحدى
و انتو كمان خدوا بالكم منى
مش هاقول لكم ادعولى
بس بجد ادعوووووووووولى

و ادى حد كمان حقق حلمه

شئ جميل ان تسمع خبر حلو

لكن الاجمل ان الخبر ده يكون عن حد انت مهتم بيه و تحب تسمع عنه كل خير

انا من يوم ما دخلت عالم التدوين و بقيت بينهم و انا حسيت ان ناس منهم كتير بقوا من اهلى و حسيت بده اكتر لما

بيبقى فيه خبر حلو او حدث حلو بيتعلق بحد منهم تلاقيهم بسرعة اتلموا و وقفوا جنبوا و كانوا من اول اللي بيهنوه

انا بنفسي جربت ده في الحفلة

و النهاردة عرفت ان الرواية الاولى لاختى الغالية نهى محمود صدرت خلاص و بقت في السووووق

و زى ما هي بتقول الرواية وصلت لعالم الواقع

اهو يا جماعة حد تانى اتحقق حلمه

عقبال ما كل واحد فيكم يحقق اللي بيحلم بيه و اكتر

و عقباااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااالى

هوامش من بقية الاسبوع

هوامش من بقية الاسبوع

استغلال وسخ جدا جدا لحادث مؤلم وجدته في شوارح بورسعيد من جهات مختلفة
كل ما امشي الاقي يافطة سودة لنعى ضحايا حادث الاوتوبيس
لكن القذر ان مطعم يحط اللوجو بتاعه او محل موبايلات او حزب سياسي و اهى تبقى عصفورين بحجر اعلان و دعاية و جنبهم كلمتين نستغل بيهم الناس و هم سخنين على عيالهم اللي راحوا

و بقى سهل انكوا تلاقوا مطاعم فلان و اللوجو منور و جنبها تنعي ابناء كلية...الخ

شركة....تعزى اهالى ....الخ

حاجة تقرف

الجمعة اللي فاتت
كان فيه معرض سوق الفن التاني اللي بينظمه موقع و منتدى بورسعيد اونلاين وهناك اتقابلنا انا و ناس كتير قريبين من نفسي
و خصوصا مدوني بورسعيد
قابلت هناك روزاليا و جودة و جوسي و زحل و دكتور زيفاجو و رودى و احمد عيسى
و كنا في اليوم ده بنتكلم عن حاجات كتير
لكنهم كلهم كان عندهم نفس التعليق و نفس السؤال ليا
علي انت ليه اخر كل بوست بتقول ادعولي؟؟؟!!
و حسيت ان الموضوع ده لافت قوي لنظرهم
لدرجة انا نفسي خدت بالي
بس انا باحس ان حاجات كتر في حياتي مش هايحلها غير ربنا
حاجات كتير ايه............دي كل حاجة في حياتى مش هايحلها غير ربنا
عشان كدة باحب انى اطلب من كل اللي بيحبوني انهم يدعولى و خصوصا لما باكون باعمل خطوة صعبة حبتين في حياتي
و عشان كدة....ادعووووووووووووووووووووووووووووولي

الجمعة اللي فاتت بردو
قابلت واحد صاحبي و هو مش مدون ولا حاجة بس دخل عندى و قرا اجاباتي ع التاج الشخصي
و لفت نظره ردى في السؤال عن الحاجات اللي انا اخدتها من والدى و انا يومها جاوبت ان فيه حاجات استفدتها من بابا بان فيه غلطات كتير عملها في اسلوب ادارته لحياتنا و انا مش ناوى اكررها
لاقيته فهمني غلط و جاي يقوللى انت شايل من ابوك و للا ايه
يا نهار اسود
دانا رجعت اقرا
و اكتشفت ان كلامى ممكن يمكون اتفسر بشكل غلط في دماغ أي حد بس فعلا المعنى مش كدة ابدا
انا بس كل اللي اختلفت فيه مع ابويا نقط في التعامل مع الناس
انا ابويا انسان كريم جدا و معطاء لكل اللى حواليه
بس كان مبالغ في عطاءه لناس كتير
و لما ابويا تعب مالقيناش حد منهم حوالينا و ده سبب لي عقدة وقت طويل من حياتى و خلاني عدواني مع الناس و فاقد الثقة فيهم
بس الحمد لله واحدة واحدة الموضوع اتصلح و انا كبرت و بدات احدد مين اللي يستاهل و مين لا
اتمنى ان كدة تكون الصورة وضحت

بس في الاخر عايز اقوللكم حاجة
انا الايام دى داخل على خطوة مهمة قوي و خطيرة في حياتى
و هاطلب منكم طلب جديد جدا جدا جدا
ادعووووووووووووووووووووووووووووووووووووووووووووووووووووووووووووولىىىىى

يا حلاوتك يا مصر و انت من غير هرس

الاثنين
سافرت الى القاهرة لقضاء مشاوير مهمة و قولت بدل ما اسافر الثلاثاء الصبح اهو اسافر الاتنين و اشوف اصحابي
كان في استقبالي عمى و صديقي الحبيب ساهر محمد
و الحق يتقال الراجل كان محضرلي يوم جامد جدا و سهرة حلوة قوي
لكن الاحلى من كل ده انه سمعنى توزيعه لغنوة اللي انكسر يتطوح
فعلا انا انبهرت بالشغل اللي هو عمله
لاقيت في عينيه نظرة تلميذ مستني نتيجة او واحد قاعد قدام اهل خطيبته و مستني رايهم
بجد انا كنت طاير باللي هو عامله فيها
و انا ما كنتش متوقع الجمال ده
و لغاية النهاردة هو مش مصدق إن انا منبهر باللي هو عاملة في الغنوة
و سيبنا بعض انا و ساهر تاني يوم الساعة6:30صباحا على وعد اننا هانتقابل بعد الضهر لتسجيل الغنوة
الثلاثاء
طبعا الثلاثاء بدا من الفقرة اللي فاتت بس مش مهم
بدا يوم الثلاثاء بمفاجاة تانية ليا و هى و فاة موبايلي غير مأسوف عليه
بس المشكلة ان كل الارقام كانت متسيفة عليه و ما عرفتش اكلم حد
و لولا ان انا حافظ نمرة بيتنا و كلمت ابويا كان زمانهم اتجننوا عليا
و خلصت مشاويري حوالى الساعة11:30و لاقيتني هااقعد لوحدي لحد الساعة 5 بعد الضهر و مش عارف اكلم حد
اخدتها من قصيرها و طلعت ع الترجمان
بجد حاجة تشرح القلب
بس لو حد فايق
انا وصلت الترجمان مش شايف قدامى و ما صدقت طلعت الاوتوبيس و هاتك يا شخير يشهد عليه كل ركاب اوتوبيس بورسعيد يوم التلات اللي فات
بس كان في نفسي كلمة كدة
يا حلاوتك يا مصر و انت من غير هرس

و للاسبوع بقية

ما بقيتش اخاف في الدنيا دي غير م الوداع

ما بقيتش اخاف في الدنيا دي غير م الوداع

ده اللي جه في بالي و انا باشوف صور جنازة ضحايا حادثة انقلاب الاوتوبيس
بورسعيد فجاة اتحولت من فوقان و تحضير لحفلات في كل حتة و على كل لون الى شئ واحد
صدمة
ذهول
بكاء
اكتئاااااااااااااااااااااااااااااااااااااااااااااااااااااااااااااااااااب
اصوات عربيات اسعاف رايحة جاية
مطار بورسعيد اول مرة يكون ليه لازمة
و تكون وظيفته استقبال الجثث
شوارع مقفولة مش من زحمة المحتفلين لا عشان مواكب جنائزية
مش عارف اقول ايه
انا اعرفهم
و شفتهم
و منهم اللي حبيته
و منهم اللي كنت بازعل منه
لكن عمرى ما تخيلت ده
كل لحظة يظهر خبر جديد
فلان مات
فلان حالته خطيرة
و رغم ان عددهم ما زادش عن خمسين
لكن مليون قصة و قصة بتظهر
كفاية قصة البنتين التوام اللي ماتت واحدة منهم قدام عينين اختها
و للا اللي نجوا و هم شايفين ناس كانوا معاهم من لحظات بقوا جثث
و اعضاء مبتورة
وللا اهالى مستنين اولادهم يرجعوا يحكوا عن شرم الشيخ اللي بيسمعوا عنها في التليفيزيون كمنطقة محظورة للناس البسطاء
انا شوفت بعيني باب الكللية في عز الليل و هو مليان ناس
اللي بيصرخ
و اللي بيتكلم في التليفون بمنتهى التوتر
و الامهات اللي قاعدين ع الارض
و للا الطلبة اللي ماكانش بايدهم حاجة غير انهم يروحوا يقعدوا على باب الكلية بالليل
انا تعبان قوي
و الله تعبان قوى
يا رب انجدنى
حاسس ان الحادثة دى رامياني في بير حزن غويط قوي
.........
انا لله و انا اليه راجعون

انا لله و انا اليه راجعون

انا اسف الكلام مش مترتب بس هو ده اللي قادر اكتبه

تم الغاء جميع الاحتفالات اللي قولتلكو عليها

بورسعيد كلها النهاردة لبست اسود

امبارح بالليل اوتوبيس فيه 50فرد من كلية تربية نوعية اتقلب قرب شرم الشيخ

خمس افراد اتوفوا

و الباقي مصابين اصابات خطيرة ما بين بتر اعضاء و غيبوبة و غيره

انا باكتب البوست ده حالا و لسة الجنازة بتنتهى

انا لله و انا اليه راجعون

شم النسييييييييييييم رجع يا اخوانناااااااااااااااااااااااااااااااااااا

شم النسيم رجع يا جدعاااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااان
ايه

مالكو

اه شم النسيم رجع

طبعا حد هايقوللى يعنى هو كان راح فين

اقوللكو بقى لالااااااااااااااااااااااااااااااااااااااااااااااااااااااا

شم النسيم بتاع بورسعيد طول عمره حاجة تانية جدا

هاقوللكو عن ايه و للا ايه

التلخيص ان البلد كلها كانت بتبقى كرنفال كبيييييييير و الناس سهرانة في الشوارع لوش الفجر تحتفل

و كان كل بين بيعمل الالمبي"دمية من القماش تجسيد لشخصية اللورد ليمبي اللي اغتالوه الفدائيين البورسعيدية"وكل شارع يعمل حريقة كبية و الناس يحرقوا فيه الالمبي بتاعهم و يقعدوا يرقصوا و يحتفلوا لوش الصبح

و حفلات السمسمية في كل مكان و الشاليهات في بورسعيد كانت بيتقفل الحجز فيها قبل شم النسيم بشهور

و واحدة واحدة بدات الاحتفالات دى تختفي

و اتلهى الناس في مشاغلهم و اكل عيشهم ده لو لقيوه

المهم

شم النسيم بتاعنا رجع و انا كنت ناوى احكيلكو عنه

لكن كالعادة احمد شلبي اللي شكله جاب لاهلى احباط بقدرته الرائعة على التعبير عن كل حاجة كما يجب سبقنى و قال اللي عمرى ما هاقدر اقوله

انا هانقله زى ما هو



دائما شم النسيم فى بورسعيد له طعم أخر , طابع كرنفالى شعبى غاية فى الروعة , و اذا ذكر شم النسيم فى بورسعيد ذكر الألمبى , تلك الدمية التى تفنن فى صنعها ابناء بورسعيد واحراقها نكاية فى الأحتلال , حيث يمثل الألمبى نموزج مجسم للورد لمبى المندوب السامى الأنجليزى ,, طوال أعوام , وحتى منتصف التسعينات كان احراق اللبمى طقس مقدس عند ابناء بورسعيد الى ان منعته الحكومة لأسباب أمنية واقتصر الأحتفال على بعض العروض الرسمية فقط دون اى طابع شعبى

وفى عام 2006 تضافرت جهود مجموعة من عشاق بورسعيد لأحياء احتفالات الألمبى مرة اخرى , فكانت مبادرة منتدى بورسعيد وتحت رعاية فندق الباتروس وتم اعداد مهرجان كبير تضمن عودة الألمبى مرة أخرى لشوارع بورسعيد , بينما تم عرض معرض مفتوح للجمهور تضمن صور بورسعيد القديمة على مر العصور والذى نال اعجاب غير مسبوق من الجمهور

السنة دى بورسعيد هتحتفل بشم النسيم زى زمان سهر واحتفالات وامسيات شعرية وسمسمية للصبح هترجع تانى الأسر تخرج وتستمتع بمناسبة بنعتبرها خاصة بينا بس وبضيوفنا الكتير اللى بيجوا يشاركونا فيها كل سنة السنة دى كمان فرحتى اكبر انى هقدر اشارك فيها ولو بحاجة بسيطة أعبر فيها عن حبى للبلد دى بكره انشاء الله , الحد 8 ابريل , فى قاعة سينما الكروان , وقدام عدد كبير جدا من ضيوف بورسعيد وولادها , هيكون فى عرض فيلم وثائقى عن بورسعيد , تعقبه حفلة سمسمية , يعقبها ندوة شعرية للشاعر الكبير عم محمد عبد القادر , وعم كامل عيد , وبعدها انشاء الله هنقدم أنا ولمطرب الجميل على الألفى أمسية شعرية غنائية من الحان على الألفى وغنائه وكلمات العبد الله , انشاء الله يكون احتفال ناجح ومناسبة ترجعلنا بورسعيد زمان , والدعوة عامة للجميع فى شارع طرح البحر أمام فندق الباتروس


الى هنا انتهى كلام احمد شلبي
و اتمنى ان الحتفالات دى تبقى احلى و احلى من كل سنين الحياة
على فكرة هاتلاقوا عند احمد صور حقيقية من احتفالات السنين اللي فاتت
و حاولوا تنورونا و تشوفوا شم النسيم بتاعنا

ملحوظة

انا عمرى هنا ما شكرت حد بإسمه ابدا

و خصوصا لما يكون حد مسئول

لكن انا عايز اشكر اتنين

بيحاولوا من نفسهم ان بورسعيد تبقى احلى و ترجع زى زمان

ا/ ايمن جبر مدير الفندق اللي متحمل تنظيم المهرجان ده السنة دى و اللى فاتت

و ا/نصر الالفي مؤسس موقع و منتدى بورسعيد اونلاين

و تضيع منى كل ما لقيتك

عمرى ما فكرت ازاى ألخص علاقتي بحد و لو فكرت انى احكى عن علاقتى باي حد

عمرى ما هاقر اوصف علاقتى بأحمد شلبي و لا هاقول ازاى اتقابلنا

بس هو بمنتى السهولة قدر

احمد انسان ربنا اعطاه موهبة في انه يعبر عن اي شئ
و اي شئ تحسه

من غير ماتشرحه تلاقيه جايبه في ورقة و بيقوللك اسمع كدة

عملها معايا كتير و عملها مع ناس تانية

احساس عبقري انك تلاقي حد كاتبك في غنوة

صدقونى بالاقيني باحب نفسي جدا

و بلاقيني على لسانى سؤال

هو ده انا بجد؟

و لما الاقيه بيوصف احساس جوايا حتى ما اتكلمتش عنه بمنتهى الدقة

و لو كنت انا قاعد ارغى فيه ايام ماكنتش هالاقي الكلام اللي يسعفنى انى اوصف اللي عايزه

المهم

النهاردة كان بيني و بين احمد مكالمة ماسنجرية

باقول له

احمد انا سجلت حبيتك تانسيت النوم

و قفلنا لانه كان في الشغل

بعد ساعة

لاقيته بيقوللى

لول

ادخل عندى ع المدونة كاتب حاجة جديدة

و دخلت لاقيته كاتب عنى

و كاتب كلام بيلخص فيه ازاى اتقابلنا و ازاى بنقعد سوا

و ازاى اتجمعنا على حاجات كتيرة

و كاتب عنى

كلام مش عارف اقول انه فيا

بس بجد ظبطني جدا نفسيا

انا اخدت كلامه و حطيته هنا عشان اتفشخر بيه طول عمرى

حتى اخدت منه العنوان

من الجميل أن يكون لديك صديق ذو صوت جميل , ومن الأجمل ان يكون لديك ميل لطبقة معينة من الصوت والأحساس فتجد صديقك يمتلك تلك الطبقة ونفس الأحساس , والأكثر جمالا عندما تطلب من صديقك غنوة لمطرب تحبه فيغنيها كما توقعت أن تسمعها , والأكثر والأروع عندما يكون لديك ميل للكتابة وتجد صديقك يبدأ فى تلحين وغناء ما تكتبه وتضعه فى جيبك ,, وهذا ما حدث مع صديقى المطرب الجميل على الألفى فقد تعرفت عليه عن طريق صديقة وفنانة جميلة عرفتنا على بعض ثم سابتنا لبعض فاتصحابنا على بعض فاكتشفنا بعض وعليه اشتغلنا مع بعض ولهذا فكل ما انتجناه من أغانى أو أمسيات شعرية غنائية كان نتاج تجربة ما وأحاسيس مشتركة
ومن أكثر الأغانى التى كنت أطلبها من على الألفى فى سهراتنا الدائمة على شاطئ البحر , أو لقائتنا المتكررة مع أصدقائنا من محبى صوت على غنوة فيروز الجميلة حبيتك تانسيت النوم , وغالبا على قرر انه يستريح منى فسجلها التسجيل الجميل ده
حبيتك تانسيت النوم
بصوت على الألفى

احمد يا شلبي

ربنا ما يحرمناش من بعض

و على فكرة استنوا قريب خبر حلو عني

و على ماتسمعوا الخبر الحلو

اسمعوا حبيتك تانسيت النوم

حبيتك تانسيت النوم

و رجعنا بالتفاصييييييييييييييييييل

وسع وسع وسسسسسسسسياااااااااااااااااااااااااااااااااااااااااااع يا جدع
على الالفي رجع بالسلامة لمدونته و ناسه
بعد السلام على كل من سولت له نفسه دخول منطقتى الخاصة الخاصة و بقى من اهلى و اصحابي اولا اتفضلوا شيكولاتة من اللي فوق دي
لكن قبل الشيكولاتة و الكلام ده هاشكر ربنا سبحانه و تعالى اللي اعطانى ناس بالجمال ده يكونوا ضهر قوى ليا و ناس يشدونى وقت وقوعى في ظلام الاكتئاب و مش هقدر اقوللكم بسبب ايه و للا ايه
المهم
انا الحمد لله بقيت احسن و هاقدر اتكلم و اكمل مشواري و تفاصيلي
و مش هاعرف اوصف انا كنت بافرح قد ايه بكلمة كل واحد قدر يساعدنى
و ملحوظة لاصحاب النوايا السيئة
انا ماكنتش باعمل حركة قرعة و مستنى من وراها كلمة لا تتنحى
بس كان الالم في ضهرى وصل بيا لدرجة ان انا مش طايقه ولا طايق اتكلم وكمان كان فيه الم تانى جوايا افضل انى ما اتكلمش عنه
و اهى كانت تجربة
بس تجربة وقوفى عن التدوين كان ليها بردو خصوصيتها
انك تقعد تراقب كل حاجة حواليك و تسجل كل حاجة و تفكر فيها اكيد ليها فوايدها
.........................
عشان كدة هاتلاقوا تفاصيل كتيرة جاية في حياتي
و هاتلاقوا اخبار حلوة ان شاء الله
و هانعمل نيو لوك للمدونة و هاتلاقو الدنيا ربيع و الجو فظيع
قفل قفل قفل
و سمعونى سلام حمد الله ع السلامة لاخويا و حبيبي وابن بلدي عمرو ابن دياااااااااااااب
..............
..................
...................................
و عشان ما ارجعش ليكو بايدي فاضية
انا رجعت ليكو بهدية
اغنية مصرية
و اللى حضر الحفلة هايفتكرها
اسمها وسط البلد و الحدق فيكو يقول انا مين فيهم
الاغنية كلمات احمد حداد حفيد العظيمين فؤاد حداد و صلاح جاهين
و ألحان و توزيع احمد عاصم
و غناء اعضاء فرقة
Step by step
محمد عصمت
أريج مروان
وليد غانم
علي الالفي
على فكرة هاتلاقوا فيه مشكلة و خطا في هندسة صوت الاغنية و كلام المطربين مش كله واضح
بس اهو هدية و بصلة المحب خروف بقى
اسيبكو و يا رب تنبسطوا بالخروف...قصدي الغنوة
دوس هنا عشان تحملها

اعذرونى

لاننى قررت ان اكون انا و لن اكون غيري

و لانى قررت اما ان اقل الحق او اصمت

اذن فلأصمت

و لهذا اتخذت قراري بتجميد المدونة الى ان يحدث ما يجعل هناك مبرر لوجودها ووجودى

و لانى تعودت الا اكتب إلا عندما يكون هناك ما اريد ان اقوله

و لانى فقدت الرغبة في النطق

و الكلام

و الكتابة

اطلب منكم طلبين

ادعولى لانى امر بفترة صعبة صحيا

و ادعولى ان يصلح الله حالى

و نلتقي ان شاء الله عما قريب

بلا ولا شي

بلا و لا شي
انا اسف جدا لو كنت زي ماناس ردوا و قالوا فكرتكوا و فتحت جرح كان قرب ينطفي و ان كان مش هاينطفي ابدا

...

........

.........

بس دلوقت اسمحولى اشارككم معايا و حاجة حلوة عايشة معايا من فترة طويلة و كنت باحاول اكتب عنها اكتر من مرة لغاية ما فشلت
قلت اوريهالكوا اهي و انتو قولوا رايكم
غنوة حلوة قادرة تسحب الواحد مننا و توديه دنيا تانية خااااااااالص
يا سيدي ياسيدي قول كمان
انا كنت فين من الغنوة دي

فجاة و بدون مقدمات هبطت عليا نسمة
بس ايه نسمة بجد
فجاة لاقيت صديقي و عمى ساهر محمد بيبعتلي اغنية و بيقوللى اسمع
ايه ده
ايه المعنى ده
بلا ولا شي.............بحبك

الراجل اللي بيغني يا اسيادنا بيتكلم عن الحب الصافى من غير ولا حاجة
بحبك زي ما انت من غير أي شي
تعالي نعيش الحب بكل نقاوته و صفاه
تعالي نقعد بالفيية"الضليلة" مش لحدا ها الفية
يااااااااااااه
على فكرة الكلام عنها هايكون طبعا ركيك جدا و مش منطقي ان الواحد يقدر يوصف و يوصف في حاجة و هي تقدر تتكلم عن نفسها احسن كلام

دوس هنا
و استمتع يا برنس و اسمع بلا ولا شي
زياد الرحباني
شكرا قوي

المركب بتغرق يا قبطان.....المركب غرقت يا قبطان

تحذير: هذا الموضوع يوضع تحت تصنيف وجع قلب حقيقي لذا وجب التحذير ممنوع لمرضى القلب و الضغط و ذوى القلوب الرهيفة


تعرفوا كل ما بنسمع عن حد مات فجأة و هو مش واخد باله ان ده هايحصل
بيخلينا نفكر في حاجة واحدة
يا ترى ايه اخر حاجة فكر فيها؟؟..يا ترى ايه اخر كلمة قالها
وهو ده اللي شغل بالي و كان في حياتي طول اليومين دول

اكيد محدش فيكو غايب عنه ان فيه عبارة مصرية غرقت و مات فيها 1100انسان كانوا بيحلموا بلحظة يرتاحو فيها من غربة برة الوطن و بعيدة عن الاهل
و فجأة
المركب بتغرق يا قبطان...المركب غرقت يا قبطان
......
...
......

انا كان ليا تجربتين مع العبارة دي بعد ما غرقت
طبعا كلنا عارف وواثق ان اعلامنا المبجل كان اساسا و لا كإن الحدث ده حصل في شمال جنوب شرق اسيا الغربي
لان بالصلاة ع النبي كانت مصر مشغولة اليومين دول و مش مهم قوي الناس اللي ماتوا
اصل احنا كان عندنا كاس الامم الافريقية
و ماكانش الحدث واضح قوي
تقولش ناس كان عندهم رحلة صيد و القارب بتاعهم اتقلب
وانا شخصيا كنت في القاهرة عندى حفلة و ما كنتش مستوعب حجم اللي حاصل
لانى ما كنتش باشوف غير اغاني التليفيزيون و المصريين اهومما و شرفونا يا ابطال في معركتكو
............
؟.....

مرة كنت مع احمد عاصم بنسجل غنوة و اتاخرنا و اخدني نصلي الفجر في جامع عمرو بن العاص
و كنت انا مشدود قوي بالجامع و جماله
و فجاة دخل نعش و هانصللي الجنازة عليه
و سمعت من اللي حواليا بعد خروح النعش
لقيوه ميت و لابس سترة النجاة
وسألت عرفت انه من ضحايا العبارة
و ماكانتش الصورة اكتملت
عارفين اكتملت امتى
من كام يوم
لما اتذاع تسجيل الصندوق الاسود
عمركو سمعتو صوت الموت
عمركو سمعتو اخر كلمة قالها حد و انتو عارفين انه مات
عمركو سمعتوا صوت ناس من بعيد بيصرخوا و بيتشاهدوا
عمركوا اتخيلتوا حد وهو في عز ضلام الليل موجود في اشد درجات البرودة و ما بين ده و بين وحوش البحر و ما بين انعدام فرص النجاه
عمركوا جه في نظركوا منظر الاب اللي لبس ابنه سترة النجاة و استقبل الموت بنفسه
عارفين يعني ايه غرق
يعني مفيش هوى بيدخل للرئة يعني الم رهيب لا يطاق و ضغط ماء رهيب ع الودان و الم في كل مكان في الجسم بيتعصر و الم لا ينتهى الا برحمة ربنا و اذنه لملك الموت

عارفين يعني ايه منظر اهالي الضحايا و هم مستنيينهم و فجأة يسمعوا خبر زي ده
عارفين ايه معنى عنوان البوست
دي اخر جملتين اتقالوا في التسجيل
المركب بتغرق يا قبطان.......المركب غرقت يا قبطان.. المركب غرقت يا قبطان

هاتسمعوا في اخر ثوانى من التسجيل صوت المية و هي بتقتحم الكابينة و هاتسمعوا صوت الناس من بعيد و هم بيصرخوا و بيتشاهدوا و هاتسمعوا صوت القبطان و هو بيتشاهد

فعلا اللي مش هايستحمل

بلاش يحمل التسجيل
في النهاية انا هاسيبكم مع3حاجات
هاسيبكو مع صور اهالي الضحايا و الناجين
عشان اللي نسي يشوف
و هاسيبكو مع تسجيل الصندوق الاسود
صدقوني تجربة مؤلمة قوي
و اللي يحمله على مسئوليته الخاصة و محدش يلومنى
و هاسيبكم مع ضمايركم

انا لله و انا اليه راجعون

ست الحبايب يا حبيبة

كل سنة و انتو يا امى طيبييييييييين

على فكرة اللي انتو قريتوه مش خطأ املائي و للا هبل لغوى
لا
انا قاصد جدا
انا على فكرة فتحت عينيا ع الدنيا دي لاقيت لي اتنين ام
اه
انا لاقيت امى اللي ولدتنى و ربنا بعتهالى تنور لي دنيتي و اخدت منها اجمل احساس في الدنيا و اللي محبب الاناس في غنايا
و امى التانية اللي هي في الاصل جدتي ام ابويا
لكن طول عمرى ما اعرفش غير انها امى و بتحبني حب عجيب جدا
انا اول حفيد ليها و هى سمتني على من قبل ما اتولد و باحس بحبها محاااااوطني و جوايا

نيجي بقى لحاجة تانية
يا كل الناس بجد كل واحد قرا كلامى يجري يقول لامه كل سنة وانت طيبة و يبوس ايديها و دماغها
ربنا ما يحرمش حد من اللي ليه
دا احنا من غيرهم و الله ولا حاجة
اااااااااااااااااه
عمرى ما هانسى اعيد على امهاتى التانيين امهات كل اصحابي
كل سنة و امى والدة روزاليا و ووالدة جوسي و زحل الفلكى ووالدة احمد شلبي و امهات كا البلوجرز و اللي مش بلوجرز
كل سنة و النااااس طيبيييييييييييييييييييييييييييييييييييييييين
و ربنا يخليكو يا امى

الله عليك يا عم احمد يا بتاع زمان

بعد صباح القشطة و الفل و الذي منه

احب اتطمن عليكم و اطمنكم عليا

انا لسة باعافر مع الدنيا و لسة هى كمان بتعافر معايا

و لازم بين كل جولة و جولة الاقي نسمة صافية بتريح ايامى

و النسمة الايام دي جت من نواحينا هنا

جت من اخويا و صديقي احمد شلبي

و عشان ما اطولش عليكم في رغى كتير و مقدمات مالهاش لازمة

اسمعكو الكلام الحلو ده

و قبل ما اسمعهولكوا

اقوللكوا استنوا قريب الكلام ده متلحن و قريب جدا ان شاء الله

ااااااااااااااااااااااااااه على فكرة في اعتذار و اجب عليا

الى الاخت الغالية روزاليا

روزا يا جماعة قدمت لي هدية حلوة قوى جدا جدا ع المدونة بتاعتها لكن انا كنت في وقت صعب عليا شوية و كنت في

حالة مخلياني مش عارف استقبل اي هدايا

عشان كدة انا متاكد من انى احبطتها و نكدت عليها

عن طريقكم باقول اهو

تسلميلي يا روزا

بجد البوست حلو قوى

بس انا كان لازم اخرج من المود اللي انا فيه و اقراه مرة تانية بعين تانية و مود تاني

و قبل ما اعمل كدة كانت هى شالت البوست

و اهو هندكو كلام الاغنية اهو

بين فرح وحزن الدنيا طريق
بيسعنا ساعات وساعات بيضيق
وعشان ما نكمل سكتنا
الفرح صديق والحزن صديق
تعالى
نودع زمان
نسيب المكان
نسافر لبكره
على نغمة كمان
تعالى
نحط الأنين
على حزن السنين
ونرميهم ورانا
ونعيش فرحانين
وتحضننى بعنيك
بلمسة ايديك
تدوبنى فى ملامحك
تفرح روحى بيك
تعالى
احضننى بعنيك
بلمسة ايديك
دوبنى فى ملامحك
فرح روحى بيك
بين فرح وحزن الدنيا طريق
بيسعنا ساعات وساعات بيضيق
وعشان ما نكمل سكتنا
الفرح صديق والحزن صديق
هتعدى السنين
وتجينا السنين
وتبص فى عنييا
يناديك الحنين
هيقولك تعالى
ومد الأيدين
وأمد الأيدين
نتلاقى فى لحظة
ونطير بجناحين
ونوصل للقمر
لأبعد م القمر
لكل نجمة حلوة
شاركتنا السهر
وتحضننى بعنيك
بلمسة ايديك
تدوبنى فى ملامحك
تفرح روحى بيك
تعالى
احضننى بعنيك
بلمسة ايديك
دوبنى فى ملامحك
فرح روحى بيك