و تضيع منى كل ما لقيتك

عمرى ما فكرت ازاى ألخص علاقتي بحد و لو فكرت انى احكى عن علاقتى باي حد

عمرى ما هاقر اوصف علاقتى بأحمد شلبي و لا هاقول ازاى اتقابلنا

بس هو بمنتى السهولة قدر

احمد انسان ربنا اعطاه موهبة في انه يعبر عن اي شئ
و اي شئ تحسه

من غير ماتشرحه تلاقيه جايبه في ورقة و بيقوللك اسمع كدة

عملها معايا كتير و عملها مع ناس تانية

احساس عبقري انك تلاقي حد كاتبك في غنوة

صدقونى بالاقيني باحب نفسي جدا

و بلاقيني على لسانى سؤال

هو ده انا بجد؟

و لما الاقيه بيوصف احساس جوايا حتى ما اتكلمتش عنه بمنتهى الدقة

و لو كنت انا قاعد ارغى فيه ايام ماكنتش هالاقي الكلام اللي يسعفنى انى اوصف اللي عايزه

المهم

النهاردة كان بيني و بين احمد مكالمة ماسنجرية

باقول له

احمد انا سجلت حبيتك تانسيت النوم

و قفلنا لانه كان في الشغل

بعد ساعة

لاقيته بيقوللى

لول

ادخل عندى ع المدونة كاتب حاجة جديدة

و دخلت لاقيته كاتب عنى

و كاتب كلام بيلخص فيه ازاى اتقابلنا و ازاى بنقعد سوا

و ازاى اتجمعنا على حاجات كتيرة

و كاتب عنى

كلام مش عارف اقول انه فيا

بس بجد ظبطني جدا نفسيا

انا اخدت كلامه و حطيته هنا عشان اتفشخر بيه طول عمرى

حتى اخدت منه العنوان

من الجميل أن يكون لديك صديق ذو صوت جميل , ومن الأجمل ان يكون لديك ميل لطبقة معينة من الصوت والأحساس فتجد صديقك يمتلك تلك الطبقة ونفس الأحساس , والأكثر جمالا عندما تطلب من صديقك غنوة لمطرب تحبه فيغنيها كما توقعت أن تسمعها , والأكثر والأروع عندما يكون لديك ميل للكتابة وتجد صديقك يبدأ فى تلحين وغناء ما تكتبه وتضعه فى جيبك ,, وهذا ما حدث مع صديقى المطرب الجميل على الألفى فقد تعرفت عليه عن طريق صديقة وفنانة جميلة عرفتنا على بعض ثم سابتنا لبعض فاتصحابنا على بعض فاكتشفنا بعض وعليه اشتغلنا مع بعض ولهذا فكل ما انتجناه من أغانى أو أمسيات شعرية غنائية كان نتاج تجربة ما وأحاسيس مشتركة
ومن أكثر الأغانى التى كنت أطلبها من على الألفى فى سهراتنا الدائمة على شاطئ البحر , أو لقائتنا المتكررة مع أصدقائنا من محبى صوت على غنوة فيروز الجميلة حبيتك تانسيت النوم , وغالبا على قرر انه يستريح منى فسجلها التسجيل الجميل ده
حبيتك تانسيت النوم
بصوت على الألفى

احمد يا شلبي

ربنا ما يحرمناش من بعض

و على فكرة استنوا قريب خبر حلو عني

و على ماتسمعوا الخبر الحلو

اسمعوا حبيتك تانسيت النوم

حبيتك تانسيت النوم

و رجعنا بالتفاصييييييييييييييييييل

وسع وسع وسسسسسسسسياااااااااااااااااااااااااااااااااااااااااااع يا جدع
على الالفي رجع بالسلامة لمدونته و ناسه
بعد السلام على كل من سولت له نفسه دخول منطقتى الخاصة الخاصة و بقى من اهلى و اصحابي اولا اتفضلوا شيكولاتة من اللي فوق دي
لكن قبل الشيكولاتة و الكلام ده هاشكر ربنا سبحانه و تعالى اللي اعطانى ناس بالجمال ده يكونوا ضهر قوى ليا و ناس يشدونى وقت وقوعى في ظلام الاكتئاب و مش هقدر اقوللكم بسبب ايه و للا ايه
المهم
انا الحمد لله بقيت احسن و هاقدر اتكلم و اكمل مشواري و تفاصيلي
و مش هاعرف اوصف انا كنت بافرح قد ايه بكلمة كل واحد قدر يساعدنى
و ملحوظة لاصحاب النوايا السيئة
انا ماكنتش باعمل حركة قرعة و مستنى من وراها كلمة لا تتنحى
بس كان الالم في ضهرى وصل بيا لدرجة ان انا مش طايقه ولا طايق اتكلم وكمان كان فيه الم تانى جوايا افضل انى ما اتكلمش عنه
و اهى كانت تجربة
بس تجربة وقوفى عن التدوين كان ليها بردو خصوصيتها
انك تقعد تراقب كل حاجة حواليك و تسجل كل حاجة و تفكر فيها اكيد ليها فوايدها
.........................
عشان كدة هاتلاقوا تفاصيل كتيرة جاية في حياتي
و هاتلاقوا اخبار حلوة ان شاء الله
و هانعمل نيو لوك للمدونة و هاتلاقو الدنيا ربيع و الجو فظيع
قفل قفل قفل
و سمعونى سلام حمد الله ع السلامة لاخويا و حبيبي وابن بلدي عمرو ابن دياااااااااااااب
..............
..................
...................................
و عشان ما ارجعش ليكو بايدي فاضية
انا رجعت ليكو بهدية
اغنية مصرية
و اللى حضر الحفلة هايفتكرها
اسمها وسط البلد و الحدق فيكو يقول انا مين فيهم
الاغنية كلمات احمد حداد حفيد العظيمين فؤاد حداد و صلاح جاهين
و ألحان و توزيع احمد عاصم
و غناء اعضاء فرقة
Step by step
محمد عصمت
أريج مروان
وليد غانم
علي الالفي
على فكرة هاتلاقوا فيه مشكلة و خطا في هندسة صوت الاغنية و كلام المطربين مش كله واضح
بس اهو هدية و بصلة المحب خروف بقى
اسيبكو و يا رب تنبسطوا بالخروف...قصدي الغنوة
دوس هنا عشان تحملها

اعذرونى

لاننى قررت ان اكون انا و لن اكون غيري

و لانى قررت اما ان اقل الحق او اصمت

اذن فلأصمت

و لهذا اتخذت قراري بتجميد المدونة الى ان يحدث ما يجعل هناك مبرر لوجودها ووجودى

و لانى تعودت الا اكتب إلا عندما يكون هناك ما اريد ان اقوله

و لانى فقدت الرغبة في النطق

و الكلام

و الكتابة

اطلب منكم طلبين

ادعولى لانى امر بفترة صعبة صحيا

و ادعولى ان يصلح الله حالى

و نلتقي ان شاء الله عما قريب

بلا ولا شي

بلا و لا شي
انا اسف جدا لو كنت زي ماناس ردوا و قالوا فكرتكوا و فتحت جرح كان قرب ينطفي و ان كان مش هاينطفي ابدا

...

........

.........

بس دلوقت اسمحولى اشارككم معايا و حاجة حلوة عايشة معايا من فترة طويلة و كنت باحاول اكتب عنها اكتر من مرة لغاية ما فشلت
قلت اوريهالكوا اهي و انتو قولوا رايكم
غنوة حلوة قادرة تسحب الواحد مننا و توديه دنيا تانية خااااااااالص
يا سيدي ياسيدي قول كمان
انا كنت فين من الغنوة دي

فجاة و بدون مقدمات هبطت عليا نسمة
بس ايه نسمة بجد
فجاة لاقيت صديقي و عمى ساهر محمد بيبعتلي اغنية و بيقوللى اسمع
ايه ده
ايه المعنى ده
بلا ولا شي.............بحبك

الراجل اللي بيغني يا اسيادنا بيتكلم عن الحب الصافى من غير ولا حاجة
بحبك زي ما انت من غير أي شي
تعالي نعيش الحب بكل نقاوته و صفاه
تعالي نقعد بالفيية"الضليلة" مش لحدا ها الفية
يااااااااااااه
على فكرة الكلام عنها هايكون طبعا ركيك جدا و مش منطقي ان الواحد يقدر يوصف و يوصف في حاجة و هي تقدر تتكلم عن نفسها احسن كلام

دوس هنا
و استمتع يا برنس و اسمع بلا ولا شي
زياد الرحباني
شكرا قوي

المركب بتغرق يا قبطان.....المركب غرقت يا قبطان

تحذير: هذا الموضوع يوضع تحت تصنيف وجع قلب حقيقي لذا وجب التحذير ممنوع لمرضى القلب و الضغط و ذوى القلوب الرهيفة


تعرفوا كل ما بنسمع عن حد مات فجأة و هو مش واخد باله ان ده هايحصل
بيخلينا نفكر في حاجة واحدة
يا ترى ايه اخر حاجة فكر فيها؟؟..يا ترى ايه اخر كلمة قالها
وهو ده اللي شغل بالي و كان في حياتي طول اليومين دول

اكيد محدش فيكو غايب عنه ان فيه عبارة مصرية غرقت و مات فيها 1100انسان كانوا بيحلموا بلحظة يرتاحو فيها من غربة برة الوطن و بعيدة عن الاهل
و فجأة
المركب بتغرق يا قبطان...المركب غرقت يا قبطان
......
...
......

انا كان ليا تجربتين مع العبارة دي بعد ما غرقت
طبعا كلنا عارف وواثق ان اعلامنا المبجل كان اساسا و لا كإن الحدث ده حصل في شمال جنوب شرق اسيا الغربي
لان بالصلاة ع النبي كانت مصر مشغولة اليومين دول و مش مهم قوي الناس اللي ماتوا
اصل احنا كان عندنا كاس الامم الافريقية
و ماكانش الحدث واضح قوي
تقولش ناس كان عندهم رحلة صيد و القارب بتاعهم اتقلب
وانا شخصيا كنت في القاهرة عندى حفلة و ما كنتش مستوعب حجم اللي حاصل
لانى ما كنتش باشوف غير اغاني التليفيزيون و المصريين اهومما و شرفونا يا ابطال في معركتكو
............
؟.....

مرة كنت مع احمد عاصم بنسجل غنوة و اتاخرنا و اخدني نصلي الفجر في جامع عمرو بن العاص
و كنت انا مشدود قوي بالجامع و جماله
و فجاة دخل نعش و هانصللي الجنازة عليه
و سمعت من اللي حواليا بعد خروح النعش
لقيوه ميت و لابس سترة النجاة
وسألت عرفت انه من ضحايا العبارة
و ماكانتش الصورة اكتملت
عارفين اكتملت امتى
من كام يوم
لما اتذاع تسجيل الصندوق الاسود
عمركو سمعتو صوت الموت
عمركو سمعتو اخر كلمة قالها حد و انتو عارفين انه مات
عمركو سمعتوا صوت ناس من بعيد بيصرخوا و بيتشاهدوا
عمركوا اتخيلتوا حد وهو في عز ضلام الليل موجود في اشد درجات البرودة و ما بين ده و بين وحوش البحر و ما بين انعدام فرص النجاه
عمركوا جه في نظركوا منظر الاب اللي لبس ابنه سترة النجاة و استقبل الموت بنفسه
عارفين يعني ايه غرق
يعني مفيش هوى بيدخل للرئة يعني الم رهيب لا يطاق و ضغط ماء رهيب ع الودان و الم في كل مكان في الجسم بيتعصر و الم لا ينتهى الا برحمة ربنا و اذنه لملك الموت

عارفين يعني ايه منظر اهالي الضحايا و هم مستنيينهم و فجأة يسمعوا خبر زي ده
عارفين ايه معنى عنوان البوست
دي اخر جملتين اتقالوا في التسجيل
المركب بتغرق يا قبطان.......المركب غرقت يا قبطان.. المركب غرقت يا قبطان

هاتسمعوا في اخر ثوانى من التسجيل صوت المية و هي بتقتحم الكابينة و هاتسمعوا صوت الناس من بعيد و هم بيصرخوا و بيتشاهدوا و هاتسمعوا صوت القبطان و هو بيتشاهد

فعلا اللي مش هايستحمل

بلاش يحمل التسجيل
في النهاية انا هاسيبكم مع3حاجات
هاسيبكو مع صور اهالي الضحايا و الناجين
عشان اللي نسي يشوف
و هاسيبكو مع تسجيل الصندوق الاسود
صدقوني تجربة مؤلمة قوي
و اللي يحمله على مسئوليته الخاصة و محدش يلومنى
و هاسيبكم مع ضمايركم

انا لله و انا اليه راجعون

ست الحبايب يا حبيبة

كل سنة و انتو يا امى طيبييييييييين

على فكرة اللي انتو قريتوه مش خطأ املائي و للا هبل لغوى
لا
انا قاصد جدا
انا على فكرة فتحت عينيا ع الدنيا دي لاقيت لي اتنين ام
اه
انا لاقيت امى اللي ولدتنى و ربنا بعتهالى تنور لي دنيتي و اخدت منها اجمل احساس في الدنيا و اللي محبب الاناس في غنايا
و امى التانية اللي هي في الاصل جدتي ام ابويا
لكن طول عمرى ما اعرفش غير انها امى و بتحبني حب عجيب جدا
انا اول حفيد ليها و هى سمتني على من قبل ما اتولد و باحس بحبها محاااااوطني و جوايا

نيجي بقى لحاجة تانية
يا كل الناس بجد كل واحد قرا كلامى يجري يقول لامه كل سنة وانت طيبة و يبوس ايديها و دماغها
ربنا ما يحرمش حد من اللي ليه
دا احنا من غيرهم و الله ولا حاجة
اااااااااااااااااه
عمرى ما هانسى اعيد على امهاتى التانيين امهات كل اصحابي
كل سنة و امى والدة روزاليا و ووالدة جوسي و زحل الفلكى ووالدة احمد شلبي و امهات كا البلوجرز و اللي مش بلوجرز
كل سنة و النااااس طيبيييييييييييييييييييييييييييييييييييييييين
و ربنا يخليكو يا امى

الله عليك يا عم احمد يا بتاع زمان

بعد صباح القشطة و الفل و الذي منه

احب اتطمن عليكم و اطمنكم عليا

انا لسة باعافر مع الدنيا و لسة هى كمان بتعافر معايا

و لازم بين كل جولة و جولة الاقي نسمة صافية بتريح ايامى

و النسمة الايام دي جت من نواحينا هنا

جت من اخويا و صديقي احمد شلبي

و عشان ما اطولش عليكم في رغى كتير و مقدمات مالهاش لازمة

اسمعكو الكلام الحلو ده

و قبل ما اسمعهولكوا

اقوللكوا استنوا قريب الكلام ده متلحن و قريب جدا ان شاء الله

ااااااااااااااااااااااااااه على فكرة في اعتذار و اجب عليا

الى الاخت الغالية روزاليا

روزا يا جماعة قدمت لي هدية حلوة قوى جدا جدا ع المدونة بتاعتها لكن انا كنت في وقت صعب عليا شوية و كنت في

حالة مخلياني مش عارف استقبل اي هدايا

عشان كدة انا متاكد من انى احبطتها و نكدت عليها

عن طريقكم باقول اهو

تسلميلي يا روزا

بجد البوست حلو قوى

بس انا كان لازم اخرج من المود اللي انا فيه و اقراه مرة تانية بعين تانية و مود تاني

و قبل ما اعمل كدة كانت هى شالت البوست

و اهو هندكو كلام الاغنية اهو

بين فرح وحزن الدنيا طريق
بيسعنا ساعات وساعات بيضيق
وعشان ما نكمل سكتنا
الفرح صديق والحزن صديق
تعالى
نودع زمان
نسيب المكان
نسافر لبكره
على نغمة كمان
تعالى
نحط الأنين
على حزن السنين
ونرميهم ورانا
ونعيش فرحانين
وتحضننى بعنيك
بلمسة ايديك
تدوبنى فى ملامحك
تفرح روحى بيك
تعالى
احضننى بعنيك
بلمسة ايديك
دوبنى فى ملامحك
فرح روحى بيك
بين فرح وحزن الدنيا طريق
بيسعنا ساعات وساعات بيضيق
وعشان ما نكمل سكتنا
الفرح صديق والحزن صديق
هتعدى السنين
وتجينا السنين
وتبص فى عنييا
يناديك الحنين
هيقولك تعالى
ومد الأيدين
وأمد الأيدين
نتلاقى فى لحظة
ونطير بجناحين
ونوصل للقمر
لأبعد م القمر
لكل نجمة حلوة
شاركتنا السهر
وتحضننى بعنيك
بلمسة ايديك
تدوبنى فى ملامحك
تفرح روحى بيك
تعالى
احضننى بعنيك
بلمسة ايديك
دوبنى فى ملامحك
فرح روحى بيك

أنغام شكرا لانك موجودة بيننا

أنغاااااااام
و ها هي انغام تقنعني من جديد انها رمز للرقي و تؤكدلي انها ست الغناء و تاج راسه
يا جماعة المطرب اللي بيغني و خلاص مش بيعيش لكن المطرب اللي بيغني و بيحس و بيطرح فكرة من غناه هو اللي بيعيش و بيبقى فوق راس الناس كلها
انغام غنت غنوة جديدة في اخر حفلة ليها اسمها هاتمناله الخير
الموضوع لفتني جدا
و فكرت فعلا
ليه أي اتنين حبوا بعض و افترقوا لاي سبب لازم تنقلب محبتهم لكراهية و عداوة عنيفة
لا و كل واحد منهم يحاول على قد ما يقدر يدمر التاني و يشوه سمعته
و ينسوا حتى أي حاجة حلوة شافوها سوا
حتى العشرة و العيش و الملح
الاغنية دي بتتكلم عن اتنين سابوا بعض
لكن فضل جواهم حاجة حلوة و كل واحد منهم ماننسيش الطيب اللي شافه من التاني
حتى لو ما عادش فيه فرصة لرجوعهم لبعض
ممكن يتقابلوا و هم مفيش بينهم اساءة و يفضل من الحب اللي كان بينهم حاجة حلوة
تعرفوا
اصل احنا ياما بنشوف حوالينا ممكن تلاقي واحدة بتموت في انسان و هي عارفة كويس انه نضيف جدا من جواه و لكن لما ما يحصلش نصيب تلاقيها عملت كل اللي تقدر عليه في انها تشوه سمعته و تدمر علاقته بكل اللي حواليه و لو قدرت تشوه اصحابه كمان معندهاش مانع
المهم عايز احيي انغام و اللي كتب الاغنية لانغام و كل اللي بيسمعوا انغام و كلمات الغنوة اهى
..........
............
هاتمناله الخير
ايه يعني يفوتني و ينساني
ماهو ياما اتحمل علشاني
ما هو ياما كان قلبه غليا
هاتمناله الخير
ماهو قبل ما يجرحني داواني
كان عمرى و كان هو زماني
كان قلبي و روحي و عينيا
وهافتكر له حاجات كتير كانت ما بيننا
هافتكرله ايام هوانا
و الخطاوي اللي في طريقنا
هافتكر له حاجات كتير كانت ما بيننا
و هافتكرله ايام هوانا
و انسى لحظة ما افترقنا
لما كنا بنقسم الفرحة في عيوننا
و هافتكرله حاجات كتير
و هاتمناله الخير
ـــــــــــــــــــــــــــــ
هاتمناله الخير من قلبي
علشان يستاهل
دانا هاتمنى تلف الدنيا
تاني و نتقابل
وهافتكر له حاجات كتير كانت ما بيننا
هافتكرله ايام هوانا
و الخطاوي اللي في طريقنا
هافتكر له حاجات كتير كانت ما بيننا
و هافتكرله ايام هوانا
و انسى لحظة ما افترقنا
لما كنا بنقسم الفرحة في عيوننا
و هافتكرله حاجات كتير
و هاتمناله الخير

************

انغام...............شكرا لانك موجودة بيننا

لو عايزين تسمعوا الاغنية دوسوا هنا

على فكرة هي من حفلة و التسجيل مش قد كدة يعني و الفرقة كانت بايخة جدا

بس بردو انغام هي انغام

اااااااااااااااااااااااااااااااااااااااااااااااه

على فكرة لسة في بوست جديد عن اغنية غاطتني اقرووووووووووووووووووووووووه

ياااااااااااااا لهوى يا جدعان
هي الدنيا جرى فيها ايه
هم الرجالة راحوا فين
معلش خدتكوا في دوكة من غير ما اقول لكوا ايه اللي عامل فيا كدة
سمعتوا الاغنية اللي عاملها جوزيف عطية نجم ستار اكاديمي السنة اللي فاتت
و الله فيها مزيكا حلوة قوي و الواد بيغني بطريقة معقولة جدا بس كان عيبها الاستعراض المبالغ فيه في طبقات صوته لدرجة انه كان بيحزق و لا مؤاخذة عشان يجيب الطبقات العالية
لكن كل ده كوم و كلمات الكوبيله الاول كوم تاني
يا خبر يا جدعان
ايه اللي بيتقال ده
طب شوفوا كدة
......
.....
راح ارقص لك راح اغنيلك
راح اقضي عمري مقابيلك
قولي إنشالله
طلباتك و الله اوامر
نايم صاحي بقللك حااااااااااااااااااااااااااضر
...........
..........
و يكمل الاستعطاف و الشحتفة و يقوللها
خليكي الله يخليكي عمرى الجايي بشوفه فيكي
بدي انت تربي و لادي و تكوني الزينة في اعيادى
حبك شهادة ميلادي
ده طبعا غير الصرخة المدوية اللي اطلقها في بداية الاغنية
لااااااااااااااااااااااااااااااااااااااااااااا لااااااااااااااااااااااااااااااااا
لا تروحي


طبعا انا عاجبني جدا معنى الاغنية اللي هو اعتذاره عن غلطه في حقها و الاعتراف بالحق فضيلة
لكن عمرى ما هاستوعب ازاي وانا جاي اصالح حبيبتي اقوللها و النبي ارجعى
ربنا يخليكي و مايحرمك من اللي بتحبيهم
بس انت ارجعى و انا هاكنس و اطبخ و انضف الحمامات و
لا و ايه
اللي انت عايزاه هاتحزّم و ارقصلك و لو عايزة عجين الفلاحة كمان مفيش مانع
و اللي هاتطلبيه اوامر يا ست السيد
و تخيلوا معايا يا اخواننا لو فيلم بين القصرين اتعاد و الاخ ده فيه عامل دور امينة و نازل يبخر الست هانم
لا و للا الاحلى لو هي تسهر برا و تروح تشرب و تشوف عوالم و هو قاعد يدعيلها و يغسل هدومها و شراباتها و يربي العيال
المفروض كان يكمل بس انت ارجعى و انا هاكون خاتم في صباعك
لا خاتم ايه
انا فوطة مطبخ تمسحي بيها و هاقعد جنب الحيط بس انت ارجعى
اييييه
بتبصولي كدة ليه
انا ما تكلمتش الا ع الكوبليه اللي استفوني
بس تعالوا نتكلم عن الغنوة فعلا توزيعها حلو جدا
و الكليب كمان مهقول جدا
بس تعالوا هنا بيني و بينكم
مش البت الموديل اللي كانت معاه في الكليب بجد تعقد الصبيان و البنات في نفس و احد
المهم
اقوم انا لاحسن الغنوة تيجي من غير ما اشوفها
و ربنا يكرمكوا ياللي بتكتبوا الاغانى ابقوا خدوا بالكم انتو بتكتبوا لمطربين و للا مطربات و للا ربات البيوت

عندي ليكو خبر حلو

صباح القشطة على كل الناس اللي حبونا ووقفوا جنبنا

انا طبعا عايز اقول لكم بجد ماتزعلوش مني لاني نكدت عليكم الفترة اللي فاتت

اشي اكتئاب و اشي مشاكل و حاجات تانية

و زي ما انتو استحملتوني في كل اللي فات

عايكم تشاركوني فرحتي

انا الحمد لله اشتغلت هنا في مصنع ملابس جاهزة في بورسعيد

و انشاء الله اكون بدات اول خطوة في حياتي المستقلة عمليا

طبعا الخطوة دي هاتأثر على الغنا في حياتي بس مش عارف اذا كان سلبيا او ايجابيا بس كالعادة باطلب منكم الكلب ده

بجد ادعووووووووووووووووولي

اااااااااااااااااااااااااااه نسيت اقوللكم انا نزلت هنا ع البلوج كل ايميلاتي والحاجات اللي نقدر نتواصل بيها ع النت

هاتلاقوا ايميلي ع الياهو و الهوت ميل و كمان سكاي بي

ياللا بيننا موبايلات بقى

شكرا

في لحظات الوحدة و لحظات الياس يجمع الواحد مننا اي حاجة حلوة حصلت في حياتي و يقعد معاها

يعني يجيب البوم صور قديم او يروح مكان عزيز عليه او حتى يسترجع ذكريات قديمة ممكن تفرحه

و هو ده اللي انا عامله دلوقت

انا دلوقت باجمع كل الكلام اللي اتكتب عني ع النت و باحتفظ بيه لاني فعلا باكون محتاج قوي لكلمات الدعم الانساني

و اتفرجوا معايا

ده كان كاتبه الصديق باسم واحد بيدور على نفسه لما سمع اني عندي حفلة لانه كان بيحب يسمع واحشاني كتير دوس هنا

و ده اللي كتبه احمد عيسى صديقي اللدود و حاطط فيه صورة قديمة لينا واحنا عيال و شكلنا فيها كان عجيب حبتين دوس هنا

و ده اللي كتبته جوسي بومب فوكيرة بعد الحفلة بتاعتي دوس هنا

و ده اللي كتبته شيماء الصراحة خنقة برضو عن الحفلة دوس هنا

و ده اللي كتبته الصديقة وينكي نجمة في السما عن الحفلة و فرحتها بتجميعة المدونين في الحفلة دوس هنا

و ده اللي كتبه صديقي واخويا احمد شلبي دكتور زيفاجو عن يوم ما عملنا اغنية اللي انكسر يتطوح دوس هنا

و ده اللي كتبه موقع عشرينات عن اغنية اللي انكسر يتطوح و بجد كانت مفاجاة كبيرة قو ي ليا و اكتشفت ان اللي كاتبه الموضوع الصحفية الصديقة منى سليم و اللي عرفت منها قد ايه بتحب بورسعيد يوم ما جت تسجل معانا يوم احتفالات عيد النصر و اتفاجئت انها كاتبة عن الاغنية دوس هنا

و ده اللي كتبته الصديييييييييقة انجي سمراء النيل عننا كلنا و عن علاقتها بينا ك مدونين و ك بني ادمين دوس هنا

طبعا الشكر ممكن يبوظ جمال العمل

لكن انا باشكركم جدا و باشكر كمان اخواتي نهى كراكيب و اخوها طارق روكا و اختى روزاليا وأختي رودي و التوام فلاور و ريمي و الصديقة يارا وصديقي زحل الفلكي و ابراهيم و احمد الاماراتي و غيرهم على دعمكم ليا

و كالعادة باطلب نفس الطلب

بجد ادعووووووولييييييييييييييييييي

بورسعيد اون لاين....ربنا يفتح نفسكوا

طبعا لا اخفي عليكم حماسي الشديد لبلدي بورسعيد

حبي لبورسعيد مالوش علاقة باني مولود فيها و لا لاني عايش فيها من يوم ما شوفت هذا الكوكب

لا.........انا باحس تجاهها بكوكتيل مشاعر

اولا الاإعجاب لاني انا فعلا بحب نضافة جوها و جمال بيوتهخا القديمة و شوارعها و طبيعة الحياة فيها

ثانيا التعاطف انا شايف ان البلد دي من اكتر البلد اللي اتبهدلت في الدنيا و ناسها اتشحططوا في كل حتة ايام الحرب و انها من الممكن تاخد وضع تاني مهم جدا لو اهتموا بيها سياحيا لان جوها مميز جدا و فيها مقومات جامدة بجد

ثالثا التعاطف مع ناسها لان للاسف السينما و الدراما عموما تفننوا في انهم يطلعوا البورسعيدية بشكل كاريكاتيري مشوه بعيد تماما عن الشكل الحقيقي للشخص البورسعيدي

و ع الاقل كفاية ان ناس البلد دي نزلوا على جيوش تلت قوى عظمى بسكاكين المطابخ و بشكل بدائي بس طلعوهم و حرروا بلدهم

و برغم كدة مابيظهرش غير الشخص الاهطل الاهبل اللي فاكر نفسه فهلوي و بيحاول يضحك على طوب الارض

بس سيبكم من كل ده

طبعا اي حد بلاقيه بيحب البلد دي بيخليني مش مصدق نفسي و كمان اللي بيحاول يعمل فيها روح حلوة و خصوا في المواضيع الثقافية و الفنية

و لان احنا بلد مافيهاش لا ساقية الصاوي و لا حتى ساقية قلابة

و مفيش داعي نتكلم عن قبر الثقافة

يبقى لما الاقي جهة بتحاول تعمل حاجة تفرح زي ما قلتلكو لازم نقف كلنا وراها

المهم انتو طبعا اكيد سمعتوا عن موقع بورسعيد اون لاين

انا اكتشفت قد ايه الناس دي بيحبوا البلد و نفسهم يعملوا فيها حاجة

هم طول عمرهم بيعملوا حاجات و مشاريع مهمة تخص بورسعيد

لكن محدش يقدر يوصف سعادتي بالمشروع الجديد اللي هم عاملينه

يا جماعة الناس دي عاملين ان شاء الله يوم الجمعة دي و اول جمعة من كل شهر حاجة اسمها سوق الفن

هايعرضوا فيه كل حاجة داخلة تحت اسم الفن

موسيقى و فنون تشكيلية و نحت و تصوير فوتو جرافي و مجوهرات كمان

لا و ايه انا كمان هاغني هناك ان شاء الله

طبعا هاغني مش لوحدي احنا انا و اصحابي عاملين باند جامد كنا بنحاول نغني فيه غربي و شرقي كدة بشكل جديد

و ان شاء الله كلنا هانكون موجودين ان شاء الله عشان نحضر سوق الفن

و ان شا الله يكون موضوع ناجح و نشوفه كل شهر ان شاء الله

يا جماااااااااااااااااعة الدعوة عامة و تنوروا بورسعيييييييييييييييييييييييييييييييييييييييييييييييييييد

اللي انكسر يتطوح

و كالعادة لاقيت احمد شلبي اول حد واقف جنبي في أي شدة
و كالعادة بيقدر يبهرني دايما بحاجة جديدة من اساليبه لمساندتي
طبعا كلكم عارفين انا عامل ازاي من يوم ماحصل الموقف اللي حكيتلكو عليه بتاع يوم الفلانتاين
و من يومها و انا تعبان قوي و ماليش نفس لاي حاجة
امبارح قابلته ع النت و بردو كالعادة استقبلني
لوووووووول
كيفك انت
عارف يا علي ادخل عندي هنا في المدونة هاتلاقي حاجة انا كتبتهالك و شايفك قوي و انا باكتبها
و دخلت و انا مش متحمس
و
و...
تقدروا تقولوا أي لفظ من الفاظ المفاجأة
اتفاجئت...اندهشت...........انبهرت............اللي ييجي على بالكوا
ازاي الراجل ده بيحس بيا بالشكل ده
و ازاي قادر انه يؤرخ حياتنا و مواقفنا بشهر مبهر جميل
و فجاة وانا باقراها لاقيت اللحن بيزن في وداني
و لاقيتني باقول له افتح السماعة
و قعدت اغنيهاله
الغنوة دي بجد بقت مهمة قوي عندي و اللي عايز يسمع
دوس هنا
على فكرة دي اول غنوة انا ارفعها بنفسي و انا فرحان قوي بيها

و انا اول ما خلصتها نزلتها على طول

لا استنيت مزيكا و لا بروفات

عايز رايكو فيها بجد

و طلب اخير

ادعووووووووووووووليييييييييي

على فكرة انا غيرت الصورة اللي كانت موجودة لان البحر اللي انا طوحت فيه همومي كان موجود هنا في الصورة دي في رحلة السويس اللي كلمتكوا عليها و اكيد تقدروا تعرفوا انا مين في التلاتة اللي ماشيين

حفلة جامدة ان شاء الله

النهاردة عيد ميلاد صديقي اللدود احمد عيسى

و لانه هو جاب التورتة و الذي منه عنده في مدونته

انا قررت اني اجيب له هدية

انا عارف انها عنده

بس بردو الهدية مني مش اي حاجة

وخصوصا لما تكون الهدية دي انا

قصدي صورتي الشريفة و جنبي واحد كدة

اللي هو احمد عيسى

كل سنة و انت طيب

اهو تاج و خلااااص

كنت انا قررت اني عمرى ما هارد على أي تاج يجيلي و اني هاعمل و لا حاسس بيه
و برغم كدة صديقي اللدود و اخته و ناس تانية بعتوا التاج ليا و انا كنت مطنش
بس دلوقتي حاسس اني قادر اتكلم و احكي
اقروا و اعرفوني و حاولوا تتتعاطفوا معاياااااااااااااااااااااااااااااا

س:ايه اللي هايحصل لايميلك لما تموت؟؟؟؟؟؟

ايه السؤال الغلس ده؟؟؟؟؟
اكيد هايموت معايا
اللي مسجلينني عندهم في المسنجر اما هايعيطوا كل ما يدخلوا اون لاين
او هايمسجوه و خلاص
س:اديت الباسوورد لحد قبل كدة؟؟؟؟
لا و مستحيل اني اثق في حد للدرجة دي
س:لو كانت اه طبيعة علاقتك بيه ايه؟؟؟؟؟؟؟؟
اقرا اللي فوق
س:اسمك
علي وهبة علي الالفي
س:اسم الدلع المشهور و سط اصحابك؟؟
مفيش اسم محدد بس ساعات كانوا بيقولوا كالبوظة او لولو او علوكّا زي اللمبي
و دلوقتي بيقولوا علي ابن الناس الكويسين
س:عمرك؟؟
24سنة
انا مواليد 20/5/1982
س:برجك؟؟؟
برج الثور
انا عايز اقول اني مش مصدق ان فيه حد هايقوللي ايه اللي ممكن يحصل في يومي و الكلام ده
لكن انا مصدق ان الناس المولودين في نفس الفترات من السنة ممكن تتشابه بعض مواقف منهم
س:مجال دراستك؟؟
هندسة كومبيوتر
و ربنا ما يوري حد اللي انا شوفته في التعليم ابدا
س: شخصيتك نوعها ايه؟؟
مش عارف يعني ايه السؤال ده بس هاجاوب على قد ما فهمت
انا شخص متقلب و بصراحة احيانا سلبي و سريع الاحباط
بس كمان انا شخص صريح جدا و جاد مع اصحابي لدرجة اني ممكن اكن معاهم لطخ لو خايف عليهم
س:مودك؟؟؟
غالبا كئيب لغاية ما يحصل حاجة تغيره
س:وقت فراغك بتعمل فيه ايه؟؟؟؟
انا كائن تليفيزيوني و باعشق الفرجة
لدرجة اني باحس اني محتاج اعدل ع المخرجين غلطاتهم اللي انا شايفها من وجهة نظري
كومبيوتر كومبيوتر كومبيوتر
طبعا مش برمجة و للا حاجة من اللي ليها لزمة
لا لعب و شغل جرافيك و لعب في برامج صوت
و طبعا لما بيكون فيه اصحاب باخرج معاهم
س:الاكلة المفضلة؟؟؟؟؟؟؟؟؟
يوووووووووووووه كتير جدا
بس الاهم البيتزا و المحشي و الكباب
س:الصفات اللي اخدتها من بابا؟؟؟
العصبية الشديدة و سرعة القفش
لكن انا و بابا مختلفين تماما في حاجات كتير منها اسلوبنا في معالجة الامور و انا استفدت جدا من غلطات كتير بابا عملها و ناوي ان شاء الله ما اكررهاش
لكن كمان ابويا انسان متفاني في انه يسعد اللي حواليه و انا لما باقدر اعمل كدة باعمله
س:الصفات اللي اخدتها من ماما؟؟؟؟؟
الحنية المفرطة و الاحساااس العالي
و يمكن انا كل اللي بيسمعني اغني بيسال فيه حد في عيلتي بيغني
و للاسف مفيش
لكن اقدر اقول ان الاحساس اللي انا اخدنه في الغنا واخده كله من امي
كمان امي انسانة راقية جدا في تصرفاتها و نهمة للثقافة
س:اكتر6حاجات بتكرهها؟؟
اللي يكون بجح و يغلط و يكابر
السجاير و اللي بيشربوها
الظلم
قهر الرجال
الكدب و البجاحة في الكدب
اللي مايكونش عنده استعداد للتحاور و ينهي أي مناقشة بقرار من طرفه
الزحمة و الدوشة و الصوت العالي
و القذارة اللي بتبقى جو نفوس الناس و الغدر
المصارعة و افلام الرعب
س:اكتر6حاجات بتحبها؟؟؟؟
الغناااااااااااااااااء
الاكل و للاسف اني مش باكل عشان اعيش........لا انا باكل عشان باحب الاكل في حد ذاته
الصداقة اللي بجد لاني مش بلاقيها كتير
التقدير و مراعاة الشعور
الهدوم لاني مابلاقيش مقاسي اساسا و بيبقى يوم الشوبينج يوم نكد عليا و ع اللي
جابوني
النجاح لانه برضو مش كتير في حياتي
المزيكا بمعظم انواعها
س:الشغل بالنسبة لك؟؟؟؟؟؟؟؟؟
هو تحقيق الذات و تحقيق الاستقلال عن كل قيودك القديمة و استبدالها بقيود جديدة بس ليها قيمة
س:السفر؟؟؟
كان بيبقى احلى حلم ليا
لكن لما اتكرر بقى بيضايقني و خصوصا لما باسافر لوحدي باحس اني قلبي مقبوض
و بقى فيه شعور جديد عندي
اني هاموت على طريق السفر و ده بيرعبني جدا و انا مسافر
س: هل لديك اقوال اخرى؟؟؟؟؟؟؟
انا مارضيتش اني اقول في سؤال اكتر حاجات باحبهم
قد ايه انا باحب ربنا
و الله بجد انا مفتاحي في العبادة هو اني باحب ربنا جدا و لما باعصاه باكل نفسي مش عشان حاجة غير اني باغضبه و انا و الله باحبه جدا
حاجات تانية نفسي اقولها
انا بجد باخاف قوي من بكرة و من الناس و من الدنيا و من الفيران

يا جماعة في بوستين مهمين جدا عندي تحت

اقروهم

طارق جه يا رجالة

طارق جه يا رجالة
النهاردة زي ما كلكم عارفين كان فيه حفلة في مدونة وينكي بمناسبة عيد ميلاد الواد روكا
و كت معزوم انا فيها و الناس مستنيين
بس انا مارحتش
عارفين ليه
اصل اللي احنا كنا هانحتفل بيه كان في الطريق ليا
و روكا جه بورسعيييد يا رجاااااااااااااااالة
الدنيا النهاردة كانت بتشتي و الشوارع غرقانة و ده فعلا لحسن حظ الواد
انتو عارفين اصل بورسعيد بتبقى زي العسل في المطر
بحس انها بتتشاقى و بتبقى زي العسل
طب عايزين جنان اكتر
انا اخدت الواد و طلعنا نتمشى ع البحر
اه والله ع البحر جنب المية عدل
و فرجت الواد الشوارع و الناس و نزلت بيه قلب البلد و وديته التجاري
بس عارفين الاحلى
القلب اللي انا اكتشفته في الواد طارق
إيه البراءة و الطفولة و الرجولة و الجدعنة اللي مجتمعين في قلب الواد ده
كان نفسي جدا اليوم يكمل و نروح بورفؤاد و اوريه احلى اماكن في الدنيا بس الباشا كان عنده مواعيد في القاهرة و اطضر يسافر
انا بجد فوحان جدا
و اليوم ما كانش ناقصه غير اننا نتصور أي حاجة للذكرى
و ده للأسف ماحصلش
بس انا شخصيا مبسوط جدا انه جالي
و مستني جدا ان كلكم كلكم كلكم تنوروا بورسعيد

Happy Valentine Day

دا قلبي انا

Happy Valentine Day

.......................................................................

موضوع تاني

هدية الفلانتاين ليا

.......................

كنت حطيت بوست بمناسبة الفلانتاين و حطيت فيه صورة القلب المتقطع و خلاص
لكن حصلت مفاجاة النهاردة خليتني ادعله و احط بوست جديد
انتو عارفين ان كل المحبين بيجيبوا هدايا لبعض عشان الفلانتاين
بس انا الفلانتاين جاب ليا هدية و حسبي الله و نعم الوكيل
امبارح كنت باتكلم انا و امي و نصحتني ان احاول اشتغل أي حاجة كوضع مؤقت لغاية ما الاقي الشغل اللي انا نفسي فيه و اتفقنا على كدة
النهاردة صحيت على مكالمة من رقم غريب على موبايلي و اكتشفت انها من التوكيل الملاحي اللي كنت عملت فيه مقابلة شغل من شهرين و كانوا اختاروا حد غيري و فضلت انا في قايمة الانتظار
لاقيتهم بيقولوا ان فيه شركة تابعة لنفس التوكيل محتاجة موظف حسابات و تعالى حالا عشان تشوف
قمت و اتقمّعت و ضربت البدلة كل ده في10دقايق و نزلت
رحت لاقيت مدير الشركة فاكرني كويس و بيرحب بيا
و بيكلمني عن الشركة التانية اللي انا هاشتغل فيها و قعد يكلمني عن ان كل الحسابات و السيستم هناك ماشي بالكومبيوتر و ان شاء الله اشرفه واطول رقبته هناك و قعد يقول احنا اهم حاجة عندنا الاخلاق و الالتزام في الشغل
و قاللي اتفضل روح اسال عن الاستاذ فلان عشان تعرف منه طبيعة الشغل و المواعيد و عشان تستلم الشغل بكرة الصبح ان شاء الله
رحت يا اخواننا الشركة التانية الراجل استقبلني و اخد السي في و سابني حوالي ربع ساعة
قعدت في الربع ساعة فكرت في حاجات كتير قوي
قعدت افكر اول مرتب هاعمل بيه ايه و امتى هاروح لدكتور الريجيم و
و فكرت في اول حاجة هاجيبها باول قبض ليا
و فكرت في البوست اللي هاكتبهولكوا بمناسبة الشغل عشان انا عارف ان انا نكدت عليكم جدا
و فجاة رجع تاني و قطع افكاري الوردية
رجع مكفهر و سالني
حضرتك جاي و عارف الشغل هنا حسابات؟؟
فقلتله اني عارف
قاللي
و حضرتك محاسب؟؟؟
قلتله انا خريج هندسة جديد
قاللي
و خريج هندسة بيشتغل محاسب؟؟
و سابني تاني حوالي عشر دقايق
و لاقيته راجع بالسي في بيقوللي
احنا اسفين يا باشمهندس الادارة مش موافقة
و خلاص
كانت دي هدية يوم الفلانتاين ليا
عارفين الشفايف لما تتمط و الوش يتقلب ساعة لما الواحد بيبدا يعيط؟
من ساعتها و انا كدة
بس مش قادر اعيط
و لا عايز اعيط
و لا عايز اعمل حاجة
و لا كنت عايز انكد عليكو
بس كنت هاطرشق
لاقيت غنوة عجيبة قديمة عندي ع الكومبيوتر بصوت انغام
بتقول
في قلبي جرح
من الدنيا و عمايلها
و ايامي اللي ظالماني و باحايلها
كتير حاولوا يهدوني
يذلوني
يبكوني
يشوفوا الدمع في عيوني
و باضحك للي ظالمني
و تضحك ضحكتني مني
و ابات و الجرح متخبي
و لا مرة شاورت عليه


............................
....................
.............
......
...
.

للمرة الالف باطلب نفس الطلب
ادعووووولييييييييييييييييييييييييييييييييييييي

ماتحبنيش قد ما توريني انت قد ايه بتحبني

احساس حلو قوي لما تحس انك اثرت في حد بشكل من الاشكال ده اللي حسسهولي الواد حسام في زيارتي الاخيرة للسويس كنا زمان من حوالي اربع سنين كدة بنتكلم و شرحتله فلسفتي الخاصة في التعامل مع الناس و تعاملهم معايا كان وقتها لينا واحد صاحبنا دايما مشغول و مابيسالش على حد و تيجي تكلمه يلومك ازاي انت مش حاسس قد ايه هو بيحبك و انت واحشه رغم بعده و انشغاله فقلت الكلمة دي ماتحبنيش قد ماتحسسني انت قد ايه بتحبني بالعربي لو انت حد بيحبني و مابتعملش أي حاجة توريني انت بتحبني قد ايه انا استفدت ايه لو انت صاحبي و مفيش بيننا ع الاقل سؤال يبقى ايه؟ لو لما باشوفك بعد غياب ما بالقاش الحرارة في السلام و السؤال يبقى اهبب ايه بحبك و صداقتك و سبحان الله لاقيت الواد فاكر الكلام ده كويس و بيفكرني بايام ماقلناه و لاقيته بيتكلم معايا عن اسلوبي في التعبير عن حبي للاخرين و ازاي ان انا متفجر المشاعر ولما رجعت بورسعيد دخلت على مدونة الصديقة شيماء اللي اتفاجئت اساسا انها جت الحفلة من غير ما نتقابل لفت نظري في تعليقها عن الحفلة انها قالت لاقيت على الالفي في استقبالنا على باب ساقية الصاوي و فرحان قوي باصحابه البورسعيديين و البلوجرز كمان باسم اجدع واحد في الشارع علق على استقبالي ليه اكتر من مرة كلام حسام وباسم و شيماء خلاني الاحظ الحكاية دي في نفسي لاول مرة انا فعلا باكون طاير باي حد بييجي بورسعيد مخصوص عشاني و باكون طاير باي مكالمة سؤال عليا من أي حد من اللي باحبهم و باكون صريح قوي و واضح في التعبير عن حبي للاخرين و بصراحة بانتظر منهم كدة كمان يمكن ساعات ده بيسبب لي صدمة من اني مالاقيش كدة منهم و بيخليني ساعات اسال نفسي هو انا اللي غلط و للا هم يعني هو انا محدش محتاج مني اني اكون بالشكل ده معاه في استقبالي و تعاملي و يمكن اكون انا باطلب منهم اكتر من اللي هم يقدروا يعملوه عشاني مش عارف

الحمد لله خلااااااص

الاول عايز اشكر كل واحد وقف جنبي بكلمة تشجيع او خوف عليا و طبعا احنا عارفين ان الشكر بيبوظ جمال العمل و انكم مش محتاجيين
بس بجد متحرمش منكم
ماهو انا كان لازم اعمل أي حاجة تخرجني من اللي انا فيه
انا كان هايجرالي حاجة كنت وصلت لمرحلة مش طبيعية
و ربنا بعت لي العلاج على ايد صديق و اخ
فجاة لاقيت تليفون من عمرو صاحبي
الو انا هنا في بورسعيد انت فين
و نزلت
اااااااااااااه نسيت اقول لكم
عمرو ده صاحبي من السويس اتعرفنا من اربع سنين في اسبوع شباب الجامعات و من يومها الحمد لله ما انقطعناش عن بعض
المهم
تيجي يا واد يا لولو اللي هو انا ننزل اسماعلية نزور العيال؟
اه و الله فكرة يا واد يا مورو اللي هو عمرو
المهم و بعد شوية طلعت بفكرة تانية ان احنا نروح اسماعيلية نشوف اصحابنا اللي بيحضروا لاسبوع شباب الجامعات و بعد كدة نروح نكمل في السويس
كل ده في اقل من نص ساعة كنت محضر شنطتي الصغيرة و اتغدينا و هوب على اسماعيلية
ما طولناش هناك قوي
قعدنا من الساعة 7 للساعة 11و نص و طلعنا يا برنسات ع السويس
طبعا محدش كان فيه حيل للف و لا خروج
بس انا شبطت اني اروح ابص بصة على بورتوفيق عشقي كنا حوالي الساعة اتنين لما وصلنا بيت الواد سامو
اااااااااه سامو ده اللي هو حسام العجيب حاجة كدة طيبة قوي و مالوش في الاذية و انسان طيب كدة بطريقة اوفر شوية
المهم قبل ما ابدا احكيلكو ع المشوار
مش عارف ايه اللي بيني و بين السويس دي
اتعودت دايما ان كل لحظات اكتئابي او تعبي الاقيني باروح هناك اشوف كل الناس اللي باحبهم هناك و باحس ان كل اللي هناك اساسا بيدلعوني و مش الناس بس
لا الاماكن كلها
اللي مازارش فيكو السويس احب اعرفه انها بلد عادية جدا بس كله بعيد عن بعضه و دايما تلاقي وسط البلد في الاربعين و وسط السويس زحمة و تلاقي بورتوفيق دايما رايقة و جميلة
المهم قابلت هناك كل الناس اللي حابب اشوفهم في السويس قابلت تيكا اللي هو طارق الجدع
الواد ده يا جماعة طيب قوي و ادعوله لان فرحه خلاص كمان كام شهر
و قابلت سلاكة الواد اسلام الكراني مطرب لذيذ و واد جدع
هم دول الشلة اللي قضيت معاهم الاربع ايام
بس مش دول و بس
قابلت كمان ناس كتير من اصحابي في اسبوع شباب الجامعات اللي حكيت لكو عليه
روحنا مكان اسمة نادي التجديف هناك ع البحر و شفت بجد احلى مناظر للشمس و البحر و الاحلى اصحابي صبيان و بنات اللي كل واحد منهم ساب اللي في ايده عشان ييجي يسلم عليا
و الحمد لله الرحلة كان فيها شوية مفاجاات
يعني مثلا احنا قادين انا و مورو و حسام و فجاة نزل على راسنا مكالمة تليفون الحقوا النتيجة اتعلقت
طبعا نزلنا بسرعة و كل واحد فينا هايموت من الخوف
طب هم و خايفين لان نتيجة متحاناتهم
انا بقى خايف احسن تطلع خبر مش حلو و يتقال ياع الواد ده فقر علينا
المهم العيال نجحوا و كانت ليلة جامدة جدا الحمد لله
نيجي بقى لاهم حاجة حصلت في اخر يوم لما مورو اخدنا و طلعنا العين السخنة
بجد دي كانت احلى لحظات قضيتها من زمان
ايه الجمال ده و الروقان ده
طبعا العيال كانول مخنوقين لان المكان كان فاضي و مافيش زحمة الناس و المزز
بس انا كنت في احلى لحظات استمتاعي
و الدنيا بقت تمطر فوقنا و احنا قاعدين ع البحر نغني و نتصور
على فكرة انا لاول مرة اصر اني اتصور كتير كدة في أي مكان و مع اصحابي
بجد كنت عايز ارجع بشوية ذكريات حلوة عن الموضوع
ااااااااااااه
نسيت اقول لكم اني قبل ما اسافر بيوم كنت بردو باحاول اغير أي حاجة يمكن اتحسن شوية و روحت يا اسيادنا للحلاق شلت شعري كله نمرة اتنين
عشان اللي شافوني في الحفلة ممكن ما يعرفونيش في الصور
و رجعت من السويس ناوي ان شاء الله حاجات كتير ممكن تتغير
يعني يمكن ابدا الريجيم فعلا
و بدات احضر ال سي في بتاعتي من جديد
و نازل ان شاء الله اعمل جولة جديدة من اول و جديد

اكتئاب ما بعد الحفلة

إحساس سخيف بينكد عليّا في أحلى أوقاتي
عارفين اللي بيبقى مشغول و مهتم بحاجة و منهمك"حلوة منهمك دي"فيها جدا جدا و فجأة تخلص
و يرجع و لا حاجة
و يرجع مابيعملش حاجة
عارفين حتى لو الواحد مشغول بحاجة صعبة و مضايقاه ممكن يتعود عليها و لما بتخلص بيحس انه ناقصه حاجة
اهو ده اللي حاصل لي الأيام دي
طبعا محدش في الدنيا يقدر يوصف قد إيه فرحتي بالحفلة و الناس اللي حضروها و قد إيه أنا ما كنتش متخيل كل اللي حصل في الحفلة و حب الناس اللي اتحاوطت بيه
بس رجعت بورسعيد
و لسة بادور ع الشغل
و مفيش حاجة
و مش عارف إيه اللي حاصل لي
مخنوق شويتين زيادة
عمال افتعل مشاكل مع كل اللي حواليا
و مش متحمل حاجات كتير
تعرفوا
أول مرة افهم يعني إيه اكتئاب بعد الولادة
المفروض الواحدة يتبقى في اسعد حالاتها لأنها خلصت من تعب و إرهاق و آلام الحمل و الولادة
و الأحلى إنها جابت ابن أو بنت ها يكونوا سبب في سعادتها
لكن بعد الإحساس بان فيه حاجة مهمة هي فيها و بتخلص فجأة
ده بيسبب حالة اكتئاب عجيبة
؟
بتقولوا إيه؟
ممكن مايكونش هو ده السبب في حالة الولادةو السبب الحقيقي هرمونات من المخ تسبب الشعور بالاكتئاب عند الولادة؟
ماشي يا سيدي
انا اقصد حدث حلو قوي بعديه اكتئاب و نكد جامد قوي
و مثال سخيف
عادي بقى
المهم هو ده تفسيري للكلمة
و هو ده اللي أنا حاسس بيه الأيام دي
و زي مانتو كنتوا السبب في احلى لحظات حياتي
استحملوني في شوية لحظات غامقة كدة
طلب اخير
ادعولي تمر الفترة دي قبل ما تحصل مشكلة كبيرة بيني و بين أي حد من المهمين عليا
ملحوظة أنا نفسي اشكر تاني كل واحد حضر الحفلة كل باسمه و صفته
لكن حصلت حاجة عجيبة جدا جدا جدا ها بقى اكلمكوا عليها البوستين الجايين

ربنا يخلي كل احبابي اللي نوروا الحفلة

امبارح كانت الحفلة
الحمد لله رب العالمين ربنا و فقنا و كانت تقريبا احلى حفلة غنيت فيها من يوم ما بدات اغني مع الفرقة
تصدقوا اول مرة اغني قدام ناس عارفينني قبل ما اغني
انا بجد كنت في احلى حالة و احلى مود قبل ما اغني
و لاول مرة تحصل ان تقريبا نص الحضور كانوا جايين عشان يقفوا جنبي و يشجعوني
امبارح كان منتدى بورسعيد اونلاين عامل رحلة طلعت من بورسعيد عشان يحضروا الحفلة و الناس عملوا معايا احلى و اجب و فرحوني قوي بتشجيعهم و كمان بوكيه ورد حلو قوي
و كمان اصحابي من مجموعة حزب الوفد في بورسعيد برضه طلعوا باتوبيس عشان ييجوا يقفوا جنبي
و انا باشكر ربنا انه خلى الناس دي تحبني و تقف جنبي
و على فكرة انا بجد مش عارف ازاي اشكر انسان مهم جدا عندنا في بورسعيد و كلنا بنحترمه هو ا/محمد مصطفى شردي
الكاتب الصحفي و عضو مجلس الشعب
و سبحان الله ازاي ا/محمد شردي بيحبني و متحمس و هو اللي شجع كل الناس من حزب الوفد انهم يسافروا عشان يسمعوني و يشجعوني
المفاجاة الكبيرة لي هم البلوجرز اللي كانول موجودين
قد ايه كنت فرحان بيهم و مش عارف اساسا اعبرعن اللي عملوه معايا و هم دعموني ازاي رغم اني ممكن اكون متفق مع حد منهم او مختلف معاه لكن بجد حبهم اللي حاوطوني بيه كان كبير قوى
بس برضو انا مستني من نهى كراكيب و باسم شرف و من روكا تفسير لانهم ماجوش و كان كل الناس بيسالوا عنهم و انا منهم
و كمان كان فيه ناس من اصحابي ما توقعتش ابدا اني اشوفهم و لا الاقيهم في الحفلة
امبارح كنت حاسس ان كل حد موجود كان بيدلعني و كان بيحاوطني بحبه
كنت شايف ده في عيون اصحابي المطربين اللي جنبي و كل العازفين في الفرقة

و من احلى اللحظات في الحفلة لما طلع محمد الكتاتني صاحب مدونة زحل الفلكي و جاب بوكيه الورد اللي بورسعيد اون لاين جابوه لي
و طلع تاني و جاب لي سندوتش زنجر ساعتها القاعة كلها ماتت من الضحك بس والله ما دقته لانهم اكلوه مني
و كان الجمهور بيغنوا لي يا علي يا علي يا عترة يا فللي
نفسي اشكر كل اللي كانوا موجودين في ساقية الصاوي و اللي كانوا موجودين في الزمالك و كل اللي كانول موجودين في القاهرة عموما امبارح حتى اللي محضروش الحفلة
بجد انتو فرّحتوني قوي و ربنا يفرّح كل واحد منكم اكتر و اكتر
بجد الحمد لله رب العالمين و ربنا يوفقنا دايما

اوعى وشك كبشة لينكات مرة واحدة

بعد صباح القشطة على كل الحبايب اللي رفعوا معنوياتي و قرروا انهم يحبوني زي مانا حبيتهم
عايز اقول لكم
ان هيثم محفزظ حسسني قد ايه انا مقصر و مش عامل حاجة و عمال ارغي و اقول لكم ان انا مطرب من غير ماتسمعوا حاجة
و بعد محاولات عديدة فشلت بسبب ظروف النت عندي قرر اخويا و صديقي دكتور زيفاجو انه يساعدني و يرفع الاغاني بدالي عشان نعرف نحطها في مدوناتنا
المهم اهي كبشة لينكات عشان الحباااااااااااايب
اول غنوة اسمها واحشني كتير من كلمات محمد ابو زيد و ألحاني
و دي كانت بروفة مع صديقي شريف محسن ع الكيبورد

عايز تسمعها دوس هنا

و هنا غنوة باموت فيها لفيروز حبيتك تانسيت النوم

عايز تسمع دوس هنا

و دي كمان بروفة لاغنية اسمها ابعد بقلبك بردو ع الكي بورد لنفس الشاعر و الملحن

عايز تسمعها دوس هنا و ما يهمكش

ياااااااااااا رب يعجبووووكوا

و عايز اسالكم الاغاني دي تنفع انزل بيها فعلا و للا ابدا ادور على غيرها؟؟؟؟؟؟؟؟؟

مش كدة و بس

لا و كمان فيه لينك فيديو

اه و الله فيديو دي اغنية 3 سلامات من لقائي السنة اللي فاتت في دريم في برنامج شبابيك

عايز تسمع و تشوف دوس هنا

ادعووووووووووووووووووووووولي

يا خوفي يا جدعان

صباحو قشطة على كل المحبين و الناس اللي بقوا جوايا من اهلي
يمكن دي تاني مرة اكرر
يا جماعة عندي حفلة يوم 30/1 في الساقية
و بجد انا دايما اتعودت في كل حفلاتي مع الفرقة اني باحس اني لوحدي و مابيبقاش معايا حد من اصحابي او اهلي
تصدقوا ان امي عمرها ما حضرت ليي حفلة
عارفين ده ليه
لاني من بورسعيد و كل الحفلات بتبقى في القاهرة و السفر ممكن يكون متعب لناس
و يمكن ده عمل لي كدة حالة خاصة بين الناس اللي في الفرقة و كمان جمهور الفرقة
تصدقوا انا انا بقى ليا اصحاب من جمهور الفرقة و منهم ناس سافروا بورسعيد عشان يقضوا معايا يوم
و بلاقي في الناس اللي بيحضروا كل حفلاتنا نظرات حنيّة و احيانا تعاطف
هبل شوية اللي انا باقوله؟؟
يمكن
بس بجد انا حسيت ان فيه ناس كتير من المدونين بقوا اهلى و هم موجودين في القاهرة جاهزين و ممكن ييجوا و نفسي اشوفهم
بجد نفسي اشوف نهى كراكيب و باسم شرف و هيثم محفوظ و سماح جيرونيمو و باسم اجدع واحد في الشارع و غيرهم و غيرهم كتير
انا هاروح اسجل كوممينت عند كل و احد فيهم و اعزمه ع الحفلة
و هاشدد عليه ييجي
على فكرة انا عرفت ان فيه مدونين كتير جايين بس كلهم من بورسعيد و اول مرة احس بوقفتهم جنبي
روزاليا جاية و جوسي و زحل الفلكي و دكتور زيفاجو و ساعة الغروب
و لسة
انا مستني حد يقول لي انا جاي
بس ياخوفي الحفلة دي زي كل حفلة اتكبس و انا مش لاقي حد معايا

على فكرة في بوست تاني جديد تحت

المدونة في خطر

يا لاااااااااااااااهوي

اكتشفت يا ناس ان فيه مدونة تانية اسمها تفاصيل
و يمكن اقدم مني
و يمكن اجدد مني
مش عارف
و مش عارف كمان اعمل ايه
ممكن تفكروا معايا
هو عامل حروف الكلمة مختلفة عني
Tafassel
وانا عامل
Tafaseel
بس لما عملت بحث بالجوجل عن كلمة تفاصيل
لاقيته بيوصل ع المدونة التانية
اه عارف ان المدونتين مختلفين جدا لأبعد حد
هو مدونة سياسية بحتة
وأنا مدونتي بتتكلم في كل حاجة تخصني و من جوايا
بس ممكن تقترحوا عليا
أغيّر اسم المدونة؟
بس انا متعلق بيه جدا
وللا ازوّد ع الاسم حاجة تانية
و للا اعمل ايه
دلوني يا عزوتي

لاول مرة حد يناقشني في بوست كتبته و كنا بنتكلم انا و الصديقة الغالية اختي روزاليا عن تفاصيل الموضوع
و حسيت انها اتفاجأت من كلامي لما قلت لها ان الحب بقى رفاهية مش كل الناس تقدر تحصل عليها و ان اللي معهوش مايلزموش
ردت و قالت:بس انا اعرف ان الحب حق طبيعي لكل الناس و كل الناس لازم تعيشه مش رفاهية مقتصرة على حد معين
سكتتني كلماتها بس لما فكرت لقيتني باكلم نفسي
و هو ايه مش حق طبيعي للناس
و أي حق طبيعي للناس واخدينه
معلش كلامي مفركش شوية؟؟؟ استحملوا ماحنا متفقين
قصدي انه فيه حقوق بديهية لكل البشر و كتير من الناس مش قادرة توصل لها و عشان كدة اقتصرت على ناس معينين و بقت نوع من الرفاهية
طب مش هي اللقمة النضيفة الهنية حق لكل البشر
مين لاقي ياكل الايام دي
و اللي لاقي تفتكروا مبسوط باللي بياكله و هو محروم من حاجات كتير مش عارف يجيبها و نفسه يتعرف على طعمها
و لو لقى اللي عايزه مش بيبقى طالع ميتينه على ما يقدر يخطف اللي يجيب بيه اللقمة دي
بلاش اللقمة
طب مش هو السكن حق بديهي و مشروع لكل البشر
مين لاقي يسكن في اربع حيطان يلموه هو و اللي متحمل مسئوليتهم
و لو لقى تفتكروا ده هو السكن الحلو اللي بنحلم بيه كلنا ؟
تفتكروا حد هايتبسط في الجحر اللي عايش فيه و هو شايف اعلانات دريم لاند و مدينتي و الرحاب و هو مايقدرش اساسا يهوّب ناحيتهم حلوة"يهوّب"دي؟
طب مش الهوا حق كل الناس مين قادر يتنفس في الخنقة و السحابة السودة و مصانع الموت اللي بتتفتح جوة المناطق السكنية
حتى بورسعيد اللي فيها انضف جو في الدنيا
عايزين يشوهوها و يفتحوا فيها مصنع اسمنت
كان نفسي اوضح لها ان فيه حقوق كتير للبشر مش عارفين ياخدوها و ما جاتش ع الحب يعني و ان اللي ما معهوش مايلزموش
و عايز اسالكم في حاجة
مش بردو العجز هو العدو الحقيقي لاي مشاعر صادقة و رقيقة جوة البشر
زمان قالوا:ان دخل الفقر من الباب هرب الحب من الشباك
و بصراحة انا لو لقيت واحدة بتحبني و دايبة فيا و انا باحبها و مش قادر ارتبط بيها عشان الظروف ممكن اكره نفسي و اكره عجزي قدامها و يمكن اكرهها هي كمان
و كل ما هالاقيها متمسكة بي اكتر كل ماهاتعذب اكتر
يبقى انا كدة في السليم
يعني مثلا تفتكروا ان انا مالاقيتش البنت اللي تهز الدنيا في عينيا
عايز اقول ان ده مر في حياتي كتير جدا و اني الاقي البنت اللي لو حلمت بشئ بالاقيه فيها و بابقى نفسي اكمل معاها عمري
بس لاني صادق قوي مع نفسي و رافض اعيش تجربة مؤلمة
بابعد عنها بكل الطرق الممكنة
و ساعات بابقى غتت جدا جدا معاها عشان ما احسش بيه و لا هي تحس بيا اساسا
و اهي ماشية
انا مش هاحب و لا ارتبط الا لما اقف على رجليا و ابقى قادر على اني احب و يبقى فيه نور و ناس و بيت
على فكرة اكبر هاجس ليا في الحب هو النور
طبعا مش نور الكهربا
لكن النور اللي فيه ما ابقاش خايف من حبي و لا خايف من حد و ابقى ماشي ايدي في ايديها
مش حابب اني احب و اخاف من الناس و لا هي تكون خايفة من باباها مثلا او اخواتها عشان انا مش قادر ارتبط رسمي
و كمان مش عايز ابقى رايح اتقدم لواحدة و كل امكانياتي هي علبة جاتوه اللي داخل بيها ع الناس
معلهش المرة دي خرجت بيكم من موضوع لموضوع و لفينا لفة كبيرة حمد الله ع السلامة
*************************************************
و في الاخر احب اقول لكم
كان فيه غنوة عبقرية لأنغام اسمها معنى حبي بتقول



معنى حبي
ان قلبي يلقى كل حاجة انت
تبقى ليه و مين و امتى
و الاجابة
تبقى نور و ناس و بيت
تبقى صوتي لما اغني
او دموعي لو بكيت
معنى حبي
ان قلبك لو ناداني
اجمع العمر في ثواني
و اهديهولك في ابتسامة
احلى من كل المعاني
معنى حبي
لو حياتي ساعات خديتني
و في زحام الخوف رميتني
اجري
و احلم بين عيونك
لو بقلبك يوم ناديتني
معنى حبي
ان قلبي يلقى كل حاجة انت
تبقى ليه و مين و امتى
و الاجابة
تبقى نور و ناس و بيت
تبقى صوتي لما اغني
او دموعي لو بكيت

مش حابب اني احب

من اجمل الاغاني اللي انا لحنتها يمكن عشان اتكتبت لي مخصوص و لحالة انا لسة باعيشها لحد النهاردة
غنوة اسمها مش حابب اني احب
ايه مالكم تنحتم ليه اه مش حابب اني احب
اه يا عم مش حابب اني احب
و احب ليه اساسا؟؟انا ناقص تعب اعصاب و مرمطة
و تليفونات و بعد ماتتكلم معاك بالساعات تقولك :حبيبي بلاش تكلمني اليومين دول عشان بابا
و للا انا ناقص مصروف الفالانتاين و اشتري دباديب و هدايا مالهاش لازمة و بردو اهو رزق الهبل
و لو ما اخدناش الحكاية هزار و اتكلمنا بجد هو انا فعلا جاهز لاني احب و ارتبط بواحدة
لالالالالالالا بلاش دماغكم تروح حتة غلط خالص
انا قصدي انه أي شاب في حالتي المادية لسة مش لاقي شغل و لسة ما بناش نفسه ماديا و مش مسنود على أي حاجة و مش منتظر ان اهله يساعدوه في أي حاجة مش ندالة منهم و لكن لانهم هم كمان مستنيين اللي يساعدهم
تفتكروا انه يبقى جاهز لحب و انه يربط نفسه و اعصابه و حياته بواحدة ممكن تكون مخلصة ليه جدا و ده يزود عذابه طبعا و يفضل يحرق في نفسه و يشتغل أي حاجة و السلام المهم يجيب تمن الشبكة و الشقة و الذي منه و في الاخر تتجوز واحد غيره عشان اهلها شايفين انه مناسب ليها اكتر و جاهز اكتر
و على فكرة الحاجات دي عمرها ما حصلت لي بس حصلت حواليا كتير و اكتشفت ان واحد زيي مش ممكن يرتبط الا بواحدة تكون ميتة في التراب اللي بامشي عليه عشان ترضى تستحمل ظروفى و بردو هي لو استحملت اهلها مش هايرضوا يسيبونا في حالنا و مش هاتكمل الحكاية
ايه؟؟؟؟؟؟؟؟؟الغلس اللي بيقاطعني كل مرة شايفه قاعد هناك على جنب بيعيط على حاله
معلهش يا سيدي بكرة تروق و تحلى بس ابقى افتكرنا


!!!!!!!!!!!!!!!!!!!!!!!!!!!!!!!!!!!!!!!!!!!!
دانا نسيت نا كنت عايز اقول لكم ايه!!!!!؟اه الغنوة اللي اتكلمت عليها في الاول
على فكرة هي مش كلام جامد و تفعيلات و حاجات من دي بس هي كلام صادق جدا و قريب هانزلها ليكم بس لظروف النت عندي اعذروني
الغنوة بتقول:
مش حابب اني احب
ولا ادخل قصة حب
انا يعني هاحب ليه
كدة عايش متهني
هم اللي حبوا يعني
اخدوا م الحب ايه
لا انا عايز شوق بجنون
ولا قلبي عليا يهون
و لا عايز عقلي يطير
انا قلبي غالي عليا
ليه اجني عليه بايديا
ليه ارضى بعذابي
و حبيبي يقسى عليا
و اسهر ما تنام عينيا
و يضيع كدة شبابي
مش حابب اعيش اوهام
ساعة فرح و ساعة الام
و لا عايز عقلي يطير
كدة عايش متهني
هم اللي حبوا يعني
اخدوا م الحب ايه

دي كلمات واحد صاحبي اسمه محمد التابعي و على فكرة هو بطل كتابة بعد ما شاف انه مفيش فايدة و قاعد دلوقت في محل لتغيير زيوت السيارات
ايه لسة فيه فايدة؟؟

رغم أنف كل حاجة كل سنة و انا طيب و كل احبابي منورين حياتي

معكم علي الالفي يحدثكم من على عمق6بطانيات فوق سطح السرير حيث اعاني من نزلة برد حقيرة بوظت علينا امبارح ليلة العيد انا و العيال اصحابي و كادت ان تمنعني عن اداء الصلاة بس ربنا ستر
المهم
كل سنة و انا طيب رغم انف البرد الرهيب اللي مالي بورسعيد اللطيفة
كل سنة و انا طيب رغم انف الانفلوانزا البايخة اللي جايالي بشكل مختلف
يعني مش شوية رشح و عطس و كلام اهبل من ده
لا دي حرارة و رعشة و كحة من اللي بتوجع القلب
كل سنة و انا طيب رغم انف اودتي العجيبة اللي اكاد اجزم اني لو طلعت الاكل من التلاجة و سيبته فيها مش هايجراله حاجة و يمكن يتجمد اسرع
كل سنة و انا طيب رغم عدم و جود الشغل لحد النهاردة و ان شاء الله هابقى زي الفل قريبا
كل سنة و انا طيب رغم انف امريكا اللي قررت تصبّحنا اول يوم العيد بخبر اعدام صدام حسين و برغم انف الجزيرة اللي مالهاش هم غير تصبحنا بحاجة تسد النفس زي دي
كل سنة و انا طيب رغم انف فرصة الغنا اللي لسة باعافر عشان اجيبها و رغم انف شركة الانتاج النصابين اللي كانوا عايزين يدفعوني5000جنيه عشان يتكرموا و يحطولي غنوة في شريط معرفش هاينزل و للا لا
مش بس كل سنة وانا طيب
لا ده كل سنة و انا طيب و كل حبايبي منورين حياتي و مدلعينّي ع الاخر و محسسيني ان انا حاجة حلوة في حياتهم زي ما هم حاجة حلوة قوي في حياتي
كل سنة و ابويا الراجل الطيب زي الفل و حالته مستقرة و امي الحنينة قوي معايا و ماتحرمش منها
كل سنة و نينتي زي الفل و يارب تفضل معانا العيد الجاي و اللي بعده و اللي بعده الى ما لا نهاية
كل سنة و اخواتي البنات اللي جايين طايرين م الفرحة بدون سبب طيبين و اخويا محمد اهدا و اعقل السنة الجاية
كل سنة و اصحابي الغاليين حواليا و منورين الدنيا
كل سنة و زيكس المهاجم طيب و زي الفل
كل سنة و روزاليا العاقلة ب10000خير و بردو زي الفل
كل سنة و كراكيب رقيقة و منورة الدنيا رغم ضلامها
كل سنة و جوسي سابقة السن و اخوها مفتكس و لذيذ و مستحمل اشتغالاتنا التي لا تنتهي
كل سنة و هيثم محفوظ نجم الدنيا و منور الغنا في الدنيا
كل سنة و شادي صاحبي طيب و ييجي بورسعيد تاني
كل سنة و دكتور زيفاجو طيب و جنبي داعمني وواقف جنبي ماديا و معنويا و انسانيا و شعريا و كل حاجة
كل سنةو سماح جيرو نيمو رقيقة و عاقلة و متفتحة و فرحانة و سعيدة و يا رب الحكاية تكمل على خير
كل سنة و اللي بيدور على نفسه يفضل اجدع واحد في الشارع و يفضل كمان يحبني من غير مايشوفني

كل سنة و احمد عيسى صديقي اللدود موجود في حياتي و ينورها بغلاسته اللذيذة و تعليقاته العنيفة

كل سنة و شريف اعجب صاحب في الدنيا طيب و ربنا يهدينا و تقل عدد الخناقات اللي بيننا

اكيد نسيت ناس غاليين عليا دا و معرفتش اقول لهم كل سنة و انتو طيبين
بس انا عايز اقول للدنيا كلها بجد كل سنة و انتو طيبين و فرحانين وانا من ضمنكم

الى من اصبح شهيدا بدون مناسبة

لما حد بيستنى منك انك تاخد خطوة معينة
و انت بتبقى عايز جدا انك تاخد الخطوة دي
و ما بتكونش قادر انك تاخد الخطوة دي
يبقى الطرف التاني لازم يعذر و يقدّر
يقدّر انك بتتعذب و انت بتبعد عشان ماينفعش
و يقدّر انك بتتعذب و انت بتبعد عشان مايتعذبش في انتظار طويل لشئ ممكن يبقى صعب انه يحصل
ويقدّر انك بتتعذب و انت بتبعد عشان ما تفقدوش كصديق حتى و لو ماحصلش نصيب و عشان ماتفقدش علاقة صافية طيبة رقيقة في حياتك
و يقدّر انك فكرت فيه و التزمت ناحيته و مارضيتش ليه انه يمر بتجربة صعبة معاك و مش معروف نهايتها ايه
و يقدّر انك مارضيتش تستغل بداية حب رقيق و تعيش اللحظة و خلاص
عموما انا نايم و ضميري مرتاح
بس بردو ضميري بيعذبني لاني حاسس ان فيه حد مجروح بسببي رغم اني حاولت ماجرحوش
بيقولوا دايما وجع ساعة و لا وجع كل ساعة
و اذا كانت الجراحة مؤلمة لكن ألم الوجع اكبر
كدة و للا ايه

عرفنا ميعاد الحفلة يا جدااااااااااااااااااااااااااااااااااان

فاكرين لما اتكلمنا و قلنا عندي حفلة
و رجعنا و قلنا الحفلة اتاجلت عشان الناس هايكونوا في امتحاناتهم و محدش هايعرف يجيلنا
اهو الحفلة اتاجلت فعلا و بقت فب الاجازة
يا جماعة عندي حفلة يوم التلات 30-1 في ساقية عبد المنعم الصاوي مع فرقة
Step by step
و ان شاء الله اشوفكم كلكم هناااااااااك
و أي اخبار جديدة هانقول لكم
ياللا موبايلات بقى

كلاكيت تاني مرة انت تخين ماينفعش تغني

لاول مرة باكرر موضوع ع المدونة بس يمكن عشان الموضوع ده شاغلني

زي ماباحب اقولكم عن حاجات كتير جوايا باحبها و ناس مهمين في حياتي اسمحولي النهاردة اتكلم عن حاجة تانيةانا

كنت حكيت لكم قبل كدة اني فتحت عينيا ع الدنيا مالقيتش نفسي باعرف حاجة غير اني اغنيو طبعا الغلس بتاع كل تدوينة بيقول دلوقت :دانت صدعتنا و قرفتنا كل شوية بتغني بتغنيو ارد عليه و اقوله ربنا يخليك ابعد عني الساعة ديالمهم طبعا لان كتير منكم ماشافنيش فاماتعرفوش الحقيقة العجيبة اللي في حياتي و هي اني تخينمش مفشول قوي بس تخينو ده اللي باصتدم بيه جدا و باتفاجئ بيه كل ماباروح اشتري هدومتقولش الدنيا ما فيهاش ابدا غير مانيكانات و موديلز ولو لاقيت البياع يطلع عيني في السعر و هو بيقول الكلمة الخالدة:معلهش يا بيه مقاسات خاصة و مش هاتلاقي في السوقكل ده مش مهم لكن اللي باصطدم بيه بجد الكلمة اللي قرتوها في العنوانانت تخين يابني ماينفعش واحد زيك يغنيروح خس الاول قبل ماتفكر تيجي هناباحس ان عماد حمدي طلع من فيلم الخطايا و غير الكلام بدل ما يقول انت لقييط بدا يقول انت تخيين اخرج من بيتيهم اللي ماسكين صناعة المزيكا في مصر مايعرفوش ان في كل بيت و عيلة في الدنيا في واحد و اتنين و عائلات كاملة كلهم تخانوللا خايفين يجرحوا نظر الناس بواحد تخين اللهم احفظنا زي ماكون جربان وللا عندي اعاقة او من المشوهينو للا هو مافيش تخان بيمشوا في الشارع و بيروحوا الجامعة و بيحبوا و بياكلوا و بيدخلوا الحمام زيهم زي أي كائن حقيقي ماشي على رجليه سواء كانت اتنين و للا اربعةو الغلس عايز يقول حاجة ّ!!!!عارف يا سيدي ان اللي عندهم اربع رجلين مابيروحوش الجامعة بس انت بتوقف الكلام عند ملحوظات رزلة زيك!!وللا هو المفروض ان التخان يتلموا في مراكز لاصحاب الاحتياجات الخاصة و يتعمل ليهم اعادة تاهيلانتو عارفين ان ده خلاني احب تخني و شكلي جدا و عامل اليوزر نيم بتاعي في كل حاجة كلبوزو ازاي في الخليج يقيموا الناس على اساس انهم مطربين جامدين و موهبتهم عالية و اللي في ايديهم صناعة المزيكا في مصر بيدوروا بس ع المزز الجامدة و الشباب اللي طالع طازة من الجيم و فاتح زراير القميص للاخريعني لو حسين الجسمي دا كان بيدور على فرصة هنا في مصر كان زماننا اتحرمنا من مطرب عبقري بقى!!!! وللا ايه؟على فكرة انا كمان مش بتاع اامان يا لالاللي و للا الاغاني اللي بتتقاس التايمرلا .....انا واحد باحب اغني الاغاني اللي كل اللي في جيلي و سني بيحبوها و على فكرة اللي فوق دي صورتي انا من غير فوتو شوب والله

والله دا انا جامد قوي

تعرفوا؟

حسيت ان رد اعتباري الحقيقي حصل لما بدا البرايم الاولاني لبرنامج ستار اكاديمي

ما كنتش فاهم ليه ما قبلونيش و لا خلوني اكمل الختبار

و كنت حاسس ان فيه حاجة غلط

و الحمد لله فهمت و عرفت و اتاكدت

انا صوتي مش نشاز عشان كدة ما اخدونيش

يومها ماكونتش فاتح القميص لحد بنطلوني و لا كنت ماشي عامل فيها نجم و لا كنت باتتنك ع الناس

و لا كنت بادخل اعمل افلام ع اللجنة

عشان كدو ما طلعتش

قشطة

طظظظظظظظظ

انا جامد غصب عنكم

و الله ما غرور ولا تنطيط

بس عرفت بجد ان انا مطرب كويس لما شفت الحفلة

بس بردو هافضل اتفرج و اتسلي بالهزار و الكلام و المشاكل المفتعلة و الهيصة

نعمل ايه فاضي بقى

و طبعا حد هايقول عشان ما اخدوهوش الواد هايطق و منفسن ع البرنامج

لا والله

بجد

يابني انا لو كنت رحت و انطبقت عليا الشروط دي كان ممكن يجرالي

و لسة قدامنا كلام

........

...

..

بس تعالوا هنا

شفتوا الحفلة كانت الابهار فيها عالي ازاي

طب شفتوا شيرين كانت جامدة ازاي

الحفلة اتاجلت يا جدعاااااااااااااااااااااااااااااااااااان

اه والله اتأجلت و على فكرة كدة احسن عشان اللي عنده امتحانات يكون مالوش حجة
و خلاص

نتقابل هناك ان شاء الله

على فكرة هي اتجلت اسبوع و بقت اول اسبوع في شهر فبراير

مش بعيدة يعني

و بردو ياللا موبايلات بقى

عندي حفلة يا جدعاااااااااااااااااااااااااااااااااااااان

اسكتوا اسكتوا

اقولكوا مفاجاة

مش طلع عندي حفلة قريب

اه والله يا كل مدونييييييين الدنيا والله عندي حفلة قريب في ساقية الصاوي

مع فرقة

step by step

يوم 23/1/2007و لو حصل اي تعديل هانبلغكم

ياللا موبايلات بقى

مالحقتش ارجع..............مسافر تاني

كان دايما بيبقى اليوم اللي باروح فيه القاهرة زي ما يكون العيد

ما بيجيش نوم

و افضل اخطط هاعمل ايه

مش عارف في ايه المرة دي مش حاسس بأي حاجة اهو مسافر و خلاص

يمكن عشان لسة راجع ماكملتش اسبوعين و للا يمكن عشان السفرية اللي فاتت تعبت فيها شوية و القاهرة كانت مغلسة معايا

مش عارف

يا رب خير

المهم عايز منكم شوية حاجات عايز يافطة كبيييييييييييرة جدا مكتوب عليها مصر بترحب بيك يا علوة

و عايز fire works

و عايز بالون شووووووو و احتفالات في كل حتة

و عايز مترو انفاق رايق و مش زحمة و مفيهوش روايح من اللي انتو عارفينها

و عايز ميكروباسات مكيفة و سواقينها زوق

و عايز اتوفق في الشغل اللي رايح اعمله

و عايز ارجع منها مبسووط

بصراحة مش عايز ارجع اكتب الهرس التالت

طبعا عارف اني هاوحشكم

لي طلب اخير لاول مرة اطلبه

ادعولي

حفلة سلمى

ممكن نستريح شويتين من الهرس و نتكلم بقى في حاجة حلوة حصلت وانا في القاهرة الحاجة دي هي حفلة اختي و صديقتي الغالية سلمى صباحي
ايوة اللي انا كنت باكلمكم عنها قبل ما اسافر
الحفلة بجد كانت حلوة قوي و يمكن احلى من حفلتها الاولى
كل شئ كان متوضب كويس
الفرقة و الصوت و حتى الشكل و المناسبة الجامدة طبعا
عيد ميلاد فيروز
حاجتين لفتوا نظري في الحفلة
حسيت ان معظم الناس اللي كانوا موجودين كانهم بيسمعوا الاغاني دي لاول مرة رغم انها غنت الاغاني المشهورة بس
و الحاجة التانية ان كان في اوتوبيس طالع من بورسعيد عشان يحضروا الحفلة و كلهم كانوا سعدا قوي بسلمى و بالساقية اللي طبعا عقدّتهم زي ما عقدتني عشان مفيش مكان زيها ولا حتى اقل منها شوية في بورسعيد

و رغم ان سلمى ما غنيتش الغنوة اللي كنا عاملينها ليها الا ان الروعة اللي كانت فيها الحفلة و اغاني فيروز كانت كفاية عشان تخلي الواحد ينسى الاغنية و الدنيا و الهرس اللي انتم بس تعرفوه
100000000000000 مبروك يا سلمى و يا رب عقبااااااااااااااااااالي
و اسيبكم مع احلى صورتين شفتهم للحفلة
و احدة للمصور االبورسعيدي الموهوب جدا وليد منتصر

و التانية للمصور الجامد جدا جدا جدا محمد عز"ميزو"

الهرس التاني

و تكمل الرحلة العجيبة بيوم جديد في القاهرة
كنت رايح اعمل اختبار لشغل في الجيزة و كنت في مدينة نصرو نازل من الساعة7الصبح
تصدقوا يا ناس ان سواق ميكروباص جيت اركب معاه نزلني و قال:انا عايز واحد رفيع!!!لامؤاخذة يا استاذ
دا مع ملاحظة التلاحم الجماهيري اللا انساني الموجود اساسا
و استنيت لغاية ما تكرم واحد منهم و اتعطف ووافق اني اركب
اما عن موقف السيدة عائشة او السيدة عيشة زي ما بيقولوا
ف انا شايف ان اكبر اهانة لام المؤمنين عائشة رمز الرحمة ان الجحيم ده يبقى على اسمها
ايه ده المفروض يبقى اسمه ميدان كونداليزا او ميدان امنا الغولة لان لا السيدة عائشة و لا أي حد يرضى باللي بيحصل
عربيات مكتوب عليها جيزة و مش راضية تحمل و امم من البشر منتظرة عربية و احدة عشان يهرسوا بعض و يهرسوا أي حد مش مهم راجل او ست
شايلة عيل او طالبة جامعة مش مهم أي حاجة المهم ان كل شخص ياخذ دوره في المعجنة و يتهرس له اكتر من مرة يوميا
و الحمد لله و صلنا الشركة في الجيزة عشان نبدا فصل جديد من الغتاتة
نيجي بقى للامن اللي واقف تحت الشركة
الظابط بيشوف ورقي و بطاقتي و فجاة لاقيته بيبص لي من فوق لتحت و هو بيقول:بقى سيادتك من بورسعيد
طبعا قلبي وقع و قلت يمكن ممنوع دخول البورسعيدية للمكان ده و للا يمكن اكتشفوا ان بورسعيد هي المقر الجديد لبن لادن و تنظيم القاعدة او او او او..................مافهمتش
المهم ما سابنيش كتير في تفكيري و سالني:بقى بورسعيد مش بتحب الاهلي
ليه بقى يا اخويا
.....................................................
(النقط دي مكانها شتيمة كنت باقولها في سري بس ما اقدرش اكتبها قدامكم
بس ممكن كل واحد منكم يحط أي حاجة شايفها مناسبة و خصوصا كلمات الاحتجاج المعروفة)
طب وانا مال امي
انا مابحبش الكورة اساسا و تتحرق الكورة بجاز
انا واحد طالع مشدود و عندي انتر فيوinterview
و مش ناقص و ما نمتش اساسا و سيادته و اخد موقف عشان ماتش خايب
و بعد فاصل الاستظراف و الدفاع عن جيش الاهلي المغاويير ضد الخونة البورسعيدية اخيرا طلعت الشركة و الحمد لله المقابلة عدت على خير وانتهت بالكلمة اللعينة
(هانبقى نتصل بيك يا باشمهندس)
و نزلت
ماكدبش عليكم كان نفسي اروح يومها اختبارات سوبر ستار
ايه مالكم تنحتم ليه
اه كان يومها الامتحانات شغالة و كان نفسي اروح بس ماكدبش عليكم كنت متردد جدا و خصوصا بعد تجربة مؤلمة لي هناك تحبوا تسمعوها؟
اوك
من 3 سنين كنت هاموت و اروح الاختبارات و حاربت الدنيا عشان اسافر و خصوصا انهم كانوا بيعملوها قريب من الامتحانات و كان عندي حالة وفاة في العيلة والظروف كانت نيلة بس رغم دا كله اصريت و سافرت
و قلت هم دول اللي هايدوني فرصة عمري اللي حلمت بيها و بعد كل ده اصطدمت بالوجه الجليدي لمعدة البرنامج اللي قالت في منتهى القلاطة
علي انت صوتك كتير منيح بس نحنا عندنا مستوى بالبروجرام ما بدنا غيره
رغم ان انا عارف كويس انا غنيت يومها ازاي و ما تونتش نهائي
نرجع للهرس
بعد ما نزلت دعيت ربنا و قلت يا رب لو ماهيش ليّا او هايتحرق دمي فيها ماتخلينيش اروحها يا رب
و فعلا لاقيت واحد صاحبي بيتصل بيا عشان نتقابل و كان قريب مني حمدت ربنا و رحت له
و سمعت منه العجب اللي حاصل في اختبارات سوبر ستار السنة دي
واحد انا عارفه كويس و عارف انه مطرب جامد اول ما دخل اساسا و بيقول اول كلمة اصطدم بالوجه الجليدي اللي انتو اساسا ما شفتوهوش لانه ما بيظهرش ع الشاشة بيقوله:شكرا محمد ما مشي الحال
و حكالي انهم خلّوا واحد يغني و يرقص زي هيفاء و انهم كانوا بياخدوا ناس كتير ما بيعرفوش يغنوا عشان يضحكوا الناس عليهم في الفقرة اللاانسانية سوبر مهضوم..........بجد احمدك و اشكر فضلك يا ربي انك مارضيتش لي ان دمي يتحرق و اروح هناك اساسا
صاحبي ده كان في فيصل و كل ده مفيهوش مشكلة لكن ان انا انزل من بيته الساعة اتنين عشان اوصل لابويا م.نصر الساعة خمسة و ربع يبقى كدة كتير جدا و غلاسة بجد و يا سلام كمان لما اقول لكم ان احد الاسباب في التاخير تشريفة كانت قافلة السكة عند مجلس الشعب خلتني انزل و امشي من قبل مجلس الشعب بشوية لغاية عبد المنعم رياض
و وصلت لابويا و الحمد لله
و نكمل كلامنا بعدين اصل الحاجّة بتنادي بقالها فترة

حاااااااضر يا امي جايلك اهو